JKCL-KABUM-10-THA-063-wylie
oM swasti/__mkha' khyab zhing gi 'gro ba mtha' dag gi/__ston pa mnyam med shAkya'i rgyal po dang /__/de sras 'jam dbyangs byams chen la sogs pa/__/'phags tshogs 'dus par bcas pas shis pa stsol/__/de la dpal sa skya pa chen po yab sras brgyud par bcas pa'i ring lugs dri ma med pa 'dzin pa'i spo lu dgon thub bstan bsam 'grub dar rgyas gling 'di/__bla chen chos rgyal 'phags pa'i zhal slob rgya byon pak+shis btab cing /__rgyal ba mus pa chen po sangs rgyas seng+ge'i thugs sras shes rab rgyal mtshan gyis zhabs kyis bcags/__bla chen gzi sangs rgyas dpal bzang sogs kyi gdan sa/__rdo rje 'chang kun dga' bzang po'i chos kyi khri la bzhugs pa'i mkhan chen dpal ldan chos skyongs sogs kyi zhabs kyis bcag pa'i chos sde 'di'i dge 'dun pa rnams la bsgrigs khrims du bya ba mdor bsdus pa ni/__rang gi bka' gtan 'dzin khong gi grwa rtsed chos gzhis ma nyams pa dang /__grwa khral zhib sdud dang khang pa tshags don bskyangs gal dang /__smyung gnas dbang dang /__/mcham sogs dmigs gsal kha shas las bud med 'grul sdod mi chog pa dang /__grwa sar rnams la klog bslab rgyu dang /__'don blo sbyangs sogs rgyugs len tshags su tshud pa byed dgos/__lo nyi shu tshun grwa sar 'gro nas mar 'khor 'phral/__'byung 'dul/__kun rig__/kye rdor rnams kyi bsnyen pa sdod dgos shing /__kun rig bsnyen pa ma thon na gshin skor za mi chog pa dang /__rtsa bzhi chang lnga 'di sdom pa'i rtsa ba yin pas mig 'bras ltar bsrungs dgos pa dang /__chang btso btung gtan nas mi chog__/dbyar gnas gso sbyongs bstan pa'i gzhi ma chags nyams btang mi chog cing je rgyas 'byung dgos pa dang /__dus mchod gzhan thams cad kyang ma nyams pa dang /__tshogs bsgrig legs pa dgos shing /__'don rta dbyangs/__dkyil 'khor bri thig__/gtor bzo 'bud krol sogs phyag bzhes khungs thub sbyangs dgos pa dang /__blo gros chen po rnams kyis phyi nang rig gnas sogs bslab shes sbyangs dgos/__sho bag rgyab rgyu/__sog chas sprod pa/__skra ring por 'jog pa/__gri ring 'dogs pa/__ko l+h+wam sbubs dung gyon pa sogs mi chog cing dge slong rnams gling bar byon dus gzan sham 'bral med dgos/__lha khang dang /__gling bar tshun phyag bdar gtsang ba/__lha khang du mchod pa legs po gtsang sbra ldan pa/__dbyar gnas la gding chos/__snam sbyar/__spyi blugs/__lhung bzed/__maN+Dal sogs 'dzom dgos/__sgrub mchod sogs bsgrigs chen rigs la ther phrug snam dmar gang rigs las/__'bu ras gzan dang /__a gzan sogs gyon mi chog cing /__'du khang du ngag bcad dam po dgos/__spyi gnyer rnams nas rten thebs rtsa ba rtsis sprod yig stong shog brgyud du ma song ba dngos po ngo ma yod dgos rgyu dang /__skyed kyis gtong sgo ma nyams gong 'phel 'byung dgos/__dgon nang du rgyab 'dre 'khon rtsed mi bya bar phan tshun thugs mthun mi brgya sems gcig tu dril nas bstan pa 'dzin dgos/__de ltar gyi khrims 'di rnams dang 'gal tshab che chung dang bstun pa'i chad las zhi drag gang dgos mkhan po bla chos dang /__dgon bdag mdun 'og ma bcas nas mdzad dgos shing /__mdor na gong ma rnams la bkur bsti dang /__dman pa rnams la brtse bskyang gis rang bstan rang bca'/__rlon pas rang shes/__skam po rang 'bar gyis sangs rgyas kyi bstan pa rin po che lung rtogs bshad sgrub kyi 'dzin dgos pa lags/__me yos zla tshes la mkhan po bla chos/__dgon bdag bcas nas gsung bskul bzhin 'jam dbyangs mkhyen brtse'i sprul skus bris pa dge legs 'phel rgyas shog/___//_
