JKCL-KABUM-03-GA-005-wylie
lhag pa'i lha dkar po rnam gsum la bstod cing gsol ba 'debs pa byin rlabs sprin dkar 'dzum pa'i bla re zhes bya ba bzhugs so/____/na maHgu ru a pA rI mi ta aR+Ya ta re a yur ye/__srid pa'i gnas 'dir mtshan tsam thos pas kyang /____/dus min 'chi ba'i 'jigs pa ring du bsal/____/byin brlab zla shel bdud rtsi'i chu rgyun gyi/____/gsang gsum ye shes rgyas mdzad lhag pa'i lha/__1_/pad dkar zla ba rgyas pa'i gdan gyi dbus/____/rgyal kun mkhyen brtse'i ye shes gcig bsdus pa/____/bcom ldan 'chi med tshe lha rnams gsum ni/____/rab dkar zla zhun gsar ba'i lang tsho can/__2_/nor bu chu shel lhun po'i 'od 'phro ba'i/____/gzi brjid skar ma'i tshogs kyang mog por byed/____/zhal ras zhi 'dzum sgeg nyams mtshan dpes spras/____/rin chen rgyan dang lha rdzas na bzas bklubs/__3_/rang rtags phyag tshan mdzes pa'i phyag gis bsnams/____/mthong bas mi ngom yid 'phrogs zhi tshul dgus/____/rnam par mdzes pa ye shes chen po'i sku/____/chos dbyings spros mtha' bral ba'i klong chen por/__4_/rgyal kun dgongs klong rgya mtshor ro gcig 'khyil/____/longs spyod yongs rdzogs bde ba chen po yi/____/zag med bdud rtsi'i nyams brgya 'bar ba dang /____/sprul pa'i thugs rje mi bzad cho 'phrul gyis/__5/__zhing khams rgya mtshor yongs su 'jug pa dang /____/lhan gcig 'gro rnams rdo rje'i rgyal thabs la/____/dbugs dbyungs 'chi med mchog gi dpal ster bas/____/tshe dang ye shes grub pa'i go 'phang sbyin/__6/__zhing gi bkod pa mtha' yas bde ba can/____/yon tan dpag med rnga sgra'i rgyal po ni/____/brten pa tshe dpag med ces rgyal rnams bsgrags/____/gang mtshan yid la bzung ba'i 'chi bdud bcom/__7/__sku yi 'od kyi gzi byin lham me ba/____/gsung gi sgra dbyangs dus gsum rgyun chad med/____/thugs kyi gsang ba bsam gyis mi khyab cing /____/yon tan sgrogs la rgyal ba'i ljags kyang rdugs/__8/__'jig rten snang byed nyi zla'i 'od rnams dang /____/tshangs dbang khyab 'jug la sogs nga rgyal gyi/____/khengs pa'i ru mtshon bsnyel la mngon par phyogs/____/rnam par grol ba'i tshogs rnams khyed zhabs btud/__9/__rnam kun mchog ldan stong nyid lha mo'i sku/____/dus gsum rgyal ba'i yum gcig rje btsun ma/____/yid bzhin 'khor lo tshe dpal 'phel mdzad ma/____/nyon mongs zhi mdzad 'dod don ster mdzad ma/__10/__pad+ma ltar dkar bcu drug lang tshos sgeg__/yid 'phrog zhal dang 'jam mnyen phyag zhabs ngogs/____/ye shes spyan bdun rnam par bkra ba dang /____/myos bum mtho zhing sked skabs shin tu phra/__11/__gsang ba'i pad+ma rab rgyas dbu skra ni/__mig sman ltar gnag lan bu mgul du grol/____/rin chen rgyan phreng 'od gyi mun pa sel/____/phyogs bcu'i rgyal rnams rtag tu mnyes mdzad ma/__12/__khams gsum po yi phyag byas 'dar bzhin du/____/khyed kyi zhabs mthil rdul med gtsug tu bsnyen/____/grub pa'i rig 'dzin tshogs kyis nyer bsten zhing /____/rgyal dang de sras tshogs rnams bskrun mdzad ma/__13/__de bzhin gshegs dang rjes chags rol rtsed kyi/__de kho na yi ye shes mchog rgyas pas/____/de bzhin nyid kyi dbyings la snyoms par zhugs/____/de nyid gzigs dang spyod yul ro snyom ma/__14/__gang gi sku dang rig sngags snang ba yi/____/yid can snying la bde ba gang thob pa/____/de ni de yi mod la 'chi bdag gi/__bdud kyi zhags pa 'jigs rung gcod byed ma/__15/__mi bzad mche ba'i phrag nas bton pa dang /____/skye dang 'chi ba'i phrag rgyun snyel byed cing /____/srid pa'i sdug bsngal rma rnams gso bar mdzad/____/rang gi sras su nye bar bsgrub pa dang /__16/__yon tan rin chen tshogs kyi bgo skal gyis/____/rig pa sngags kyi nus pa'i brtul zhugs bskyed/____/'chi med grub pa'i bden don sa la sbyor/____/mi shig gsang gsum rdo rje'i khri la bkod/__17/__bla ma'i bla mar gyur pa'i rje btsun ma/____/srid zhi'i phongs pa kun las skyobs mdzad ma/____/yang dag ye shes bskyed mdzad rje btsun ma/____/'khor pa'i sdug bsngal mtsho las sgrol mdzad kyai/__18/__'chi bdag bdud las ring du rnam rgyal ma/____/gtsug tor las skyes 'od kyi phung po'i sku/____/kha ba dung dang ston ka'i zla ltar dkar/____/zhal gsum phyag brgyad rab mdzes zhi