JKCL-KABUM-11-DA-014-wylie
dpal mgon gdong bzhi par bstod pa rdo rje srin po'i ngur sgra zhes bya ba bzhugs so/__/na maHshrI d+harma pA la tsa turmu kha ya/__gang sku gnam sngon bzhus pa'i lhun po la/__/mun pa nag pos lan stong 'khyud pa'i mdangs/__/stong zil bung ba ltar gnag 'jigs rung sku/__/dus mtha'i me bzhin 'bar ba khyod la bstod/__/khro gnyer rab 'khrugs rngam pa'i zhal gdangs shing /__/rno dbal mche ba gangs ri ltar gtsigs pas/__/dgra bgegs ro la 'debs shing ras dmar ljags/__/glog ltar myur bskyod dpa' bo che la bstod/__/shangs nas 'thor rlung drag por bskyod pa dang /__/ha ha hi hi k+ShiM k+ShiM phaT sgra yi/__/stong gsum 'gengs shing bdud sde dpa' bkod pa'i/__/rdo rje'i gad mo sa gsum g.yo la bstod/__/mi thung sgeg pa'i sku ni rab brjid cing /__/rus pa'i rgyan dang er ka'i phreng ba dang /__/tshangs skud dar dang stag gi sham thabs gsol/__/gdong pa bzhi ldan nag po che la bstod/__/ral gri mdung dang gri gug thod khrag dang /__/rus phreng bdud rtsi'i bcud ldan bum pa sogs/__/phyag bzhi'i mtshon cha sna tshogs rab 'dzin pa/__/lha chen dpal 'bar dbang phyug chen por bstod/__/rdo rje'i gnas yul kun na rab tu zhing /__/bsil ba'i tshal dang ti se tsA ri dang /__/po tA la sogs rnam 'phrul du mas bzhugs/__/dpa' bo'i bram ze'i gzugs 'chang khyod la bstod/__/rdo rje theg pa'i rgyud sde kun gnyer zhing /__/rig 'dzin rnal 'byor rnams kyi srungs ma mdzad/__/bden gnyis yang dag lta ba 'dzin pa la/__/lus dang grib bzhin zhal gyi bzhes la bstod/__/khams gsum kun gyi dbang phyug nag po che/__/dus gsum rgyal ba'i phrin las mthu stobs mnga'/__/bdud bgegs log 'dren phye mar 'thags mdzad cing /__/srid gsum dgra las rnam par rgyal bar bstod/__/zhi dang rgyas dang dbang dang drag po sogs/__/bsam pa'i mod la yid bzhin sgrub mdzad pa'i/__/rnam rol mtha' yas sgyu ma'i sku 'chang pa/__/gang bsam thogs med mgon po che la bstod/__/gang gi bka' nyan g.yung mo gtum mo dang /__/sing+ga li dang srin mo nag mo bzhi/__/rab 'jigs khro mo'i gar gyi rnam par bskyod/__/sprul pa yang sprul bsam mi khyab la bstod/__/zhing skyong gdong bzhi rtsal chen 'khor bcas rnams/__/phyi nang gsang ba'i mchod gtor 'di bzhes la/__/bstan pa rin chen phyogs bcur rgyas pa dang /__/bstan 'dzin skyes bu'i dbu 'phang mtho bar mdzod/__/sgrub po bdag cag dam ldan bu slob dang /__/sbyin bdag 'khor bcas tshe bsod dbang thang rgyas/__/mi mthun 'gal rkyen byad phur rbod gtong bzlog__/bsam don yid bzhin 'grub pa'i phrin las mdzod/__/mdor na deng nas byang chub ma thob bar/__/mi 'bral snying gi grogs po khyod bsten na/__/skad cig tsam yang 'bral med bskyangs ba dang /__/rdo rje'i sku mchog thob pa'i phrin las mdzod/__/ces pa'ang sa byi cho 'phrul zla ba'i tshes bcu bzhi la kun dga' phrin las rgya mtshos mngon par bstod pa 'dis kyang bla ma nag po chen pos rjes su 'dzin pa'i rgyur gyur cig__/sarba dz+ra ga taM/__mang+ga laM//__//
