JKCL-KABUM-09-TA-001-wylie
@#/__/rnal 'byor ma'i gsang sngags nye snying dang sbyar ba'i rdo rje'i glu DA ki dgyes pa'i dbyangs snyan gyi 'grel chung bzhugs so/__/
oM swasti/__'gyur med mchog tu bde ba che/__/lhan skyes rnal 'byor ma dpal gzugs/__/bla ma rdo rje btsun mo la/__/btud nas nye snying cung zad dbye/__/de yang in+d+ra b+hu ti'i rgya gzhung las/__yi ge re re'i de kho na/__/'phral du yang dag yid ches bskyed/__/bgegs rnams thams cad brlag par byed/__/gsang sngags don ni bshad par bya/__/zhes pa ltar/__dpal bde mchog nyung ngu'i rgyud las/__bklag pa tsam gyis 'grub par 'gyur ba'i gsang sngags nye snying oM gsum ma'i zab don snying por dril ba thams cad mkhyen gzigs 7'jam dbyangs mkhyen brtse'i dbang po'i mdzad pa'i rdo rje'i glu kha sbyor DA ki bzhad pa'i dbyangs snyan gyi don 'grel shin tu nyung ngu'i 'chad pa la/__mtshan bshad pa/__gzhung don no/__/dang po mtshan smos pa ni/__rje btsun rdo rje rnal 'byor ma sogs te/__bsam yas rigs rnams kun gyi khyab bdag DA ki bye ba 'bum sde'i rje mo/__sgrib gsum gyi dri mas gos pa med pas btsuXn zhing /__mtshan rtog gi gzhom du med pas rdo~X rje~X rig stong chos nyid rnala~X ma sku bzhi'i ngo bor dbang 'byora~X zhing dus gsum rgyal ba bskyed pa'i ma~X cig yum chen mo la rgyud sde sgo drug tu dbye ba'i rnal 'byor bla med rgyud kyi rgyal po gsang ba mtha' yi sngags rgyud kyi rtse mo bde mchog nyung ngu'i rgyud nas bstan pa'i nye snying bklags pas grub pa dang sbyar ba'i sgo nas rnal 'byor ma la mngon par bstod cing bsngags pas sku gsung thugs yon tan phrin las la bsngags par 'gyur te/__/ji skad du/__lha nyid sngags kyi tshul gyi ni/__/sgrub pa po la mchog ster byed/__/ces dang /__gal te dngos grub mchog 'dod na/__/lha dang sngags nyid tha dad med/__/ces lha sngags dbyer med yin pa'i phyir/__/ces so/__/de ltar bsngags pa'i rdo rje'i glu ste yid dpyod kyis ma bslad pa'i rig stong chos nyid rdo rje'i rang sgra thol byung du byung ba'i glu kha sbyor yan lag bdun dang sbyar ba ste/__gang grags pas/__longs spyod rdzogs dang kha sbyor bde chen rang bzhin med/__/snying rje'i yongs gang rgyun mi chad dang 'gog pa med/__/yan lag bdun dang ldan pa'i sangs rgyas 'di nyid ni/__/bdag 'dod tshad mas yongs bsgos blo can rnams kyang 'dod/__/ces so/__/DA ki ste mkha' 'gro rnams dgyes par bskyed cing thugs dam bskul bas shin tu thugs dgyes pa chen pos bzhad pa'i nga ro brgyad dang ldan pa'i dbyangs snyan sgrogs pa'o/__/de'ang rang gi rdo rje'i lus kyi rtsa thig rlung gsum dpa' bo DA ki'i grong khyer chen po ste/__rnal 'byor ma kun spyod las/__/de ni he ru ka dpal sprul/__/dag pa chos kyi sprul pa ni/__/phag mo'i gzugs su bstan ba yin/__/thabs dang shes rab sbyor ba las/__/'di nyid dang ni thams cad 'byung /__/zhes dang /__rnal 'byor ma mchog 'byung ba ni/__/rtsa rnams kun gyi grong khyer mchog__/stong phrag bdun cu rtsa gnyis kyi/__/dbus ma a wa d+hU ti'o/__/de ltar phag mo gtso bo ste/__/go 'phang mchog bzhin shes par bya/__/zhes gsungs pa ltar rnal 'byor bdag gi sgo gsum dad gdong nas dbyer med pas bstod bya bstod byed gnyis su med par shes pa'i rtogs goms kyi bstod dbyangs su sgrogs pa bzhugs