JKCL-KABUM-08-NYA-011-041

Previous Text Back to Volume PageNext Text

ལོག་ལྟའི་སྨག་འབྱིན་མུན་སེལ་ཉི་མ།

Wylie title	log lta'i smag 'byin mun sel nyi ma
Location	chos kyi blo gros bka' 'bum Volume 8, sde tshan 11, Text 41, Pages 389-393 (Folios 53a3 to 55a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. log lta'i smag 'byin mun sel nyi ma. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 389-393. Bir, H.P.: Khyentse Labrang, 2012.
Genre	Advice - zhal gdams
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/sun-to-banish-darkness-of-wrong-views
Colophon	ཅེས་པའང་རྒྱལ་བའི་བསྟན་པ་མཐའ་དག་ལ་དད་པ་ཐོབ་ཅིང་ཆོས་མེད་ཀྱི་སྙོམས་ལས་དྲེག་པ་རྒྱལ་ཁམས་པ་ཞིག་གིས་སྤྲིང་བ་འདིས་ཀྱང་འཇིག་རྟེན་ན་ཕན་པ་རྒྱ་ཆེན་པོ་འབྱུང་བར་གྱུར་ཅིག། །སརྦ་མངྒ་ལཾ།།
	ces pa'ang rgyal ba'i bstan pa mtha' dag la dad pa thob cing chos med kyi snyoms las dreg pa rgyal khams pa zhig gis spring ba 'dis kyang 'jig rten na phan pa rgya chen po 'byung bar gyur cig/__/sarba mang+ga laM//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༈ ལོག་ལྟའི་སྨག་འབྱིན་མུན་སེལ་ཉི་མ་བཞུགས་སོ། །སྲིད་པའི་དྲྭ་བ་བྲལ་མཛད་ཅིང་། །ཉེས་བརྒྱའི་ཚངས་ཚིངས་བསྲེག་མཛད་པ། །བློ་གཏེར་རྡོ་རྗེ་རྣོན་པོ་ཡི། །ཞབས་ལ་བཏུད་ནས་འདི་བརྗོད་བྱ། །སྲིད་པའི་མུན་པས་ཁེབས་པ་ཡི། །ལོག་ལྟ་རྒྱུད་ལྡན་གང་ཟག་གིས། །ཆོས་ལ་སྡང་བའི་ཅ་ཅོ་ནི། །རྣམ་པར་སྤེལ་བ་དོན་རེ་ཆུང་། །རང་ལྟ་མཆོག་ཏུ་འཛིན་པ་ནི། །སྒོམ་སྤང་སྒྲིབ་པའི་དབྱེ་གཞི་ཡིན། །ཡང་དག་ལྟ་བ་ལྡན་གྱུར་ན། །ཆགས་སྡང་མདུད་པ་རང་སར་གྲོལ། །སྤྲོས་པའི་གཟེབ་ཏུ་འཆིང་བ་མེད། །མགོན་པོ་ཀླུ་སྒྲུབ་ཡབ་སྲས་ཀྱིས། །སྟོང་དང་མི་སྟོང་ལ་སོགས་ཀུན། །སྨྲ་བའང་སྤྲོས་མཐའ་ཡིན་གསུངས་ན། །གསར་རྙིང་ཆོས་དང་གང་ཟག་ལ། །བཟང་ངན་འབྱེད་ཅིང་རང་ཕྱོགས་བསྟོད། །གཞན་ཕྱོགས་སྨད་ལ་ཞུགས་པ་ནི། །སྐྱེ་བོ་ངན་པའི་ལུགས་སྲོལ་ཡིན། །འཇམ་མགོན་རྒྱལ་བ་གཉིས་པ་ནི། །བློ་བཟང་གྲགས་པའི་དཔལ་འབར་བ། །མཉམ་མེད་ཇོ་བོ་ཡབ་སྲས་ཀྱི། །བརྒྱུད་པའི་བཀའ་སྲོལ་འཛིན་པ་ཡིན། །ལྟ་སྤྱོད་རྣམ་དག་ཟུང་འབྲེལ་གྱི། །རྣམ་ཐར་གཙང་མ་བདག་གིར་བཞེས། །ཐུབ་གསུང་གདམས་པར་ཤར་བ་དང་། །བསྟན་པ་འགལ་མེད་ལེགས་རྟོགས་ཤིང་། །ཀུན་ལ་སྙོམས་ཤིང་བྱམས་པ་འདིས། །བརྒྱུད་པ་དེ་ཡི་ཕྱག་བཞེས་ཡིན། །རང་ཉིད་དེ་ཡི་སྒོར་ཞུགས་ཏེ། །དེ་དང་འགལ་ཟླར་བསྒྲུབ་པ་ནི། །བསྟན་པ་དེ་ལ་རྨ་འབྱིན་ནོ། །ཨོ་རྒྱན་པདྨ་འབྱུང་གནས་དང་། །ལྷ་གཅིག་དི་པཾ་ཀ་ར་གཉིས། །ཐུགས་བརྒྱུད་གཅིག་པ་ཡིན་པར་ནི། །བཀའ་གདམས་གླེགས་བམ་ལས་གསལ་ཞིང་། །བདག་ཉིད་ཆེན་པོ་ཙོང་ཁ་པའི། །བླ་མ་ལས་ཀྱི་རྡོ་རྗེ་ཡི། །ཕྱག་རྡོར་སྙན་བརྒྱུད་ཆེན་པོ་དང་། །ཞུས་ལན་བདུད་རྩི་སྨན་མཆོག་སོགས། །ཕྱག་རྫོགས་དགོངས་པའི་དོན་དང་མཐུན། །པཎ་ཆེན་བློ་བཟང་ཆོས་རྒྱན་དང་། །ངག་དབང་བློ་བཟང་རྒྱ་མཚོ་སོགས། །རྙིང་མའི་ཟབ་ཆོས་ཐུགས་ཉམས་བཞེས། །གཞན་ཡང་མཁས་གྲུབ་ཆེ་རྣམས་ཀྱིས། །སྔ་འགྱུར་བཀའ་གཏེར་ཆོས་མཛོད་རྣམས། །གསན་བཞེས་མཛད་ཅིང་འགྲོ་དོན་སྤེལ། །རྟ་མགྲིན་ཡང་གསང་ཁྲོས་པ་དང་། །སྐྱེར་སྒངས་དག་སྣང་རྟ་མགྲིན་སོགས། །གཏེར་ཆོས་དགེ་ལྡན་པ་རྣམས་ཀྱིས། །ཐུགས་དམ་གསང་བའི་མཐིལ་དུ་མཛད། །དེ་སོགས་ལོ་རྒྱུས་ཁུང་མ་དང་། །འཐད་ལྡན་ལུང་དང་རིགས་པ་མང་། །དེ་ཕྱིར་སྔ་འགྱུར་མཆོག་བསྟན་དང་། །ཟབ་མོའི་ཆོས་དང་གང་ཟག་ལ། །སྡང་ག་ནམ་ཡང་མ་མཛད་ཅིག། རང་གི་གྲུབ་མཐའི་ཆེ་བ་ཙམ། །བརྗོད་ལ་སུས་ཀྱང་བཀག་པ་མེད། །སྙིང་ནས་རང་ཉིད་སྡང་བ་དང་། །གཞན་དག་དེ་རྗེས་ཁྲིད་པ་རྣམས། །ལོག་པའི་ལམ་ཞུགས་དད་པ་ལྡོག། །སྡིག་པའི་ཕུང་པོ་ཤིན་ཏུ་ལྕི། །ངན་སོང་དམྱལ་བའི་རྒྱུར་བྱེད་པས། །དེ་ལ་བག་ཡོད་མཛད་པར་རིགས། །དམ་པར་ཕལ་ཆེའི་གང་ཟག་གིས། །དམ་པའི་སྤྱོད་དང་མཐུན་པ་ཡིས། །གཞན་ཕན་ལྷག་བསམ་རྨད་བྱུང་གིས། །བསྟན་འགྲོར་ཕན་བདེ་སྒྲུབ་པར་རིགས། །གསུང་རབ་རྡོ་ལ་བསྐོར་བ་དང་། །སཱཙྪ་ཇོ་དར་རླུང་འཁོར་རྣམས། །རླུང་གིས་རྫི་ཕྱོགས་ཕོགས་པ་ཡིས། །ཐར་པའི་ས་བོན་ཐེབས་པར་འགྱུར། །དགེ་ཆོས་དེ་འདྲ་བཀག་མ་བྱེད། །སྨན་མདོ་སྦྱང་རྒྱུད་ལ་སོགས་ནས། །གསལ་བར་བསྟན་པའི་ཞེ་དགུ་ཡིས། །བདུན་ཚིག་ཆོ་ག་ལ་སོགས་དང་། །ཨོ་རྒྱན་གུ་རུའི་རྣམ་པར་ཐར། །པདྨ་བཀའ་ཡི་ཐང་ཡིག་དང་། །བླ་མའི་གསང་སྔགས་སིདྡྷི་དང་། །ཞི་ཁྲོ་ལ་སོགས་འགོག་བྱེད་ན། །རང་གི་རྩ་བའི་བླ་མ་ཡི། །ཐུགས་དམ་རྒྱུད་བསྐུལ་མཚན་སྔགས་དང་། །གསང་བ་འདུས་པ་ལས་བྱུང་བའི། །དཀྱིལ་འཁོར་ལྷ་ཚོགས་ཐམས་ཅད་ཀྱང་། །འདོན་བསྒོམ་བཟླས་སོགས་མི་རུང་པའི། །གནོད་པ་ངེས་པར་འབབ་པས་ན། །དེ་ཕྱིར་སྒོ་གསུམ་བག་ཡོད་མཛོད། །སྡེ་དགོན་སྦྱིན་བདག་སོ་སོ་ཡི། །གནའ་བོའི་ལུགས་སྲོལ་ཇི་ཡོད་ཀྱིས། །འདོན་སྒྲུབ་མཆོད་བསྟོད་བྱ་རྒྱུ་རྣམས། །སྔོན་གྱི་ལུགས་བཞིན་བྱེད་གྱུར་ན། །ཤིན་ཏུ་དགེ་ཞིང་བཀྲ་ཤིས་འཕེལ། །ཁ་མཁས་ཅོལ་ཆུང་རྗེས་འབྲངས་ནས། །སྔར་ཡོད་བསྐྱུར་ཏེ་གསར་ངས་ཀྱི། །བྱ་བྱེད་མང་པོ་འཕེལ་གྱུར་ན། །འཇིག་རྟེན་མི་བདེའི་རྩ་བ་བྱེད། །དེང་སང་བསྟན་པ་མར་འགྲིབ་ཅིང་། །སྙིགས་མའི་རྩོད་པ་བྱས་པའི་དུས། །གྲུབ་མཐའི་ཆགས་སྡང་རྩོད་པ་ཡི། །ཅི་ཞིག་ཕན་ཏེ་དགོས་པ་ཆུང་། །དེ་བས་དབུ་མའི་དབྱིངས་སུ་བཞུགས། །འདིར་དགེས་སྐྱེ་འགྲོ་མ་ལུས་ཀུན། །ངེས་འབྱུང་བྱང་སེམས་རྒྱུད་ལ་སྐྱེ། །ཡང་དག་ལྟ་བའི་འབྱོར་པ་འཕེལ། །ཚོགས་གཉིས་རྫོགས་ཤིང་སྒྲིབ་དག་ནས། །སྐུ་གཉིས་གོ་འཕང་མྱུར་ཐོབ་ཤོག། ཅེས་པའང་རྒྱལ་བའི་བསྟན་པ་མཐའ་དག་ལ་དད་པ་ཐོབ་ཅིང་ཆོས་མེད་ཀྱི་སྙོམས་ལས་དྲེག་པ་རྒྱལ་ཁམས་པ་ཞིག་གིས་སྤྲིང་བ་འདིས་ཀྱང་འཇིག་རྟེན་ན་ཕན་པ་རྒྱ་ཆེན་པོ་འབྱུང་བར་གྱུར་ཅིག། །སརྦ་མངྒ་ལཾ།། །།

