JKCL-KABUM-05-CA-040-wylie
@#/__/seng chen yid bzhin nor bu'i g.yang sgrub bsam 'phel dbang rgyal zhes bya ba bzhugs so/__/
na mo gu ru sid+ha rA dza ye/__dgra lha'i rgyal po sku rje seng chen gyi/__/sgrub thabs nor bu dpag bsam ljon shing gi/__rgyas pa'i las sgrub zab pa'i man ngag ni/__/nyung ngur bkod la rtag tu dge gyur cig__/de la gza' skar rgyas pa'i 'phrod sbyor dus/__/gtor ma khang bzang sum brtsegs lcags ri dang /__/nor bu'i mtshan pa dar gyis brgyan pa dang /__/sku gsung thugs rten srog 'khor bla rdo dang /__/phyi nang gsang ba'i mchod tshogs mdzes par bshams/__/rang nyid gsang bdag nga rgyal la gnas pas/__/mdun du nor bu'i brgyan pa'i gzhal med khang /__/brjid chags bkod legs mdzes pa'i nang dbus su/__/pad+ma 'dab ma stong phrag brdal ba dang /__/nyi zla rab tu rgyas pa'i gdan gyi steng /__/sku rje seng chen yid bzhin dbang gi rgyal/__/gser mdog dzam+bu nA da'i mdangs kyis 'khyud/__/seng ge dkar mo bsgyings pa'i steng na 'gying /__/phyag g.yas sba lcag nor bu'i rgyal mtshan sgrengs/__/g.yon pa dkur brten gter bum nor bus brgyan/__/mchan g.yon ne'u le sngon po nor bu skyugs/__/mdung mo khams gsum dgra 'dul ba dan 'phyar/__/lha rdzas dar dang rin chen rgyan gyis mdzes/__/rin chen dbu rgyan ze'u srog lnga pa gsol/__/dbu skra phyed bcings lhag ma sil bur grol/__/thor cog rtse mor dbang rgyal tog gis mdzes/__/'khor du gsang ba'i yum chen rnam bzhi dang /__/steng phyogs byang chub sems dpa' rin chen mang /__/oM rgyan bla ma nor lha la sogs pa/__/rtsa brgyud bla ma mkha' klong 'khyil ba sogs/__/yi dam lha tshogs rnam sras mdung dmar can/__/rta bdag brgyad dang zhang blon la sogs dang /__/dzaM lha rigs lnga nor rgyun dpal chen mo/__/kun 'khyil mched gsum tshe ring mched lnga dang /__/thang lha spom ra la sogs dkar phyogs kyi/__/lha dang klu chen brgyad sogs gter bdag rnams/__/khrom tshogs bzhin du mngon sum bzhugs pa yi/__/gnas gsum yig 'bru gsum las 'od zer 'phros/__/nor lha rgya mtsho'i lha tshogs spyan drangs gyur/__/rnga dang cha lang sil khrol sogs/__/rol mo sna tshogs ldir ba dang /__/spos 'thul snyan pa'i dbyangs kyis bos/__/dar gyi g.yab mo dang bcas pas/__/hU~M hrIHsngon bskal ma yis sna drangs te/__hU~M hrI/__bla ma seng chen yid bzhin dbang /__/nor bu dgra 'dul chen po ni/__/dwangs sman DA ki'i 'khor tshogs dang /__/dpa' thul dgra lha'i rig 'dzin tshogs/__/nor lha rgya mtsho'i 'khor dang bcas/__/gnas 'dir spyan 'dren gshegs su gsol/__/stangs stabs phyag rgya khrigs se khrig__/rdo rje gar gyi nyams 'gyur brgya/__/ngo mtshar cho 'phrul chen po yi/__/ma thogs myur du spyan 'dren no/__/dam tshig rten la gnyis med thim/__/dam ye dbyer med dgyes par bzhugs/__/mchog thun dngos grub stsal du gsol/__/gu ru d+he wA DA ki ni sed+ha ma Ni rA dza sarba ba su de wa sa ma ya dza dza/__dzaHhU~M ba~M ho/__sa ma ya tiSh+Tha lhan/__slar yang dbang lhas dbang bskur zhing /__/rigs kyi bdag pos rgyas btab gyur/__/phyag bya ba ni/__rang las sprul pa'i lus grangs med/__/dpag yas 'gro drug sems can rnams/__/lus kyi 'khri shing bzang po'i rtser/__/sor bcu'i 'dab ma'i gong bu bkod/__/gcam bu min pa'i gdung dbyangs dang /__/lhan cig sgo gsum gus phyag 'tshal/__/na mo na ma mi/__hU~M/__dbang po drug la mchod pa'i rdzas/__/lha dang mi yi gnas rnams su/__/byang chub sems dpa'i smon lam las/__/byung ba dbang 'byor mchod pa'i sprin/__/nyer spyod bdun dang 'dod yon lnga/__/bkra shis rdzas rtags rin chen bdun/__/nye ba'i rin chen rnam bdun dang /__/gzhal med khang bzang skyed tshal dang /__/glang chen rta mchog dre'u sogs/__/spu sdug mdzes pa'i ri dwags tshogs/__/'jigs shing rngam pa'i gcan gzan dang /__/'bri g.yag ba mchog rwa lug khyu/__/stag seng khyung 'brug rma bya sogs/__/nam mkha' lding