JKCL-KABUM-09-TA-023-wylie
gsang ba'i rnal 'byor zab mo la nges pa rnyed pa'i bden tshig 'jam dpal mchog grub ces bya ba bzhugs so/__/na mo gu ru/__many+dzu shrI dz+nyA na kA ya/__/bla ma 'jam dpal rdo rje yi/__/ye shes snang ba'i 'od po che/__/snying la shar dang lhan cig tu/__/kun rmongs mun pa stug po che/__/gsal ba'i dbyings su thim par gyur/__/de tshe grong khyer gsum po ni/__/rang snang rnam par dag pa yi/__/'og min zhes bya nyams dga' bar/__/'jam dpal dang po'i sangs rgyas kyi/__/ngo bo mngon par byang chub dang /__/chos dbyings rgyas par bkang ba yi/__/gzugs sku nor bu'i sprin chen po/__/yon tan rin chen drwa ba yi/__/rgyan gyi rnam par mdzes pa ni/__/dpag yas 'dzad med lhun gyis grub/__/rtag pa rgyun gyi 'khor lo shar/__/de las thugs rje'i zlos gar ni/__/zhi dang khro bo bsam yas shar/__/khyad par 'jam dpal khros pa'i rgyal/__/gti mug dgra ste gshed chen po/__/'jigs byed khros pa ma he'i zhal/__/srid gsum rwa rtses thal mar 'bigs/__/'khor 'das zil gnon dpal chen po/__/bka' rtags phyag rgya'i rol pa che/__/don la bdag dang gnyis su med/__/sngar yang dam tshig phyag rgyas bcings/__/da yang srid pa ji srid bar/__/'du 'bral med pa'i rgya yis gdab/__/tsit+ta rin chen 'bar ba'i dkyil/__/dam du sba zhing dam du bcang /__/de bzhin nges par 'grub pa la/__/mkha' khyab 'jam dbyangs dkyil 'khor pa/__/til gong bzhin du bzhugs rnams kyis/__/bden pas kyang ni 'grub pa dang /__/chos nyid rang bzhin rnam dag dang /__/chos can phyi nang rten 'brel ni/__/mi bslu bden pas nges 'grub cing /__/de yi byin gyis bkra shis shing /__/khams gsum kun tu dge gyur cig__/bde skyid dpal yon rgyas par shog__/ces pa'ang sprel lo sprel zla'i tshes 28la lho brag lha lung du yid la gang shar bris pa gu h+ya//__//
