DKR-KABUM-23-'A-026-wylie
<div class="wylie-content"
@#/_/rdzogs pa chen po gsang ba snying thig ma bu'i bka' srol chu bo gnyis 'dus kyi khrid yig dri med zhal lung gi dgongs pa ltar bkod pa'i sngon 'gro'i ngag 'don rgyas pa gdod ma'i myur lam zhes bya ba bzhugs so// @#/_/na mo gu ru dz+nyA na kA ya ya/_'dir 'od gsal rdzogs pa chen po'i lam mchog paN chen bi ma las shing rta'i lam srol phyes pa'i gdams ngag sgom pa'i snod rung du bya ba sngon 'gro'i chos rnams las/_ngag 'don gyi rim pa khol phyung du bkod pa la/_zab lam sgom pa'i snod du thun gyi sngon 'gro/_snying tig gi khyad chos sems sbyong bdun gyis lam gyi gzhi bca' ba/_thun mong sngon 'gro bzhis rgyud dag par byed pa bla rnal dang bcas pa'o/_/dang po ni/_gnas dben par bde ba'i stan la bsam gtan gyi spyod lam dang ldan pas 'khod de/_rlung ro dgu phrugs sam sum phrugs su bsal bas sdig sgrib thams cad dag par bsam la/_sems can thams cad kyi don du man ngag rdzogs pa chen po'i gdams pa zab mo nyams su blang bar bgyi'o snyam pas/_dpal ldan rtsa ba'i bla ma rin po che/_bdag gi spyi bor pad+ma'i gdan bzhugs nas/_/bka' drin chen po'i sgo nas rjes bzung ste/_/sku gsung thugs kyi dngos grub stsal du gsol/_/zhes brjod pa dang chabs cig tu/_rang gi spyi bor pad+ma dang nyi zla'i gdan la rtsa ba'i bla ma rdo rje sems dpa'i rnam pa can du zhabs sems skyil gyis bzhugs pa _kaHthog rig 'dzin tshe dbang nor bu'i gsung rgyun du bla ma gzhi'i kun bzang gi rnam par thig le sngon po'i dbus su bsgoms pa dang kun mkhyen gyis rdo rje'i lam bstan du bla ma rdor sems su gsal gsungs la/_rgyal ba karma pa rang byung rdo rjes kyang drangs par mdzad do mchan/_la mos gus gdung shugs drag pos/_dus gsum sangs rgyas thams cad kyi ngo bo bla ma rin po che mkhyen/_bdag gi rgyud smin cing grol bar byin gyis brlab tu gsol/[ 1$0000210]zhes pa tsam mam/[1$0000300 ]zab lam gyi rtogs pa khyad par can rgyud la skye bar byin gyis brlab tu gsol/_tshe 'di nyid la phyag rgya chen po mchog gi dngos grub thob par byin gyis brlab tu gsol/_zhes gsol ba btab/_bla ma'i zhabs g.yas pa'i mthe bong las bdud rtsi dkar po'i rgyun babs/_rang gi tshang bug nas zhugs lus thams cad gang*/_bde ba chen po'i ye shes skyes/_mthar bla ma 'od du zhu nas rang la thim pas rgyud byin gyis brlabs par bsams nas rig pa 'dzin med du 'jog mthar/_rdo rje'i 'dug stangs dang mos sgom cung zad byas _mdun gyi bla ma kun bzang yab yum hU~M mthing ga'i rnam par lus rdo rje sngon po rtse gsum par bsgoms pa'i lte bar byon par bsam zhes tshe dbang nor bu'i gsungs/_mchan/_pas bar chad med pa'i dgos pa dang*/_don dam gyi srung 'khor mchog tu 'gyur ro/[ 1$0000210]/gnyis pa snying tig gis khyad chos sems sbyong bdun gyis lam gyi gzhi bca' ba la bdun las/_dang po mi rtag pa la bsam nas sems sbyong ba ni/[ 1$0000300]phyi rol nyin mtshan dus bzhi'i 'gyur ldog dang*/_/nang gi phung po gsang ba gnyen 'dun sogs/_/'dus byas chos rnams mi rtag myur du 'jig_/snying po med pa chu lbur lta bu 'o/_/[1$0000210]gnyis pa 'phral yun gyi bde ba la sems sbyong ba ni/[1$0000300 ]dge sdig 'bras bus rigs drug gnas su 'khor/_/srid pa'i