JKCL-KABUM-08-NYA-011-015-wylie
!_dus gsum sangs rgyas 'dus pa'i ngo bo/__/mtshungs med dpal ldan bla ma'i zhabs pad/__/rab gus gdung bas snying dbus mchod nas/__/gdams pa'i bslab bya nyung ngur dbye'o/__/dal 'byor thob pa da res tsam yin/__/'di nyid don med chud zos byas na/__/rin chen gling nas stong par log 'dra/__/tshe ni mi rtag ston ka'i sprin 'dra/__/'chi rkyen nges med nam 'chi cha med/__/myur du dam pa'i lha chos la rems/__/dam chos snying po rgyu 'bras spang blang /__/sdig pa'i las la shin tu 'dzem zhing /__/dge ba che phra sgrub la nan tan/__/sgo gsum dal med yang yang brtson dang /__/nang pa sangs rgyas pa yi khyad chos/__/'di phyi'i re ltos bla ma dkon mchog/__dad mos drag pos gsol ba thob dang /__/bslu ba med pas skyabs gzhan ma 'tshol/__/rigs drug sems can pha mar gyur rnams/__/sdug bsngal rgyu 'bras rtag tu spyod la/__/snying rje chen po yang yang bskyed cing /__/rtag tu gzhan phan lhag bsam bzang po/__/phyogs ris med par phan pa sgrub dang /__/'di dang phyi ma bde bar 'ong ngo /__/dran chog rgyal po rtsa ba'i bla mar/__/gsol btab dbang blang thugs yid bsre nas/__/rang sems skye med chos sku'i rang zhal/__/yengs med 'dzin bral blo yis ma bslad/__/rang bab zhog dang sa ler gsal 'ong /__/de la rtag tu goms par byas na/__/ma rig srid pa drung nas 'byin 'gro/__/chos spyod lhag lha'i bsnyen sgrub la 'bad/__/'dus byas dge ba khyad du ma bsad/__/dmigs bcas dmigs med tshogs gnyis zung 'jug/__de las sku gnyis 'bras bu thob 'ong /__/de ltar gdams pa nyung ngu 'di yang /__/ban tshang dbu mdzad 'jam dbyangs bzang pos/__/bskul ngor chos kyi blo gros de yis/__/bris pas byang chub thob par gyur cig/__mang+ga laM//___//
