JKCL-KABUM-04-NGA-036

From Khyentse Lineage - A Tsadra Foundation Project

སྒ་སྟོན་ཆོས་རྗེ་རྡོ་རྗེ་འཆང་ལེགས་པ་རིན་པོ་ཆེའི་བླ་མའི་རྣལ་འབྱོར་བྱིན་བརླབས་གཏེར་ཆེན།
Wylie title sga ston chos rje rdo rje 'chang legs pa rin po che'i bla ma'i rnal 'byor byin brlabs gter chen JKCL-KABUM-04-NGA-036.pdf
Location chos kyi blo gros bka' 'bum
Volume 4, Text 36, Pages 273-277 (Folios 1a1 to 3a2)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People སྒ་སྟོན་ངག་དབང་ལེགས་པ་ (sga ston ngag dbang legs pa)
Citation 'jam dbyangs mkhyen brtse chos kyi blo gros. sga ston chos rje rdo rje 'chang legs pa rin po che'i bla ma'i rnal 'byor byin brlabs gter chen. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: 273-277. Bir, H.P.: Khyentse Labrang, 2012.
Genre Guru Yoga Texts - bla ma'i rnal 'byor
Colophon

།ཅེས་པའང་འཁྲུལ་སྣང་ཅུང་ཟད་ཀྱིས་མཚམས་སྦྱར་ཏེ་བཀའ་འབང་གི་ཐ་ཆུང་ཆོས་ཀྱི་བློ་གྲོས་པས་བྲིས་པ་སིདྡྷིར་བྷ་ཝནྟུ།།

/ces pa'ang 'khrul snang cung zad kyis mtshams sbyar te bka' 'bang gi tha chung chos kyi blo gros pas bris pa sid+d+hir b+ha wan+tu//

":Property:textsubnumber|textsubnumber" can not be assigned to a declared number type with value 1.

[edit]
སྒ་སྟོན་ཆོས་རྗེ་རྡོ་རྗེ་འཆང་ལེགས་པ་རིན་པོ་ཆེའི་བླ་མའི་རྣལ་འབྱོར་བྱིན་བརླབས་གཏེར་ཆེན་ཞེས་བྱ་བ་བཞུགས་སོ། །ཨོཾ་སྭསྟི། གང་ལ་བསྙེན་པས་དཔལ་དམ་པ། །རབ་ཏུ་སྦྱིན་མཛད་བླ་མ་རྗེར། །བཏུད་ནས་རྣལ་འབྱོར་ཟབ་མོའི་ལམ། །མོས་གུས་འཕེལ་ཕྱིར་ཉུང་ངུ་སྤེལ། །དེ་ལ་བླ་མར་མོས་གུས་ལམ་གྱི་སྲོག་ཏུ་བཟུང་ནས་འདི་ལ་འབད་པར་བྱ་སྟེ། དེའང་སྔོན་འགྲོ་སྐྱབས་སེམས་ནི། བདག་སོགས་འགྲོ་ཀུན་དེང་ནས་བྱང་ཆུབ་བར། །རིགས་ཀུན་འདུས་ཞལ་མཆོག་ལ་སྐྱབས་སུ་མཆི། །འགྲོ་རྣམས་བླ་མེད་བྱང་ཆུབ་ལ་འགོད་ཕྱིར། །ཟབ་མོ་བླ་མའི་རྣལ་འབྱོར་ཉམས་བླངས་བགྱི། །ཞེས་ཅི་ནུས་དང་། དངོས་གཞི་རྟེན་བསྐྱེད་པ་ནི། ཨོཾ་མ་ཧཱ་ཤུ་ནྱ་ཏ་སོགས་ཀྱིས་སྟོང་པར་སྦྱངས། རང་ཉིད་གནས་པའི་ས་ཕྱོགས་བདེ་བ་ཅན། །ཡིད་འཕྲོགས་ཞིང་གི་བཀོད་པ་བསམ་ལས་འདས། །བཻཌཱུཪྻ་དང་མར་གད་ས་གཞི་ལ། །གསེར་གྱི་མིག་མང་རིས་བྲིས་བསྟར་བའི་གཞིར། །ནོར་བུ་ཆུ་ཤེལ་སྔོན་པོའི་ཁང་བཟང་ལ། །གསེར་དང་རིན་ཆེན་སྣ་ཚོགས་རྒྱན་སྤྲས་དབུས། །རཏྣའི་ཁྲི་དང་པད་དཀར་ཟླ་གདན་སྟེང་། །རྩ་བའི་བླ་མ་ཆོས་རྗེ་རྡོ་རྗེ་འཆང་། །ངག་དབང་ལེགས་པ་སེམས་དཔའ་པདྨའི་རྒྱལ། །སྐུ་མདོག་དམར་གསལ་ཞི་འཛུམ་དགྱེས་ཉམས་ཅན། །ལོངས་སྐུའི་ཆས་ཅན་དར་དང་རིན་ཆེན་བརྒྱན། །ལྷ་རྫས་སྔོན་པོའི་སྨད་གཡོགས་མཛེས་པར་བཀླུབས། །ཕྱག་གཡས་པུས་མོའི་སྟེང་དུ་ས་གནོན་དང་། །གཡོན་པས་སྐྱབས་སྦྱིན་ཐུགས་ཀར་གཏོད་པ་ཡི། །མཐེབ་སྲིན་བར་ནས་གསེར་གྱི་མྱུ་གུ་ནི། །རབ་རྒྱས་སྙན་གྱི་ཐད་ཀར་གྱེས་པའི་རྩེར། །འཆི་མེད་ཚེ་ཡི་བདུད་རྩིའི་བུམ་བཟང་བསྣམས། །ཞབས་གཉིས་རྟ་བབ་སྐྱིལ་མོ་ཀྲུང་གིས་ནི། །གཡས་པ་པད་སྡོང་རྒྱས་པའི་སྟེང་མནན་ཞིང་། །དྭངས་པའི་མཁའ་ལ་འཇའ་ཚོན་ཤར་བ་ལྟར། །རྣམ་བཀྲ་སྒེག་ཅིང་མཚན་དཔེའི་དཔལ་དུ་འབར། །སྐུ་ལ་གདན་གསུམ་དཀྱིལ་འཁོར་ཆེན་པོ་རྫོགས། །གནས་གསུམ་ཡི་