so/__/zhes pa'o/__/gnyis pa la/__kha sbyor yan lag bdun gyi dang po longs spyod rdzogs pa longs sku'i yan lag gtso bor bshad pas sku gsum gyi bdag nyid du mdor bstan pa dang /__de nyid rgyas par bshad pa dang /__don bsdu ba'o/__/dang po ni/__oM gyi rang bzhin sogs te oM gsum gyi don ni sngags kyi mgo 'dren pa la sogs pa'i don brgyad la 'jug par bshad kyang skabs 'dir lhan cig skyes pa mchog tu mi 'gyur ba'i bde ba chen po'i ye shes ster ba gtso bo'i don du bzung nas bshad na/__o~XM phyi rang bzhin 'khor 'das brtan g.yo kun gyi dbyings de bzhin nyid ni 'dus ma byas pa 'gyur bcas kyi chos nyid las 'das pa'i 'gyur med smra bsam brjod bral so so'i skye bo'i shes blo'i gzhal du lta ci/__'phags pa sa bcu pas kyang ji bzhin gzhal ba las 'das pa'i chos nyid gdod ma'i gshis lugs de nyid stong pa phyad chad du song ba ma yin pa o~XM gyi rang mdangs stong chen de nyid zag pa dang bcas pa'i sgrib thogs thams cad spangs shing slar mi skye ba nyid yin kyang 'khor 'das shes bya'i rnam pa thams cad pa kun phra rab rdul gyi chos las 'das pa'i zag bral bde ba chen po'i mchog dang ldan pa'i mi 'gyur rtag pa dam pa'i ye shes de nyid oXM gyi ngo bor snang bas stod pa'i ye shes gnyis su dbyer med cing 'og min gyi gnas su sa bcu pa rnams la chos kyi longs spyod yongs rdzogs nges pa lnga ldan lhan skyes rdo rje rnal 'byor ma rtag pa rgyun gyi 'khor lo'i sku can don gnyis phun sum tshogs pa'i dpal dang yon tan drug ldan bdag nyid chen po ste/__byams pas/__mtshan ni sum cu rtsa gnyis dang /__/dpe byad brgyad cu'i bdag nyid 'di/__/theg chen nye bar longs spyod kyis/__/thub pa'i longs spyod rdzogs skur bzhed/__/ces gsungs pa ltar gyi sku de ni chos dbyings don gyi 'og min mkha' spyod rdo rje btsun mo'i zhing na bzhugs pa'i rnal 'byor dbang mo de las gang 'dul mchog gi sprul pa'i sku rigs lnga'i rdo rje rnal 'byor ma'i rnam rol phra rab rdul gyi grangs dang mnyam par khyab pa las gtso bor ma chags pad+ma'i rigs so sor rtogs pa'i ye shes gsung rdo rje rnal 'byor ma'i gzugs sku shar ba ste/__de skad du yang in+d+ra b+hU ti'i rgya gzhung las/__rba rlabs med cing dri ma med/__/nyi ma lta bu'i rnam pa can/__/chos kun rab tu ma gnas pa/__/dngos dang dngos med rnam par spangs/__/zhes dang /__longs spyod lam nas legs pa ni/__/rten cing 'brel 'byung ye shes te/__/shin tu legs pa'i 'od gsal ba/__/'di ni zung 'jug zhes bya ste/__/zhes dang /__/rang rig bde ba'i mchog gyur pa/__/g.yas pa'i ye shes rgya mtsho yi/__/sprul pa lam ni dri ma med/__/zhes so/__/de skad du'ang /__/rdo rje 'chang a nan b+ha dras/__/'dabs brgya'i lte bar nyin mor byed pa'i dbus/__/zhal gcig phyag gnyis 'bar ba'i spyan gsum g.yo/__/pad+ma rA ga ltar dmar rje btsun ma/__/mkha' spyod longs spyod rdzogs la phyag 'tshal lo/__/zhes gsungs pa ltar ro/__/gnyis pa rgyas bshad drug gi__/dang po kha sbyor bstan pa ni/__sarba ji snyed sogs te/__saXrbaX ni mang tshig ji snyed pa'am thams cad pa ste/__gong du bstan pa'i rang bzhin med pa'i chos dbyings stong pa chen po de las skye ba med kyang skye ba'i cho 'phrul du snang ba'i gsung mchog pad+ma'i rigs gtso che bas bsdus pa'i rigs ni ri rab kyi