JKCL-KABUM-06-CHA-038-wylie
@#/__/bcom ldan 'das mi 'khrugs pa'i zhing bkod don bsdus kyi smon lam rin po che'i phreng ba bzhugs so/__/
mngon dga'i zhing na byang chub shing dbang drung /__mi 'khrugs rgyal ba dpal gyis lham mer bzhugs/__/nyan thos byang chub sems dpa' 'khor bcas la/__/lus dang ngag yid dwang bas gus phyag 'tshal/__/dngos 'byor yid sprul bdag pos ma bzung ba'i/__/lha ma'i dpal 'byor bde ba'i yo byad kyi/__/mchod pa'i sprin gyis nam mkha' gang byas te/__/bde bar gshegs pa sras dang bcas rnams mchod/__/thog med dus nas dus gsum gyis bsags pa'i/__/srid dang ngan 'gro'i rgyur gyur mi dge'i las/__/gang bsags 'gyod pas so sor bshags pa ni/__/slan chad mi bgyi'i sdom la gnas par bgyi/__/'phags skye'i dge tshogs kun la yi rang zhing /__/rgyal rnams chos kyi 'khor lo bskor ba dang /__/mya ngan mi 'da' bzhugs par gsol ba 'debs/__/de lta'i dge ba byang chub phyir bsngo bas/__/gang smon 'das pa'i sangs rgyas spyan chen por/__/mi 'khrugs rgyal bas byang chub thugs bskyed cing /__/nam yang khro ba gnod sems mi 'byung sogs/__/smon lam brgyad btab bdag gis 'grub gyur cig__/gzhan yang dam bca' ji bzhin bgyid pa dang /__/gom re bzhin yang sangs rgyas yid byed dang /__/tshe rab kun tu khyim nas 'byung sogs kyi/__/sgrub pa'i smon lam bco brgyad 'grub gyur cig__/de bzhin 'khor bzhi'i nyes ltung mi gleng dang /__/'tshang rgya'i zhing du ltung ba'i sgra tsam yang /__/mi grags dag cing yon tan ldan pa sogs/__/nan tan smon lam bdun po 'grub gyur cig__/ji ltar mi 'khrugs spyad ba spyod tshe bzhin/__/sangs rgyas zhing nas sangs rgyas zhing 'gro zhing /__/de bzhin gshegs rnams mnyes par byed pa la/__/skad cig tsam yang thugs dbyung mi bgyid shog__/tshe rab kun tu tshangs par spyod pa dang /__/pha rol phyin pa'i chos nyid las brtsam pa/__/ston cing de tshe bdag gi lus dang sems/__/ngal dang dub pa cung zad med par shog__/chos sbyin de yi dge tshogs ji snyed pas/__/rang gi sangs rgyas zhing der byang sems rnams/__/tshe rab brjes kyang dam chos mi brjed cing /__/gang du smon pa'i zhing der skye bar shog__/de dag rdzogs pa'i sangs rgyas rnams dang ni/__/rtag tu mi 'bral gus pas rab bsnyen cing /__/bdud dang bdud kyi rigs kyi lha dag gis/__/thams cad du yang blags rnyed ma gyur cig__/ji ltar rang nyid dam chos 'dod pa ltar/__/sems can de dag chos 'dod gyur pa la/__/de dag de ltar yon tan ma rdzogs par/__/bdag nyid byang chub spyad pa spyod par shog__/bdag ni 'di nas shi 'phos gyur pa'i 'og__/mngon par dga' ba dag pa'i zhing khams su/__/bcom ldan mi 'khrugs rgyal ba'i drung skyes te/__/byang chub lam gyi sgrub pas mnyes byed shog__/rgyal sras spos kyi glang po la sogs pa/__/zhing de'i byang chub sems dpa' che rnams kyi/__/yon tan ji snyed bdag la'ang ldan gyur cig__/sangs rgyas rnams kyi rtag tu bsngags mdzad shog__/ji ltar rgyal sras de dag bcom ldan des/__/byang chub chen por mngon sum lung bstan bzhin/__/bdag kyang phyir mi ldog pa'i sa thob ste/__/byang chub mchog tu lung bstan thob par shog__/rgyal ba de yi dam pa'i chos 'dzin cing /__/byang chub spyod pa kun tu snang byas te/__/tshogs gnyis rgya mtsho yongs su rdzogs pa dang /__/sems can rgya mtsho rab tu smin byed shog__/mdor na mi 'khrugs rgyal ba'i thugs bskyed dang /__/spyod pa smon lam ji bzhin bdag spyod cing /__/mngon dga'i zhing mtshungs dag pa'i 'jig rten du/__/bcom ldan de 'dra'i go 'phang mngon byed shog__///__dri med zhing skyongs nas gsungs pa'o//___//
