JKCL-KABUM-08-NYA-012-051-wylie
!_bla ma rjes dran gyi glu 'jigs mdzad khros pa'i byin rlabs snying la bskul ba'i dbyangs snyan ces bya ba/__a ho ye/__dpal ldan srid zhi'i khyab bdag bde chen gyi chos sku/__/dngos gcig du ma'i gar gyi rnam rol ni mtha' yas/__/rgyal kun mkhyen pa'i gter chen ye shes kyi sku can/__/bla ma 'jam dpal rdo rje snying dbus nas dran byung /__/kha sbyor yan lag bdun ldan mtshan dpe yi snang brnyan/__/dmar ser sin+d+hu wA ra'i 'od zer gyi phur po/__/rdo rje dbyangs can dgyes pa'i rjes chags kyi rol rtsed/__/rab 'byams spro bsdu'i byed po snying dbus su bzhugs shig/__mdzes 'dzum zhi bas mi thul gdul dka' yi 'gro la/__/mi bzad 'jigs rung drag po gar dgu yi nyams ldan/__/gshin rje bye ba'i sde tshogs 'dul mdzad kyi khrag 'thung /__/'jam dpal ya man+ta kar gsol ba rang 'debs so/__/kun rmongs gti mug dgra chen mun stug gi glang po/__/nga rgyal dregs pas myos pa'i gtsug bum ni 'gem mdzad/__/dus kyi dgra chen bcom ldan rdo rje ni 'jigs byed/__/bdag gi sgo gsum rdo rje gsum dngos su bsgyur mdzod/__/bsnyen cing sgrub pa'i gsang chen rmad byung gi nyams len/__/rdo rje be ta li yi snyan brgyud kyi gdams pa/__/grub brnyes rig 'dzin bye ba'i thugs bcud kyi bdud rtsis/__/tshe 'dir 'jam dpal 'grub par gsol ba rang 'debs so/__/khams gsum 'od gsal dbu ma'i grong khyer du sdom pas/__/rtsa yi mdud grol thig le 'od gsal du dengs ste/__/cir snang sku dang ye shes 'byams klas kyi 'khor lor/__/gdod nas lhun rdzogs mngon gyur byin gyis rang rlobs shig/__ma dag rlung sems 'khrul pa'i gzugs brnyan gyi snang ba/__/bstan la gnod cing 'tshe ba'i lha min gyi kla klo/__/'jigs mdzod khros pa'i mtshon cha rnon po yi dbal gyis/__/rtsad nas brlag par nus pa'i mthu stobs zhig stsol zhu/__/rgyal bstan dar rgyas bstan 'dzin skyes chen rnams zhabs brtan/__/chos ldan rgyal po'i mnga' thang dar shing ni rgyas te/__/'jig rten bde dge'i dpal yon rdzogs ldan bzhin 'phel nas/__/bkra shis dge legs snang ba 'grib med du shog cig/__nged cag rdo rje'i rnal 'byor rig 'dzin gyi pho mo/__/tshe srog rdo rje'i ka chen yun du ni brtan te/__/'chi bdag bdud las rnam rgyal rdo rje yi sku brnyes/__/'gro don mkha' khyab don gnyis lhun grub tu gyur cig/__/ces pa'ang 'jigs med nam mkha'i rdo rje tshe dbang grub pa rtsal 'jigs mdzad khros pa'i bsnyen sgrub kyi skabs lcags stag rgyal zla'i dkar phyogs kyi rdzogs pa dang por gsol ba btab pa sid+d+hi rastu//___//