rdul gyis grangs dang mnyam pa'i bsam gyis mi khyab pa dang /__bsdu na bye ba phrag phyed dang bzhi/__de stong phrag bdun cu rtsa gnyis/__de las bsdu na bdun cu rtsa bdun/__de nyid so bdun/__de nyid nyi shu rtsa bzhi/__de brgyad du bsdu/__de'ang mkha' 'gro ma lnga yi dkyil 'khor dang /__de yang bsdu na rdo rje rnal 'byor ma 'di nyid du bsdu ba dang /__mdor na dkyil 'khor rgya mtsho'i spro bsdu'i byed por snang ba'i rnal 'byor ma 'di ni buXd+d+ha steX sangs rgyas zhes bya ba sbyangs bya sgrib gsum gyi mun pa thams cad sangs shing rtogs bya ye shes kyi snang ba mchog tu rgyas pa'i bdag nyid chen po 'di las chags can dang /__chags bral gyi sprul pa'i sku zhi ba dang /__khro bo khro mo'i tshul bstan pa'i mi slob pa dang /__slob pa'i byang chub sems dpa' dang nyan rang /__/so skye'i tshul bstan pa ste sras dang bcas pa dang /__bdud bzhi'i g.yul las rnam par rgyal ba'i rdzogs pa'i sangs rgyas kun bskyed pa dang /__spro ba dang sdud pa'i bdag nyid can gyis rdo rje btsun mo'i b+ha gar rol zhing rtag tu dgyes par bzhugs pa'i chos kyi 'byung gnas yum chen mo gcig pu ste/__ji skad du/__chos dbyings shes rab pha rol phyin/__/zag med bde chen sgyu ma'i gzugs/__/bde gshegs thams cad bskyed pa'i yum/__/zhes dang /__nga ni sangs rgyas thams cad kyi/__/yum gyi gzugs kyis bskyed par byed/__ces dang /__saMm tra las/__dmigs med gnas su shes rab dang /__/dmigs med snying rje chen po nyid/__/rdo rje rdo rje sems dpa' dpal/__/rdzogs pa'i sangs rgyas byang chub nyid/__/'di ni shes rab pha rol phyin/__/pha rol phyin pa kun gyi dngos/__/mnyam nyid bsam bya nyid du gsungs/__/sangs rgyas sku mchog bsgom pa nyid/__/zhes pa ltar ro/__/DA kiX nIX yeX sheXs te mkha' 'gro ma zhes bya ba/__rdo rje gur las/__Dam bi ha yas ga ma ni/__/sangs rgyas khams dang rnam par dag__/nam mkha' kun tu spyod grub pa/__/mkha' 'gro ma zhes bya bar brjod/__/ces gsungs pa ltar/__rnal 'byor ma yi rgyud 'di las srid zhi'i brtan g.yo thams cad mkha' 'gro ma drwa ba sdom pa'i dkyil 'khor 'ba' zhig las gzhan du ma mchis shing /__shes rab stong nyid rnal 'byor ma'i gzugs su shar ba de kun kyang bde chen he ru ka dpal dang /__kha sbyor zag med bde mchog sgyu ma'i rol rtsed kyi nyams brgyas rnam par sgeg pa'i tshul gong du bstan pa bzhin no/__/rje rdo rje 'chang gis/__chags can skyes bus gdul bar bya ba'i phyir/__/brtan g.yo'i bdag po he ru ka dpal dang /__/gnyis med ye shes gar gyis rol mdzad pa/__/mkha' spyod kha sbyor che la phyag 'tshal lo/__/zhes gsungs so/__/gsum pa bde ba chen po'i don ni/__badz+ra nam mkha'i sogs te/__rdo rje rtse mo las/__sra zhing snying po khong stong med/__/bcad dang gzhig par bya ba med/__/bsreg par byar med 'jig med pas/__/stong nyid rdo rjer brjod par bya/__/zhes pa ltar/__de yang baXdz+raX ni rdo rje ste gzung 'dzin gyi mtshan rtog gis mi phyed cing /__rtog tshogs kyi rdul thams cad dang bral ba'i nam mkha' stong pa'i dkyil ltar rnam par dag pa'i thugs rgyud can gyi rdo rje rnal 'byor ma de ni waX r+NaX nIX yeX ni kha dog ma ste rdo rje'i rigs can ma zhes bshad la/__de ni rang bzhin gyis 'od gsal ye shes kha dog rnam pa sna tshogs pa du mar 'char