sogs 'dab chags dang /__/yid bzhin nor bu dpag bsam shing /__/gter chen bum pa bzang po dang /__/klu nor nyer gcig la sogs pa/__/mdor na srid pa'i khams rnams su/__/bzang rgu ji snyed mchis so cog__/ma lus blo yis blangs te 'bul/__/lha rdzas bzang po'i na bza' dang /__/rin po che yi rgyan cha mdzes/__/go khrab mda' mdung ral gri sgyogs/__/mtshon cha rnam pa sna tshogs 'bul/__/rtsa brgyad stong la sbyar ba'i sman/__/bde chen chags bskyed rak+ta dang /__/spod ldan gtor ma rin chen 'bar/__/ja chang 'o zho mtsho ltar bskyil/__/dkar mngar skyems phud gang+ga'i rgyun/__/zhal zas phye mar gangs ri ltar/__/legs par spungs pa'i mchod pa 'bul/__/rab tu dga' ba'i nyams 'gyur can/__/pad can dung can ri dwags ma/__/lha mo klu mo bde skyid ma/__/rin chen sil khrol rgyan ldan mas/__/sku la bde chen mchod pa 'bul/__/shin tu gdug cing gtum pa'i tshogs/__/brnab sems ser sna'i las ngan gyi/__/'phangs pa'i gzhan sde bza' ba yi/__/mi dang mi min 'byung po rnams/__/e dbyings 'bar ba'i gtun khung du/__/rdo rje tho bas bcom pa dang /__/rdo rje ral gris gzhom pa yi/__/sgrol ba'i mchod pa rmad du byung /__/sangs rgyas mdzad pa ngo mtshar che/__/ha ha he hi'i dgyes par rol/__/mchod pa dam pa bla na med/__/ji snyed snang ba 'di dag kun/__/ji lta ba bzhin bcos bslad med/__/ro mnyam chen po'i mchod pa ni/__/mchod pa kun bdag e ma hoHa la la ste dngos grub stsol/__/nam mkha' mdzod sngags dang /__sarba pU dza sa ma ya hoHbstod pa ni/__hU~M hrIHma bcos spros bral sogs/__sa bcu'i sems dpa' rig 'dzin dgra lha'i sku/__/shes rab ral gri mda' gzhu 'chang ba po/__/rdo rje'i ya lad rin chen rgyan gyis brgyan/__/dzam gling seng chen rgyal po khyod la bstod/__/dwangs sman DA ki bka' blon dpa' thul dang /__/dgra lha wer ma nor lha gter bdag sogs/__/'dod rgu'i gru char yongs su 'bebs mdzad pa/__/nor lha rgya mtsho'i tshogs la phyag 'tshal bstod/__/sku dang gsung thugs yon tan dpag med mdzod/__/phrin las rnam bzhi'i 'gro don rdzogs mdzad pa/__/seng chen bsam 'phel dbang gi dkyil 'khor lhar/__/gus pas bstod do dngos grub rnam gnyis stsol/__/bzlas pa ni/__bla ma seng chen thugs ka ru/__/gu ru pad+ma saM b+ha wa/__/sku mdog dkar la dmar ba'i mdangs/__/phyag gnyis rdo rje rgyal mtshan dang /__/thod pa nor bu'i bkang ba bsnams/__/tshon gang tsam gyi thugs ka ru/__/nor bu zur brgyad lte bar hrIH/__gser gyi mdog can mtha' bskor du/__/sngags kyi phreng bas bskor ba las/__/'od 'phros 'gro ba'i sgrib pa sbyangs/__/snod bcud dag pa'i zhing du gyur/__/sku dang sngags las 'od zer sprin/__/mkha' dbyings khyab par 'phros pa las/__/'dod rgu'i gru char 'bebs pa yi/__/brtan g.yo'i rgud pa kun zhi nas/__/nam mkha' mdzod la dbang 'byor zhing /__/nor lha rgya mtsho'i dkyil 'khor dang /__/dbyer med gcig tu rdzogs par bsam/__oM AHbadz+ra gu ru pad+ma saM b+ha wa sid+ha ma Ni rA dza sarba sid+d+hi pha la hU~MHbsnyen pa'o/__/oM AHhU~M badz+ra gu ru pad+ma saM b+ha wa sid+ha ma Ni rA dza maN+Dal la sarba ba su de wa a yur puN+ye dz+nyA na puSh+TiM ku ru oM/__sgrub pa'o/__/sgrub sngags mthar/__rat+na puN+ye na na kha d+he sogs las sbyor ro/__/thun mthar stong tshig mchod bstod bya/__/gsol mchod bskang bshags g.yang 'gugs rnams/__/gzhan nas 'byung ba ltar bya zhing /__/las gzhung gang la brten pa yi/__/tshogs mchod la sogs rgyas par sbyor/__/rjes la mchod bstod nong bshags dang /__/brtan bzhugs la sogs rjes rim rnams/__/yi dam gang byas de bzhin bya/__/ces pa'ang pad+ma ye shes rdo rjer sa khyi zla bdun tshes skor zhig la rdo rje gling du mngon rtogs ltar gyi sku yi nyams ban bun shar ba bzhin zhag shas nas nyams mtshar bris pa'o/__/kha skongs rigs mi pham gsung nas bsnan/__yi dam rtsa gsum yang na rta mgrin lta bu sbyar na legs shas che/__//__/
