JKCL-KABUM-02-KHA-039-wylie
dpal chen po la bstod pa rngam pa'i 'gying glu zhes bya ba/__a ho/__badz+ra gIrti ka ma la ma l+yA nirti a la la ho/__bde mchog ye shes bde ba'i gar/____/chags med chags pa chen po'i gzugs/____/rang byung grub pa'i phyag rgya 'bar/____/brtan g.yo kun gyi khyab bdag che/__hoHdngos po kun las rab 'das shing /____/rdul bral ye shes chen po'i sku/____/gar dgu'i nyams kyis rnam par sgeg__/dpal chen sku mchog 'bar la bstod/____/rngam pa'i sgra chen rab bsgrags pas/____/'gog pa'i chos las slong ba dang /____/brtan g.yo'i sgra skad thams cad kun/____/grags stong ru lu'i gsung la bstod/____/nam mkha' lta bur mtha' dbus bral/____/ye shes nyi ma rab gsal bas/____/skye med blo las 'das pa'i thugs/____/rnam pa kun mchog bde chen bstod/____/'dzad pa med pa'i yon tan ni/____/lhun grub zag pa med pa'i chos/____/mtha' klas ngang gis 'byor pa yi/____/sku dang ye shes tshogs la bstod/____/gang la gang 'dul bsam mi khyab/____/du ma'i gzugs su bsgyur ba las/____/phrin las rtsol med lhun rdzogs pa/____/srid pa ji srid 'phro la bstod/____/sangs rgyas kun gyi gsang ba gsum/____/thugs kyi dpal ber sdud pa las/____/ji snyed spro bar byed pa'i bdag__/yang dag grub pa chen por bstod/____/phyogs med phyogs dang bral ba yi/____/gzung 'dzin chos su snang ba kun/____/bdag med dbyings su mnyam pa nyid/____/dngos po'i de kho na nyid bstod/____/'khor 'das kun gyi spyi dpal che/____/kha sbyor bdun ldan he ru ka/__rang rig nyid du shes pa'i blos/____/gnyis su med par bstod par bgyi/____/de ltar bstod las byung ba'i dges/____/srid gsum grong khyer stong gyur te/____/'og min rdo rje bkod pa ru/____/tshom bu gcig tu sangs rgyas shog__/ces pa'ang jo bo smr-i ti dz+nyA nas rdzu 'phrul gyi bkod pas 'du byas pa'i gling bu dpal chen dgyes pa'i gtsug lag khang gi yang rtser sprel lo gro bzhin zla ba'i tshes nyer lnga la rig pa 'dzin pa'i gral mthar 'khod pa 'jam dbyangs chos kyi blo gros sam/__pad+ma ye shes rdo rjes bstod pa 'dis kyang bla ma dpal chen po'i go 'phang mngon du brnyes pa'i rgyur gyur cig__/__//__
