JKCL-KABUM-05-CA-037-wylie
@#/__/hA:'chi med 'phags ma'i sgrub mchod skabs kyi zur rgyan nyung ngu bzhugs so/__/
na mo gu ru tA rA tsin+d+ha tsakra ya/__de la 'chi med 'phags ma'i sgrub mchod skabs su lha sta gon dang /__bum pa sta gon gnyis las dang po thog mar/__bkra shis byin chags dag pa'i gnas su byang bgrod yar ngo'i tshes brgyad lta bu'i dus bzang por/__dam tshig gi bris sku sogs rten dang rgyan gyi yo byad du mas spras pa'i gung du/__bdag bskyed mchod pa chu gnyis nyer spyod/__sman gtor rak+ta rnams ji ltar bde bar bsham/__stegs bu khebs ldan gyi dbus su rin po che'i maN+Dal dri'i thig le bkod pa la me tog gam 'bru dkar gyi tshom bu dbus su che ba gcig__/phyogs bzhir de las dma' ba bzhi/__de rgyab chung ba bzhi bcas gtso 'khor dgu bkod/__mdun rgyab gang bder sman raka gtor gsum dang /__chu gnyis nyer spyod g.yon bskor du bsham/__sngon 'gro dkar gtor dang /__gzhan yang nyer mkho'i yo byad rnams tshogs par bya'o/__/de nas thog mar tshig bdun gsol 'debs dang brgyud 'debs sngon du 'gro ba'i skyabs sems nas brtsams bdag bskyed rgyun gyi rnal 'byor ltar byas la/__bzlas pa rnams ji ltar 'grub par bya/__de nas dkar gtor gser skyems bshams la/__bsang sbyang byin brlabs mgron drangs shing sngags bzlas spyi ltar byas la/__gang dag 'dir gnas sogs kyis phrin las bcol ba ni sa slong gi don yang tshang ngo /__/de nas las gzhung ltar byin brlab/__tshom bu las sngags kyis bsang /__swa b+hA was sbyang /__stong pa'i ngang las mdun gyi rten:'byung lnga yum gyi mkha' klong du:nor bu chu shel sogs phrin las ltar dam tshig pa bskyed/__ye shes pa bstim/__phyag mchod bstod pa'i bar dkyus ltar btang /__rdor dril dang spos thogs/__pus btsug thal mo sbyar la/__oM=sangs rgyas thams cad skyed pa'i yum:'chi med sgrol ma'i lha tshogs rnams:sngon gyi thugs dam chen po yis:bdag la dgongs par mdzad du gsol:rig pa 'dzin pa bdag gis ni:yo byad rnam pa thams cad pas:bde ba'i longs spyod rab sbyar te:lha rnams yongs su mchod pa dang :snod ldan rnams la phan gdags phyir:sngags kyi cho ga'i thabs chen pos:snying po'i dkyil 'khor bsgrub pa dang :rang gzhan don kun bgyid 'tshal na:ye shes snying rje chen po yis:bzod par mdzad de gnang nas kyang :snod bcud 'chi med sgrol ma yi:rdo rje gsum dang dbyer med par:byin gyis brlab par mdzad du gsol:ces gsol ba btab/__ces gsol bas lha tshogs rnams dgyes pa chen pos/__rig pa 'dzin pa khyod kyis dkyil 'khor gyi las ci ltar 'os pa gyis shig ces bka'i gnang ba stsal nas sgrub pa'i sa gzhi la thim pas ye shes kyi gzi byin lhag par 'bar bar gyur/__ces dmigs la maN+Dal tshom bu bcas bsdu/__gnyis pa ni rin chen bum pa dri'i chab dang nyer lnga'i bcud ldan gnyis kha rgyan mgul chings bcas pa bkod nas/__mchod pa rnams sngar ltar gsar du bsham pa'am kha gso/__dung zhal gzungs thag 'du byas la/__bsang sbyang /__stong pa'i ngang las pad zla'i steng :kha dog lnga ldan yi ge b+h+rU~M:yongs gyur phyi ni rin po che'i:rang bzhin bum pa bzang po che:mtshan nyid yongs rdzogs 'od du 'bar:nang ni lha tshogs bzhugs pa'i gnas:rin chen gzhal med khang chen por:dbus su pad+ma 'dab bzhi'i steng :sogs phrin las ltar dam tshig pa bskyed/__ye shes pa spyan 'dren bzhugs gsol phyag mchod bstod pa'i bar btang /__bum nang 'phags ma'i thugs ka ru:ye shes sems dpa' sogs nas/__grangs med nyi zer rdul ltar 'phro:rang gi thugs nas sngags kyi phreng :rdo rje'i gzungs thag las brgyud de:bum lha'i thugs dam rgyud bskul bas:bde stong rol pa'i 'od zer sprin:mkha' khyab kun tu snang ba yis:'phags mchod 'gro ba'i don kun bsgrubs:tshur 'dus thugs kyi dwangs bar 'khyil:sku dang sngags las bdud rtsi'i rgyun:dpag med byung nas bum pa'i bcud:dngos grub kun gyi snying por gyur:ces pas ting 'dzin gsal btab/__gzungs thag blangs la gtso bo gsum dang tshe sham can rnams sum brgya re las mi nyung ba dang /__las bzhi brgya rtsa re/__sgo bzhi nyer gcig re las mi nyung ba bzla/__mthar/__oM AHhU~M:zhes dung zhal gyi chu mchod yon tu phul bas/__lha tshogs bde ba chen po'i ngo bor 'od du zhu bas 'chi med tshe dang ye shes kyi dngos grub ster ba'i rdo rje bdud rtsi'i chu