JKCL-KABUM-08-NYA-012-035-wylie
!_tshogs kyi glu ye shes byin 'bebs ces bya ba bzhugs so/__/a ho ye/__steng rnam dag 'ja' 'od 'khrigs pa yi klong na/__/pha rtsa gsum kun 'dus pad+ma 'byung gnas de bzhugs yod/__/'khor rig 'dzin dpa' bo mkha' 'gro yi bskor nas/__/bu bdag la dgyes pa'i 'dzum zhal ni lam me/__/mkhyen brtse dang nus pa tshad med kyi gter chen/__/mi bdag gi re ltos 'dun pa yi gtad sa/__/pha khyed kyi thugs rjes bslu ba ni mi srid/__/dus bzang po tshes bcu'i mchod pa yi dus chen/__/yul gnas dang nye gnas mkha' 'gro yi 'du ba/__/tshad bzung las 'das pa'i tshogs gral gyi dbus na/__/nga gtad med rig pa'i khye'u chung 'di skyid do/__/tshogs 'dod yon sprin phung nam mkha' ltar khyab cing /__/lha rdo rje'i dbang pos dgyes rgur ni rol pas/__/nyams bde chen zag bral dga' bzhi ni 'bar ro/__/sgra grags stong a dI ka dI yi mchod do/__/sku gar gyi nyams brgya'i bro brdung ni khrigs se/__/thugs a haM 'bar 'dzag bde stong gis myos pas/__/rtsa 'khor lo bzhi yi lha tshogs kyis gar bsgyur/__/lus phung khams skye mched lhar snang du byin rlobs/__/ngag srog rtsol 'gro 'ong dbu ma ru dengs nas/__/yid rtog tshogs 'od gsal chen po yi sbubs zhugs/__/gzhi pad+ma dra ba chen po yi zhing du/__/'bras rang rig sku gsum mtsho skyes rje'i zhal mjal/__/ma 'gro drug 'khor ba dong sprugs su shog cig/__ces pa'ang lcags 'brug dbo zla ba'i tshes bcur gling rje yab sras sogs dang thugs sgrub bar chad kun sel tshogs kyi 'du bar spyod pa'i skabs bris ba'o//___//