གེ་གསུམ་གྱིས་མཚན་པ་ལས། །འོད་འཕྲོས་སྐྱབས་གནས་ཐམས་ཅད་སྤྱན་དྲངས་ཤིང་། །རྩ་བའི་བླ་མ་ཉིད་ལ་ཐིམ་པར་གྱུར། །དེ་ནས་ཡན་ལག་བདུན་པ་བཟང་སྤྱོད་ནས་འབྱུང་བ་ལྟར་དང་། གུར་ནས་འབྱུང་བའི་རྒྱུན་བཤགས་ལན་གསུམ། ཞེན་པ་སྤོངས་བ་དཀོན་ལྷུན་ལམ་ཟབ་ལྟར། གསོལ་བ་གདབ་པ་ནི། རིགས་ཀུན་ཁྱབ་བདག་སེམས་དཔའ་པདྨའི་རྒྱལ། །གསུང་གི་རྡོ་རྗེ་འོད་སྣང་མཐའ་ཡས་དང་། །དབྱེར་མེད་སྐྱབས་ཀུན་འདུས་ཞལ་ཆེན་པོ་ལ། །གསོལ་བ་འདེབས་སོ་བདེ་ཆེན་ཞིང་དུ་དྲོངས། །བླ་མ་ཀུན་འདུས་པདྨ་སེམས་དཔའ་མཁྱེན། །བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས། །ཡི་དམ་ཀུན་འདུས་པདྨ་སེམས་དཔའ༴ །མཆོག་དང་ཐུན་མོངས་དངོས་གྲུབ་ཆར་ཆེན་ཕོབ། །མཁའ་འགྲོ་ཀུན་འདུས༴ །ཕྱི་ནང་གསང་བའི་བར་ཆད་དབྱིངས་སུ་སོལ། །ཆོས་སྐྱོངས་ཀུན་འདུས༴ །དམ་ཆོས་སྒྲུབ་པའི་འགལ་རྐྱེན་མི་མཐུན་བཟློག །ནོར་ལྷ་ཀུན་འདུས༴ །མཐུན་རྐྱེན་དཔལ་འབྱོར་འདོད་རྒུའི་སྤྲིན་ཕུང་འཁྲིགས། །སྐྱབས་གནས་ཀུན་འདུས་པདྨ་སེམས་དཔའ་མཁྱེན། །བྱང་ཆུབ་བར་དུ་འབྲལ་མེད་རྗེས་སུ་བཟུང་། །ཅེས་དང་། སྐྱབས་གནས་ཀུན་འདུས་བླ་མ་རིན་པོ་ཆེ། སོགས་ནས། ཐུགས་རྗེས་ཟུངས། ཞེས་པ་རྣམས། སྤྲོ་ན་མཎྜལ་རྒྱས་བསྡུས་དང་སྤེལ་ལ་གྲངས་བསོག །ཁྱད་པར་དུ་རྗེ་ཉིད་ཀྱིས་ཞལ་གསུང་། ངག྄༵་གི་དབ྄༵ང་ཕྱུག་འཇམ་དབྱངས་ས་སྐྱ་པའི། །ཟབ་རྒྱས་སྙན་བརྒྱུད་རྒྱ་མཚོའི་མཛོད་བཟུང་ནས། །ལེག྄༵ས་བཤད་དགའ་སྟོན་འགྱེད་ལ་ཟླ་མེད་པ྄༵། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཅེས་པ་གྲངས་ཅི་ནུས་དང་། ཐུགས་དམ་རྒྱུད་བསྐུལ་གྱི་བཟླས་པ་ནི། ཨོཾ་ཨཱཿབཛྲ་གུ་རུ་བྷོ་དྷི་སཏྭ་པདྨ་རཱ་ཛ་སརྦ་སིདྡྷི་ཕ་ལ་ཧཱུྃ་སྭཱ་ཧཱ། ཞེས་ཅི་ནུས་བསྙེན། མཐར། སྲས་བཅས་སངས་རྒྱས་སོགས་ཀྱི་སྡོམ་བཟུང་དང་། དབང་བླངས་བ་ལམ་ཟབ་ལྟར་ལ། མཐར་ནི་བླ་མ་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་རང་སེམས་གསལ་སྟོང་ནི། །ཟུང་འཇུག་འོད་གསལ་ཕྱག་རྒྱ་ཆེན་པོའི་ངང་། །དུས་གསུམ་རྟོག་པས་མ་བསླད་རང་ཞལ་བསྐྱངས། ཞེས་ཅི་གནས་སུ་མཉམ་པར་བཞག །ཐུན་ལས་ལྡང་བ་ན། སངས་རྒྱས་ཀུན་འདུས༴ སོགས་དང་། བླ་མའི་ཞབས་པད་གུས་པས་རྟག་བསྟེན་པས། །དགྱེས་པས་ཐུགས་རྗེ་ཆེན་པོས་བདག་བཟུང་སྟེ། །རྡོ་རྗེ་ཐེག་སོགས་གཞུང་མང་སྤྱོད་པ་དང་། །སྙན་རྒྱུད་བཞི་དང་རྟག་ཏུ་ལྡན་པར་ཤོག །སྤངས་བྱའི་སྡེ་རྣམས་ཀུན་དང་འཁོན་གྱུར་ཏེ། །རབ་དགའ་ལ་སོགས་ས་ཡི་མཆོག་གྱུར་པ། །ཟླ་བ་ཀུ་མུད་ལྟར་སྐྱ་ཐོབ་གྱུར་ནས། །ས་བཅུའི་རྒྱལ་སྲས་རྣམས་དང་འགྲོགས་པར་ཤོག །རྣལ་འབྱོར་འདིས་ནི་རྒྱལ་བ་ཐོབ་ཅེས་པའི། །སྙན་པའི་གྲགས་པས་ཕྱོགས་ཀུན་རྒྱས་གྱུར་པས། །བདུད་དཔུང་སྡེ་བཅས་ཡི་མུག་དཔའ་བཀོང་ནས། །ཐར་པའི་རྒྱལ་མཚན་མྱུར་དུ་སློངས་བར་ཤོག །རྒྱལ་སྲས་རྣམས་དང་རྟག་ཏུ་རོལ་བྱེད་ཅིང་། །རྡོ་རྗེའི་ལུས་སུ་གྲུབ་ཅིང་དཔལ་གྱུར་པས། །བློ་མཆོག་རྣམས་དང་འགྲོགས་ཤིང་བཞད་པའི་སྒྲས། །རྡོ་རྗེ་དྲིལ་བུ་རོལ་ཅིང་འགྱིང་པར་ཤོག །དེ་ལྟར་བདག་གིས་ཐོབ་པར་གྱུར་ནས་ཀྱང་། །ནམ་མཁའི་མཐའ་གཏུགས་གྱུར་པའི་སེམས་ཅན་རྣམས། །སྲིད་པའི་མཚོ་ལས་སྒྲོལ་བར་བྱེད་པ་ཡི། །གྲུ་ཆེན་འཛིན་པའི་དེད་དཔོན་རྒྱལ་པོར་ཤོག །དཔལ་ལྡན་བླ་མའི་ཐུགས་རྗེའི་སྟོབས་དང་ནི། །བདག་གི་སྟོབས་དང་བསོད་ནམས་ཐམས་ཅད་ཀྱིས། །ཇི་ལྟར་སྨོན་ལམ་བཏབ་པ་དེ་བཞིན་དུ། །བདག་དང་འགྲོ་བས་རབ་ཏུ་འགྲུབ་པར་ཤོག །ཅེས་བསྔོ་སྨོན་བྱ་ཞིང་རྗེས་ཐོབ་བླ་མའི་ལམ་ཁྱེར་དང་མ་བྲལ་བར་བྱའོ། །དགེ་འདིས་བདག་གཞན་འགྲོ་བ་ཀུན། །བླ་མ་མཆོག་གི་རྗེས་བཟུང་ཞིང་། །འདི་ཉིད་ཡིད་ལ་བྱེད་པ་རྣམས། །ཀུན་མཁྱེན་ཡེ་ཤེས་ཐོབ་གྱུར་ཅིག །ཅེས་པའང་འཁྲུལ་སྣང་ཅུང་ཟད་ཀྱིས་མཚམས་སྦྱར་ཏེ་བཀའ་འབང་གི་ཐ་ཆུང་ཆོས་ཀྱི་བློ་གྲོས་པས་བྲིས་པ་སིདྡྷིར་བྷ་ཝནྟུ།། །།
[edit]

