JKCL-KABUM-04-NGA-016-wylie
kun mkhyen klong chen pa'i bla ma'i rnal 'byor ye shes snang ster ces bya ba bzhugs so/__/bla ma la phyag 'tshal lo/__/kun mkhyen chos kyi rgyal por mi phyed pa'i dad pa dang mos gus drag po dang ldan pa rnams kyis lam zab mo 'di la 'jug par bya ste/__de la thog mar skyabs sems ni/__aH_rang byung stong gsal chos kyi dbyings/__/ye shes sku can bla ma la/__/mi phyed gus pas skyabs su mchi/__/'gro rnams bla ma'i sar 'god bgyi/__/rten bskyed ni/__a/__snod bcud 'dzin zhen dag pa'i klong /__/rang byung 'ja' 'od 'khrigs pa'i dbus/__/seng khri pad ma zla ba'i steng /__/rang rig kun mkhyen bla ma ni/__/zhi 'dzum paN+Di ta yi chas/__/sems nyid ngal gso'i phyag rgya can/__/sku la rtsa gsum dkyil 'khor rdzogs/__/ma bskyed ye rdzogs lhun gyis grub/__/gzod nas dam ye 'du 'bral med/__/ye shes lhun grub chen por gsal/__/tshogs bsags pa ni/__rang rig lha dang gnyis su med/__/dag mnyam chen po'i phyag gis 'dud/__/'khor 'das ro mnyam ngang du mchod/__/sdig ltung skye med klong du bshags/__/rang grol rig pa rjes yi rangs/__/'pho med khyab brdal chen por bzhugs/__/rtsol bral chos 'khor bskor bar bskul/__/chos dbyings ye grol chen por bsngo/__/maN+Dal ni/__phyi snod 'jig rten dpal 'byor dang /__/nang bcud phung khams maN+Da lar/__/dbyings snang 'ja' 'od tshom bu bkra/__/sku gsum don gyi lha la 'bul/__/oM gu ru maN+Da la pU dza AHhU~M/__gsol 'debs ni/__'od gsal snang bzhi mthar phyin cing /__/rig pa mi 'gyur sku lngar bzhengs/__/rang byung gzi brjid dpal du 'bar/__/gdod ma'i mgon po klong chen pa/__/dri med 'od zer la phyag 'tshal/__/rtse gcig gus pas gsol ba 'debs/__/rtag tu thugs rjes byin gyis rlobs/__/ye shes snang ba rgyas par mdzod/__/bla ma khyed dang mnyam par shog__/oM AHma hA gu ru sarba sid+d+hi hU~M/__zhes bzla/__dbang blang ba ni/__/'o/__mkhyen no mkhyen no kun mkhyen bla ma/__/bdag rgyud byin gyis brlab par mdzod cig__/ye shes rdo rje'i dbang chen bskur nas/__/sku bzhi'i sa bon thebs par mdzod cig__/rtse gcig gsol ba btab pa las/__/bla ma dgyes pa'i nyams dang ldan/__/byin rlabs gzi brjid dpal du 'bar/__/bla ma'i dpral mgrin thugs ka nas/__/rang 'dra'i sku dang yig 'bru gsum/__/'od zer bdud rtsi dang bcas byung /__/rang gi gnas gsum thim pa yis/__/sgrib dag byin rlabs dbang bskur thob/__/sku bzhi'i go 'phang rgyud la bzhag__/mthar ni bla ma 'od du zhu/__/d+hIHyig dmar ser gyur pa nyid/__/rang gi snying dbus thim pa las/__/rig stong dgongs pa'i rtsal chen rdzogs/__/yid dpyod spros dang bral ba yi/__/ka dag blo 'das ngang du bzhag__/ces ci gnas su mnyam par bzhag__/slar yang tsit+ta'i 'od khyim du/__/d+hIHyig yongs su gyur pa las/__/bla ma 'jam dpal longs spyod rdzogs/__/dmar ser ral gri glegs bam 'dzin/__/zhi 'dzum dar dang rin chen brgyan/__/zhabs gnyis rdo rje'i skyil krung bzhugs/__/thugs kar zla ba la gnas pa'i/__/d+hIHmthar sngags kyi phreng bas bskor/__/'od 'phros rgyal ba sras bcas mchod/__/mkhyen brtse'i byin rlabs thams cad bsdus/__/bdag blo'i gti mug mun pa sel/__/blo gros snang ba rgyas par gyur/__/oM sarba d+harmA b+ha wa swa b+ha wa bi shud+d+he badz+ra a A aM aH_pra kr-i ti pa ri shud+d+haHsarba d+harmA ya du ta sarba ta thA ga ta dz+nyA na kA ya many+dzu shrI pA ri shud+d+hi tA mu pA dA ya ti aM aH_sarba ta thA ga ta hri dA ya ha ra ha ra oM hU~M hrIHb+ha ga wAn dz+nyA na murti wA gi shwa ra/__ma hA wa tsa sarba d+harma ga ga na ma la su pa ri shud+d+ha d+harma d+hA tu dz+nyA na gar+b+ha aH_zhes dang /__oM a ra pa tsa na d+hIHci nus dang /__skabs 'gar snod bcud snang ba kun/__/bla ma 'jam dpal dpa' bo yi/__/gnas gsum phyag rgya'i rol par blta/__/rang snang spro dang bsdu ba yi/__/rtsal sbyong dag la yang yang 'bad/__/thun mthar dge ba bsngo ba ni/__dge 'dis mtha' yas sems can kun/__/kun mkhyen chos kyi rgyal po dang /__/'jam dpal ye shes sems dpa' yi/__/go 'phang tshe 'dir mngon byas te/__/srid gsum grong khyer stong gyur cig__/ces sogs thun mong dang thun mong ma yin pa'i smon lam gyis rgyas gdab cing bla ma'i lam khyer dang ma bral bar bya'o/__/ces pa'ang dge slong kun dga' rab rgyas kyi ngor/__'jam dbyangs blo gros rgya mtshos tha skar zla ba'i tshes bcu la smras rim bzhin bskul ba pos yi ger bkod pa 'dis kyang dpal ldan bla ma'i byin brlab snying dbus su 'jug pa'i rgyur gyur cig__/sarba dA mang+ga laM//____//