ba'i sku/__19/__de bzhin gshegs pa kun gyi gsang ba'i mdzod/____/rgyal ba'i ye shes phyag rgya'i gzugs shar ba/____/bsten pas ring 'tsho'i dngos grub myur stsol ma/____/dus min 'chi ba'i dgra las rnam par rgyal/__20/__sku yi 'od kyis srid gsum snang bar byas/____/gsung gi sgra yis brtan g.yo kun la khyab/____/thugs bsang ye shes dpal gyi be'ur 'khyil/____/yon tan 'chi med bum bzang mdzad med gter/__21/__phrin las kun tu dga' ba'i gzi brjid can/____/nor bu'i 'od snang phung po lta na sdug__/don gnyis lhun grub dbang bsgyur bcom ldan ma/____/phyogs bcu kun las rnam par rgyal ma mchog22/__lha klu 'byung po stobs dang ldan pa rnams/____/'od zer phra mos zil gyis gnon par byed/____/rgyal ba bden par smra bas bka' bstsal pa'i/____/khyod kyi gzungs sngags mthu chen bzlas pa'i mod/__23/__de la de ma thag tu 'don pa'i don/____/myur du sbyin pa'i rig sngags bskal pa'i mes/____/srid gsum gshin rje'i tshogs rnams bsreg cing 'joms/____/sngags kyi thebs pas ye shes chen por bsgyur/__24/__bcom ldan dpa' bo rab tu stobs ldan pa/____/khams gsum skye 'chi zas su za bar byed/____/'jig rten 'jig rten 'das dang ma 'das kun/____/khyod kyis rnam par gnon cing khyod la 'dud/__25/__gang gi gsang gsum de bzhin gshegs pa rnams/____/chos dbyings mkha' la rtag tu ri mor bri/____/phyag rgya'i sku la nyer bar snyoms 'jug na/____/slob pa'i tshogs rnams nyer bsten smos ci zhig26/__ngan song 'gro rnams khyod kyi phyag gis drongs/____/dman lam ltung rnams byang chub lam la bkri/____/rgyal sras rnams la 'od zer dbang bskur bas/____/mi slob zung 'jug dam par yongs su bkod/__27/__b+h+rU~M yig gtsug tor nor bur 'khyil ba las/____/sgrib gsum bag chags tshogs las rnam rgyal ma/____/'bras bu'i mthar thug ye shes gsang ba'i sku/____/chos sku rab snang rdul bral bcom ldan ma/__28/__de ltar 'chi med tshe lha rnam gsum la/____/bsten pa'i rig sngags nor bu'i rgyud mang bsgrengs/____/rtse gcig gsol ba btab pa'i nus mthu yis/____/gsang gsum byin rlabs rgyud la 'jug par mdzod/__29/__bsgom dang bzlas brjod 'bad pa phra mo yis/____/dus min 'chi ba bco brgyad ring du spangs/____/tshul gnas thos bsam bsgom pa rab tu 'phel/____/tshe dang ye shes snang ba rgyas par mdzod/__30/__blo gros srid gsum dgra las rnam par rgyal/____/phyir brgol spobs pa'i rig sngags rtsad nas 'joms/____/shes rab ral gris khams gsum g.yul ngor gcod/____/brtul zhugs zla med mchog de grub par mdzod/__31/__bstan 'dzin skyes rnams zhabs pad ring du bstan/____/bstan pa'i sbyin bdag dbu 'phang mngon par mtho/____/bstan la 'tshe ba'i kla klo'i bsam sbyor zhi/____/bstan la dad rnams bde dgas 'tsho bar shog32/__tshe yi mthar yang lha mchog rnam gsum gyi/____/thugs rjes phyag gis nam yang mi gtong bar/____/'jigs bcas gnas ngan len las rab sgrol nas/____/bde chen dag pa'i zhing du drongs bar mdzod/__34/__bdag dang bdag la 'brel pa thob pa kun/____/mi mthun 'gal rkyen nyer 'tshe kun zhi nas/____/gnas skabs tshe dpal ye shes snang ba rgyas/____/mthar thug byang chub mchog la 'god gyur cig35/__'di nas bzung ste byang chub snying po'i bar/____/tshe yi lha mchog gsum dang mi 'bral zhing /____/bkra shis dge mtshan pad+ma dkar po yis/____/'dzin ma'i khyon kun yongs su khyab gyur cig36/__sras bcas rgyal ba rgya mtsho'i thugs bskyed dang /____/lha yi lhar gyur dkar po rnam gsum gyi/____/mdzad pa smon lam mkhyen brtse nus pa'i tshul/____/de 'dra kho nar bdag sogs 'gyur bar shog37/__ces pa'ang rab tshes shing glang cho 'phrul zla ba'i tshes 7bzang por mdo stod khyung po'i yul ring can zhes bya'i sa yi char dga' ldan pho brang chen po'i rdzong chen du/__'jam dbyangs blo gros rgya mtshos rtse gcig gus pas gsol ba btab ba 'dis kyang rang gzhan gyi dam chos sgrub pa'i bar chad thams cad zhi zhing ring 'tsho'i dpal yon mchog tu rgyas pa dang don gnyis lhun gyis 'grub pa'i rgyur 'gyur bar bla ma rgyal ba sras dang bcas pas byin gyis brlab tu gsol/__sarba dA pu shrI:yo bi dza yan+tu/__mang+ga laM/__shu b+haM/__bkra shis dpal 'bar 'dzam gling rgyan drug shog/____//__
