JKCL-KABUM-07-JA-018-wylie
@#/__/rje btsun rdo rje rnal 'byor ma'i sgrub thabs snying por dril ba mkha' spyod lam bzang zhes bya ba bzhugs so/__/
zab khrid thob pa rnams kyi nyams su blang bar bya'o/__/bla ma rdo rje rnal 'byor ma'i/__/zhabs kyi pad+mor gus btud nas/__/gang de'i myur lam la brten te/__/mkha' spyod go 'phang thob 'dod na/__/'khor lo sdom pa yab yum gyi/__/dbang dang byin rlabs zab mo yis/__/rgyud smin dam tshig sdom ldan pas/__/bskyed rim rnal 'byor bcu gcig gi/__dang po nyal ba'i rnal 'byor ni/__/rang dang snang ba thams cad kun/__/lhar snang sgyu ma lta bu'i ngang /__/gnyid kyi 'od gsal dbyings su 'jug__/gnyis pa ldang ba'i rnal 'byor ni/__/dpa' bo DA ki'i sngags kyi sgras/__/bskul nas gnyid las sad par mos/__/bskyed rim gsal ba'i ngang nas ldang /__/gsum pa bdud rtsi myong ba ni/__/dngos sam yid kyis bdud rtsi'i bcud/__/oM AHhU~M gis myang ba las/__/zag med bde bas tshim par bsam/__/bzhi pa tshad med rnal 'byor la/__/dang po skyabs su 'gro ba ni/__/tha mal snang ba dbyings thim par/__/snod bcud dag pa'i zhing gi dbus/__/mdun mkhar bla ma rdo rje chos/__/skyabs kun 'dus pa'i ngo bor gsal/__/pha mas thog drangs bdag gzhan 'gro/__/rtse gcig gus pas skyabs 'gror dmigs/__/bdag dang mkha' mnyam 'gro ba ma lus kun/__/dus 'di nas bzung byang chub snying po'i bar/__/bla ma sangs rgyas chos dang tshogs mchog la/__/mi phyed gus pa chen pos skyabs su mchi/__/ci nus rjes su mos gus ches/__/bla ma mchog dang dkon mchog rin po che/__/rnam pa gsum la phyag 'tshal skyabs su mchi/__/khyod kyis bdag dang sems can thams cad kyi/__/lus ngag yid gsum byin gyis brlab tu gsol/__/zhes pas gsol btab tshogs zhing gi/__'od kyis bdag sogs 'gro ba kun/__/sgrib dag sku bzhi'i go 'phang bkod/__/skyabs yul rang la thim par bsam/__/gnyis pa sems bskyed dngos gzhi ni/__/bdag gis rdzogs pa'i sangs rgyas thob byas nas/__/'gro kun srid pa'i mtsho las bsgral bar bya/__/de yi ched du rdo rje rnal 'byor ma'i/__/lam gyi rim pa nyams su blang bar bgyi/__/lan gsum sogs bya/__gsum pa rdor sems sgom bzlas ni/__rang gi spyi bor pad zlar rdo rje sems/__/rab dkar rdo rje dril 'dzin snyems ma dkar/__/gri thod 'dzin pa'i yum dang mnyam par sbyor/__/dar dang rus pa'i rgyan rdzogs skyil krung bzhugs/__/yab kyi thugs kar zla steng hU~M dkar po/__/de las 'od 'phros de bzhin gshegs kun gyi/__/byin rlabs ye shes bdud rtsi spyan drangs thim/__/bla ma bcom ldan rdo rje sems dpa' yis/__/bdag sogs 'gro kun sdig ltung sbyang mdzad gsol/__/hU~M las bdud rtsi'i rgyun babs rang nyid kyi/__/spyi gtsug nas zhugs nad gdon sdig sgrib kun/__/yongs su sbyangs te lus kun gang bar gyur/__/ces brjod stobs bzhi'i gnad dang bcas/__yi ge brgya pa ci nus mthar/__mgon po bdag ni mi shes rmongs pa ste/__/dam tshig las ni 'gal zhing nyams/__/bla ma mgon pos skyabs mdzod cig__/gtso bo rdo rje 'dzin pa ste/__/thugs rje chen po'i bdag nyid can/__/'gro ba'i gtso la bdag skyabs mchi/__/gsang gsum rtsa ba yan lag gi/__dam tshig nyams chag mthol zhing bshags/__/sdig sgrib nyes ltung dri ma'i tshogs/__/ma lus byang zhing dag mdzad gsol/__/rdor sems 'od zhu rang la thim/__/rang lus dag pa'i shel ltar bsam/__/lnga pa bla ma'i rnal 'byor ni/__/mdun gyi nam mkhar ye shes gzhal med khang /__/de dbus seng khri pad zla