JKCL-KABUM-08-NYA-011-026-wylie
!_zhal gdams mdor bsdus bzhugs/__bla ma la phyag 'tshal lo/__/dal 'byor gyi mi lus thob pa 'di/__/gtan bde sgrub pa'i gzhi ma yin/__/da res chud zos ma btang la/__/legs nyes sa mtshams 'di yin no/__/bu na tshod gzhon par ma sems shig/__myur du 'chi bar 'ong gi gda'/__/mthong dang thos la brtags shing dpyad/__/de rang gi steng du legs par bsgom/__/bde sdug gi gzhi ma las su ltos/__/dkar nag blang dor brtson par gyis/__/'khor ba rigs drug sdug bsngal de/__/rang gi sgo gsum steng du blang /__/yang yang bsgom na snying rlung 'khrugs/__/'khrugs kyang ngan song gnas mi 'phen/__/thar pa'i phan yon la sems shig/__bu bla ma'i gdams pa snying la 'chang /__/byams dang snying rje byang sems dang /__/dad dang mos gus dam tshig rnams/__/lam gyi gzhi rten yin pas na/__/gal chung snyom las ma bskur la/__/g.yo sgyu tshul 'chos ngos lkog spang /__/rang gi skyon rnams ma sbed cig/__chos rnams kun gyi rtsa ba ni/__/sems 'dul ba la rag las phyir/__/chos rnams gnad thog 'gro mi 'gro/__/nyon mongs chos tshul la brtag dgos/__/dngos grub kun gyi rtsa ba ni/__/bla ma sangs rgyas mthong bar dgos/__/lta bsgom kun gyi rtsa ba ni/__/gzhi rtsa med pa'i sems nyid 'di/__/ngo shes rtsal rdzogs brtan thob dgos/__/spyod pa kun gyi mdo dril ni/__/bzang ngan ro snyoms rang grol dgos/__/phyi ma legs pa'i rtsa ba ni/__/tshe 'di zhen pa log par dgos/__/de kun grogs su dben rir brten/__/mdo sde rnams dang man ngag gi__/don la yang yang 'dris par gyis/__/bu de ltar gdams pa snying la zungs/__/nged la de ltar ma mchis rung /__/phan par gdams la nyes med cing /__/khyed kyi 'di ltar bskul ba la/__/brten nas gang dran shar mar bris/__/'jam dbyangs chos kyi blo gros pas so//___//
