JKCL-KABUM-11-DA-006-wylie
/nag po chen po lcam dral la mchod gsol bsdus pa phrin las myur 'grub ces bya ba bzhugs so/_/na maHshrI ma hA kA la ye/_rdo rje nag po chen po 'khor bcas la mchod gtor shin tu bsdus pa 'bul bar 'dod pas mchod gtor ci 'byor pa bshams la/_oM las rab yangs ka pA la yi snod/_/AHlas sha lnga bdud rtsi lnga po rnams/_/hU~M gis zag med ye shes bdud rtsir bsgyur/_/ha ho hrIHyis nam mkha' mnyam par spel/_/oM AHhU~M ha ho hrIH_lan gsum/_hU~M/_'og min gnas dang rgya gar rdo rje gdan/_/bsil ba tshal sogs gnas yul dur khrod nas/_/bstan srung gtso bo rdo rje gur gyi mgon/_/e ka dzA Ti dpal ldan lha mo dang /_/zhing skyong dbang phyug gnod sbyin yab dang yum/_/pu tra b+ha tra sring mo dur khrod bdag_/gnod sbyin lcam sring la sogs rgyud gsum gyi/_/srung ma dam can rgya mtsho 'khor bcas rnams/_/dam rdzas bdud rtsi'i mchod gtor chen po dang /_/dgyes pa'i spyan gzigs thugs dam bskang ba'i rdzas/_/sa dang nam mkha' bar snang khyab pa 'di/_/dgyes par bzhes la rgyal bstan rin po che/_/mi nub dar zhing rgyas pa'i phrin las mdzod/_/de la 'khu ba'i lha min kla klo'i tshogs/_/rtsa sbur me bzhin thal ba'i rdul du rlog_/myur du rtsad nas 'joms par mdzad du gsol/_/rnal 'byor bdag cag 'khor dang bcas pa rnams/_/bu gcig ma bzhin brtse bas skyongs ba dang /_/gang bsam thams cad 'bad med myur du 'grub/_/'di phyi bar do kun tu srung skyobs mdzod/_/rang rig dpal ldan bla ma nag po che'i/_/rang zhal mjal te rdo rje 'chang gi sar/_/myur du bgrod nas 'gro rnams sgrol nus pa'i/_/mchog thun dngos grub stsol ba'i phrin las mdzod/_/ces pa'ang la sras bsod rgyal/_mgon po tshe brtan/_gsol dpon bkra rnam bcas pas lha reg bcas bskul ba'i ngor/_chos kyi blo gros pas dpal sa skya'i sgo rum ye shes mgon po mngon sum bzhugs pa'i mdun du bris pa dge legs su gyur cig/_/
