JKCL-KABUM-11-DA-011-wylie
@#/__/ye shes mgon po phyag bzhi pa'i phrin las dngos grub 'byung gter bzhugs so/__/
na ma shrI he ru ka ya/__rgyal ba'i bstan srungs yongs kyi gtso/__/ye shes mgon po nag po cher/__/gsol mchod dam can dgyes skong ni/__/nyung ngu'i tshul gyis rnam par dbye/__/de la dbang thob cing dam tshig ldan pas gnas dben par phyi nang mchod gtor tshogs par bshams la/__rang he ru ka'i nga rgyal la gnas pas/__a mr-i ta kun+Da lis bsang /__swa b+hA was sbyangs/__stong pa'i ngang las drag rgyan gyi/__/bkod pa phun sum tshogs pa ru/__/a las b+hany+dza'i snod yangs par/__/phyi nang gsang ba'i mchod gtor rnams/__/dwangs shing thogs pa med par gyur/__/oM badz+ra ar+g+haM nas/__shab+da AHhU~M dang /__ma hA pany+tsa a mr-i ta rak+ta ba liM ta keM ni ri ti ta na ga Na ma hA pU tsa hoHrnams kyis byin gyis brlabs/__oM ma hA shu n+ya ta sogs kyis stong par sbyangs/__stong pa'i ngang las srung 'khor dbus/__/rab 'jigs dur khrod brgyad kyis bskor/__/drag po'i gzhal yas mtshan rdzogs dbus/__/brag chen pad+ma nyi ma dang /__/dregs pa byi chings bsnol ba'i steng /__/gnam lcags tsakra rtsibs bzhi'i lter/__/rdo rje gri gug hU~M gis mtshan/__/spro bsdus nag po chen po ni/__/zhal gcig pa la phyag bzhi pa/__/'jigs rungs rdo rje srin po'i gzugs/__/sbom thung lto ba yan lag rags/__/sbrul chun rus rgyan rkam rlon phreng /__/stag gi lpags pa'i sham thabs dang /__/glang kos stod g.yogs zhing lpags dkris/__/dpa' bo'i dar dpyangs ring du 'phur/__/phyag bzhis dang pos gri thod dang /__/'og mas ral gri kha T+wA~M bsnams/__/zhabs gnyis dpa' bo rol pa'i stabs/__/bar du e ka tsa tri sngo/__/kha T+wA~M thod khrag bsnam pas 'khyud/__/shar du mgon po gri gug mthing /__/gri thod mchan g.yon bing chen bsnams/__/lho ru gza' bdud dbu dgu pa/__/dud kha phyag bzhi chu srin gyi/__/rgyal mtshan sbrul zhags mda' gzhu 'gengs/__/nub tu stag zhon nag po ni/__/bing ngar lcags par dar nag gsol/__/byang du las mgon seng ge'i gdong /__/mdung dar dmar gtor rta nag zhon/__/gtso bo'i mdun du bya rog gdong /__/mthing nag ral gri thod pa'i nang /__/glo snying 'dzin cing dor stabs kyis/__/sprul pa dpag med 'gyed cing bzhugs/__/phyi khyams phra men gdong can brgyad/__/gar stabs phyag mtshan ma nges 'dzin/__/sbrul dar mgo phreng rus pas brgyan/__/de rgyab mkha' 'gro ging lang+ka/__/'bar ma dbang phyug la sogs dang /__/dpal mgon bdun cu rtsa lnga rnams/__/mngon sum bzhin du bzhugs pa yi/__/gnas gsum yi ge 'bru gsum dang /__/thugs ka'i hU~M 'od kyis bskul bas/__/'og min gnas dang rdo rje gdan/__/bsil ba'i tshal sogs gar bzhugs kyi/__/gnas nas skad cig nyid la gshegs/__/hU~M/__dad pa dang ni dam tshig gi__/sngon gyi thugs dam rjes su dgongs/__/sangs rgyas bstan pa srung ba'i phyir/__/da lta nyid du spyan 'dren gshegs/__oM badz+ra ma hA kA la sa pA ri wa ra badz+ra sa ma dzaHsa spyan drangs/__hU~M/__rab 'jigs dur khrod gzhal med khang /__/dregs pa pad nyi'i gdan steng du/__/dpa' bo chen po dgyes par bzhugs/__/pad+ma tsaN+Da suR+Ya tiSh+Tha baM/__hU~M/__chos nyid skye ba med pa las/__/nag po rngams pa'i gzugs ston pa/__/rdo rje srin po 'khor bcas la/__/rab gus brda yis phyag 'tshal lo/__/a ti pu hoHpra tIts+tsha hoHhU~M/__phyi mchod zhi ba'i nyer spyod dang /__/gzugs sgra dri ro reg bya dang /__/bkra shis rdzas rtags rin chen bdun/__/gzhal med khang bzang la sogs pa/__/ngo mtshar rnam mang mchod pa bzhes/__/sarba pU dza sa ma ya hoHhU~M/__dmar chen khrag gi mchod yon dang /__/dug chu'i zhabs bsil dbang po