JKCL-KABUM-10-THA-036-wylie
@#/__/yer pa'i gnas chen la bstod pa lha'i rnga sgra zhes bya ba bzhugs/__
yer pa'i gnas chen la bstod pa lha'i rnga sgra zhes bya ba/__na mo many+dzu shrI ye/__lha yi lhar gyur bcom ldan 'das/__/dkyil 'khor khyab bdag many+dzu shrI/__/ye shes sku ste sku yi mchog__/rnam pa thams cad pa la 'dud/__/byang chub sems dpa' dbang 'byor gyi/__/smon lam stobs las rang byung ba/__/'byung ba chen po la sogs pa/__/ngo mtshar gdod nas byin gyis brlabs/__/ji ltar skyes bus rtsol med par/__/zla nyi nor bu dpag bsam dang /__/lha yi rnga sgra ji bzhin du/__/rdo rje'i gnas yul kun tu snang /__/de las byang phyogs kha ba can/__/yul dbus 'phrul snang gtsug lag che'i/__/srog 'dzin sa yi brtan phur ni/__/yer pa'i gnas 'di khyad du 'phags/__/chos rgyal lha yi dbang po ni/__/a mi d+he wa'i rnam par 'phrul/__/srong btsan grags pa'i ba dan des/__/yer pa lha ri snying po gsal/__/de'i mthus 'dzam gling mchod sdong che/__/chos 'khor dpal gyi mdun sa de/__/rdzu 'phrul chen po'i stobs nas 'khrungs/__/de las 'jam dpal rgyal por ston/__/rig sngags 'chang ba kun gyi rje/__/o rgyan pad+ma saM b+ha wa/__/byang chub sems dpa' zhi 'tsho sogs/__/mkhas dang grub pa'i ri bo'i spor/__/shel gyi rdul dkar brtsegs pa bzhin/__/cho 'phrul chen po brgya phrag gis/__/sa 'dir ngo mtshar gtam du snyan/__/chos nor gter kha grangs med pa/__/rdo rje'i brag dang ri sul sogs/__/sbas te bstan 'gror phan bde yi/__/btsas su srid pa ji srid bzhugs/__/slar yang ches cher snyigs ma'i dus/__/dpal ldan mar me mdzad yab sras/__/nyi zla bzhin du lham mer gsal/__/theg chen chos kyi rang sgra 'ur/__/bka' gdams bstan pa'i pad tshal 'di/__/ches cher bzhad pa'i dang po ni/__/lhun gyis grub pa'i gnas mchog gi/__byin gyis brlabs las rgyas par gyur/__/dga' ldan lha brgya'i bdag po dang /__/'phags pa'i gnas brtan chen po sogs/__/dgyes par rol pa'i dga' tshal ni/__/mthong bas sems kyi gdung ba zhi/__/chu shel ba gam bkod re legs/__/rtsi shing nags tshal gar gyis rtsen/__/yan lag brgyad ldan chu bo'i rgyun/__/lhung lhung 'bab pas sim pa bskyed/__/dag pa'i zhing mchog bde ba can/__/ljongs 'dir mngon sum 'phos pa lta'i/__/yer pa'i gnas mchog 'di nyid la/__/rtag tu bsnyen cing sgrub par shog__/gnas gtsang 'di 'dra'i gzhal med khang chen du/__/byang chub lam gyi rim par blo sbyang zhing /__/theg chen rdo rje rtse mo'i nying khu yis/__/rig stong 'ja' lus rdo rje'i skur smin shog__/ces pa'ang smin zla'i tshes 17la 'jam dbyangs dga' ba'i go chas zla ba phug tu bris pa'o//___//