[edit]

!_log lta'i smag 'byin mun sel nyi ma bzhugs so/__/srid pa'i drwa ba bral mdzad cing /__/nyes brgya'i tshangs tshings bsreg mdzad pa/__/blo gter rdo rje rnon po yi/__/zhabs la btud nas 'di brjod bya/__/srid pa'i mun pas khebs pa yi/__/log lta rgyud ldan gang zag gis/__/chos la sdang ba'i ca co ni/__/rnam par spel ba don re chung /__/rang lta mchog tu 'dzin pa ni/__/sgom spang sgrib pa'i dbye gzhi yin/__/yang dag lta ba ldan gyur na/__/chags sdang mdud pa rang sar grol/__/spros pa'i gzeb tu 'ching ba med/__/mgon po klu sgrub yab sras kyis/__/stong dang mi stong la sogs kun/__/smra ba'ang spros mtha' yin gsungs na/__/gsar rnying chos dang gang zag la/__/bzang ngan 'byed cing rang phyogs bstod/__/gzhan phyogs smad la zhugs pa ni/__/skye bo ngan pa'i lugs srol yin/__/'jam mgon rgyal ba gnyis pa ni/__/blo bzang grags pa'i dpal 'bar ba/__/mnyam med jo bo yab sras kyi/__/brgyud pa'i bka' srol 'dzin pa yin/__/lta spyod rnam dag zung 'brel gyi/__/rnam thar gtsang ma bdag gir bzhes/__/thub gsung gdams par shar ba dang /__/bstan pa 'gal med legs rtogs shing /__/kun la snyoms shing byams pa 'dis/__/brgyud pa de yi phyag bzhes yin/__/rang nyid de yi sgor zhugs te/__/de dang 'gal zlar bsgrub pa ni/__/bstan pa de la rma 'byin no/__/o rgyan pad+ma 'byung gnas dang /__/lha gcig di paM ka ra gnyis/__/thugs brgyud gcig pa yin par ni/__/bka' gdams glegs bam las gsal zhing /__/bdag nyid chen po tsong kha pa'i/__/bla ma las kyi rdo rje yi/__/phyag rdor snyan brgyud chen po dang /__/zhus lan bdud rtsi sman mchog sogs/__/phyag rdzogs dgongs pa'i don dang mthun/__/paN chen blo bzang chos rgyan dang /__/ngag dbang blo bzang rgya mtsho sogs/__/rnying ma'i zab chos thugs nyams bzhes/__/gzhan yang mkhas grub che rnams kyis/__/snga 'gyur bka' gter chos mdzod rnams/__/gsan bzhes mdzad cing 'gro don spel/__/rta mgrin yang gsang khros pa dang /__/skyer sgangs dag snang rta mgrin sogs/__/gter chos dge ldan pa rnams kyis/__/thugs dam gsang ba'i mthil du mdzad/__/de sogs lo rgyus khung ma dang /__/'thad ldan lung dang rigs pa mang /__/de