nyi ma'i steng /__/rtsa ba'i bla ma sangs rgyas rdo rje chos/__/dmar gsal rdo rje dril 'dzin longs sku'i chas/__/mtha' skor pad zlar brgyud pa'i bla ma rnams/__/dpa' bo rdo rje chos kyi rnam par bzhugs/__/gnas gsum oM AHhU~M gis mtshan pa las/__/'od 'phros skyabs yul thams cad spyan drangs thim/__/skyabs gnas ma lus 'dus pa'i ngo bor gyur/__/skyabs kun 'dus zhal rtsa brgyud bla ma la/__/gsol ba 'debs so bdag rgyud byin gyis rlobs/__/mos gus drag pos gsol btab nas/__/rang gi snying ga nas 'phros pa'i/__/lha mo'i tshogs kyis mchod par bsam/__/phyi mchod nyer spyod nang mchod bdud rtsi'i sprin/__/gsang ba snyoms 'jug bde stong de kho na/__/'khor gsum dmigs med phyag rgya chen po yi/__/rtsa brgyud bla ma'i tshogs rnams mchod par bgyi/__/khyad par nang gi tshogs mchod ni/__/rang sems rnal 'byor ma dpal mkha' la thon/__/phyag g.yas gri gug phung po'i smin mtshams su/__/reg pa tsam gyis thod pa ling gis gog__/thod pa'i sgyed pu gsum gyi khar bzhag pas/__/stong gsum dang mnyam yangs pa'i snod gyur nas/__/rkang g.yon nas brtsams dum bu gtubs te blugs/__oM AHhU~M dang ha hoHhrIHbrjod pas/__/ye shes me 'bar thod pa'i dam rdzas kun/__/zhu zhing khol bas ye shes bdud rtsir gyur/__/thugs nas sprul pa'i lha mo'i tshogs kyis mchod/__/rtsa ba'i bla ma'i zhal du oM AHhU~M/__lan bdun/__/brgyud pa'i bla ma'i zhal du oM AHhU~M/__/gzhan yang mchod 'os zhal du oM AHhU~M/__/gdon bgegs rigs drug 'gro ba kun la sbyin/__/tshogs rdzogs sgrib byang rnam mkhyen myur thob shog__/mthar ni lha mo rang la thim/__/mchod pa'i rdzas sogs mi dmigs bzhag__/spro na maN+Dal ci nus 'bul/__/mjug tu dbang bzhi blang ba ni/__/sangs rgyas kun dngos dpal ldan bla ma la/__/gsol ba 'debs so dbang bzhi bskur du gsol/__/zhes pas gsol btab brgyud pa'i bla ma rnams/__/'khor lo'i mgon po'i thugs kar dbyer med thim/__/de yi gnas gsum rdo rje'i 'bru gsum las/__/dkar dmar mthing ga'i 'od zer rnam pa gsum/__/rim dang cig char byung nas rang nyid kyi/__/gnas gsum thim pas dbang bzhi rdzogs par thob/__/sgrib dag lam bzhi bsgom pa'i snod du gyur/__/byin brlabs sku bzhi'i sa bon rgyud la bzhag__/bla ma 'od zhu snying dbus ba~M yig dang /__/dbyer med spros bral 'od gsal gnyug ma'i ngang /__/mthar ni ba~M yig 'ja' tshon bzhin du yal/__/drug pa bdag lhar bskyed pa ni/__de yi ngang las rang gi snying ga ru/__/e yig dmar po nyis brtsegs yongs gyur las/__/chos 'byung dbus su zla dkyil ba~M yig mthar/__/sngags phreng g.yon 'khor zer gyis lus nang gang /__/sdig sgrib kun byang 'od kyi phung por gyur/__/de nyid yongs gyur chos 'byung gzhal yas dbus/__/sna tshogs pad nyi'i gdan la skad cig gis/__/rang nyid rnam snang rigs bdag dang bcas pa'i/__/rnal 'byor ma dpal zhal gcig phyag gnyis ma/__/zhabs gnyis g.yas brkyangs dus mtshan dmar mo dang /__/g.yon bskum 'jigs byed nag po'i gdong pa mnan/__/sku mdog dmar mo bskal pa'i me lta bu/__/spyan gsum dag pa mkha' spyod phyogs su gzigs/__/phyag g.yas rdo rje'i gri gug thur du brkyangs/__/g.yon pas thod pa khrag bkang steng phyogs bzung /__/phrag pa g.yon par rdo rje'i kha T+wA~M brten/__/bde stong nyams rgyas lang tsho'i gzi 'od 'bar/__/dbu skra gnag snum sil mas sku stod khebs/__/thod skam dbu rgyan do shal ring du 'phyang /__/rus pa'i phyag rgya rnam lngas sku la