སྔོན་འགྲོ་ལ་སོགས་པ་རྒྱུན་དུ་ཉམས་སུ་ལེན་པའི་སྐབས།

Previous Text Back to Volume Page Next Text

Wylie title	sngon 'gro la sogs pa rgyun du nyams su len pa'i skabs
Location	mdo mkhyen brtse bka' 'bum Volume 8, Text 6, Pages (Folios to )
Author	མདོ་མཁྱེན་བརྩེ་
Less details More details
Citation
Genre	Practical Instructions - lag len - len thabs · Preliminary Practices - sngon 'gro

[edit]

༄༅། །སྔོན་འགྲོ་ལ་སོགས་པ་རྒྱུན་དུ་ཉམས་སུ་ལེན་པའི་སྐབས། དང་པོ་ལུས་གནད་ནི། རྒྱལ་བ་དབེན་ས་བས། རྐང་པ་ལག་པ། རྐེད་པ་གསུམ་སོ་སུམ་ཅུ་ལྕེ་རྣམ་བསྡོམ་པ་བཞི། མགོ་མིག་ཕྲག་པ་དབུགས་དང་བཞི་རྣམ་པར་སྣང་མཛད་ཆོས་བརྒྱད་ཡིན། ཞེས་གསུངས་པ་ལྟར། རྐང་པ་གཉིས་རྡོ་རྗེ་སྐྱིལ་ཀྲུང་དང་གཅིག །ལག་པ་གཉིས་མཉམ་བཞག་དང་གཉིས། རྐེད་པ་དྲང་པོར་སྲོང་བ་གསུམ། སོ། མཆུ་རང་བབས་སུ་འཇོག་ཅིང་ལྕེ་རྩེ་རྐན་ལ་སྦྱར་བ་དང་བཞི། མགོ་བོ་མ་ཡོ་བར་དྲང་པོར་བསྲོང་ནས་མགྲིན་པ་ཅུང་ཟད་གུག་པ་དང་ལྔ༌། མིག་སྣ་རྩེར་ཕབ་པ་དང་དྲུག །ཕྲག་པ་གཉིས་ཐད་ཀར་འཇོག་ཅིང་དཔུང་པ་གཉིས་བརྐྱང་པ་དང༌། དེའི་སྟེང་དུ་དབུགས་བདུན་ཕྱིར་དལ་བུས་རྒྱུ་བ་འདི་བསྣན་ནས་ཆོས་བརྒྱད་ཟེར་བ་ཡང་ཡོད་པས་དེ་ལྟར་བྱས་ནས་བཞུགས་ཚུལ་དེ་ལའང་གེགས་སེལ་བོགས་འདོན་གྱིས་གནད་མི་འདྲ་བ་མང་པོ་ཡོད་པ་ཡིན་པས། ལུས་འདི་མ་འཆུགས་པ་གལ་ཆེ། ལུས་གནད་འཆུག་ན་རླུང་འཁྲུགས་དེ་ལ་བརྟེན་ནས་སེམས་འཁྲུགས་ཏེ། དགེ་སྦྱོར་གནད་དུ་མི་འགྲོ་བ་ཡིན་པས། དེས་ན་ལུས་གནད་འདི་གལ་ཆུང་དང་བག་མེད་ཀྱིས་སྤྱོད་པ་སོགས་སྤང་དགོས། གཉིས་པ་ངག་གནད་རླུང་རོ་དགུ་སྤྲུགས་ནི་རང་གི་ལག་པ་གཡོན་པས་སྣ་བུག་གཡོན་མནན་ནས། སྣ་བུག་གཡས་ནས་རླུང་ལན་གསུམ་བསལ་བས། བདག་སོགས་སེམས་ཅན་ཐམས་ཅད་ཀྱིས་སྔོན་ཐོག་མ་མེད་པ་ནས་ཉོན་མོངས་པ་ཞེ་སྡང་གི་སྒོ་ནས་བསགས་པའི་ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་རླུང་ལྗང་ནག་གི་རྣམ་པ་ཕྱི་རོལ་དུ་རྒྱངས་སེ་ཐོན་པར་བསམ། ཡང་ལག་པ་གཡས་ཀྱིས་སྣ་བུག་གཡས་མནན་ནས་གཡོན་པའི་ནང་ནས་རླུང་རོ་ལན་གསུམ་བསལ། བདག་སོགས་སེམས་ཅན་ཐམས་ཅད་ཀྱིས་སྔོན་ཐོག་མ་མེད་པ་ནས། ད་ལྟའི་བར་དུ་ཉོན་མོངས་པ་འདོད་ཆགས་ཀྱིས་སྒོ་ནས་བསགས་པའི་ནད་གདོན་སྡིག་སྒྲིབ་ཐམས་ཅད་རླུང་རོ་དམར་ནག་གི་རྣམ་པ་ཕྱི་རོལ་དུ་ཐོན་པར་བསམ། ཡང་སྣ་བུག་གཉིས་མཉམ་དུ་རླུང་རོ་ལན་གསུམ་བསལ་བས་སྔོན་ཐོག་མ་མེད་པ་ནས་བདག་སོགས་སེམས་ཅན་ཐམས་ཅད་ཀྱིས་ཉོན་མོངས་པ་གཏི་མུག་གི་སྒོ་ནས་བསགས་པའི་ནད་གདོན་སྡིག་སྒྲིབས་བག་ཆགས་དང་བཅས་པ་རླུང་དུད་ཁུ་དང་སོལ་ཁུའི་རྣམ་པ་ཕྱི་རོལ་དུ་ཐོན་པར་བསམ། དེ་ལྟར་རླུང་རོ་དགུ་སྤྲུགས་སུ་བསལ། དེ་ལྟར་བྱས་ནས་རང་གི་སྤྱི་བོར་བླ་མ་བསྒོམ་ལ་ཕུར་ཚུགས་སུ་བསོལ་བ་འདེབས་པ་ནི། རང་གི་སྤྱི་བོར་རྩ་བའི་བླ་མ་དེ་ཉིད་སྐུ་གསུམ་ཀུན་འདུས་ཀྱི་བདག་ཉིད། འདས་པའི་སངས་རྒྱས་ཐམས་ཅད་ཀྱི་སྤྲུལ་པ། ད་ལྟའི་སངས་རྒྱས་ཐམས་ཅད་ཀྱི་རྒྱལ་ཚབ། མ་འོངས་པའི་སངས་རྒྱས་ཐམས་ཅད་ཀྱི་འབྱུང་ཁུངས། མདོར་ན་ཕྱོགས་བཅུ་རབ་འབྱམས་ན་བཞུགས་པའི་རྒྱལ་བ་སྲས་བཅས་ཉན་རང་སོ་སྐྱེ་ཕོ་མོ་བྱ་དང་རི་དྭགས་ལ་སོགས་པ་བླ་མ་དེའི་ཆོས་ཉིད་བསམ་གྱིས་མི་ཁྱབ་པའི་རྣམ་རོལ་ཆོ་འཕྲུལ་སྤྲུལ་པ་སྣ་ཚོགས་ཀྱིས་སེམས་ཅན་ཅན་ཐམས་ཅད་ཀྱི་དོན་གང་ལ་གང་འདུལ་མཛད་པ་ཡིན་པས། སངས་རྒྱས་དང་དབྱེར་མེད་དུ་ཤེས་པའི་ངང་ནས་གསོལ་བ་འདེབས་དགོས་པ་ཡིན་ཏེ། ངག་ཏུ་རྒྱལ་བ་ཀུན་འདུས་རྗེ་བཙུན་བླ་མ་རིན་པོ་ཆེ་མཁྱེན་ནོ། །བདག་གི་རྒྱུད་བྱིན་གྱིས་བརླབ་ཏུ་གསོལ། ཀུན་བཟང་བཀའ་བརྒྱུད་ཀྱི་ངོ་བོ་ཡོངས་འདུས་ཡིད་བཞིན་གྱི་ནོར་བུ་རྩ་བའི་བླ་མ་དེ་མཁྱེན་ནོ། །མཆོག་ཐུན་དངོས་གྲུབ་ཀུན་རྩོལ་ཅིག །ལན་གཅིག་བརྗོད་ནས་མོས་གུས་ཀྱིས་མཆི་མ་འཁྲུགས་པར་བྱའོ། །དལ་འབྱོར་རྙེད་པར་དཀའ་བ་རྒྱུད་ལ་སྐྱེ་སླ་བའི་ཆེད་དུ་ཐབས་ཟབ་མོ་སྔགས་ཀྱིས་རྒྱུད་སྡེ་ལས་བྱུང་བ་འདི་ལྟར་བསྒོམ་པར་བྱ་སྟེ། དབེན་པ་རུ་གཅིག་པུར་གནས་ཤིང་བདེ་བའི་སྟན་ལ་རྐང་པ་ཕྱེད་སྐྱིལ་གཡས་ས་ལ་བཙུགས་ཏེ་བསླང་གཡོན་གྱི་པུས་མོ་ཕབ་ལ། ལག་པ་གཡས་ཀྱིས་གྲུ་མོ་པུས་མོ་ལ་བཙུགས་ཏེ་འགྲམ་པར་སྦྱར། གཡོན་པུས་མོ་ལ་བཀབ་པ་སྟེ། མྱ་ངན་གྱི་འདུག་སྟངས་ཅན་ལ་དམིགས་པ་ནི་ཡུལ་ཐམས་ཅད་ཡངས་ཤིང་རྒྱ་ཆེ་བ་ལ་ངན་སོང་གསུམ་གྱི་སེམས་ཅན་རྣམས་ལ་བསམ་གྱིས་མི་ཁྱབ་པ་རང་རང་གི་སྡུག་བསྔལ་གྱིས་ལན་ཏེ་ངུ་ཙིར་དི་རེ་བ། དེའི་དཀྱིལ་དུ་བྲག་རི་ཤིན་ཏུ་མཐོ་བ་གཅིག་གི་སྟེང་ན་རང་གཅིག་པུ་གྲོགས་མེད་པར་མི་ལུས་ཐོབ་ནས་ཡོད་པ་དེ་ཉིད། མར་ལྷུང་ལ་ཁད་ཡོད་པ་ལ་འདི་སྙམ་དུ་ཨ་ཙ་མ་དམྱལ་བ་ཡི་དྭགས་དུད་འགྲོ་དཔག་ཏུ་མེད་པ་འདི་ལྟ་བུའི་ནང་ནས་རང་གཅིག་པུ་མི་ལུས་ཐོབ་པ་འདི་སྔོན་དགེ་བའི་མཐུ་ཞིག་ཡིན་པས། རེ་དགའ་སྙམ་པའི་ངང་ནས་ཚིག་འདི་ལྷང་ལྷང་བརྗོད་དོ། །ཨ་ཙ་མ་ནི་ང་རེ་འཇིགས། །ངན་སོང་སེམས་ཅན་མང་ལུགས་སམ། །མི་ལུས་ཐོབ་པ་དཀོན་ལུགས་སམ། །མ་ཀིར་ལྷུང་བར་མགྱོགས་ལུགས་སམ། །རྙེད་པ་དཀའ་ལ་འཇིག་པ་སླ། །འདི་ལ་ཅི་ལྟར་བྱས་ན་ཐར། །ཐར་ཐུབ་ཡོད་ན་སྒྲུབ་པ་ལགས། །ཞེས་སྨྲེ་སྔགས་ལྷང་ལྷང་ཡོད་པའི་ཚེ། སྟེང་གི་ནམ་མཁའ་ལ་དྲིན་ཆེན་རྩ་བའི་བླ་མ་དེ་ཉིད་སྐུ་ལ་རུས་པའི་རྒྱན་དྲུག་གསོལ་བ་ཕྱག་གཉིས་སྐྱབས་སྦྱིན་ཕྱག་རྒྱ་དང་བཅས་པ་བྱོན་ཏེ་འདི་སྐད་གསུངས་པར་བསྒོམས་ལ། ཀྱེ་མ་དལ་འབྱོར་རྙེད་དཀའ་ཐོབ་པ་ད་རེས་ཙམ། །མྱུར་དུ་ངན་འགྲོའི་གནས་སུ་ལྷུང་ལ་ཁད། །ད་རེས་འདི་ལ་དོན་ཆེན་མ་བསྒྲུབ་ན། །ཕྱི་ནས་མི་ལུས་ཤིན་ཏུ་རྙེད་པར་དཀའ། །ཞེས་གསུངས། མ་ཐག་ཏུ་རང་གི་བསམ་པ་ལ་ད་ལན་འཁོར་བའི་སྡུག་བསྔལ་ལས་གྲོལ་བར་བྱས་ནས་སེམས་ཅན་གཅིག་ཀྱང་མ་ལུས་པ་བདག་གིས་བསྒྲལ་བར་བྱའོ། །སྙམ་དུ་སེམས་བསྐྱེད་མ་ཐག་ཏུ་བླ་མའི་ཐུགས་ཀ་ནས་འོད་ཟེར་གྱི་སྙིང་པོ་ཞིག་བདག་ལ་ཟུགས་པ་ཙམ་གྱིས་རང་ཉིད་བདེ་ཆེན་ཞིང་དུ་ཡེར་གྱིས་སླེབ་བྱུང་སྙམ་པ་དང༌། བདག་གི་སྙིང་ཁ་ནས་འོད་ཟེར་དཔག་ཏུ་མེད་པ་འཕྲོས་ཏེ་སེམས་ཅན་དེ་དག་གཅིག་ཀྱང་མ་ལུས་པ་བདེ་ཆེན་གྱི་ཞིང་དུ་དྲང་བར་བསམ། སེམས་ཅན་ལ་སྙིང་རྗེ་དྲག་ཏུ་བསྒོམ་པར་བྱའོ། །མི་རྟག་པ་རྒྱུད་ལ་སྐྱེ་སླ་བའི་ཕྱིར་ཐབས་ཀྱིས་གནད་ཟབ་འདི་ལྟར། དམིགས་པ་ནི། ཡང་ལུས་གནད་གོང་ལྟར་བྱ་སྐྱིལ་ཀྲུང་བཅས་པ་ལ་བདག་གང་ནས་ཕྱིན་རུང་ཆ་མེད་པར་ལུང་པ་ཁ་བྱང་དུ་བསྟན་པ་མདོག་ནག་ཅིང་སྟོང་སེང་ངེ་བ་མིའི་རྒྱུ་འགྲུལ་མེད་པ་རྫ་རི་སྔོན་སྤུང་སྤུང༌། རྫ་ཆུ་སྔོན་པོ་ཁྲ་ལམ་ལམ་དུ་འབབ་པ། གྲོག་རོང་ལམ་མེད་པ་འཇག་རྐྱ་ཀྱུ་རུ་རུ་ཟེར་བ། མི་རོ་མང་པོ་གཅན་གཟན་གྱིས་ཕར་ཚུར་འཐེན་པ། ཝ་མོ་ཁོང་ཁོང་བརྒྱལ་བ། བྱ་རོག་གིས་སྟོང་སྟོང་སྒྲོགས་པ༌། འུག་པས་ཧ་ཧ་ཟེར་བ། བྲག་རི་མཐོ་སང་སང་ལྷགས་པ་འུ་རུ་རུ་བྱེད་པ། ཉི་མ་རི་རྩེ་ནས་ནུབ་པ་གྲིབ་སོ་ནག་ངམ་ངམ་པའི་དུས་དེར་སླེབ་སྟེ། སྔོན་ཆད་འགྲོ་ནི་མ་མྱོང༌། གྲོགས་མེད་གཏད་སོ་མེད་པར་ཐོམ་ཐོམ་དུ། ཀྱེ་མ་ཀྱེ་ཧུད་ཨ་ཙ་མ། །གར་འགྲོའི་གཏད་སོ་བདག་ལ་མེད། །བུ་དང་ནོར་རྫས་གར་ཡོད་དམ། །ཡུལ་དང་ཕ་མ་ནམ་སླེབ་བམ། །ཀྱེ་མ་ཀྱི་ཧུད་ང་རེ་སྐྱོ། །ཞེས་ལྷང་ལྷང་ཟེར་ཞིང་ཐོམ་ཐོམ་ཕྱིན་པ་ལ་ཅི་ཞིག་ཅེ་ན། བྲག་རོང་ཞིག་ཏུ་གློ་བུར་དུ་ལྷུང་བར་ལག་པ་གཡས་པ་བྲག་གི་དཀྱིལ་ན་རྩྭ་ཕུང་གཅིག་ཡོད་པ་དེ་ལ་ཟིན་ཏེ་དམ་དུ་བཟུང་རུང༌། འདར་ཕྲི་ལི་ལི་ཡོད་པ་ལ་བལྟས་པས་ན་གཏིང་མི་མངོན་པར་ཡར་ལ་བལྟས་པས་གནམ་ལ་སྙོག་པ་མེ་ལོང་གི་ངོས་ལྟར་འདྲེད་ཅིང༌། རྒྱ་ཆེ་བ་རླུང་འུ་རུ་རུ་ཟེར་བ་ཞིག་ཏུ་ཡོད་པ་ལ། རྩྭ་ཕུང་དེའི་གཡས་ཕྱོགས་ཀྱི་བྲག་གི་སེར་ཁ་གཅིག་ནས་བྱི་བ་དཀར་པོ་གཅིག་བྱུང་ནས་རྩྭ་ཉག་མ་གཅིག་བཅད་དེ་ཁྱེར་སོང་ཡང་གཡོན་ཕྱོགས་ནས་བྱི་བ་ནག་པོ་གཅིག་བྱུང་ནས་རྩྭ་ཉག་མ་གཅིག་བཅད་དེ་ཁྱེར་སོང༌། དེ་གཉིས་རེས་མོས་བྱས་ཏེ་ཁྱེར་པས་རྩྭ་ཕུང་དེ་ཇེ་ཆུང་ཇེ་ཆུང་ལ་སོང༌། དེ་ཡང་གཡས་ཀྱི་བྲག་གི་སེར་ཁ་ནས་བྱི་བ་དཀར་པོ་ཞིག་གིས་རྩྭ་ཉག་གཅིག་བཅད་དེ་ཁྱེར་བ་ནི། དེ་རིང་ནམ་ལངས་ནས་མུན་མ་རུབ་བར་དུ་ཚེ་ལ་ཉི་མ་གཅིག་ཐལ་བའི་དཔེ་ཡིན་གཡོན་གྱི་བྲག་གི་སེར་ཁ་ནས་བྱི་བ་ནག་པོ་གཅིག་གིས་རྩྭ་ཉག་མ་གཅིག་བཅད་དེ་ཁྱེར་བ་ནི་དོ་ནུབ་མུན་རུབ་ནས་སང་ནམ་ལངས་ཀྱི་བར་དུ་ཚེ་ནུབ་གཅིག་ཐལ་བའི་དཔེ་ཡིན་བྱི་བ་ལ་རྒོལ་ཐབས་ནི་མེད་བྱི་བ་ལ་ནི་འཇིགས། དངངས་སྐྲག་གདའ་སྟེ་ཨ་ཙ་མ། ད་ནི་བདག་ལ་འཆི་བ་སླེབ་སྟེ་ཐོས་པ་ནི་མེད་སྔོན་ཆད་འཆི་བ་མ་དྲན་པས་ཆོས་ནི་མེད་འཆི་བ་ཡོང་རྒྱུ་ཡིད་ལ་མེད་པར་གློ་བུར་དུ་སླེབས། ད་ནི་བུ་ཚ་ནོར་རྫས་ཉེ་འབྲེལ་ཡུལ་མི་ཁྱིམ་མཚེས་དང༌། དེ་རིང་ནས་བྲལ་ཏེ། དེང་ཕྱིན་ཆད་ནི་འཕྲད་མི་ཡོང༌། སྔོན་ལ་དགེ་བ་མ་བྱས། ནོར་བསགས་པ་ནི་ཤུལ་དུ་ལུས། སྔོན་ཆད་འགྲོ་མ་མྱོང་བའི་གཤིན་ཡུལ་མུན་ནག་ཐག་རིང་དུ། གྲོགས་མེད་པ་གཅིག་པུ་འགྲོ་དགོས་པས་ཨ་རྫིས་འཇིགས་ལ། འདི་ལས་ཐར་ཐབས་ཤིག་ཅི་དྲག །ད་ཅི་འདྲ། བྱེད་ཨ་ཙ་མ་འདི་ལས་ཇི་ལྟར་བྱས་ན་ཐར་ཞེས་སྐྲག་སྔངས་ལྷང་ལྷང་ཡོད་པའི་ཚེ། སྟེང་གི་ནམ་མཁའ་ནས་རྩ་བའི་བླ་མ་དེ་ཉིད་པད་ཟླའི་སྟེང་ན་སྐུ་ལ་རུས་པའི་རྒྱན་དྲུག་གསོལ་ནས། ཌ་དྲིལ་བསྣམས་ཏེ་གར་སྟབས་ལིང་ལིང་བྱེད་ཅིང་འདི་སྐད་དུ། ཀྱེ་མ་ད་ནི་མི་རྟག་མྱུར་དུ་འཇིག། །ཕྱི་ཡི་དུས་བཞི་མི་རྟག་འགྱུར་དུ་འགྲོ། །རྒན་རིམ་དགྲ་གཉེན་ཐམས་ཅད་འཆི་དང་རྒུད། །གཞོན་རིམ་དར་མ་ལོ་ཟླ་ཞག་གྲངས་འགྱུར། །འཆི་བ་འདི་ལ་བཟློག་ཐབས་ཅི་ཡང་མེད། །བཟློག་ཐབས་ཡོད་དམ་ད་ལྟ་འདི་ལ་ལྟོས། །ད་ནི་ལངས་མེད་བླ་མར་མོས་གུས་མཛོད། །ཅེས་གསུང་ཐོས་པ་ཙམ་གྱིས་འདི་ལྟ་བུ་འཆི་བ་ལ་མ་ཐུག་པའི་ཚེ་ཆོས་ཤིག་བྱ་རྒྱུ་ཡིན་པ་ལ། ཆོས་ཤིག་མ་བྱས་པ་ང་རེ་འགྱོད། ད་ནི་ཤི་རུང་བླ་མ་དཀོན་མཆོག་མཁྱེན། བླ་མ་དཀོན་མཆོག་གསུམ་ལ་ཐུགས་རྗེ་ཡོད་ན་བདག་འཁོར་བའི་གཡང་ས་ཆེན་པོ་འདི་ལས་བསྒྲལ་ན་ཅི་མ་རུང་བསམ་ཞིང་བླ་མ་དཀོན་མཆོག་མཁྱེན་ཞེས་སྙིང་ཐག་པ་ནས་མོས་གུས་དྲག་པོ་བྱས་པས་བླ་མའི་ཐུགས་ཀ་ནས་འོད་ཟེར་གྱི་སྙིང་པོ་ཞིག་བྱུང་སྟེ་བདག་ལ་ཟུག་པ་དང༌། རྩྭ་ཕུང་ཆད་པ་དང་མཚུངས་ཏེ། རང་ཉིད་འོད་ཟེར་དེས་ཡེར་གྱིས་བཏེགས་ནས་བདེ་ཆེན་གྱི་ཞིང་དུ་སླེབ་སྙམ་པ་དང༌། བདག་གི་སྙིང་ཁ་ནས་འོད་ཟེར་དཔག་ཏུ་མེད་པ་འཕྲོས་པས་ཁམས་གསུམ་གྱི་སེམས་ཅན་གཅིག་ཀྱང་མ་ལུས་པ། བདེ་ཆེན་དག་པའི་ཞིང་དུ་དྲངས་བར་བསམ་ཞིང༌། སྙིང་རྗེ་དྲག་ཏུ་བསྒོམ་པར་བྱའོ། །དེ་ལྟར་མི་རྟག་པའི་ཚུལ་གྱིས་བློ་བསྐུལ་ཏེ་མྱུར་དུ་ཆོས་ལ་འཇུག་དགོས་པ་ནི། སྒེག་མོའི་མགོ་ལ་མེ་ཤོར་བའམ། སྡར་མའི་པང་དུ་སྦྲུལ་བྱུང་བ་ལྟར། ལེ་ལོ་དང་ཕྱི་བཤོལ་ཀྱི་དབང་དུ་མི་གཏོང་བར་དགེ་བར་འབད་ཅིང༌། རྟག་འཛིན་བློ་དེ་ལྡོག་པར་བྱའོ།། །།