bde 'byor dug can kha zas bzhin/_/ltar snang bde yang nam phugs sdug bsngal rgyu/_/nges legs thar pa'i lam mchog kho na 'o/_/gsum pa rkyen du ma la bsam ste sems sbyong ba ni/_rkyen snang 'khrul pa'i bya ba zin dus med/_/ji ltar byas kyang 'dod thog bab mi 'gyur/_/smig rgyu'i chu la ri dwags snyeg pa bzhin/_/de bas blo sna dge la bsgyur bar bya/_/bzhi pa byas pa don med la sems sbyong ba ni/_'jig rten bya bzhag don med chags sdang gzhi/_/gnyid thun gcig gi rmi lam bzang ngan ltar/_/snang ba sgyu mas bslus pa mtshang re che/_/lings kyis bor te zab mo'i gdams ngag bsgom/_/lnga pa sangs rgyas kyi yon tan bsam nas sems sbyong ba ni/_sangs rgyas sku gsum yon tan tshad med ldan/_/rang la yod pa de nyid bsgom na thob/_skyes bu 'brum nad 'byongs bzhin mi ldog pas/_/gtan bde'i go 'phang dka' ba spyad la bsgrub/_/drug pa bla ma'i gdams ngag la brten nas sems sbyong ba ni/_bla ma sman pa gdams ngag bdud rtsi'i bcud/_/'khor ba'i rgya mtsho sgrol ba'i gru bo che/_thar pa'i khang bzang bgrod pa'i them skas mchog_/nyin mtshan bsran btsugs de don nyams su blang*/_/bdun pa rnam par mi rtog pa la sems sbyong ba ni/_bde gsal rnam par mi rtog mkha' lta bu/_/bsam gtan dam pa'i bde bas rgyud dul ba/_/zhing sa gshin por lo tog legs pa bzhin/_/ting 'dzin kun gyi gzhi rten bsgrub par bya/_/'di rnams ngag 'don tsam bkod pa ste gtso bor thun re re bzhin sems 'dzin dgos pas zangs yig can dang*/_sems sbyong bdun gyi don khrid dri med zhal lung gzhung rnams su gsungs pa'i don la yid bzhag pas nges 'byung gi blo 'khul nges bya/_khyad par sems sbyong tha ma la lus gnad chos bdun bca' rlung ro bsal te lus stong gsal dbus dbu ma'i yas man gyi sna la a haM gsal ba 'bar 'dzag gi zhu bdes 'khor lo bzhir khyab mthar snying gar a dkar la sems gtad nas bum can bzung ba bde stong*/_phyi'i tshogs drug gi snang ba thams cad nam mkha'i rang bzhin du sngo mer gyis zhu bar bsams la rlung phyir mnan/_yul snang nam mkha'i rang bzhin de sna bug nas zhugs lte bar sngo mer gyis khengs/_lus khams tsha grang dang bstun pa'i rlung gi reg bya de ltar dmigs pa gsal stong*/_lus gnad sngar ltar la/_rlung rang bab bzhag ste sems dus gsum gyi rtog pas ma bslad pa'i rang bab tu 'bol le/_yengs med hrig ger bzhag pa chos nyid rnam par mi rtog pa'i ngang la sems 'dzin pa ste/_de rnams gal che bas ngag 'don khrigs nas gsala'adebs mi nus pa'i phyir dmigs rim mdor bsdus smos pa ltar sems sbyang*/_'dir rig 'dzin chen po'i khrid rgyun du sems sbyang dang po'i mtshams skyabs 'gro/_gnyis par sems bskyed/_gsum pa dang bzhi pa'i rjes man+Dal/_lnga pa'i rjes rdor sems sgom bzlas/_drug pa'i rjes bla ma'i rnal 'byor/_bdun pa'i rjes rlung thig la bslab pa rnams spel te byed pa'i lugs kyang yod do/_/gsum pa thun mong sngon 'gro bzhi sbyor gyis rgyud dag par byed pa ni/_yi ge dmar ru'i rgyab yig las shugs bstan du 'byung ba dang chos kyi rgyal po smin gling gter chen rin po che yab sras kyi phyag bzhes su mdzad pa ltar bkod pa la/_dang po lam dman pa las khyad par du gyur pa skyabs 'gro la'ang gnyis/_kun rdzob dang*/_don dam gyi skyabs 'gro'o/_dang po ni/_sa