sga ston chos rje rdo rje 'chang legs pa rin po che'i bla ma'i rnal 'byor byin brlabs gter chen zhes bya ba bzhugs so/__/oM swasti/__gang la bsnyen pas dpal dam pa/__/rab tu sbyin mdzad bla ma rjer/__/btud nas rnal 'byor zab mo'i lam/__/mos gus 'phel phyir nyung ngu spel/__/de la bla mar mos gus lam gyi srog tu bzung nas 'di la 'bad par bya ste/__de'ang sngon 'gro skyabs sems ni/__bdag sogs 'gro kun deng nas byang chub bar/__/rigs kun 'dus zhal mchog la skyabs su mchi/__/'gro rnams bla med byang chub la 'god phyir/__/zab mo bla ma'i rnal 'byor nyams blangs bgyi/__/zhes ci nus dang /__dngos gzhi rten bskyed pa ni/__oM ma hA shu n+ya ta sogs kyis stong par sbyangs/__rang nyid gnas pa'i sa phyogs bde ba can/__/yid 'phrogs zhing gi bkod pa bsam las 'das/__/baiDUR+Ya dang mar gad sa gzhi la/__/gser gyi mig mang ris bris bstar ba'i gzhir/__/nor bu chu shel sngon po'i khang bzang la/__/gser dang rin chen sna tshogs rgyan spras dbus/__/rat+na'i khri dang pad dkar zla gdan steng /__/rtsa ba'i bla ma chos rje rdo rje 'chang /__/ngag dbang legs pa sems dpa' pad+ma'i rgyal/__/sku mdog dmar gsal zhi 'dzum dgyes nyams can/__/longs sku'i chas can dar dang rin chen brgyan/__/lha rdzas sngon po'i smad g.yogs mdzes par bklubs/__/phyag g.yas pus mo'i steng du sa gnon dang /__/g.yon pas skyabs sbyin thugs kar gtod pa yi/__/mtheb srin bar nas gser gyi myu gu ni/__/rab rgyas snyan gyi thad kar gyes pa'i rtser/__/'chi med tshe yi bdud rtsi'i bum bzang bsnams/__/zhabs gnyis rta bab skyil mo krung gis ni/__/g.yas pa pad sdong rgyas pa'i steng mnan zhing /__/dwangs pa'i mkha' la 'ja' tshon shar ba ltar/__/rnam bkra sgeg cing mtshan dpe'i dpal du 'bar/__/sku la gdan gsum dkyil 'khor chen po rdzogs/__/gnas gsum yi ge gsum gyis mtshan pa las/__/'od 'phros skyabs gnas thams cad spyan drangs shing /__/rtsa ba'i bla ma nyid la thim par gyur/__/de nas yan lag bdun pa bzang spyod nas 'byung ba ltar dang /__gur nas 'byung ba'i rgyun bshags lan gsum/__zhen pa spongs ba dkon lhun lam zab ltar/__gsol ba gdab pa ni/__rigs kun khyab bdag sems dpa' pad+ma'i rgyal/__/gsung gi rdo rje 'od snang mtha' yas dang /__/dbyer med skyabs kun 'dus zhal chen po la/__/gsol ba 'debs so bde chen zhing du drongs/__/bla ma kun 'dus pad+ma sems dpa' mkhyen/__/bdag rgyud smin cing grol bar byin gyis rlobs/__/yi dam kun 'dus pad+ma sems dpa'=__/mchog dang thun mongs dngos grub char chen phob/__/mkha' 'gro kun 'dus=__/phyi nang gsang ba'i bar chad dbyings su sol/__/chos skyongs kun 'dus=__/dam chos sgrub pa'i 'gal rkyen mi mthun bzlog__/nor lha kun 'dus=__/mthun rkyen dpal 'byor 'dod rgu'i sprin phung 'khrigs/__/skyabs gnas kun 'dus pad+ma sems dpa' mkhyen/__/byang chub bar du 'bral med rjes su bzung /__/ces dang /__skyabs gnas kun 'dus bla ma rin po che/__sogs nas/__thugs rjes zungs/__zhes pa rnams/__spro na maN+Dal rgyas bsdus dang spel la grangs bsog__/khyad par du rje nyid kyis zhal gsung /__ngaga?~X gi dba?~Xng phyug 'jam dbyangs sa skya pa'i/__/zab rgyas snyan brgyud rgya mtsho'i mdzod bzung nas/__/lega?~Xs bshad dga' ston 'gyed la zla med pa?~X/__/dpal ldan bla ma'i zhabs la gsol ba 'debs/__/ces pa grangs ci nus dang /__thugs dam rgyud bskul gyi bzlas pa ni/__oM AHbadz+ra gu ru b+ho d+hi satwa pad+ma rA dza sarba sid+d+hi pha la hU~M swA hA/__zhes ci nus bsnyen/__mthar/__sras bcas sangs rgyas sogs kyi sdom bzung dang /__dbang blangs ba lam zab ltar la/__mthar ni bla ma 'od zhu rang la thim/__/thugs yid gcig 'dres rang sems gsal stong ni/__/zung 'jug 'od gsal phyag rgya chen po'i ngang /__/dus gsum rtog pas ma bslad rang zhal bskyangs/__zhes ci gnas su mnyam par bzhag__/thun las ldang ba na/__sangs rgyas kun 'dus=__sogs dang /__bla ma'i zhabs pad gus pas rtag bsten pas/__/dgyes pas thugs rje chen pos bdag bzung ste/__/rdo rje theg sogs gzhung mang spyod pa dang /__/snyan rgyud bzhi dang rtag tu ldan par shog__/spangs bya'i sde rnams kun dang 'khon gyur te/__/rab dga' la sogs sa yi mchog gyur pa/__/zla ba ku mud ltar skya thob gyur nas/__/sa bcu'i rgyal sras rnams dang 'grogs par shog__/rnal 'byor 'dis ni rgyal ba thob ces pa'i/__/snyan pa'i grags pas phyogs kun rgyas gyur pas/__/bdud dpung sde bcas yi mug dpa' bkong nas/__/thar pa'i rgyal mtshan myur du slongs bar shog__/rgyal sras rnams dang rtag tu rol byed cing /__/rdo rje'i lus su grub cing dpal gyur pas/__/blo mchog rnams dang 'grogs shing bzhad pa'i sgras/__/rdo rje dril bu rol cing 'gying par shog__/de ltar bdag gis thob par gyur nas kyang /__/nam mkha'i mtha' gtugs gyur pa'i sems can rnams/__/srid pa'i mtsho las sgrol bar byed pa yi/__/gru chen 'dzin pa'i ded dpon rgyal por shog__/dpal ldan bla ma'i thugs rje'i stobs dang ni/__/bdag gi stobs dang bsod nams thams cad kyis/__/ji ltar smon lam btab pa de bzhin du/__/bdag dang 'gro bas rab tu 'grub par shog__/ces bsngo smon bya zhing rjes thob bla ma'i lam khyer dang ma bral bar bya'o/__/dge 'dis bdag gzhan 'gro ba kun/__/bla ma mchog gi rjes bzung zhing /__/'di nyid yid la byed pa rnams/__/kun mkhyen ye shes thob gyur cig__/ces pa'ang 'khrul snang cung zad kyis mtshams sbyar te bka' 'bang gi tha chung chos kyi blo gros pas bris pa sid+d+hir b+ha wan+tu//____//

Footnotes

Other Information