rgyun du gyur/__ces mos/__las bum nang du pad nyi'i steng :pad+ma rta mgrin sku mdog dmar:phyag gnyis pad+ma dril bu 'dzin:dur khrod chas rdzogs dor stabs bzhugs:sku las rdo rje'i bdud rtsi'i rgyun:babs pas bum pa gang bar bsam:oM hrIHpad+mAn+ta kri ta sarba big+h+nAn ha na ha na hU~M phaT:ces brgya rtsa brgyad bzla/__dpal khro bo'i rgyal po rta mgrin gyis dbang bskur gyi bya ba ma grub kyi bar du bar gcod kyi bgegs thams cad bzlog pa'i phrin las mdzad du gsol/__ces las bcol nas bzhag__/sku rten tsakli dbu rgyan rdor dril bdud rtsi sogs dbang rdzas rnams kyang skabs 'di ru tshogs par byas la/__dbang rdzas rnams ngo bo rnam par dag pa chos kyi dbyings rang bzhin ye shes kyi snang ba cir yang 'char ba'i byin rlabs dang dngos grub 'byung ba'i dbyig tu gyur par mos pa rnams ni sta gon gyi bya ba'o/__/dngos gzhi'i sgrub mchod skabs dzaba? khang dbye ba ni/__b+h+rU~M bi shwa bi shud+d+he/__tA~M hrIHb+h+rU~M:tA~M b+h+rU~M hrIHhU~M/__dza hU~M ba~M ho:phaT dzaHzhes bdag bskyed kyi dkyil 'khor las mdun rten gyi go sa mar me gcig las gnyis mched kyi tshul gyis rten dang brten pa'i dkyil 'khor phyes te me ri 'dabs 'byor tsam du bzhugs par bsgom la bzlas par bya'o/__//__/mjug dngos grub len pa'i bzlas dmigs ni/__b+h+rUM bi shwa bi shud+d+he oM tA re tut+tA re tu re sarba maN+Da la phaT dzaHzhes dzaba? khang phye ba sngon du 'gro bas/__rang gi thugs ka nas 'od zer dmar po 'phros/__dkyil 'khor gyi lha tshogs rnams kyi thugs rgyud bskul/__de las 'od zer bsam gyis mi khyab pa 'phros/__'khor 'das kyi dwangs bcud thams cad bsdus te dkyil 'khor pa'i thugs kar thim/__dngos grub stsol ba la mngon du phyogs pas ye shes kyi gzi byin 'bar bzhin bzhugs par gyur/__oM tA re tut+tA re tu re hrIHb+h+rU~M badz+ra dz+nyA na A yu She swA hA:oM AHhU~M swA hA:mU~M lA~M mA~M pA~M tA~M:sarba ta thA ga ta A yur+dz+nyA na ma hA puN+ye tiSh+Tha oM:kA ya wA ka tsit+ta gu Na karma sarba sid+d+hi pha la ho:ci nus su bzla'o/__/dngos grub bskul ba bsdu na rang gzhung ltar la/__cung zad rgyas par spro na yongs rdzogs 'chi med snying thig las 'byung ba 'dis kyang bskul te/__hrIHrang byung 'od snang phyogs bcu'i dkyil 'khor khyab:mi 'gyur tshe yi dngos grub ma lus bsdus:bdud rtsi'i rang bzhin dngos grub rdzas la thim:ye shes bsod nams tshe yi rgya mtshor 'khyil:hrIH'chi med rdo rje'i dkyil 'khor ma lus pa:gzhan du mi bzhugs rang gi dbyings su gsal:ma rig 'khor ba'i mun khrod las grol te:dag pa ye shes sgo chen rang sar bye:chos nyid dag pa'i skya rengs dang por shar:nyams snang gong du 'phel ba'i nam yang langs:rig pa tshad la phebs pa'i nyi ma shar:rnam rtog 'chi bdag mun pa kun zad nas:ye shes snang ba 'phel ba'i grangs rdzogs pas:da lta nyid du dngos grub stsal du gsol:da ni nang dbyings chen por dbyer med par:chos dbyings kun bzang rgyal sa chen por 'jug:sku lnga lhun gyis grub pa'i dbang chen skur:yon tan mi zad rgyan gyi dngos grub stsol:ris med rgyal ba'i phrin las kun la khyab:rgyun chad med pa'i 'gro don lhun gyis grub:de nas rang gzhung gi bskul tshig la 'jug go/__mar me'i smon lam spyi ltar ram/__'chi med snying thig las 'byung ba ltar byas kyang 'brel che ste/__hU~M:ngo bo rang bzhin thugs rje'i dkyil 'khor du:tshe mtha' yas dngos bla mas dbu bzung nas:lu gu rgyud du 'brel ba'i mched lcam rnams:mi 'bral 'grogs pa'i ting 'dzin rtse gcig gis:snang gsal mar me 'di yis mtshon nas kyang :ye shes sgron me stong rtsa shar ba'i mthus:ma rig mun pa'i nang du mi 'khyams shing :'chi bdag gcan gzan gdug pa'i skad mi thos:nyon mongs dug lnga ldang ba kun sol la:'khor ba skye 'chi'i 'phrang la 'grim grab tshe:ye shes sgron me thugs rje der ma chung :tshe lam pad+ma can gyis sna khrid nas:'chi med 'phags ma'i tshogs kyis tshe stsol la:tshe bdag yab yum rnams kyis srog brtan cig:dbang chen rta mgrin rgyal pos bar chad sol:mgyogs ma mchod pa'i lha mos mtha' nas skyongs:'od gsal snang bzhi rim par bgrod nas kyang :'chi med rdo rje'i sku ru 'grub par shog:ces smon lam gdab bo/__/de ltar sgrub mchod nyer mkho'i zur rgyan chos kyi blo gros pas dkyus gcig tu bsdebs pa'o/__//__/