spras/__/ye shes me phung 'bar ba'i klong du bzhugs/__/bdun pa 'gro ba dag pa ni/__/snying ga'i ba~M yig sngags phreng bcas pa las/__/'od 'phros rigs drug brtan g.yo'i snang ba sbyangs/__/de las phyi snod rdo rje btsun mo'i zhing /__/nang bcud 'gro kun lha yi ngo bor gyur/__/brgyad pa dam ye bsre byas nas/__/lus kyi dkyil 'khor gsal 'debs pa/__/'bar ba'i phyag rgya g.yon du bskor/__phaiM/__slar yang thugs ka'i sa bon 'od zer gyis/__/rnal 'byor ma dpal 'khor bcas spyan drangs shing /__/'gro ba rnal 'byor mar gyur thams cad bcas/__/dzaHhU~M ba~M hoHrang la gnyis med thim/__/ye shes gzhug pa'i rkyen gyis snying ga'i ba~M/__/'od zhu dbus su mkha' spyod dmar mo dang /__/byang nas g.yon skor ljang dmar ser dang dkar/__/mtha' skor sngags kyi yig 'bru so gnyis kyang /__/rnal 'byor ma dpal dmar mo re rer gyur/__/de mthar pad kor 'khyud rgya bcas/__oM yo ga shud+d+haHsarba d+harmAHyo ga shad+d+ho\u0f85 haM/__thabs shes gnyis med bde chen ye shes su/__/bdag dang snang ba thams cad rnam dag pa'i/__/lus kyi gnas su zla ba'i dkyil 'khor steng /__/lte bar oM ba~M dmar mo phag mo dang /__/snying gar ha~M ya~M sngon mo gshin rje ma/__/kha la hrIM mA~M dkar mo rmongs byed ma/__/dpral bar hrIM hrIM ser mo skyod byed ma/__/spyi gtsug hU~M hU~M ljang gu skrag byed ma/__/tshigs brgyad phaT phaT dud ka tsaN+Di ka/__kun kyang lha nyid yi ge'i gzugs su shar/__/dgu pa bzlas pa'i rnal 'byor la/__/thog mar ngag gi bzlas pa ni/__lus dkyil gtso mo'i thugs kar chos 'byung dbus/__/zla steng ba~M mthar sngags kyi phreng bas bskor/__/'od 'phros 'phags mchod 'gro kun sgrib gnyis sbyangs/__/pho nya gsum gyi byin rlabs nus mthu kun/__/rang thim bdag rgyud byin gyis brlab par gyur/__/oM oM oM sarba bud+d+ha DA ki nI ye badz+ra war+N+Na nI ye badz+ra bai ro tsa nI ye hU~M hU~M hU~M phaT phaT phaT swA hA/__dam bcas grangs las mi nyung bzla/__/khyad par lha yi nga rgyal dang /__/rnam pa spyi dang bye brag la/__/sems 'dzin bsam gtan dug dbyung zhing /__/gsal snang mchog tu brtan par bya/__/de nas yid kyi bzlas pa ni/__/kha sbyor rlung bzung steng rlung gis/__/lus dkyil lte bar drangs ba dang /__/lhan cig lha rnams sngags su bsgyur/__/yid ngor klog pa'i tshul gyis bzla/__/phyogs bcu dus gsum rgyal ba sras bcas kyi/__/sku gsung thugs dang yon tan phrin las kyis/__/bdag sogs 'gro kun byin gyis brlab nas kyang /__/mchog thun dngos grub thob par mdzad du gsol/__/zhes pa la 'dod don gsol ba gdab/__/zhar byung rdzogs rim dang po ni/__/chos 'byung grwa bzhir dga' ba 'khyil/__/g.yon du 'khor la sems gtad pas/__/bde ba'i ye shes skyes par bsam/__/gnyis pa lus dbus drang po ru/__/spyi bo nas bzung gsang gnas bar/__/a wa d+hU ti'i yas mar sna/__/dga' 'khyil dkar dmar gsal btab nas/__/gsang gnas dang ni spyi bo ru/__/sems bzung yas mar 'jog 'bab kyis/__/bde stong ye shes bskyed pa'i mthar/__/brjod bral mi rtog ngang du bzhag__/bcu pa bsam mi khyab pa ni/__/snying ga'i ba~M las 'od 'phros khams gsum po/__/'od kyi rnam par gyur nas rang la thim/__/de yang rim gyis thugs srog nA da'i bar/__/'od zhu spros bral stong pa nyid du gyur/__/bsam gyis mi khyab thun min ni/__/zhar byung rdzogs rim bsgom pa'i mthar/__/lus gnad bsrang zhing rlung ro bsal/__/rang gi lus dbus rtsa dbu ma/__/phyi dkar nang dmar spyi gtsug