phyogs dag pa'i zhing khams chen por gyur pa'i dbus su/_rang gi mdun du dpag bsam gyi ljon shing yal ga lo ma me tog 'bras bu phun sum tshogs pa nam mkha'i dbyings thams cad khyab pa'i lte bar seng khri pad+ma nyi zla'i gdan la rtsa ba'i bla ma kun tu bzang po longs spyod rdzogs sku'i rnam par bzhugs pa la brgyud pa'i bla ma rnams dang*/_mdun gyi yal gar khyad par gyi sangs rgyas dpal rdo rje sems dpa' la yi dam dkyil 'khor gyi lha tshogs rnams dang*/_g.yas su thun mong gi sangs rgyas ston pa thub pa'i dbang por phyogs bcu dus gsum gyi sangs rgyas sprul sku'i rnam pa can rnams kyis bskor ba/_rgyab tu chos dkon mchog glegs bam brag ri brtsegs pa lta bu/_g.yon du theg pa che chung gi dge 'dun/_bar mtshams kun tu mkha' 'gro chos skyong nor lha'i tshogs sprin phung gtibs pa ltar bzhugs pa'i mdun du/_rang gzhan sems can thams cad sgo gsum 'jug pa gcig tu dril te skyabs su 'gro ba'i mos pas/_nam mkha'i gnas su nam mkha' gang ba yi/_/bla ma yi dam mkha' 'gro'i tshogs rnams dang*/_/sangs rgyas chos dang 'phags pa'i dge 'dun la/_/bdag sogs 'gro drug gus pas skyabs su mchi/_/zhes brgya stong sogs ci nus kyi mthar/_skyabs yul rnams kyi thugs ka nas 'od zer 'phros pas sems can thams cad kyi sdig sgrib sbyangs te dag pa'i zhing du 'ur gyis song bar bsam/_tshogs zhing rnams dbus kyi bla ma la thims de yang rang la thim par bsam ste gnas lugs kyi skyabs 'gro'i ngang du ngal bso/_sngon 'gro 'bum lnga grangs gsog na 'di gsag pa legs snyam/[ 1$0000240]'di la kaHthog tshe dbang nor bu'i khrid rgyun du rang gi mdun gyi nam mkhar bla ma sku dngos su gsal ba'i mtha' bskor du skyabs yul rnams nam mkha'i skar tshogs bzhin bsgom/_mchan/[1$0000300 ]mthar dmigs med kyi ngang du 'jog par gsung*/_gnyis pa ni/_rang gi lus kyi 'khor lo bzhi'i rtsa 'dab dge 'dun/_thig le chos/_rlung lnga'i dwangs ma ye shes lnga ni nyon mongs pa ye nas dag pa sangs rgyas sku gsum gyi bdag nyid du rang ngo shes nas bsgom snyam du/_rlung lnga rnam dag dwangs ma'i sku/_/nyon mongs rnam dag ye shes lnga/_/sku gsum mdzad pa mthar phyin pa'i/_/dkon mchog gsum la rtogs pas 'dud/_/ces lan ci rigs brjod la 'od gsal gyi rang ngor mnyam par bzhag go__/gnyis pa theg chen gyi rtsa ba sems bskyed la gnyis/_kun rdzob dang*/_don dam mo/_dang po ni/_don dam par gzod ma nas rnam par dag kyang*/_kun rdzob 'khrul pa'i dbang gis sdug bsngal gyi rgyu 'bras bsam gyis mi khyab pa la rtag par longs spyod pa'i ma rgan sems can thams cad gdod ma'i mgon po'i go 'phang la 'god pa dang*/_rang gi rig pa mngon sum gyi ye shes lam snang ba rnam bzhi nyams su blang snyam pa'i sems snga na med pa bskyed la/_e ma ho/_ma rig 'jig rten mun pa'i klong*/_/rang gi thabs shes sgron me yis/_/rang la gnas pa'i ye shes de/_/bla ma'i drin gyis rtogs par bya'o/_/zhes lan grangs ci nus brjod la smon pa sems bskyed/_dbyings ka dag chos sku skye med nam mkha' lta bu dang*/_ye shes lhun grub rang rig sku gsum gyi ngo bo spros pa'i mtha' bzhi las 'das pa tshig dang yi ge med pa'i don/_smra bsam brjod med chen po nyid rang ngo shes par bya snyam du/_e ma ho/_/sangs rgyas mthar thug