lnga'i/__/me tog phreng ba tshar du dngar/__/tshil chen spos kyi dud sprin 'thul/__/mkhris pa'i dri chab sbu phreng g.yo/__/dgra bgegs sha rus zhal zas dang /__/rkang gling thod rnga'i rol mo 'khrol/__/mgon po 'khor dang bcas pa yi/__/zag med rdo rje'i dbang po lngar/__/dgyes bar bzhes la dngos grub stsol/__/oM ma hA sha ma sha na ar+g+haM nas/__shab+da'i bar gyis mchod/__hU~M/__rtsa brgyad stong la sbyar ba'i sman/__/rgyu drug bsgral ba'i rak+ta dang /__/'dod yon lnga ldan ba liM ta/__/sbyor sgrol tshogs kyi 'khor lo dang /__/mchod bya mchod byed gnyis med mchod/__/ma hA pany+tsa rak+ta ba liM ta ta na g+ha Na ma hA pu tsa d+harma d+hA tu at+ma ko\u0f85 haM/__hU~M/__'jigs rungs sku ni mi sdug srin po'i gzugs/__/bdud dang log 'dren klad pa 'gem mdzad cing /__/ha ha hU~M phaT nga ro 'brug ltar sgrogs/__/snying rje'i thugs ldan nag po chen por bstod/__/chos nyid gcig las du ma'i nyams 'bar bas/__/gsang ba'i yum mchog e ka tsa tri dang /__/gri gug gza' bdud stag zhon seng gdong dang /__/las mgon bya rog gdong can bstod par bgyi/__/gzhan yang he ru ka yi sprul pa'i 'khor/__/phra men brgyad dang 'bar ma ging lang+ka/__/dbang phyug nyer brgyad gtsang ris mgon po sogs/__/nag po 'khor dang bcas la phyag 'tshal bstod/__/bzlas ba ni/__gtso bo'i thugs kar he ru ka__/mthing gsal rdo rje dril bu bsnol/__/zhi ma khro yi nyams ldan gyi/__/thugs kar rdo rje sngon po'i lter/__/nyi steng hU~M sngon 'bar ba las/__/sngags kyi phreng ba rab spros pas/__/rgyal mchod byin bsdus bdag byin brlabs/__/slar yang snod bcud thams cad ni/__/he ru ka dpal nag po che'i/__/dkyil 'khor gcig tu byin gyis brlabs/__/sngags phreng sku dang me 'od dang /__/mtshon cha skar ltar 'khrugs pa yi/__/sde brgyad dregs tshogs dbang du bsdus/__/ma rungs 'byung po rdul du brlag__/rnam shes rgyal ba'i sras su bskrun/__/drag po'i las chen rtsal rdzogs bsam/__/oM badz+ra ma hA ka la hU~M hU~M phaT swA hA/__oM ma hA kA la e ka tsa tri gu Na hrI da hU~M phaTaHoM shrI ma hA kA la ka wu wa rU pa tsit+ta sarba duSh+Tan ma ra ya hU~M phaT/__oM badz+ra DA ki tsa tu ra mu kha ka ka u lu ka shwa na su ka ra ya ma di d+hi ya ma du ti daSh+ti ma tha na ye hU~M hU~M phaT phaT swA hA/__spyi sngags shA sa na bzla'o/__/bsnyen mthar mchod bstod gsol bskangs bya/__yi dam tshogs 'khor gzhung ltar dang /__bskang bshags ni/__bskang rdzas rnams la dmigs nas/__a mr-i ta dang /__swa b+hA was sbyangs/__skong ba'i gnas mchog 'og min zhing /__/phyi nang gsang ba'i rten rdzas rnams/__/sa dang bar snang kun khyab ste/__/kun bzang bde stong sprin du gyur/__nam mkha' mdzod sngags lan gsum dang /__oM sarba bid pU ra pU ra a brta ya ho/__badz+ra s+pha ra Na khaM/__gis spel/__hU~M/__chos dbyings ngang las khros pa'i sku/__/snying rje'i gar gyis rol mdzad pa/__/nag po chen po phyag bzhi pa/__/tshur gshegs tshur gshegs gnas 'dir gshegs/__/hU~M/__'bar ba chen po'i dkyil 'khor na/__/dur khrod gsar rnying thang mar brdal/__/khrag mtsho dug chu khol ma 'khrugs/__/rdo rje can yang 'jigs pa'i gnas/__/nag po chen po phyag bzhi pa/__/he ru ka yi sprul pa ste/__/mi bsrun rngams pa'i sku 'chang ba/__/yum mchog e ka tsa ti dang /__/las kyi mgon po bya rog gdong /__/gri gug can dang rA hu la/__/stag zhon zhing skyong seng+ge'i gdong /__/'khor gyi gdong brnyan phra men tshogs/__/'bar ma ging lang dbang phyug dang /__/gtsang ris dpal mgon 'khor bcas sogs/__/rgyud gsum dam can dregs pa'i tshogs/__/gtso 'khor sprul pa yang sprul rnams/__/hU~M/__thugs dam