དཔལ་ལྡན་དམག་ཟོར་རྒྱལ་མོའི་བསྟོད་པ།

From Khyentse Lineage - A Tsadra Foundation Project
JKCL-KABUM-11-DA-023
Wylie title dpal ldan dmag zor rgyal mo'i bstod pa JKCL-KABUM-11-DA-023.pdf
Location chos kyi blo gros bka' 'bum
Volume 11, Text 23, Pages 123-124 (Folios 1a1 to 1b5)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation 'jam dbyangs mkhyen brtse chos kyi blo gros. dpal ldan dmag zor rgyal mo'i bstod pa. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: 123-124. Bir, H.P.: Khyentse Labrang, 2012.
Genre Protector Rituals - gsol mchod  ·  Verses of Praise - bstod pa
Deity dmag zor rgyal mo
Colophon

།ཞེས་པའང་མི་ཉག་དགེ་སློང་ཀུན་དགའ་ནས་ལྷ་རྫས་ཨ་ཤེ་བཅས་བསྐུལ་ངོར། ཆུ་འབྲུག་ཆོ་འཕྲུལ་ཟླ་བའི་ཚེས་བརྒྱད་ལ་ཆོས་ཀྱི་བློ་གྲོས་པས་བྲིས་པ་དཔལ་ལྡན་ལྷ་མོས་རྟག་ཏུ་བསྲུང་སྐྱོབས་རྗེས་སུ་འཛིན་པའི་རྒྱུར་གྱུར་ཅིག །སརྦ་མངྒ་ལཾ།།

/zhes pa'ang mi nyag dge slong kun dga' nas lha rdzas a she bcas bskul ngor/__chu 'brug cho 'phrul zla ba'i tshes brgyad la chos kyi blo gros pas bris pa dpal ldan lha mos rtag tu bsrung skyobs rjes su 'dzin pa'i rgyur gyur cig__/sarba mang+ga laM//

1 Texts in this Section (sde tshan or chos tshan)

[edit]
དཔལ་ལྡན་དམག་ཟོར་རྒྱལ་མོའི་བསྟོད་པ་བཞུགས་སོ། །སྔགས་དབྱངས་སྔོན་དུ་འགྲོ་བས། བྷྱཽཿརབ་འབྱམས་རྒྱལ་བ་ཀུན་གྱི་ཡུམ་གཅིག་མ། །རྡོ་རྗེ་དབྱངས་ཅན་དྲག་མོར་ཁྲོས་པའི་གཟུགས། །དཔལ་ལྡན་ལྷ་མོ་དམག་དང་ཟོར་གྱི་ལས། །སྒྲུབ་མཛད་རེ་མ་ཏཱི་ལ་བསྟོད་པར་བགྱི། །འཇིགས་རུང་སྐུ་ནི་མི་བཟད་སྲིན་པོའི་གཟུགས། །ཞལ་ནས་ཨ་ར་ལླི་དང་བྷྱོ་སྒྲ་སྒྲོགས། །ཟབ་ཞི་སྤྲོས་བྲལ་འོད་གསལ་བདེ་ཆེན་ཐུགས། །བསྟན་སྲུང་གཙོ་མོ་ནམ་གྲུ་མ་ལ་བསྟོད། །གཤིན་རྗེའི་ལྕམ་ལ་བདུད་ཀྱི་ཡུམ་གཅིག་མ། །དཔལ་ཆེན་བཀའ་ཉན་དབང་ཕྱུག་ཐོད་རློན་འཆང་། །མིང་བརྒྱ་མ་ལ་མཚན་སྟོང་སྣ་ཚོགས་གཟུགས། །ཕུར་སྲུང་ཆེན་མོ་རེ་ཏི་མཆེད་བཞིར་བསྟོད། །ཞི་བའི་དུས་ན་པརྞ་ཤ་ཝ་རི། །དུས་བཞི་ཀུན་ལ་དབང་བསྒྱུར་དྲག་མོ་རྒྱལ། །འཁོར་དུ་མ་མོ་བྱེ་བ་འབུམ་སྡེ་དང་། །དྲེགས་པ་སྡེ་བརྒྱད་ཚོགས་ཀྱིས་བསྐོར་ལ་བསྟོད། །རླུང་ནག་ཁྲག་མཚོ་འཁྱིལ་པའི་ཀློང་ཆེན་པོར། །དྲེལ་རྟའི་སྟེང་ན་བཙན་སྐྱིལ་ཞལ་ཕྱིར་གཟིགས། །ཕྱག་ན་བེ་ཅོན་ཐོད་ཁྲག་ལ་སོགས་པ། །མཚོན་ཆ་ལྔ་འཆང་དཔལ་ལྡན་ལྷ་མོར་བསྟོད། །རྣ་བ་གཡས་གཡོན་སྦྲུལ་དང་སེངྒེས་བརྒྱན། །དབུ་སྟེང་རྨ་བྱའི་གདུགས་དང་སྐུ་སྟོད་ལ། །ཞིང་ཆེན་སྐུ་སྨད་སྟག་ལྤགས་རེ་ལྡེའི་ཤམ། །ཞབས་གཉིས་ལྕགས་སྒྲོག་མཛེས་པར་གསོལ་ལ་བསྟོད། །རུས་རྒྱན་མགོ་རློན་ཁྲག་ཞག་ཐལ་བས་བྱུགས། །མཆེ་གཙིགས་ལྗགས་འདྲིལ་ལྟེ་བར་ཉི་མ་དང་། །སྤྱི་གཙུག་ཟླ་བ་ཚེས་པས་རབ་མཚན་ཞིང་། །ཆོས་དབྱིངས་དབང་ཕྱུག་དཔལ་ལྡན་ལྷ་མོར་བསྟོད། །བ་གླང་ཁྲི་སྙན་ཆུ་སྲིན་གདོང་ཅན་དང་། །ལྕགས་རྐང་སྲོག་གཟེར་དུང་སྐྱོང་མ་ལ་སོགས། །རྔམ་ཞིང་གསོད་པའི་ལས་ལ་རབ་བརྩོན་ཞིང་། །ལྷ་མིན་བདུད་དང་ཀླ་ཀློ་དམ་སྲི་འདུལ། །འདོད་པ་ཁམས་ཀྱི་དབང་ཕྱུག་མ་ལ་བསྟོད། །ཞེས་པས་བསྟོད་ཅིང་བཅོལ་བ་ནི། དཔལ་ལྡན་དམག་ཟོར་རྒྱལ་མོ་འཁོར་བཅས་རྣམས། །རྒྱ་ཆེན་མཆོད་སྦྱིན་གཏོར་མ་འདི་བཞེས་ལ། །བདེ་གཤེགས་བསྟན་པ་ཕྱོགས་བཅུར་རྒྱས་པ་དང་། །སོགས་ཀྱིས་ཕྲིན་ལས་བཅོལ་བར་བྱའོ། །ཞེས་པའང་མི་ཉག་དགེ་སློང་ཀུན་དགའ་ནས་ལྷ་རྫས་ཨ་ཤེ་བཅས་བསྐུལ་ངོར། ཆུ་འབྲུག་ཆོ་འཕྲུལ་ཟླ་བའི་ཚེས་བརྒྱད་ལ་ཆོས་ཀྱི་བློ་གྲོས་པས་བྲིས་པ་དཔལ་ལྡན་ལྷ་མོས་རྟག་ཏུ་བསྲུང་སྐྱོབས་རྗེས་སུ་འཛིན་པའི་རྒྱུར་གྱུར་ཅིག །སརྦ་མངྒ་ལཾ།། །།

Footnotes

Other Information