JKCL-KABUM-11-DA-058-wylie
dam can bstod pa bzhugs so/__/hU~M hriH/__rgyal ba kun gyi thugs rje las 'khrungs rtsa gsum gcig sdus pad 'byung gi__/bka' nyan phrin las mthu stobs rmad byung snang srid sde brgyad kun gyi rje/__/'das dang ma 'das kun tu bzhugs shing legs nyes stangs 'dzin byed pa'i gnyer/__/dam tshig can gyi srung ma chen po dam nyams rnams kyi srog gi gshed/__/gsang sngags bka' dang gter gyi mdzod 'chang badz+ra sa d+hu chen po ni/__/rtsal chen gdong lnga'i dbang po dang ni ra skyes 'jigs rung la sogs pa/__/ri ltar brjid cing glog ltar myur ba'i rtsal chen bang mgyogs bzhon pa'i steng /__/gang sku bye ru'i mdog ltar dmar dang mthing nag dug chen ha la'i mdog__/gzhan yang zhi rgyas sna tshogs sku ni cig tu ma nges cir yang ston/__/the'u rang sde tshogs ma mo mtsho sman dge bsnyen rmu bdud bye ba 'bum/__/gnam sa bar snang yongs su gang ba'i 'khor tshogs bsam mi khyab pa'i dbus/__/mi bzad dgra 'dul dpa' bo chen po rgya bod nor gyi bdag po ni/__/zhi rngams chags pa'i gzugs kyis nad gdon zhi dang bsod nams legs tshogs sdud/__/khro gtum sku ni mthong ba'i mod la bdud snying lkog mar lhung ba dang /__/drag por khros tshe dgra bgegs lus ni rno dkar mche bas 'thag par byed/__/tho chen drag pos stong gsum rdul phran bcom na bdud sde smos ci zhig__/don snying khrag chen zhal du 'dren shing rus pa'i tshogs ni krum krum gsol/__/sbud pa'i 'thor rlung dus mtha' shugs kyis lha min yul khams thal bar gtor/__/khyod thugs snying rjes rab tu zhi yang ma rungs rnams la drag por ston/__/gnam lcags rdo rje'i thog chen dang 'dra gang la thogs med stobs ldan pa/__/dgra lha'i rgyal po rdo rje legs par mchod gtor gser skyems rgya mtsho 'bul/__/dgyes pas bzhes nas rig 'dzin rnal 'byor bdag cag dpon slob 'khor bcas rnams/__/nyin mtshan kun tu mi g.yel srungs shing kha 'dzin rgyab rten stong grogs mdzod/__/zhi rgyas dbang drag las rnams ma lus myur du sgrub mdzad khyod la bstod/__/rtsa brgyud bla mas bka' bsgos ji bzhin bcol pa'i phrin las 'grub par mdzod/__/ces pa'ang kaHthog rdo rje gdan gyi gtsug lag khang du khyi snron zla'i tshe 11la blo gros rgya mtshos bris pa dge zhing bkra shis par gyur cig__/mang+ga laM/__/shu b+haM//__//