bskang ba'i dam tshig rdzas/__/srid zhi'i khams kyi dpal 'byor rnams/__/ji snyed blo yi blangs byas nas/__/rang rang mthun pa'i rdzas su 'bul/__/rta nag g.yag nag lug nag dang /__/bya nag khyi nag stag seng khyung /__/dom dang dred mo 'dur zhing rgyugs/__/'phar spyang dug sbrul kha rlangs 'tshubs/__/dre'u bong bu glang po che/__/spu sdug mdzes pa'i ri dwags tshogs/__/rma bya ngang ngur bzhad khrung khrung /__/kaM ka la sogs bya rigs tshogs/__/bkra shis rdzas rtags rin chen bdun/__/nye ba'i rin chen bdun la sogs/__/stag gzig lpags shun gos dar dang /__/zhwa nag ber phod rus pa'i rgyan/__/mi mgo skam rlon phreng ba dang /__/nor bu rin chen rgyan phreng mdzes/__/keng rus brtsegs pa'i thod pa'i mkhar/__/mi ro'i rgyal mtshan zhing chen gdugs/__/'phan dang dar dpyangs la sogs pa/__/rngams brjid 'jigs rung gzhal med khang /__/bkod pa rnam mang bsam yas kyi/__/mgon po 'khor bcas thugs dam bskang /__/khyad par bris 'bur sku yi rten/__/srog sngags yi ge gsung gi rten/__/phyag mtshan 'bar ba thugs kyi rten/__/thod pa bum bzang yon tan rten/__/drag po'i rdzas rnams phrin las rten/__/phyi rol rgyud gsum dregs tshogs rnams/__/nang du rtsa thig rlung gi tshogs/__/sems nyid skye med gnyug ma'i gshis/__/stong gsal wa le shar pa 'di/__/mi 'bral gsang ba'i rten du bcas/__/ye shes mgon po 'khor bcas rnams/__/nam yang mi 'bral thugs dam bskang /__/dmar chen gtor ma ri ltar spungs/__/sman phud bdud rtsi char ltar 'bab/__/dmar chen khrag mtsho'i sbu phreng g.yo/__/mgon po 'khor bcas thugs dam bskang /__/ye shes mgon po phyag bzhi pa/__/yum mchog e ka tsa ti dang /__/las mgon bya rog gdong pa can/__/thugs mgon ma hA ka la dang /__/gza' dang stag zhon zhing skyongs sogs/__/thugs dam gnyan po bdag gis bskang /__/phra men gdong can chen mo brgyad/__/ging lang 'bar ma dbang phyug che/__/gtsang ris dpal mgon bdun cu sogs/__/thams cad thugs dam gnyan po bskang /__/bskang ngo bskal pa'i bar du bskang /__/g.yar dam gnyen po sor chud cig__/mi mthun rkyen ngan thams cad bzlog__/bcol pa'i phrin las 'grub par mdzod/__/bdag ni mi shes gti mug pas/__/bcas dang rang bzhin nyes ltung rnams/__/mi 'chab mi sbed snying nas bshags/__/khyad par sku gsung thugs dam 'gal/__/bsnyen sgrub g.yel zhing mchod gtor chag__/rten rdzas ma 'dzoms le los g.yel/__/chos skyong thugs dang 'gal ba rnams/__/mi 'chab mi sbed snying nas bshags/__/klong yangs chen por bzod bzhes la/__/mi sgrib tshangs pa'i dngos grub stsol/__/he ru ka'i yig brgya brjod/__de nas tshogs la rol zhing lhag gtor gtong /__rig 'dzin grub thob chen po rnams kyi mdzad pa'i bstod pa dang /__khyad par rkang brgyad kyi bstod ba bya/__drag po'i las gtsor 'don na bskul bzlog sogs gzhan du shes/__rjes gtor ma 'bul ba ni/__gtor ma rak+ta bran la gtor 'gugs dang /__shA sa na'i mthar/__nr-i tri badz+ra ang+ku sha dzaHdzaHhU~M ba~M ho/__oM AHhU~M ha ho hrIHsa brlabs/__shA sa na lan gsum gyis bsngos/__hU~M/__rgyal ba'i bstan srung rdo rje nag po che/__/sogs dngos rol ltar gtor ma bstab/__mchod bstod sogs rjes rim dngos rol ltar bya'o/__/'di sbyar dge tshogs ci mchis pa/__/bstan pa srungs shing rgyas phyir bsngo/__/skye dang tshe rabs thams cad du/__/bla ma mgon pos rjes 'dzin shog__/ces pa'ang me bya lor rdo rje gdan gnas mjal theng gnyis pa 'gro skabs badz+ra a pa na mchod 'bul zla 9tshes 25la bgyid skabs rmi lam gyi nyid 'khrul cung zad la brten tshes drug la rig dbyings ji ltar thon bzhin bris pa bstan srung dgyes pa'i rgyur gyur cig__/mang+ga laM//__//
