JKCL-KABUM-10-THA-051-wylie
bal yul yang le shod kyi gnas bstod bzhugs so/__/shrI badz+ra he ru ka na mo/__'bar ba'i sku ni gcig tu 'khyil/__/ye shes grub pa'i phyag rgya che/__/gdod nas grub pa'i 'og min ni/__/sa 'dir 'phos pa rmad du byung /__/rdo rje'i lus kyi bkod pa ni/__/phyi rol dngos po'i chos su shar/__/dpyad legs rnam shes dag pa yi/__/bkra shis rtags kyi mtshan mas spras/__/haM dang a thung snyoms zhugs kyi/__/kha sbyor rtags su shel dkar ri/__/nags tshal stug po'i rnam par mdzes/__/sprul pa'i 'khor lo sa 'dzin ni/__/zlum po thig le gcig tu 'khyil/__/dran pa rnam bkod dwangs bsil rdzing /__/rngam la ro drug 'dod yon mchod/__/bde skyong lha mo'i gar gyis rtsen/__/a don skye med stong pa'i sgra/__/su ras myos pa'i brtul zhugs kyis/__/dbang chen rngam pa'i sgra sgrogs pas/__/bdag 'dzin ru tra rnam gsum gzhom/__/dpal chen sku sngags phyag mtshan sogs/__/phan tshun 'gran pa bzhin du bkra/__/pad+ma rgyal po thod phreng rtsal/__/yang dag grub pa chen po yi/__/srod la bdud rnams kI las bsgral/__/tho rangs mngon par byang chub brnyes/__/de yi byin brlabs sgrub gnas che/__/sa chen 'di na 'gran zla dben/__/phyi nang gsang ba'i de nyid dang /__/legs sbyar bkod pa'i sgra dbyangs kyis/__/srid gsum 'gro ba kun bsgral nas/__/gsang ba mchog gi grong 'jug shog__/slar yang chos gter bang mdzod rnams/__/pha nor bu yis spyod pa dang /__/sa gsum rab dga'i dbyangs sgrogs pas/__/'dzam gling kun tu khyab par shog__/ces pa'ang rdo rje gzi 'bar rtsal gyis so//___//