phyir snga 'gyur mchog bstan dang /__/zab mo'i chos dang gang zag la/__/sdang ga nam yang ma mdzad cig/__rang gi grub mtha'i che ba tsam/__/brjod la sus kyang bkag pa med/__/snying nas rang nyid sdang ba dang /__/gzhan dag de rjes khrid pa rnams/__/log pa'i lam zhugs dad pa ldog/__/sdig pa'i phung po shin tu lci/__/ngan song dmyal ba'i rgyur byed pas/__/de la bag yod mdzad par rigs/__/dam par phal che'i gang zag gis/__/dam pa'i spyod dang mthun pa yis/__/gzhan phan lhag bsam rmad byung gis/__/bstan 'gror phan bde sgrub par rigs/__/gsung rab rdo la bskor ba dang /__/sAts+tsha jo dar rlung 'khor rnams/__/rlung gis rdzi phyogs phogs pa yis/__/thar pa'i sa bon thebs par 'gyur/__/dge chos de 'dra bkag ma byed/__/sman mdo sbyang rgyud la sogs nas/__/gsal bar bstan pa'i zhe dgu yis/__/bdun tshig cho ga la sogs dang /__/o rgyan gu ru'i rnam par thar/__/pad+ma bka' yi thang yig dang /__/bla ma'i gsang sngags sid+d+hi dang /__/zhi khro la sogs 'gog byed na/__/rang gi rtsa ba'i bla ma yi/__/thugs dam rgyud bskul mtshan sngags dang /__/gsang ba 'dus pa las byung ba'i/__/dkyil 'khor lha tshogs thams cad kyang /__/'don bsgom bzlas sogs mi rung pa'i/__/gnod pa nges par 'bab pas na/__/de phyir sgo gsum bag yod mdzod/__/sde dgon sbyin bdag so so yi/__/gna' bo'i lugs srol ji yod kyis/__/'don sgrub mchod bstod bya rgyu rnams/__/sngon gyi lugs bzhin byed gyur na/__/shin tu dge zhing bkra shis 'phel/__/kha mkhas col chung rjes 'brangs nas/__/sngar yod bskyur te gsar ngas kyi/__/bya byed mang po 'phel gyur na/__/'jig rten mi bde'i rtsa ba byed/__/deng sang bstan pa mar 'grib cing /__/snyigs ma'i rtsod pa byas pa'i dus/__/grub mtha'i chags sdang rtsod pa yi/__/ci zhig phan te dgos pa chung /__/de bas dbu ma'i dbyings su bzhugs/__/'dir dges skye 'gro ma lus kun/__/nges 'byung byang sems rgyud la skye/__/yang dag lta ba'i 'byor pa 'phel/__/tshogs gnyis rdzogs shing sgrib dag nas/__/sku gnyis go 'phang myur thob shog/__ces pa'ang rgyal ba'i bstan pa mtha' dag la dad pa thob cing chos med kyi snyoms las dreg pa rgyal khams pa zhig gis spring ba 'dis kyang 'jig rten na phan pa rgya chen po 'byung bar gyur cig/__/sarba mang+ga laM//___//