JKCL-KABUM-08-NYA-010-004-wylie
!_oM swa sti/__dpal ldan bla ma 'jam pa'i rdo rje yi/__/zhabs la btud de gdams pa'i mgrin gsos spel/__/shin tu rnyed dka'i rten 'di da phyin nas/__/thob par dka' bas dal 'byor don yod mdzod/__/tshe ni mi rtag chu yi chu bur 'dra/__/'chi bdag bdud ni dgong kha'i grib so bzhin/__/'khor ba'i sdug bsngal bzod par dka' ba la/__/bsam nas rgyu 'bras spangs blang shin tu gces/__/bla ma mchog gsum skyabs kyi snying por zungs/__/'gro kun pha mar shes pas snying rje sgom/__/tshogs bsags sgrib sbyongs lam la 'bad pa dang /__/bla mar mos gus gsol 'debs rtag tu brtson/__/lus lha ngag sngags sems gyi 'phro 'du kun/__/ye shes chen por lam du khyer ba dang /__/zag bcas zag med dge tshogs 'gro la bsngo/__/smon lam rgyal po bzang spyod 'don la rem/__/sems kyi gnad 'di ma shes gyi nar 'phyan/__/de yang 'khrul pa'i sems kyi rtsar bcad pas/__/lus ngag yid gsum gzhi med rtsa bral du/__/gtan la dbab cing da lta'i rig pa ni/__/rang gsal 'gag med dbyings dang 'du 'bral med/__/gsal rig stong gsum sku gsum dbyer med pa'i/__/rang byung ye shes mtshan ma'i spyod yul bral/__/gzung 'dzin rtog pas ma bslad rang bab zhog/__rnam rtog gang shar gdam nga med par grol/__/de ltar nyams blangs yengs med brtson byas na/__/tshe 'di'am ni bar dor grol ba ste/__/gdod ma'i sa la gtan srid zin par 'gyur/__/de skad smra ba blun rmongs chos blo la/__/dad pa ldan pas bskul ba ma gcog tsam/__/mdor bsdus nyid du phul ba'i dge ba yis/__/sems rgyud grol zhing don gnyis lhun grub shog/__/mang+ga laM//___//
