JKCL-KABUM-10-THA-038-wylie
lho brag gnas chen mkhar chu la bstod cing gsol ba 'debs pa bzhugs so/__/na mo gu ru pad+ma rA dzA ya/__'og min gnyis pa sa la 'phos 'dra/__/rdo rje'i gnas chen lho brag mkhar chur/__/o rgyan slob dpon pad 'byung yab yum/__/rje 'bangs rnams dang 'phags yul rig 'dzin/__/mkhas grub rnams kyis yang yang byin brlabs/__/khyad par yang dag sgyu ma bde mchog__/mngon sum grub brnyes nam mkha'i snying po/__/rdzu 'phrul rtogs pa lta dgongs phul phyin/__/dpa' bo mkha' 'gro bye ba sa ya/__/til gong bzhin du dgyes par rol pa'i/__/gnas kyi mchog tu gyur pa 'di ni/__/chu bur mig gi spyod yul gyur pa/__/bdag cag las dang skal ba bzang zhing /__/ngo mtshar rdo rje'i brag gi ba gam/__/dbyibs legs sra brtan bkod pa lhun chags/__/rtsa ba gsum gyi phyag rgya'i snang brnyan/__/gsang ba gsum gyi byin rlabs gzi 'bar/__/ne'u gseng spang ljongs g.yu yi maN+Dal/__/lha yi me tog kha dog rnam bkra/__/ljon shing sna tshogs mgo lcog ldem me/__/'bras bu bzang po'i khur gyis lci ba/__/lha bya spu sdug mdzes pa'i gsung snyan/__/yan lag brgyad ldan bdud rtsi'i chu bo/__/rnam mang lhung lhung dal gyis 'bab cing /__/rnal 'byor rig 'dzin grub pa pho mo/__/snang dang mi snang bgrang las 'das shing /__/chos nor zab gter 'dzad pa med pas/__/yongs su gtams pa'i sgrub gnas chen por/__/gsol ba 'debs so byin gyis rlobs shig__/rdo rje'i gnas mchog de bI ko Ti/__/rnal 'byor bdag gi lus la zhugs nas/__/phyi nang gzhan gsum gcig tu tshogs pas/__/rlung sems snang ba dbang du 'dus te/__/dpa' bo DA ki'i tshogs dang dgyes rol/__/bde mchog yang dag 'khor lo sdom pa'i/__/go 'phang mngon du byed par shog cig__/ces pa'ang rig 'dzin kun bzang 'od gsal snying po rtsal me sprel lor gnas 'dir rgyu ba'i skabs sprel zla'i tshes 20la gsol ba btab pa sid+d+hi rastu//___//
