JKCL-KABUM-08-NYA-011-028-wylie
!_zhal gdams mdor bsdus bzhugs so/__/dpal ldan rdo rje sems dpa'i zhabs la phyag 'tshal lo/__/de yang rang re rnams kyis rnyed dka'i dal 'byor gyi rten 'di lta bu bsod nams kyi tshogs rgya chen po bsags pa las/__da res kyi skabs 'dir skyon med pa'i mi lus thob pa las skye ba phyi ma yang yang rnyed pa dka' ba'i tshul la legs par bsam/__de yang 'jig par sla ba 'dus byas mi rtag pa'i mtshan nyid skye ba'i mthar 'chi ba las ma 'da' shing rgan gzhon nges med/__'chi rkyen nges med kyi tshul la yang dran par byas pas blo sna chos phyogs la gzhol zhing chos mthar phyin cing /__brtson 'grus kyi rlung dang tshe 'dir snang gi bya bzhag thams cad chod pa'i thabs 'di las zab pa med cing /__'chi ba thog tu bab na rigs drug gang rung du skye ba len pa las ma 'das shing 'khor ba spyi khyab khams gong ma la khyab pa 'du byed kyi sdug bsngal dang /__ngan song gsum sogs sdug bsngal gyi sdug bsngal/__mtho ris rnams 'gyur ba'i sdug bsngal/__bye brag dmyal ba tsha grangs sogs kyi sdug bsngal yid la dran par dgos/__de yang sdug bsngal thams cad kyi 'byung khungs rten gzhi ni zag bcas nye bar len pa'i phung po lnga po 'di yod pas de las nyes pa thams cad 'byung ba yin/__de yi rgyu rtsa ba ni kun 'byung nyon mongs pa'i tshogs thams cad yin la de yang dug gsum du ma 'dus pa med cing /__yul yid du 'ong ba la brten nas 'dod chags mi mthun pa la brten nas zhe sdang /__bar ma la brten nas gti mug 'byung ba ste de gsum gang rung gis kun nas bslangs te bskyed pa'i las gtso che ba'i dbang du byas na mi dge ba bcu po'i nang du 'dus pa yin pas de la blang dor ma nor ba zhig phra zhib nas brtson pa la nan tan dang de la 'jig rten yang dag gi lta ba zer/__rgyu 'bras bslu ba med pa la nges shes bskyed pa yang yang gal che/__mi dge bcu'i ldog phyogs lus ngag yid gsum gyi dge bcu lha mi'i bde 'bras tsam 'dod nas bsags pa skyes bu chung ngu /__rang nyid gcig pu zhi bde don gnyer gyi 'khor ba la nges 'byung gi blos dge ba bsags pa thar pa'i cha dang mthun pa skyes bu 'bring nyan rang /__sems can thams cad la phan 'dod pa'i blos bsags pa rnams theg chen thar pa cha mthun skyes bu chen po byang chub sems dpa'i lam rnams las rang re rnams kyi nyams len skyes bu chen po'i lam ltar bya dgos/__de yang gzhan phan lhag pa'i bsam pas rang 'dod kyi 'khri ba gtan nas ma gos pa zhig gis gzhi bzung nas rang gi sgo gsum gyi dge ba'i bya ba dmigs bcas dmigs med che phra thams cad dngos brgyud nas mkha' mnyam sems can rnams la phan pa'i phyir du spyod cing yongs su bsngo ba dang /__smon lam khyad par can gdab/__byams pa dang snying rje shas mi bzod pa nam mkha' ltar kun la khyab par bsgom/__de yang sems bskyed yul bskyed mkhan skyes pa'i bya ba thams cad ngo bor rang bzhin gyi stong pa las snang cha'i rten 'brel ma 'gags par 'char ba 'di la stong nyid snying rje zung 'jug kyang zer/__bden gnyis zung 'jug/__stong rten 'byung dbyer med snang stong zung 'jug sogs don gcig la ming gi rnam grangs du ma brjod pa yang stong nyid snying rje zung 'jug gi gnad 'dis nye bar mtshon pa yin/__de nyid byang chub kyi sems dngos yin/__des srid zhi mtha' gnyis 'gog pa'i myang 'das