JKCL-KABUM-10-THA-065-wylie
oM swasti/__phyogs dus rgyal ba'i mkhyen brtse'i rdzogs ldan sprin/__/dge legs phan bde'i gru char 'bum 'jo bas/__/sa gsum srid zhi'i gdung sel bla ma rje/__/mtsho skyes rdo rjes shis pa'i me tog stsol/__/gdan gsum yongs rdzogs sgyu 'phrul drwa ba'i gzugs/__/byin brlabs dngos grub phrin las zlos gar gyis/__/don gnyis 'dod dgu'i dga' ston spel mdzad pa/__/rab 'byams rtsa gsum lha tshogs rgyal gyur cig__/zab gsang 'dod dgu'i dbyig gi gzi byin las/__/smin grol nor bu'i gru char mi zad pas/__/gangs can kun dga'i mchog sbyin gter chen rje/__/o rgyan mchog gyur gling pa grags gang rgyal/__/ris med bstan pa'i mnga' bdag mkhyen brtse'i dbang /__/bka' gter mdzod lnga'i srol 'byed blo mtha' yas/__/lung rig seng ge'i sgra 'byin mi pham pa'i/__/rnam thar rab dwangs yid kyis lan brgyar bsngags/__/rdo rje theg pa'i gseng lam rmad byung ba'i/__/snying po bsnyen sgrub yan lag bzhi'i shing rtas/__/grub gnyis 'byor pas mi zad 'phel ba'i lam/__/tshul bzhin brtson pa don ldan bgyi ba nyid/__/zhes shis par brjod pa'i snyan tshig gi sbyor bas dge legs kyi lam srol yangs par phyes te deng gi dus 'dir/__gangs can bstan 'gro'i phan bde'i btsas dang /__o rgyan sangs rgyas gnyis pa'i phrin las phyogs kun tu 'phel rgyas su bya ba'i thugs bskyed ston zla ltar dkar zhing /__dad dang gtong ba nus pa mkhyen rtogs kyi yon tan phun sum tshogs pa sngags chen bla ma bkra shis dpal ldan nas 'bad rtsol chen pos byang phyogs snga 'gyur bstan pa'i lcags ri/__spyan ras gzigs dngos zhabs dkar tshogs drug rang grol gyi gdan sa/__zho 'od gsang sngags dar rgyas gling gi gtsug lag khang du bod yul sa 'og kun gyi gter gcig__/thugs sgrub bye ba phrag brgya'i yang snying /__gnas dus gdul bya 'di la dgongs te rtsod bral sprul pa'i gter chen gsum gyi bka' drin las byon pa'i bla ma'i thugs sgrub rnam gnyis dang /__yang gter rtsa gsum dril sgrub rnams chig dril gyi sgrub chen gsar du btsugs pa'i rten 'byung dang po shar ba dang ngos nas sgrub pa'i rten gyi sku gsung thugs rten byin ldan mang du bsrings pa dang /__bsam sbyor 'phel rgyas su 'byung ba'i dmigs 'dun skyabs srung bgyis shing /__7'jam mgon mkhyen brtse'i zlos gar dis mgon mkhyen sprul nas rin chen gter mdzod chen mo'i smin grol tshang bar stsal zhing sgrub pa'i phyag len zhib bslab bgyis pa bzhin/__sgrub pa'i sta gon nas brtsams tha mar dge ba grol dbang gi bar sngags sde de'i khongs su gtogs pa'i sngags pa mchog dman che chung thams cad 'du dgos pa dang /__rdo rje slob dpon dbu mdzad/__chos khrims sogs rang rang gi las skal bzhin byang chub pa bslab shing mthar phyin pa dang /__rdo rje slob dpon rgyal tshab rgyal thebs rnams nas thugs sgrub rnam pa gnyis ka'am/__tha na gang rung re'i bsnyen bzlas tshad du 'khyol ba dang /__gral dbu 'dzin nas bzung sgrub pa ma grol bar tshogs khang du sdod rgyu las khyim du mi 'gro/__sngags grwa kun gyis zhwa/__zla gam/__rdor dril sogs 'tshogs pa'i yo byad rigs re re bzhin tshang ba dang /__chos thog 'di'i ched du sems can gyi srog bcad pa dang /__sngags pa rnams kyis gri sogs 'tshon cha 'chang ba dang /__chang dang kha sna'i dud pa 'then mi chog__/phan tshun khong khro 'thab rtsod kyi rigs mi bya/__tshogs khang gi sgor son pa nas ral pa phab ste bag yod pas gral du 'khod/__gdangs dbyangs rol mo rnams phyag len bzhin ma nor ba dang /__tshogs dang mchod pa gtor ma'i rigs la gtsang sbra/__nyin mtshan gyi bsnyen rgyun bar ma chad pa bcas zhib par chos khrims nas bka' bkod 'byung ba ltar legs par zhi dul bag yod dang ba 'dren pa bcas byas nas/__gnas skabs dad ldan sbyin bdag kyi tshogs rdzogs/__snod bcud kyi dge mtshan rgyas/__snyigs ma'i rgud pa zhi/__mthar thug rig 'dzin bzhis lam mthar son pas dngos grub rnam gnyis 'bad med du thob pa rdo rje'i lung las gsung pa ltar nges pas kun gyi thugs la gzhug par zhu/__rmad byung thugs bskyed chu gter las 'ong zhing /__/tshogs gnyis cha shas yongs rdzogs nam mkha'i nor/__/phan bde'i 'od zer rab 'byams zhing brdal ba'i/__/sangs rgyas gnyis pas dus kun srung gyur cig__/sbyangs gzhi 'od gsal ye shes snying po'i khams/__/bde myur sngags kyi theg pas legs sbyangs nas/__/rig 'dzin rnam bzhi'i 'bras bu g.yur za ba'i/__/ngo mtshar dga' ston ljongs der 'char bar shog__/sgrub pa mchog 'dir 'brel ba'i skye bo kun/__/tshe 'dir mi mthun 'gal rkyen mtha' dag zhi/__/ma hA gu ru'i mngon sum rjes bzung nas/__/tshoms bu gcig tu mngon par byang chub shog__/ces pa'ang sngags chen bkra shis dpal ldan nas lha rdzas bcas gsung bskul ltar 'jam dbyangs mkhyen brtse'i sprul ming 'dzin pa 'jam dbyangs chos kyi blo gros dang /__dil mkhyen 'jigs med mkhyen brtse'i 'od zer zung nas sde dge rdzong sar bkra shis lha rtse'i gtsug lag khang nas spel ba dge legs kyi pad+mo mchog tu rgyas pa'i rgyur gyur cig__/sarba dA mang+ga laM//___//
