JKCL-KABUM-02-KHA-013-wylie
'jam dpal bstod pa ye shes snang ba zhes bya ba bzhugs so/____/na mo many+dzu shrI ye/____/'jam dpal sangs rgyas kun pas sngar sangs rgyas/____/ye shes mig gcig dri ma med pa'i bdag__/phra rab rdul gyi khongs su rab 'jug pa/____/brtan g.yo srid zhi'i bdag po khyod la 'dud/____/'gro ba kun gyi pha dang mar gyur cing /____/nyan rang dgra bcom byang chub sems dpa' dang /____/sangs rgyas 'phags pa thams cad bskyed pa'i yab/____/ye shes sku can gzhon nu'i tshul ston 'dud/____/sku gcig sku ni nam mkha'i mtha' dang mnyam/____/gsung gcig dbyangs kyis 'khor 'das kun la khyab/____/thugs gcig rang byung 'jam dpal ye shes sems/____/yid can kun gyi srog tu zhugs la 'dud/____/ji lta ji snyed rgyal dang de sras rnams/____/'jam dpal nyid kyi rnam par 'phrul pa las/____/gzhan du rdul tsam ma dmigs brtags par dka'/____/zab dang rgya che'i gsang gsum mtha' klas 'dud/____/zhi dang khro bo'i dkyil 'khor bsam yas kyi/____/res 'ga' gtso dang res 'ga' 'khor du ston/____/dman dang mchog gi spros pa cir ston kyang /____/thams cad thams cad 'jam dpal rol par 'dud/____/sku dang sngags kyi rol rtsed mtha' yas pa'i/____/'od zer bye ba brgya phrag dkrigs pa'i mod/____/snod bcud tha mal de bzhin nyid du sbyangs/____/rang bzhin 'od gsal ji bzhin ston la 'dud/____/kun rmongs mun pa'i gdon gyis zin pa rnams/____/sku yi shas tsam yid la snang ba dang /____/byin gyis brlabs pa'i rig sngags rgyal po yi/____/zer gyis reg pas blo mchog ster la 'dud/____/shin tu ma rungs gdug can dregs pa ni/____/dug gsum rang rgyud ru trar gol ba rnams/____/khro rgyal dmar dang nag chen 'jigs gzugs kyis/____/rtswa sbur me bzhin 'jom mdzad gshed por 'dud/____/'jam dpal sgyu 'phrul drwa ba chen po ste/____/'jam dpal dus gsum dus med kun tu bzhugs/____/gshegs dang bzhugs pa'ang ming gi spros pa tsam/____/'khor 'das mnyam nyid 'jam dpal rdo rjer 'dud/____/de ltar bstod pas 'jam dpal nyi ma yi/____/bdag cag blo yi pad+mo rab rgyas nas/____/de bzhin gshegs pa'i gsung rab mtha' dag la/____/so sor rig bzhi'i 'jug pa thob gyur cig__/tshe rabs kun tu 'jam dbyangs bla ma yi/____/yongs 'dzin mdzad de thar pa'i lam du skyel/____/byang chub spyod pa rgya mtsho mthar phyin nas/____/'jam dpal sku bzhi'i ngo bor byang chub shog__/ces pa'ang gro lod bzlas bsnyen gyi chu 'brug zla 11tshes 23gyi snga dro'i char 'jam dpal dga' ba'i go chas bris pa'o/__/____//_