dbyings rig gnyis/_/sku gsum ngo bo mtha' bral gzhi/_/tshig las 'das pa'i rang byung de/_/da lta nyid du rtogs par bya'o/_/zhes lan grangs ci nus su brjod la 'jug pa'i sems bskyed do/_gnyis pa ni/_don dam par chos thams cad gzod ma nas spang blang bcing grol med pa mnyam rdzogs chen po'i rang bzhin du sangs rgyas pas 'khor ba dang myang 'das/_sangs rgyas dang sems can/_bdag gzhan bzang ngan gyi dbye bsal med pa yin par shes pas rgyu 'bras las 'das pa chos sku'i dgongs pa rang chas su lhun 'byams kyi ngang du la bzla ba'i blos/_bdag dang mtha' yas sems can rnams/_/ye nas sangs rgyas yin pa la/_/yin par shes pa'i bdag nyid du/_/byang chub mchog tu sems bskyed do/_/zhes brjod grangs 'bum phrag la 'di bsag_/spro na kun rdzob sems bskyed dbugs 'byin 'jug dang sbyar ba'i bde sdug gtong len dang*/_don dam sems bskyed 'khor gsum rang bzhin med pa'i rang ngor mnyam par bzhag go_/gsum pa sdig sgrib sbyong byed snying po rdor sems sgom bzlas kyi ngag 'don la/_spyi dang*/_khyad par ro/_dang po spyi ni/_rang lus tha mal spyi gtsug tu/_/pad dkar zla ba'i dkyil 'khor steng*/_/a las rdo rje sems dpa' dkar/_/rdor dril 'dzin pas yum la 'khyud/_/rin chen rgyan spras sems skyil bzhugs/_/thugs kar zla steng hUM gi mthar/_/snying po yi ge brgya pas bskor/_/sku dang sngags las bdud rtsi'i rgyun/_/dkar nar babs te spyi bor zhugs/_/bdag gi lus kun gang ba yis/_/sdig sgrib dag nas shel gong ltar/_/dri ma med pa'i lus su gyur/_/ces ngag tu brjod cing dmigs pa rtse gcig tu gcun la yig brgya bzlas mthar/_mgon po bdag ni mi shes rmongs pa yis:_dam tshig las ni 'gal zhing nyams:_bla ma mgon pos skyabs mdzod cig:_gtso bo rdo rje 'dzin pa ste:_thugs rje chen po'i bdag nyid can:_'gro ba'i gtso la bdag skyabs mchi:_sku gsung thugs rtsa ba dang yan lag gi dam tshig nyams chag thams cad mthol zhing bshags so/_/sdig sgrib nyes ltung dri ma'i tshogs thams cad byang zhing dag par mdzad du gsol/_zhes gsol ba btab pas/_rdo rje sems dpa'i zhal nas/_rigs kyi bu khyod kyi sdig sgrib thams cad dus da lta nas dag go zhes gnang ba bstsal te 'od du zhu nas rang la thims pas dmigs med kyi ngang du mnyam par bzhag_/gnyis pa ni/_skad cig gis pad zla'i dbus su rang nyid rdo rje sems dpa' dkar po zhal gcig phyag gnyis pa/_g.yas rdo rje thugs kar 'dzin cing*/_g.yon dril bu dkur brten pa/_zhabs rdo rje'i skyil krung can/_dar dang rin po ches brgyan pa'i snying nang zla ba'i dbus su rdo rje dkar po tshon gang ba/_lte bar hUM gis mtshan pa'i mtha' bskor du yi ge brgya pa dkar ser mar me lta bu'i 'od kyis bdag dang sems can thams cad kyi sdig sgrib sbyangs te snang ba thams cad rdo rje sems dpa'i sku/_sgra skad thams cad yi ge brgya par bsam la/_oM badz+ra satwa sa ma ya ma nu pA la ya/_badz+ra satwa twe no pa tiSh+Tha/_dr-iD+ho me b+ha wa/_su toSh+yo me b+ha wa/_su poSh+yo me b+ha wa/_a nu rak+to me b+ha wa/_sarba sid+d+hi m+me pra yats+tsha/_sarba karma su tsa me tsit+taM shre yaHku ru hU~M/_ha ha ha ha hoH_b+ha ga wAn/_sarba ta thA ga ta hr-i da ya/_badz+ra mA me muny+tsa/_badz+ri b+hA wa/_ma hA sa ma ya satwa a/_zhes ci 'grub bzlas