zhing 'char ba'i ngo bo spros mtshan las 'das pa rnam pa'i rang gdangs de ni zhi ma khro chags khams gsum gyi sred pa'i 'ching ba dang 'phags pa slob pa'i sa las rnam par 'das pa'i rnam med ye shes phyag rgya'i gzugs su shar ba la rnam bcas bde ba chen pos 'khyud pa'i brtan g.yo ste 'khor 'das snod bcud kun la khyab par 'phro ba'i dpal ldan mkha' spyod dbang mor bstod pa'o/__/ji skad du/__ye shes thig le las/__stong pa la ni thams cad 'byung /__/zhes dang /__sdom 'byung las/__rnam pa sna tshogs dri med pa'i/__/dkyil 'khor dag ni 'phro bar snang /__zhes dang /__bde mchog rtsa rgyud las/__'jig rten phyi rol de bzhin gnas/__zhes dang /__brtag gnyis las/__ji ltar phyi rol de bzhin nang /__/zhes so/__/bstod pa las/__nyid thugs zag pa med pa'i bde ba che/__/'gyur med dga' ba gya nom bla na med/__/rgyun mi 'chad pa bde ba'i ros gang ma/__/mkha' spyod bde ba che la phyag 'tshal bstod/__/zhes so/__/gsum pa rang bzhin med pa ni/__badz+ra gzung 'dzin sogs te baXdz+raX ni blo rtog gzung 'dzin gyi mtshan ma'i chos kyis ma phyed mi phyed phyed par mi 'gyur ba'i rang bzhin gzhir gnas gnyug ma'i ye shes bri gang bsal bzhag 'pho 'gyur bral ba de ni baiX roX tsaX niX yeX ste rnam par snang mdzad ma zhes bya bar 'gyur la/__de lta bu'i de bzhin gshegs pa'i sku yi rigs kyi rnam par snang mdzad chen po de ni rang bzhin bden par grub pa med pa'i rna mthar sgo bzhi'i bdag nyid can gyi stong nyid chen po ste/__brtag gnyis las/__ngo bos gzugs med mthong ba po/__/sgra med thos pa po yang med/__/dri med snom pa po yang med/__/ro med myong ba po yang med/__/reg med reg pa po yang med/__/sems med sems las byung ba'ang med/__/ces dang /__sgom pa po med bsgom pa'ang med/__/lha med sngags kyang yod ma yin/__/spros pa med pa'i rang bzhin las/__/sngags dang lha ni yang dag gnas/__/zhes pa ltar/__nyi tshe'i stong pa rnams kyis rab tu dben pa'i stong pa chen po'i rang gdangs 'od gsal lhan skyes rnal 'byor ma mchog gi rnam par gcig nyid gnas yul nyer bzhi/__yul so gnyis la sogs pa zhing skyes kyi rdo rje rnal 'byor ma du mar snang bar mdzad cing /__bde stong dbyer med mchog gi dpal dang ldan pa'i mkha' spyod dbang mor 'dod do zhes pa ste/__a b+hi d+ha na las/__phag mo'i gzugs ni thams cad pas/__/spros dang bral bas sdom pa'o/__/zhes dang /__rang bzhin bdag med gcig pu ste/__/mkha' mnyam rnal 'byor gzugs can don/__/zhes gsungs pa ltar ro/__/rje rdo rje 'chang gis/__rnam dag chos dbyings spros bral nam mkha'i ngang /__/mtha' yas yon tan mang po'i nyer mdzes pa/__/rnam pa kun gyi mchog dang rab ldan ma/__/mkha' spyod rang bzhin med la phyag 'tshal lo/__/zhes so/__/bzhi pa snying rje'i bdag nyid chen po bstan pa ni/__hU~M ni rang bzhin sogs te hU~M niX sdug bsngal 'joms pa la sogs pa don du ma la 'jug pa ste bshad ma thag pa ltar gzod nas spros mtshan las 'das kyang hU~M giX rang gdangs dmigs med brtse ba chen po'i rgyu dang mi rgyu'i 'gro ba rnams la rjes su chags pa'i snying rje chen po'i ros thugs rgyud yongs su gang ste/__dmigs med gnas su shes rab dang /__/dmigs med snying rje chen po nyid/__/blo dang lhan cig gcig gyur pa/__/nam mkha' nam mkha' ji lta