JKCL-KABUM-08-NYA-012-003-wylie
!_skyo glu snying gi gzer chen zhes bya ba bzhugs so/__/rje dran chog ngo bo rdo rje 'chang /__/skyabs mtshungs med blo gter dbang po dang /__/rje thams cad mkhyen gzigs si tu pa/__/dpal bka' drin mnyam med pad+ma'i mtshan/__/mgon 'gro 'dul dpa' bo rdo rje dang /__/chos shes bya kun gzigs grub chen pa/__/rje 'jam mgon ngag dbang legs pa'i zhabs/__/gtsug rgyan gyi yongs 'dzin rnam pa drug/__mi bdag gi spyi bo'i rgyan du bzhugs/__/dus legs nyes skyid sdug ci byung yang /__/rje bla ma rnams la gsol ba 'debs/__/bu bdag la thugs rjes byin gyis rlobs/__/dus snyigs ma'i gral mthar skyes pa yi/__/rgyud nyon mongs dug lngas rab tu gzir/__/chos zab rgyas kyi gdams pa thob gyur kyang /__/dpe shog thog dang tshig skam kho nar lus/__/don snying la zugs pa 'ga' ma mchis/__/rang rgyud gshis ngan pa 'dul ma thub/__/sems chos nyid rnam rtog mun pas sgrib/__/bying rgod kyi chom rkum ngan pas bcom/__/brjed ngas kyis dran pa'i so ma tshugs/__/snang sems tha mal rgya 'byams lus/__/don rig stong dbyings su grol ma thub/__/de bsam zhing bsam zhing skyo ba 'phel/__/phyi nam zla dus kyi stod smad dang /__/nang skye 'gro mi yi 'gyur ba dang /__/sgos rang gi mi tshe zad lugs la/__/yang yang bsam na skyo ba 'phel/__/grogs mi rtag 'dus pa thams cad 'bral/__/de phal cher phyi ma'i ltad mor song /__/rgyu nor rdzas sgyu ma'i bsog pa 'dra/__/phan cung zad med kyang snying med po/__/mgo 'khor nas nor la gsog 'jog byed/__/de'i tshul la bsam kyang skyo ba 'phel/__/dam sdom pa sna gcig mi bsrung ba'i/__/rang gzhan gyi o zog tshul 'chos kyi/__/chos 'chad nyan byed zer dam chos btsongs/__/'jig rten gyi dgra 'dul gnyen skyong dang /__/cha 'dra ba'i chags sdang rten bzhengs sogs/__/don med kyi stong ldir chen po'i ngang /__/tshe 'di yi lhag ma nub rir bskyal/__/don de la bsam kyang skyo ba 'phel/__/sems phan pa'i tshig gi smras gyur kyang /__/tshig ngan pa'i rang bzhin mthong gyur nas/__/'khon ngan par bzung ba'i slob bu dang /__/bskyangs dka' ba'i 'khor g.yogs gnas tshul la/__/bsam zhing bsam zhing skyo ba 'phel/__/rang las 'bras brtsi med btang bzhin du/__/mi gzhan la dge sdig blang dor bshad/__/g.yo sgyu yi khug mgo chen po can/__/bdag rang la bsam zhing skyo ba 'phel/__/da mi tshe'i lhag ma ji tsam gnas/__/las don med mang pos mgo mi 'khor/__/chos zab mo sgrub la brtson pa yis/__/tshe mtha' ru 'khyol bar byin gyis rlobs/__/skyabs dran chog rgyal po khyed rnams mkhyen/__ces pa'ang chu rta zla 10tshes 4la sems skyo ba'i gdung glu blo gros rgya mtshos bris pa'o//___//