chen po'i go 'phang thob par 'gyur ro/__/de yi bslab bya bdag gzhan brje ba'i blo sbyong yang yang bsgom zhing /__dkon mchog la dad pa/__sems can la snying rje shugs drag po/__byang chub kyi spyod pa rgya mtsho lta bu la 'dun cing smon pa dang /__gzhan phan don gnyer gyi bsam pa la g.yo sgyu med pa kho na gal che/__de lta bu'i bsam pa rin po che byang chub sems kyi blo bcos shing dge ba che phra ci byas thams cad la 'dis rtsis thebs par bya dgos pa ni med du mi rung ba yin no/__/gnad de lta bu'i gzhi bzung nas skyabs 'gro nas brtsam sngon 'gro'i bsags sbyangs mthar phyin pa dang /__khyad par stobs bzhi'i gnad dang ldan pa'i yig brgya ltung bshags/__dri med bshags rgyud sogs la nan tan 'bad/__byin rlabs kyi gzhi bla ma'i rnal 'byor yin pas/__rtsa ba'i bla ma sangs rgyas su thag bcad/__skyabs gnas kun 'dus su bsgom/__bka' drin dran cing gus pa bskyed/__dad dang dam tshig la ngos lkog med cing dka' spyad snying rus kyi mgo btsugs nas bla ma'i rnal 'byor la brtson na byin rlabs 'byung bar the tshom med/__de lta bu'i sngon 'gro'i rim pas rgyud sbyangs nas phyag rdzogs zung 'jug gi gzhi lam 'bras gsum gyi gnad mdor dril na/__rang gi sems nyid gdod nas skye 'gags gnas gsum dang dngos po dang mtshan mar ma grub yod med yin min thams cad las 'das pa'i gzhi sems kyi chos nyid rig pa gsal stong zung 'jug 'khor 'das kun khyab gzod nas rnam par dag pa 'di ni gnyug ma gzhi yi bzhugs tshul dang /__de nyid bla ma'i byin rlabs dang rang gi mos gus 'dzoms pas rang gnas kyi lta ba de ngo 'phrod cing dus gsum gyi rnam rtog dang bral ba'i tha mal gyi shes pa de la yid dpyod blos 'dzin gyis ma bcings ma bcos bzo med gnyug ma rang bab kyi ngang du chos nyid rang gnas kyi dran pas yengs med du bsgom bya sgom byed du bral bar 'jog pa na rlung so rig pa'i ye shes kyi rten med gzhi rtsa bral ba yul med rang gsal chen por nyams su myong ba de yi ngo bo smra bsam brjod bral du 'char ba ni lam bsgom pa'i skabs dang /__de'i ngang las spyod pa la spangs blang med par gang shar gang snang rig pa'i dbyings su ro mnyam pa'i spang gnyen gzhan nas btsal ma dgos pa rang shar rang grol bya lam rjes med du 'gro ba 'di ka spyod pa'i mthar thug/__de ltar goms pa la brten nas rig pa'i dbyings ka dag stong chen dang /__ye shes lhun grub gnyis gdod nas 'du 'bral med pa'i yon tan rgya mtsho lta bu rang chas su bzhugs pa 'bras bu gzhan nas btsal du med pa nang gi yon tan phyi gsal du shar ba la grol ba mthar phyin pa'am 'bras bu zhes ming gi brjod pa yin no/__/de lta bu'i lam gyi srog bzung ba dngos gzhi dmigs med mtshan nyid pa yin no/__/dge ba gang byas rnams dus thams cad du dmigs med kyi bsngo bas rgyas thebs par gal che/__/mdor na dad pa/__nges 'byung /__zhen log/__snying rje/__stong nyid/__byang sems/__mos gus/__dam tshig/__bskyed rdzogs/__bden med zhen med ma bcos 'dzin bral rang gnas rnams gdams ngag gi mdo chings bsdus don yin pas de ltar nyams su blang bar zhu/__ces pa rang slob pad+ma theg mchog gi gsung bskul ngor shin tu mdor bsdus nas bkod pa zhib tu bla ma gong ma rnams kyi zhal gdams gsungs mgur khrid yig sogs las shes par bya ba kho na'o/__/chos kyi blo gros pas so//___//