zug__/g.yas g.yon ro rkyang dkar dang dmar/__/yar sna sna bug gnyis su gug__/rtsa gsum mar sna lte ba'i 'og__/sbubs stong gcig tu gyur pa'i dbus/__/ba~M yig rang sems dbyer med pa/__rnal 'byor ma dpal mtheb sor tshad/__/gsal btab de la sems gtad pas/__/rlung phyir 'gro dang lhan cig tu/__/thugs las rang 'dra chung ngu 'phros/__/ro ma'i lam brgyud sna g.yas sgor/__/byon nas de las sprul pa'i tshogs/__/dpag med nyi zer rdul bzhin 'phros/__/'phags mchod 'gro kun sgrib gnyis sbyangs/__/rnal 'byor mar gyur tshur 'dus pa/__/sprul pa'i rnal 'byor ma la thim/__/de nyid sna bug g.yon nas rlung /__/nang du 'jug dang lhan cig par/__/rkyang ma'i lam brgyud lte ba yi/__/rnal 'byor ma la thim par bsam/__/de ltar lan bdun la sogs pas/__/rtsa lam sbyangs nas dngos gzhi ni/__/lte ba'i rang sems rnal 'byor ma'i/__/thugs las 'od 'phros lus kun gang /__/'od phung dmar po gcig tu gyur/__/rnal 'byor ma yang mkha' spyod la/__/'byon par rings pas yar byon te/__/dbu ma dbu gtsug ro rkyang gnyis/__/zhabs mthil la 'byar je thung gyur/__/spyi bor byon tshe rtsa gsum dang /__/lus kun lhag ma med par thim/__/rnal 'byor ma dpal mkha' spyod gshegs/__/'od gsal dbyings su thim par bsam/__/bsam gyis mi khyab ngang du bzhag__/slar yang rang sems rnal 'byor ma/__/mkha' las sprin ltar brdol nas kyang /__/mar byon gzhi lus sngar bzhin grub/__/slar yang 'pho sogs ci nus sbyangs/__/mthar ni go cha dgod pa sogs/__/gzhung ltar nyams su blang bar bya/__/bcu gcig spyod lam rnal 'byor ni/__/slar yang gzugs snang rdo rje rnal 'byor mar/__/gsal ba'i gnas rnams go chas rgyas btab cing /__/sgrar grags sngags la dran rtogs 'od gsal dang /__/snod bcud dga' ba gsum gyi ngo bor shar/__/dge ba'i rtsa ba 'di yis myur du bdag__/rnal 'byor ma dpal go 'phang 'grub gyur nas/__/mtha' klas 'gro ba gcig kyang ma lus pa/__/de yi sa la myur du 'god par shog__/'chi tshe mgon dang dpa' bo ma tshogs kyis/__/me tog gdugs dang rgyal mtshan thogs nas su/__/rol mo glu dbyangs sil snyan sogs mchod cing /__/mkha' la spyod pa'i gnas su 'khrid par shog__/lha mo tshad ma dam tshig tshad ma dang /__/des gsungs tshig kyang tshad ma'i mchog yin pas/__/bden pa de yis lha mo de rnams kyis/__/bdag cag rjes su 'dzin pa'i rgyur gyur cig__/rtsa brgyud bla ma yi dam rnal 'byor ma/__/mkha' 'gro chos skyong srung ma'i bden stobs kyis/__/gnas skabs mthar thug rgud pa kun zhi zhing /__/phan bde'i dpal la rol pa'i bkra shis shog__/de ltar brtson pas tshe 'di'am/__/bar do skye ba bcu drug tshun/__/rnal 'byor ma yis rjes bzung nas/__/kha sbyor bdun ldan go 'phang 'grub/__/tshul 'di riga?X 'dzi?Xn gruba?X ba'i?X phul/__/gang de'i bka' stsal lhur blangs nas/__/'jam dbyangs mkhyen brtse'i dbang po yis/__/dpal 'khor chos sde'i chos grwar bris/__/de las byung ba'i dge ba dang /__/rim gnyis zab mo'i rnal 'byor gyis/__/khams gsum brtan g.yo'i dngos po kun/__/bde chen thig ler ro gcig shog__/sarba dA mang+ga laM/__/zhes nA ro mkha' spyod kyi rgyun khyer thun min kun mkhyen bla ma'i gsung bklag chog tu bkod pa 'di'ang /__dge legs rin chen nas rgyun khyer zhig bsgrigs dgos zhes bskul ngor chos kyi blo gros pas gsar rtsom gyi dgos pa chung bas nag 'gros su sdeb ba'i yi ge'i byed po bkra shis dbang phyag gis bgyis pa dge legs su gyur cig__///__