ba'o/__/zhes so/__/hU~M giX byed las sam phrin las ni sems can rnams khams gsum gyi sdug bsngal spyi dang bye brag__/khyad par khu rdul rlung gsum gyi sgrib pa las skyobs pa'i zung 'jug rnam kun mchog ldan rdo rje btsun mo sku gsum rnam dbyer med pa'i dpal dang ldan pa'i ye shes kyi snang brnyan mkha' spyod dbang mor 'dud do/__/de skad du'ang /__rje a nA na tas/__gang gi rang bzhin rnam par mi rtog kyang /__/thugs rje chen pos sems can ma lus pa/__/yid bzhin nor ltar dgos 'dod kun stsol ma/__/mkha' spyod snying rjes yongs gang la phyag 'tshal/__/zhes so/__/lnga pa rgyun mi chad pa'i don ni/__phaT kyi mtshan gzhi sogs te/__phaT+ra ni dgas pa'am khos shig ste bdud dang sdug bsngal 'joms pa'i don du bshad la/__de yang phaT+ra ni gzung 'dzin gcod par byed pa'i thabs shes dbyer med kyi mtshan gzhi stong pa chen po srid zhi'i spros mtha' thams cad bral bzhin du phaT kyi mtshan nyid gsal ba stong dang rten 'byung dbyer mi phyed cing snang cha 'gag pa med cing thugs rje chen por byings las rang shar ba'i tshul gyis phaT kyi mtshon byed ni gzhi dus kyi lhan skyes rnal 'byor ma ste/__byams pas/__gang gis srid pa ji srid par/__/'gro la phan pa sna tshogs dag__/mnyam du mdzad pa'i sku de ni/__/thub pa'i sprul sku rgyun mi 'chad/__/ces dang /__de nyid las me long dang byad kyi gzugs brnyan bzhin gnas yul zhing skyes kyi dpa' bo rnal 'byor ma sprul pa'i sku/__gzhan yang rigs las skyes pa dang /__las las skyes pa'i dpa' bo rnal 'byor ma'i tshogs dang /__phyi nang gnyis dbyer med du sdom pa'i rnal 'byor pas snod bcud dag pa rab 'byams su shes pa'i lta ba'i gding dang ldan pas sngags las skyes pa'i rnal 'byor ma sogs mdor na dus gsum rgyun mi chad par 'char ba'i snang stong dbyer med don gnyis phun sum tshogs pa'i dpal dang ldan pa'i mkha' spyod dbang mor 'dud do/__/de skad du'ang /__rje bla mas/__srid dang zhi ba'i mtha' dang bral ba yi/__/mi gnas mya ngan 'das pa'i sa brnyes nas/__/rgyun chad med pa 'gro ba'i don mdzad pa/__/mkha' spyod rgyun chad med la phyag 'tshal lo/__/zhes gsungs so/__/drug pa 'gog pa med pa'i don ni/__swA hA mkha' dang sogs te swAX hAX ni gzhi tshugs zhes pa'i don yin te nam mkha'i mtha' dang mnyam pa'i yid can rgya mtsho kun la srid zhi'i dge legs kyi sgo brgya 'byed cing gnas skabs phan pa dang mthar thug bde ba'i 'dod dgu yid bzhin du stsol ba la dpag bsam shing dang bum bzang ltar 'bad med ster ba'i phrin las 'gog pa med pa ste/__'jug pa las/__zhi sku dpag bsam shing ltar gsal 'gyur zhing /__/yid bzhin nor bu ji bzhin rnam mi rtog__/'gro grol bar du 'jig rten 'byor slad rtag__/'di ni spros dang bral la snang bar 'gyur/__/zhes pa ltar/__srid zhi'i mtha' gnyis la mi gnas pa'i 'gog pa med pa'i sku dang ye shes kyi phrin las snang bar mdzad pa'i dran pa tsam gyis srid zhi'i 'jigs 'phrog ma rig pa'i tsha gdung sel bar mdzad cing /__rim gnyis lam la brtson pa'i rnal 'byor pa bdag gi skyabs gcig mchog thun dngos grub kyi dpal dang ldan pa bla ma mkha' spyod dbang mor gus pas 'dud do/__/bstod pa las/__dmigs med snying rje gzhan gyi dbang gyur pas/__/'khor ba ji srid gnas pa de srid du/__/mya ngan mi 'da' rtag par rab bzhugs ma/__/mkha' spyod 'gog pa med la phyag 'tshal lo/__/zhes gsungs so/__/gsum pa pho nya gsum gyi don mdor bsdus te dngos grub stsol bar bskul ba'am zhu ba ni/__a ho cir snang sogs te ngo mtshar ba dang dgyes pa sogs kyi don la 'jug pa ste/__rang snang dag pa rab 'byams rnam thar sgo gsum mtshon pa'i chos 'byung gi klong na brtan g.yo'i dngos po kun sngags skyes rnal 'byor dga' mar shar bas zhing las skyes pa'i dpa' bo DA ki ri rab kyi rdul gyi grangs dang mnyam pa'i tshogs dang badz+ra a ra li yi sbyor bas dwangs pa'i chags med chags pa'i tshul du bstan pa'i bde ba chen po'i sgyu ma'i gar gyi rtsed 'jo'i thabs shes bskyed rdzogs kyi lam khyad par can gyi drangs pa dang /__khyad par dpal ldan bla ma'i byin rlabs snying dbus su 'bebs pa las sad pa'i rang snang don gyi 'og min chos kyi dbyings kyi pho brang bde ba chen po'i ye shes kyi bkod pa 'byams klas par bzhugs pa'i rang bzhin don gyi lhan skyes rdo rje rnal 'byor ma dpal tshe 'di nyid la the tshom med pa'i nges shes brtan po dang ldan pa'i sngags kyi tshig don zab mo'i bskul ba las brjod med brjod pa kun gyi gzhir gyur pa'i ba~M yig lha yi gzugs su shar ba chos nyid kyi mig dri ma med pa thob pa las chu bur mig gi dbang po'i sgo shin tu yongs su dag pas mthong ba dang /__gsung gi sgra thos pa dang /__thugs kyi ye shes mngon sum ster ba'i dngos grub mchog gi skal pa de lo dang zla bar ma 'gyang bar deng 'dir da lta nyid du yid smon tsam du ma lus pa rang rang gi bskal ba dang 'tshams par mngon sum du stsol cig ces pa'o/__/de yang dngos grub ni zhi sogs dman pa'i dngos grub dang /__'bring grub pa chen po brgyad/__'bring gi mchog mkha' spyod ces bya ba che 'bring chung gsum las/__chen po ni sangs rgyas kyis sku gsum yan lag bdun ldan gyi go 'phang brnyes pa dang /__'bring mkha' spyod ces bya ba rdzu 'phrul gyis nam mkha' la rgyu zhing spyod yul du byed pa/__lus 'gres rgud dang bral zhing /__tshe nyi zla dang mnyam pa/__ci bsam pa'i longs spyod nam mkha' las len pa sangs rgyas kyi zhing kun tu sprul sku las chos nyan te dpa' bo mkha' 'gro rnams dang skal ba mnyam du spyod pa dang mkha' spyod chung ngu 'dod gzugs kyi rten la sngags grub pa'i 'bras bu'i zhing dang longs spyod sogs phun sum tshogs pa ste/__rten de nyid la rig pa 'dzin pa dang /__'khor lo'i sgyur ba sogs su skye ba dang /__'tshang rgya bar gang rung du 'gyur ba dang gzhan yang mkha' 'gro spyi 'grub pa'i rtags 'du ba gsum dang /__'bar ba gsum sogs kyi rtags kyang 'byung ba yin no/__/de nas gsang sngags mtha' bzhi'i bshad pa'i dbang du byas na/__thun mong spyi yi don dang /__yi ge'i don dang /__sbas don dang /__mthar thug gi don ci rigs sngar yang bshad zin la/__khyad par sbas don bskyed rim dang sbyar na sku gsum ye shes lnga ldan gyi sangs rgyas mkha' 'gro thams cad rdo rje sna tshogs mdangs ldan rdo rje rnam snang mdzad las bdud dang mtshan rtog gzhom pa'i sku can de nyid sgrub byed rnal 'byor bcu gcig gi lam la brtson pas gzhi dus kyi ngo bo ye dag gi rnal 'byor ma dpal sbyangs gzhi'am kun brtags glo bur gyi dri mas sgrib pa'i cha nas sbyang bya sbyong byed bskyed rdzogs kyi lam rim gzhi dus kyi rnal 