JKCL-KABUM-11-DA-013-wylie
dpal nag po chen po zhal bzhi pa'i gsol ka phrin las glog zhags zhes bya ba bzhugs so/__/na ma ta ra/__mchod gtor rnams la dmigs nas/__ra~M ya~M kha~M/__oM AHhU~M ha ho hrIHlan gsum/__hU~M/__sangs rgyas kun gyi thugs rje gcig bsdus pa/__/mthu stobs dbang phyug dpal ldan nag po che/__/stobs 'phrog dbang po gdong bzhi 'khor bcas rnams/__/mchod gtor gnas 'dir spyan 'dren byon skyems bzhes/__/pad nyi dgra bgegs ro yi gdan la bzhugs/__/rnam kun mchog ldan mtha' bral dbu ma'i mkhar/__/zla nyi za bas dus kyi mun ltar gnag__/bden bzhi'i zhal ni nag dkar dmar dang dud/__/zhal gdang mche gtsigs smar smin me ltar 'bar/__/ljags 'dril mchu 'phyang ha hi hU~M k+ShiM sgrogs/__/phyag bzhi'i gri thod rtse gsum mdung rnon 'phyar/__/mchan g.yon bum pa rus phreng phyag 'gags brgyus/__/skra brdzes rus rgyan mgo rlon dug sbrul dang /__/tshangs skud se ral dril bu g.yer kas brgyan/__/dpa' bo stag gi sham thabs rngams brjid ldan/__/g.yas bskum g.yon brkyangs gyad kyi dor stabs kyis/__/dam nyam dgra bo'i steng na bro brdungs shing /__/yum chen g.yung mo nag mo gtum mo ljang /__/srin mo dmar nag sing ga li ma ser/__/srin mo'i cha byad gcer mo gri thod 'dzin/__/ral pa thur 'phyang rgyu rlon ga sha can/__/khro zhing rngams la zhabs gnyis gar stabs bzhengs/__/bskal pa'i me dpung 'ur 'ur 'khrugs shing 'bar/__/dpal ldan srid gsum dbang bsgyur gtso 'khor rnams/__/phyi nang gsang ba'i mchod gtor dam pa dang /__/mthun rdzas bskang rdzas rten rdzas sgrub rdzas kyi/__/mchod sprin bde stong rol pa'i sprin phung 'dis/__/dpal ldan gru 'dzin bdag po gdong bzhi pa/__/lha chen nag po chen po'i thugs dam bskang /__/ti se'i gangs dang bsil ba tshal gyi bdag__/dam tshig ldan pa'i rnal 'byor gar gnas par/__/'bral med rang bzhin shugs kyis bskyangs mdzad cing /__/dpal ldan nA gA rdzu na'i srung ma che/__/zhing skyong dbang phyug chen po'i thugs dam bskang /__/thugs dam bskang ngo bdag cag dpon slob kyi/__/mi shes rmongs pas thugs dang 'gal ba rnams/__/chos skyong chen po khyed la mthol lo bshags/__/bzod par bzhes la tshangs pa stsal du gsol/__/khyab bdag rdo rje 'chang gi spyan snga ru/__/dam bca' ma g.yel dam ldan rnal 'byor rnams/__/ma yi bu bzhin rtag tu bsrung zhing skyobs/__/sangs rgyas bstan dgra skye 'gro'i bde skyid 'phrog__/bla ma'i sku dgra dam nyams gar gnas kyang /__/skad cig nyid la thal ba'i rdul bzhin rlogs/__/byad phur rbod gtong bzlog pa'i phrin las mdzod/__/zhi rgyas dbang dang drag po'i las gang rtsom/__/thogs med myur ba nyid du 'grub pa dang /__/rnal 'byor bcol ba'i phrin las grub par mdzod/__/ces pa'ang dbon mdzod bla ma tshe dbang dpal 'byor gyis rin chen dang po'i rten bcas bskul ngor 'jam dbyangs blo gros rgya mtshos sa ga zla ba'i dmar phyogs kyi rdzogs pa dang po'i drag po'i sbyor ba phun sum tshogs pa'i phyi dro'i thun phyed bzhi bar bris pa dge'o//__//
