JKCL-KABUM-08-NYA-012-037-wylie
!_rje bla ma'i zhabs la phyag 'tshal lo/__/pha drin can blo gter dbang po mkhyen/__/bu blo gros ming can blo ngan bdag/__lo bcu phrag lnga la son pa yi/__/tha skar gyi zla ba'i tshes bco lnga'i/__/nam tho rangs cung zad mnal ba na/__/dngos mthong du med pa'i rig rgyu yi/__/'khrul pa'i snang ba shar ba la/__/rje thams cad mkhyen pa blo bzang grags/__/'khor thugs sras bzhi po dang bcas pa/__/thams cad kyang gser mdog chas ldan shar/__/rje gtso bo'i zhal nas brtsegs gsung tshogs/__/glegs bam gyi rnam pas sdom gtad mdzad/__/chos khyad 'phags gsang 'grel sgron gsal gyi/__/bka' khyod la gtad do zhes gsungs nas/__/'khor thams cad mi snang gyur pa dang /__/rgyud 'grel glegs bam brgyad stong tsam/__/'od sngon po'i rnam par gnas pa dang /__/rje gsang ba 'dus pa phyag gnyis pa'i/__/skur gyur te dgongs pa gtad pa dang /__/glegs bam de gsang 'dus dkyil 'khor gyi/__/lha so gnyis gyur nas gnas gsum nas/__/'od zer gyi bdud rtsi'i dbang bskur stsal/__/slar glegs bam gsang 'dus sngags su gyur/__/rje bla ma'ang sngar bzhin gyur pa dang /__/glegs bam sngags kyi rnam pa de/__/bdag lus la thim pas rang gsang 'dus/__/mi bskyod par gyur dang lus nang kun/__/sngags mer gyis gang nas rang sgra sgrogs/__/lus sems la bde bas cung zad khyab/__/yid mi rtog ngang la phyam mer brdal/__/gnyid srab mo de yang sad par gyur/__/rje 'di la sngon nas 'brel pa ni/__/ches zab mo yod pa'i nyer len las/__/rje gang gi byin rlabs yang yang 'char/__/kha byang bstan phug der nyi ma med/__/dpe de bzhin rje yi dgongs mdzad kyang /__/bu las ngan la yar skyed cang ma mchis/__/las ngan nyon mongs kyi rdzab tu lhung /__/de bsam zhing bsam zhing snying rlung ldang /__/skye ngan gyi skye bo bdag 'dra la/__/rje khyed kyi thugs rjes dgongs mdzad nas/__/srid me 'dags klong nas bsgral du gsol/__/'khrul rtog gi rlung dmar zhi ba dang /__/ngan spyod kyi rgyun thag chad du gsol/__/blo gros kyi snang ba bskyed du gsol/__/chos byang chub kyi sems mchog skye bar mdzod/__/rje 'jam dbyangs bla ma khyed nyid kyis/__/dus da dung byang chub ma thob par/__/mi bdag gi skyabs gnas mdzad pa dang /__/theg mchog gi chos kyi rgyas par mdzod/__/gsol ba snying nas 'debs so byin gyis rlobs/__/nyam thag gi nad par byin rlabs kyi/__/phan pa 'byung ba de bzhin du/__/dngos grub gyi skal ba chen po zhig/__dus da lta smin par ma gyur kyang /__/byin rlabs kyi dgongs gtang zab mo des/__/sgrib gsum dbyings su dag par shog/__gzhi rgyud de rang ngo 'phrod pa dang /__/lam rgyud kyi ye shes 'char ba dang /__/'bras rgyud gsang ba 'dus pa yi/__/dkyil 'khor de mngon par byang chub shog/__rje khyod kyi bstan pas 'dzam gling khyab/__/de la 'khu zhing sdang pa yi/__/lha min gyi bdud las rgyal bar shog/__bkra shis kyi dga' ldan dar rgyas shog/__//
