DKYD-KABUM-07-JA-055

Previous Text Back to Volume PageNext Text

Wylie title
Location	mdo mkhyen brtse bka' 'bum Volume 7, Text 55, Pages (Folios to )
Author	མདོ་མཁྱེན་བརྩེ་
Less details More details
Citation
Genre

Tibetan Text

[edit]

༁ྃཿ བསྟན་སྐྱོང་ཡིད་བཞིན་དཔལ་འབར་མའིཿ མཆོད་སྒྲུབ་སྙིང་པོ་བཅུད་བསྡུས་བཞུགསཿ ༁ྃཿ ཀུན་བཟང་ཡུམ་ལ་ཕྱག་འཚལ་ལོཿ བསྟན་སྐྱོང་རྡོ་རྗེ་གཤོག་རྒོད་མའིཿ མཆོད་སྒྲུབ་དངོས་གྲུབ་རོལ་མཚོ་བསྟནཿ རྃ་ཡྃ་ཁྃཿ ཨོཾ་ཨཱཿཧཱུྃཿཔཉྩ་ཨམྲྀ་ཏ་ཧ་ཧོ་ཧྲཱིཿ བྷྱོཿ ཀི་ལ་ཡ་དང་སྔགས་སྲུང་རོལ་པའི་སྲསཿ བསྟན་སྐྱོང་ཆེན་མོ་རྡོ་རྗེ་གཤོག་རྒོད་མཿ བདག་དང་དབྱར་དམ་གཅིག་པའི་ཐ་ཚིག་དགོངསཿ སྤྱན་འདྲེན་གནས་འདིར་བཛྲ་ས་མཱ་ཛཿ མདུན་མཁར་ཁྲག་མཚོ་མེ་རླུང་འཁྲུགས་པའི་དབུསཿ དགྱེས་པར་བཞུགས་ལ་གུས་པས་ཕྱག་འཚལ་ལོཿ ཕྱི་མཆོད་སྤྱན་གཟིགས་འདོད་ཡོན་ནམ་མཁའ་གང་ཿ ནང་མཆོད་པཱ་ལིང་སྨན་རཀ་ཞིང་ཁམས་ཁྱབཿ གསང་མཆོད་བདེ་ཆེན་དགའ་བཞིའི་ཡེ་ཤེས་ཀྱིཿ འབྱུང་གནས་རྩ་བཅུད་ཁམས་ཀྱི་དངས་མའི་རོཿ བརྟེན་བགྲུབ་བསྐང་རྫས་དཀོར་ནོར་ལོངས་སྤྱོདཚོགསཿ དངོས་སུ་འབྱོར་དང་ཡིད་ཀྱིས་སྤྲུལ་ཏེ་འབུལཿ མཛའ་གྲོགས་ཐུགས་དམ་བསྐངས་ལ་དགྱེས་པ་བསྐྱེདཿ རྒྱལ་བ་གཉིས་པ་པདྨ་ཐོད་ཕྲེང་གིཿ གསང་སྔགས་བསྟན་པའི་སྲུང་མར་མངའ་གསོལ་བའིཿ དབུ་ལྔ་ཕྱག་བཞི་ཁྱུང་གདོང་རྡོར་གཤོགས་ཅནཿ ཁྲོ་མོའི་ཆས་རྫོགས་རྫུ་འཕྲུལ་དྲེའུ་སྔོན་ཞོནཿ ཞི་རྒྱས་དབང་དྲག་རྣམ་འགྱུར་ཅིར་ཡང་སྟོནཿ དཔལ་ལྡན་རྡོ་རྗེ་གཤོག་རྒོད་མ་ལ་བསྟོདཿ བདག་དང་སྔོན་ནས་ལས་དང་སྨོན་ལམ་འབྲེལཿ ཚེ་རབས་ཀུན་ཏུ་མི་འབྲལ་དམ་བཅས་བཞིནཿ རྩེ་གཅིག་ཁྱོད་སྒྲུབ་མཆོད་བསྟོད་གསོལ་འདེབས་ནཿ མཛའ་གཙུག་དམ་བཅའི་རི་མོར་གཉེར་དགོངས་ལཿ དགའ་བཞིའི་ཡེ་ཤེས་བདེ་བ་ཆེན་པོར་སྦྱོརཿ ས་དང་ལམ་གྱི་ཡོན་ཏན་གོང་འཕེལ་ཞིང་ཿ འགལ་རྐྱེན་ཀུན་སོལ་མཐུན་རྐྱེན་ལེགས་ཚོགས་སྤེལཿ འདོད་པའི་དོན་ཀུན་འབད་མེད་ལྷུན་གྲུབ་མཛོདཿ ཏིང་འཛིན་དམིགས་གནད་ལྡན་པ་ཡིསཿ ཨོཾ་རུ་རུ་ཧེ་དུན་ཁ་ཁ་དུནཿ རཀྨོ་དུ་ར་དུ་ཏི་ཛཿ རཀྨོ་ཉེ་ར་དུ་ར་དུ་ཏི་རུ་བྷྱོཿ ཙིཏྟ་ཧྲིང་ཧྲིང་ཛ་ཛཿ བཟླ་ཞིང་ཆོས་ཉིད་གཅིག་ཏུ་བསྲེཿ མཆོད་ཅིང་ཐུགས་དམ་བསྐང་བ་ནིཿ བདེ་སྟོང་དབྱེར་མེད་ཆོས་སྐུའི་ངང་ཉིད་ལསཿ ཏིང་ངེ་འཛིན་གྱི་རྣམ་རོལ་མཆོད་པའི་སྤྲིནཿ གཟུགས་མཛེས་སྒྲ་སྙན་དྲི་ཞིམ་རོ་མངར་དང་ཿ རེག་འཇམ་དབང་པོ་ཡུལ་དྲུག་ཚིམ་བྱེད་རིགསཿ བདུད་རྩི་སྨན་དང་རཀྟ་བཱ་ལིང་གཏོརཿ རྟེན་བསྒྲུབ་ཐུགས་དམ་བསྐང་དང་མཆོད་པའི་རྫསཿ སྤྱན་གཟིགས་དཀོར་ནོར་མཁོ་དགུའི་བྱེ་བྲག་ཀུནཿ ནམ་མཁའ་མཛོད་ཀྱི་ལོངས་སྤྱོད་ལྟར་སྤྲུལ་ནསཿ གསང་སྔགས་བསྟན་སྐྱོང་རྣལ་འབྱོར་རེ་སྐོང་མཿ རྡོ་རྗེ་གཤོག་རྒོད་འཁོར་དང་བཅས་ལ་འབུལཿ ཐུགས་དམ་དགྱེས་སྐོང་ཉམས་ཆགས་འགལ་འཁྲུལ་བཤགསཿ གང་བཅོལ་ཕྲིན་ལས་ཐོགས་མེད་མྱུར་འགྲུབ་མཛོདཿ རྩ་སྔགས་མཐརཿ སརྦ་པཉྩ་རཀྟ་བཱ་ལིང་ཏ་ཁ་ཁ་ཁཱ་ཧི་ཁཱ་ཧིཿ ལན་ལྔའམ་བདུན་བརྗོདཿ ཧཱུྃཿ སྐུ་གསུམ་ཞིང་ན་གང་ལ་གང་འདུལ་གྱིཿ གསང་གསུམ་ཆོ་འཕྲུལ་དཔག་ཡས་རོལ་པའི་གརཿ དཔལ་ལྡན་རྡོ་རྗེ་གཤོག་རྒོད་སྤྲུལ་འཁོར་བཅསཿ མངའ་གསོལ་བསྟོད་དོ་ལས་ཞིའི་ཕྲིན་ལས་སྒྲུབསཿ བདེ་སྟོང་ཟག་མེད་རྟོགས་པ་མངོན་གྱུར་ཅིང་ཿ ཡིད་ལ་འདོད་པའི་བསམ་དོན་མྱུར་འགྲུབ་མཛོདཿ གསང་བའི་བཀའ་སྲུང་དཔལ་སྟེར་མའིཿ མཆོད་སྒྲུབ་བཅུད་བསྡུས་སྙིང་པོ་འདིཿ བདག་འདྲ་ཨ་ཙར་དམར་པོ་ཡིསཿ རང་གཞན་དོན་དུ་ཕབ་པའོཿ ས་མ་ཡཱཿ རྒྱ་རྒྱ་རྒྱཿ གུ་ཧྱཿ བཀྲ་ཤིས་དཔལ་འབར་བདེ་སྐྱིད་ལྡན་པར་ཤོགཿ ཿ