pa'i rjes la snang ba thams cad thugs ka'i hUM la bsdu/_hUM mi dmigs pa'i ngang la bzhag ste bsngo ba bya/_yig brgya 'bum phrag la 'di bsag_/skabs 'dir rig 'dzin chen po'i khrid rgyun du/_phyi bya rgyud ltar bla ma rdo rje sems dpa' spyi bor sgom pa zhes/_rang gi spyi bor pad+ma dkar po 'dab brgyad de las 'dab ma gcig la gcig mthud kyi tshul du nam mkha'i mthas gtugs pa'i bar du khyab pa/_de lta bu'i 'dab ma re re'i 'og tu sems can re re 'khod pa/_de re re'i spyi gtsug gi pad 'dab steng du'ang rdo rje sems dpa' re bzhugs pa/_de thams cad kyang rdor sems yab rkyang sems skyil can/_thugs kar sa bon sngags phreng dang bcas pa las 'od 'phros/_sangs rgyas sras bcas bstim/_bzlas pa dang bdud rtsi 'beb sbyong mthar/_mgon po bdag ni sogs/_rdo rje sems dpa' sems dpa' che/_/rdo rje de bzhin gshegs pa kun/_/rdo rje sems dpa' kun tu bzang*/_/phyag 'tshal rdo rje sems dpa' la'o/_sho lo kas bstod/_rdo rje sems dpas dbugs dbyung ste/_gnyis pa nang spyod rgyud ltar snying gar sgom pa dang sbrel na/_rang gi spyi bor bzhugs pa'i mu nas sku'i byin rlabs bdud rtsi byang chub sems kyi rnam par slar yang babs/_mgrin pa yan chad gang*/_lus kyi sdig sgrib dag_/sku'i byin rlabs thob par bsam/_yang rdor sems mgrin par byon gsung gi byin rlabs bdud rtsi'i rnam par babs/_snying ga yan chad gang*/_ngag gi sgrib pa dag_/gsung gi byin rlabs thob par bsam/_yang snying gar byon thugs kyi byin rlabs bdud rtsi'i rnam par babs/_lte ba yan chad gang*/_yid kyi sgrib pa dag_/thugs kyi byin rlabs thob par mos/_'di la yun ring du 'bad/_de dag gi skabs su yig brgya bzla/_gsum pa gsang ba rnal 'byor rgyud ltar sems dpa' sum brtsegs su sgom pa dang sbrel na/_bdud rtsis lus thams cad gang*/_sgrib pa mtha' dag dag_/rnam smin gyi phung po gnas gyur nas rang nyid rdo rje sems dpar gyur pa'i thugs kar rang 'dra'i ye shes sems dpa'/_de'i thugs kar ting nge 'dzin sems dpa' rdo rje dkar po rtse lnga pa'i lte bar hUM/_de la dmigs nas yig brgya bzla/_bzhi pa yang gsang bla med ltar khyer so gsum du bsgom pa dang sbrel na/_de'i mthar snang grags rig gsum rdo rje sems dpa'i sku gsung thugs su mos te/_yig drug bzla/_lnga pa de kho na nyid chos kyi dbyings su la bzla ba ni/_dmigs bral ka dag gi ngang du mnyam par bzhag par gsungs/_rdor sems phyi nang gsang sgrub man ngag re re bzhin khol 'don byas kyang rung bas skabs der thog mthar skyabs sems bsngo smon sbyor zhing*/_yang na mthar chags dkyus gcig tu gtang ba skabs gang bde bya chog par mngon no/_/bzhi pa tshogs gnyis rdzogs byed maN+Dal la gsum/_dang po sprul sku'i maN+Dal ni/_tshogs zhing mdun du rdo rje'i zhing khams chen po rnam par dag pa rin po che'i ri rab gling bzhi dang bcas pa'i rtse mor pad zla'i gdan la rtsa ba'i bla ma sprul sku'i rnam pa can dgongs brda' snyan brgyud kyi bla ma rnams kyis bskor ba/_gling dang gling bar rnams su khyad par gyi dkon mchog yid dam/_thun mong gi dkon mchog sangs rgyas/_dam chos dang*/_dge 'dun/_mkha' gro chos skyong nor lha'i tshogs bcas bzhugs par mos/_de ltar legs par bshams pa'i maN+Dal rang gzhan sems can thams cad kyis 'bul bar mos te/_sems