'byor ma mngon du gyur pa sbyang 'bras te gzhi lam 'bras gsum dbyer med kyi rnal 'byor ma mngon sum du gyur ba'o/__/bdag byin rlabs kyi sbas don dang sbyar na/__oM gsum rtsa rlung thig gsum dang dbu rkyang ro gsum sarba bud+d+ha DA ki nI ye 'khor lo'i rtsa 'dabs kyi rlung thig DA ki thams cad/__badz+ra war+Na nI ye ni dbu ma'i mar sne'i lte 'og gi gtum mo nyi ma'i rang bzhin/__badz+ra bai ro ni dbu ma'i yar sna thabs mchog rnam par snang mdzad ri bong 'dzin pa'i gzugs can/__hU~M phaT ni 'bar 'dzag gi sbyor bas bde drod mi rtog gsum gyis gzung 'dzin gyi rtog pa gzhom pa'o/__/dkyil 'khor 'khor lo'i sbas don dang sbyar na/__oM gsum yar thabs yab kyi sgo gsum/__sarba bud+d+ha sogs shes rab rig ma/__badz+ra war+Na sogs rgyud yongs su dag pa'i rig ma bcu drug lang tshos myos pa'i mdog ltar gsal zhing zhal nas tsan+da sa mchog dang ut+pal la'i dri bsung 'thul ba'i mdangs ldan ma/__badz+ra bai ro tsa nI ye nye rgyus spyod pa la brten yab yum 'du shes gsum gyi snyoms 'jug dga' ba'i rol rtsed kyi thig le lugs 'byung ldog las byang chub sems kyi thig le'i 'od chen rab tu rnam par snang mdzad ma/__'khor lo'i dbus su dwangs mar brtan cing 'gros bzhi thim nas mthar thug gtsug tor gyi rtse mor thim pas rdo rje'i sa mchog mngon du 'gyur ba ste/__rgyud las e yi cha byad bzang po gang /__/dbus su ba~M gyis rnam par brgyan/__/bde ba thams cad kyi ni gnas/__/sangs rgyas rin chen za ma tog__/ces so/__/bzhi pa'i sbas don mthar thug dang sbyar na/__oM gsum rdul bral dwangs ma'i 'od gsal gzhom med thig le chen po ni sgrub gzhi/__sarba bud+d+ha sogs dus gsum rgyal ba thams cad kyi thugs kyi gsang ba rang byung ye shes/__badz+ra war+Na sogs lhan skyes gnyug ma bde ba chen po'i ye shes 'od kyi thig le de ni brtan g.yo kun gyi srog ye shes lnga yi rang bzhin mchog tu gsal zhing 'tsher ba rdul bral ba~M yig gi rnam par gnas pa/__badz+ra be ro tsa nI ye de ltar bla ma'i man ngag gi gnad du bsnun pas/__'jam dpal sgyu drwa las/__'od chen rnam par snang bar byed/__/ye shes snang ba lam me ba/__/'gro ba'i mar me ye shes sgron/__/gzi brjid chen po 'od gsal ba/__/zhes dang /__mun pa la ni mar me ltar/__/zhes dang /__rgyud saM bu tra las/__rig ma'i skyes bu grub pa ni/__gang du yang mi 'gro/__gang du'ang mi gnas pa/__thog ma dang /__tha ma dang /__dbus dang bral ba/__gnyis su med pa/__gnas gsum du snang ba/__thams cad du son pa thams cad mkhyen pa thams cad pa/__thams cad kyi don thams cad/__sems can thams cad kyi sems la gnas pa/__sdig pa thams cad las rnam par grol ba/__yon tan thams cad kyi brgyan par byas pa/__thams cad dang ldan pa/__zhi ba/__mnyam pa med pa/__rtag par mdzad pa/__mgon po skyobs pa/__kun tu rtog pa spangs ba/__dbyibs dang kha dog dang bral ba/__rgyal ba'i spyod yul ma yin pa/__rgyal po spyod par dka' ba'i phyir rdo rje nyon mongs pa'i nye bar gdung ba las grol ba'i phyir zla ba/__dogs pa med pa'i phyir seng ge/__gting dpag dka' ba'i phyir chu yi phung po'o/__/de ltar dpe sna tshogs kyis rnal 'byor ma rnams kyis dper bya'o/__/zhes gnyis su med pa'i ye shes gsal zhing rgyas par bstan pa'o/__/de ltar rim pa gnyis kyi lam la brtson pas dgra