JKCL-KABUM-09-TA-020-wylie
@#/__/rig 'dzin rtsa rgyud sgyu 'phrul drwa ba bzhugs/__/
dpal kun tu bzang po la phyag 'tshal lo/__/bcom ldan kun bzang 'od mi 'gyur/__/chos dbyings khyab brdal chen po che/__/zhing khams 'byams las 'das pa'i dbus/__/rang snang shes rig 'khor dang bcas/__/dus bzhi mnyam pa'i dus de na/__/sgra tshig brjod las 'das pa'i gsung /__/zhing khams kun tu khyab par 'phro/__rgyal ba rnams ni dgongs pas brgyud/__/sems dpa' rnams la brda yi brgyud/__/rnal 'byor rig 'dzin sgra tshig gi__/du ma nyid du so sor go__/don dam nyid la dbyer med cing /__/chos sku'i dgongs par gcig pa'o/__/gleng gzhi ste dang po'o/__/de nas ston pa 'od mi 'gyur/__/kun tu bzang po dang sbyor ba'i/__/ye shes sku ni rnam par ston/__/de tshe rdo rje sems dpa' yi/__/mchod cing bstod de gleng bslang gsol/__/gleng bslangs ba ste gnyis pa'o/__/ston pa mi gsung dgyes par bzhugs/__/zag med bde ba chen po'i sgra/__/phyogs bcu kun tu 'phros pa nyid/__/nyid kyi thugs kar bsdu byas te/__/chos nyid bya rtsol bral ba'i sgras/__/de bzhin nyid du bka' stsal to/__/'das dang ma 'ongs de bzhin gshegs/__/kun gyi dgongs pa 'di yin te/__/rang rig ma bcos bde ba che/__/ka na dag cing mtha' dgus bral/__/gsal dang stong pa zung 'jug pa'i/__/rang byung ye shes thog mtha' med/__/gzhi med rtsa ba bral ba'o/__/pho mo ma yin kha dog med/__/mtshan dang mtshan nyid mtshan brjod med/__/thig le nyag gcig 'od lnga'i klong /__/gzhom du med cing bcad pa dang /__/tshig par bya ba yongs med cing /__/nam mkha'i rang bzhin ye shes srog__/dngos po dngos med phra rab kyi/__/rdul gyi chos 'das rnam par 'das/__/bsam gyis mi khyab phyag rgya che/__/brtan g.yo kun la khyab par gnas/__/gzhi yi rgyud kyi skabs te gsum pa'o/__/thabs kyis zin dang ma zin las/__/rig dang ma rig gnyis su snang /__/ma rig sems can 'khor bar 'khrul/__/rig na thams cad dag pa ste/__/ma dag btsal yang mi rnyed do/__/'on kyang dri ma glo bur ba/__/sbyong byed rim gnyis ting 'dzin bsgom/__/rgyud dag shes rab man ngag ldan/__/lta dgongs drod thob slob dpon gyis/__/dbang gi cho gas smin byas pas/__/rdo rje bzhi yi sa bon thebs/__/de nyid goms par byed pa yi/__/bskyed rim bla ma'i dkyil 'khor ni/__/bsnyen dang nye bsnyen sgrub pa dang /__/sgrub pa chen po'i tshul gyis ni/__/bskyed dang sngags bzlas nyer bsdu yi/__/rnal 'byor chu bo'i rgyun bzhin brtson/__/lam bskyed pa'i skabs te bzhi pa'o/__/bskyed pa'i snang zhen bzlog pa'i phyir/__/rdzogs rim rnal 'byor zab mo ni/__/lus bsrangs rlung gi dug bsal nas/__/sku yi stangs ra rig 'dzin gyi/__/bskyed pa legs par gsal btab nang /__/stong chen sgrib thog bral ba yi/__/dbus su rtsa yi gtso mo gsum/__/'khor lo bzhi yi brgyan pa dang /__/mas snar gtum mo ra~M dmar po/__/ril ma tsam du bsgom pa dang /__/yar snar thig le ha~M yig gzugs/__/rlung bskur me 'bar rtsa 'khor bsregs/__/me yi 'od kyis dros pa yi/__/drod dang ha~M las bdud rtsi'i rgyun/__/'dzags pas bde ba'i ye shes te/__/lte bar dkar dmar zhal sbyor gyi/__/mi rtogs ye shes drangs pa yi/__/thabs la goms pas gzhan lus kyi/__/phyag rgya bsten la dbab ldog pa'i/__/ye shes dga' ba ngos bzung bas/__/rtsa mdud grol zhing thig le dang /__/rlung gi dbu mar sdud pa las/__/sa yi yon tan rdzogs par 'gyur/__/rdzogs rim mtshan bcas kyi skabs te lnga pa'o/__/thabs kyi zhu bdes drangs pa las/__/mtshan ma med pa'i ye shes snyed/__/rdul bral nam mkha' dwangs pa la/__/'od gsal nyi zla'i dkyil 'khor 'char/__/ka ti'i lam brgyud rang rig gi__/rang gi ye shes mngon sum mthong /__/gnyis su med pa'i blo yi ni/__/gnyis med ye shes mngon du byed/__/lus kyi 'byung ba rang dag cing /__/'khrul pa'i rtog tshogs dbyings su dag__/gzung dang 'dzin pa las grol ba'i/__/chos sku'i btsan sa zin par 'gyur/__/rdzogs pa mtshan med kyi skabs te drug pa'o/__/lam gyi yan lag rmi lam dang /__/sgyu lus 'od gsal 'pho ba dang /__/bar do dag kyang sgom par bya/__/dran dang 'dun pa mi g.yo ba'i/__/ting 'dzin shin tu gsal ba dang /__/dam tshig rnam par dag par bya/__/bla mar mos bskyed nyams chag skong /__/tshogs dang gtor ma sbyin bsreg dang /__/sgrub cing mchod de dbang blang rnams/__/lam gyi yan lag grogs su bzung /__/rim gnyis kyi yan lag gi skabs te bdun pa'o/__/spros bcas spros med spyod pa yi/__/bogs dbyungs brtul zhugs mthar phyin pas/__/phyi nang gnas rnams kun tu rgyu/__/mkha' 'gro'i tshogs dang dgyes dgur spyod/__/de ltar spyod pas mtshams sbyar nas/__/sgrib gsum ye shes me yis bsregs/__/thig rlung dwangs ma stobs su gyur/__/gtsug tor rtse mor son pa las/__/'pho med bde ba chen po'i sku/__/mchog tu mi 'gyur de kho na/__/'bras chos nyer lnga'i bdag nyid che/__/gzhan nas ma byung ma btsal zhing /__/gzhir rdzogs 'bras bur smin pa'o/__/de las nam mkha'i mthar thug par/__/sku dang ye shes phrin las ni/__/rtag khyab mdzad pa 'bad med pa/__/'gro ba'i dpal du rang shar ba'o/__/'bras bu'i skabs te brgyad pa'o/__/rtsa rgyud ye shes drwa ba 'di/__/kun tu bzang po'i thugs kyi bcud/__/rdo rje sems dpar rab tu gtad/__/de yi thugs rgyud sprul pa yi/__/rig pa 'dzin pa'i thugs su gdams/__/dus kyi tha mar snang bar 'gyur/__sa ma yaHrgya rgya rgyaHman+t+ra guh+yaHa ti gar+b+ha rgyaH__ces pa'ang rig 'dzin pad+ma'i thugs rje dang /__DA ki'i brda yi rkyen las gtan la phab pa'o//__//