kyi rang bzhin dag pa'i brdar maN+Dal lan gsum phyis/_byang sems kyi rlan mi yal ba'i phyir dri bzang dang ba byung chus byug_/tshom bu rab bzhi bcu rtsa gcig_/'bring nyer gsum/_bsdu na dgu gang 'os bkod la/_rigs lnga gangs chen mtsho'i zhing khams snod bcud kyi 'byor pa mtha' klas pas chad pa med par 'bul bar bsam pas/_oM AHhU~M/_dbang chen gser gyi sa gzhi/_ri'i rgyal po ri rab/_shar lus 'phags po/_lho 'dzam bu'i gling*/_nub ba glang spyod/_byang sgra mi snyan/_lus dang lus 'phags/_rnga yab dang rnga yab gzhan/_g.yo ldan dang lam mchog 'gro/_sgra mi snyan dang sgra mi snyan gyi zla/_gser gyi ri bdun/_rol pa'i mtsho bdun/_rgyal sri rin po che sna bdun/_bkra shis kyi rdzas brgyad/_gter gyi bum pa/_dpag bsam gyi shing*/_ma rmos pa'i lo thog_/yid du 'ong ba'i 'dod yon/_shin tu mdzes pa'i lha mo/_nyi ma/_zla ba/_dbus su lha dang mi yi 'dod yon ma tshang ba med pa/_'jig rten gyi khams rgya mtsho legs par bkod de bcom ldan 'das rnam par snang mdzad la sogs pa phyogs bcu'i de bzhin gshegs pa/_rigs lnga gang chen mtsho'i sku dang gsung dang thugs mi zad pa rgyan gyi 'khor lo la brten pa'i zhing khams rab 'byams mtha' klas pa tshangs chen bskal pa chen pos legs par brgyan pa 'di nyid bla ma dang yi dam dkyil 'khor gyi lha tshogs dam can rgya mtsho'i tshogs dang bcas pa rnams la/_kun tu bzang po'i mchod pa'i sprin phung chen po bsam gyis mi khyab par dmigs te 'bul lo/_phyogs bcu'i zhing khams rgya mtsho'i rdul snyed ri rab gling bzhi'i 'jig rten khams/_/lha dang mi yi 'dod yon phun tshogs bde gshegs mchod pa'i sprin phung can/_/tshangs chen bskal pas legs par brgyan te dge legs rgya mtsho'i bsod nams zhing*/_/bla ma yi dam dkyil 'khor lha tshogs dam can rgya mtsho'i tshogs la 'bul/_/rin chen maN+Dal yid 'ong mchod pa'i sprin/_/rgyal ba'i 'byor tshogs dpag med dang ldan pa/_dpag yas nam mkha'i rgyan gyur 'di phul bas/_/rang bzhin sprul sku'i zhing la spyod par shog_/ces tshom bu gso zhing sho lo ka phyi ma la grangs bzung*/_gnyis pa longs sku'i maN+Dal ni/_tshogs zhing 'og min stug po bkod pa'i zhing khams gzhi dang rgya tshad rgyan bkod pa'i khyad par bsam gyis mi khyab par bla ma longs sku rigs lnga 'khor dpag tu med pa dang bcas pa bzhugs par mos la/_tshom bu rgyas par nyer lnga/_'bring la bcu gsum/_bsdu na bdun bkod de/_'og min stug po bkod pa'i zhing khams rgyan dang bkod pa phun sum tshogs shing mchod pa'i lha mo mtha' yas pa'i sprin 'phro bas rtag pa rgyun gyi 'khor lor mchod bar bsam/_oM AHhU~M/_'og min gyi gnas rnam dag stug po bkod pa bde ba'i zhing*/_thams cad kyang snang la rang bzhin med pa'i zhing khams na/_shin tu yid du 'ong ba'i gzhal med khang chen po/_sgo bzhi gru bzhi rta babs bzhi dang ldan pa/_rin po che'i gdugs/_chos kyi 'khor lo shin tu mdzes pa'i ri dwags/_lha'i gos rnam par rgyal ba'i rgyal mtshan/_yid du 'ong ba'i 'phan zla ba rlung gis bskyod pa/_rnga yab nor bu'i yu ba can/_gser gyi dril bu g.yer kha'i phreng ba/_rdo rje dang nor bu rin po che'i tog_/rtsig pa lnga dang ldan pa'i steng na rin po che'i pha gu_/nor bu sna tshogs kyi drwa phyed/_rdo kra ma shIr+Shi