gsum sod/__'phrang gsum sgrol/__bdud bzhi bcom/__'ja' lus dwangs ma'i sku mchog mngon du mdzad pas srid gsum thams cad 'og min rdo rje btsun mo mkha' spyod dag pa'i zhing chen por sgrol bar mdzad pa'i phrin las 'dzad pa med par 'khor ba ji srid gnas kyi bar rtag khyab lhun grub tu 'byung ba ste/__de ltar dbang bzhi'i lam gyi sbas don mdo tsam zhar byung du smros pa'o/__/de ltar gsang sngags kyi rgyal po 'di bzlas pa'i phan yon ni bde mchog nyung ngu'i rgyud le'u zhe bdun pa las/__de nas mkha' 'gro ma yi rig pa chen po bzlas nas rigs thams cad dbang du byed par 'gyur ro/__/rtag tu bzlas brjod byas na dpal chen po bskyed par 'gyur zhes phag mo'i nye snying la brten pa'i las tshogs gsungs/__le'u zhe brgyad pa las/__de nas gzhan yang bshad bya ste/__/mkha' 'gro kun gyi bde ba'i mchog__/snying po'i rnal 'byor ma kun gyis/__/'dod pa'i las kun sgrub pa po/__/gang zhig dran pa tsam gyis ni/__/'jig rten gsum po g.yo byed cing /__/rjes su dran pa tsam gyis kyang /__/yang dag dngos grub rim gyis ster/__oM sarba bud+d+ha DA ki ni ye badz+ra war+Na nI ye hU~M hU~M phaT swA hA/__/sngags 'di bzlas pas 'grub pa ste/__/las rnams kun byed dge ba yin/__/mkha' 'gro rnal 'byor ma rnams dang /__/khaN+Da ro hi lA ma sogs/__/mkha' 'gro ma ni thams cad kyis/__/sngags ni 'di nyid yin par bshad/__/sa 'og yang na mtho ris sam/__/de bzhin mi yul dag tu yang /__/las ni gang dag yod pa rnams/__/bklag pas de dag thams cad 'grub/__/'di las shin tu mngon gyur gang /__/'jig rten gsum na ci yang med/__/gang phyir 'di ni bla med pa/__/las rnams thams cad sgrub byed yin/__/mkha' 'gro ma ni kun gyi gnas/__/mdor bshad rgyas pa ma yin no/__/zhes dang /__in+d+ra b+hu ti'i rgya gzhung las/__de ltar nges shes rnal 'byor pas/__/gang zhig blo ldan rtag tu slob/__/'grub par 'gyur ba the tshom med/__/bsod nams dman pa'i mi yis kyang /__/the tshom med par de yis 'grub/__/zhes pa ltar don de dag la dgongs nas tshar chen rdo rje 'chang chen pos kyang /__he ru ka dpal rgyud kyi rgyal po las/__/rdo rje btsun mo nye ba'i snying po mchog__/bklag pas 'grub ces gsung pa'i bden pa skyong /__/zhes gsungs pa sogs 'phags bod kyi mkhas grub rig 'dzin rnams kyis rgya cher bsngags pa ltar dad mos rtse gcig pas bzla bar byas na dngos grub 'byung ba la the tshom med pa'i nges shes yang dag pa'o/__/zhar byung brtsams pa pos smos pa ni/__ces pa'ang bag yod kyi le'u sogs go sla'o/__/sngags don shin tu rgyas pa ni in+d+ra b+hu tis rgya gzhung mchan dang bcas pa las shes par bya'o/__/mchog tu mi 'gyur bde chen gyi/__/ye shes rnal 'byor dpal mo'i sngags/__/zab don bshad pa'i tam+bu ras/__/dngos grub mchog gi skal ldan shog__/ces pa'ang bslab gsum mdzod 'chang dge ba'i bshes gnyen ngag dbang bstan pa dar rgyas nas bkra shis pa'i lha rdzas sogs rten dang bcas te gsung bskul ngor 'jam dbyangs chos kyi blo gros pas rje bla ma'i nye snying gi don glu la 'grel chung gsal byed kyi tshul du sbyar ba lhan cig byed po mchog sprul rin po che bkra shis dpal 'byor gyis mdzad pa 'dis kyang rang gzhan thams cad rdo rje btsun mo bla ma rnal 'byor mas rjes su 'dzin pa'i rgyur gyur cig__/mang+ga laM//__//