mda' yab/_rin po che'i drwa mig_/gseng ma'i pu shu/_rab tu mtho ba'i phyur bu/_'dod yod gyi snam bu/_sgeg mo ma/_phreng ba ma/_glu ma/_gar ma/_me tog ma/_bdug spos ma/_snang gsal ma/_dri chab ma/_zhal zas ma/_sil snyan ma/_mchod pa'i sprin phung chen po bsam gyis mi khyab pas phyi nang kun tu yang legs par brgyan te bkod pa'i gnas tshangs pa rnga sgra'i zhing khams chen po/_ye shes rin po che sprin gyi drwa bas legs par brgyan pa 'di nyid/_bla ma dang yi dam dkyil 'khor gyi lha tshogs dam can rgya mtsho'i tshogs dang bcas pa rnams la ji srid 'khor ba ma stongs kyi bar du rtag pa rgyun gyi 'khor lor 'bul lo/_bde chen gnas ni shin tu mtha' yas bkod pa'i sprin gyi 'od zer can/_/sgo bzhi gru bzhi rta babs bzhi ldan ye shes rnam lnga'i rtsig pas brgyan/_/sgeg mo phreng thog rin chen glu gar mchod pa'i sprin gyi 'od 'phro ba/_/bla ma yi dam dkyil 'khor lha tshogs dam can rgya mtsho'i tshogs la 'bul/_/'og min bde chen rin chen gzhal yas khang*/_/sna tshogs mchod pa'i sprin gyi bla bre can/_/nam mkha' gang bar dmigs te phul ba yis/_/lhun grub longs sku'i zhing la spyod par shog_sho lo ka phyi ma la grangs bzung zhing 'bul lo/_gsum pa chos sku'i maN+Dal ni/_tshogs zhing chos sku thig le nyag gcig 'od gsal rdo rje snying po'i zhing khams su bla ma chos sku gdod ma'i mgon po 'khor rang snang ye shes rgya mtsho'i tshogs dang bcas rang gsal lhun grub tu bzhugs par mos la/_tshom bu rgyas par nyer lnga/_'bring la lnga/_bsdu na gsum bkod de/_chos snying 'od gsal rdo rje snying po'i zhing khams chen por rig gdangs sku dang thig le'i snang ba 'byams klas pa mchod bya mchod byed med par rang byung rang shar rang thim du 'bul bar bsam la/_oM AHhU~M/_chos nyid 'od gsal gyi zhing khams gdod ma nas ngo bo nyid kyis rnam par dag cing*/_nam mkha' ltar stong la mtha' dbus med pa/_nyi zla ltar bkra zhing lhun gyis grub pa/_'khor ba dang mya ngan las 'das pa gang du yang ma byed mi 'byed 'byed pa med pa'i rang bzhin/_sangs rgyas kyi zhing dang 'gro ba drug gi rnam par 'phrul pa dpag tu med pa'i 'byung gnas chen po/_lhun grub rin po che'i sbubs/_sku gsum 'du 'bral med pa'i klong*/_dus bzhi mnyam pa nyid kyi ye shes/_gzhon nu bum pa sku'i zhing khams phyi dang nang med pa kun tu yang nang du gyur pa/_sngon po dang*/_ser po dang*/_dmar po dang*/_dkar po dang*/_ljang khu'i 'od zer phyogs bcur 'phro zhing*/_nam mkha'i mtha' klas par sku dang ye shes kyi snang ba chen pos legs par brgyan pa'i bkod pa tshad med pa'i mnga' thang chen po la dbang 'byor ba/_'od gsal rdo rje snying po'i zhing khams/_rang bzhin gyis rnam par dag cing lhun gyis grub pa 'di nyid/_bla ma dang yi dam dkyil 'khor gyi lha tshogs dam can rgya mtsho'i tshogs dang bcas pa rnams la/_dgongs klong rnam par dag pa'i ngang du ye shes kyi mchod pa dam par 'bul lo/_/gdod nas rnam dag 'od gsal zhing ni ma skyes lhun rdzogs 'dus ma byas/_/sna tshogs mi dmigs spros kun nyer zhi ye shes rnam lnga'i gzhal yas khang*/_/sku gsum mdzad pa'i 'od zer dang bcas rang bzhin lhun gyis grub pa'i gnas/_/bla ma yi dam dkyil 'khor lha tshogs dam can rgya mtsho'i tshogs la 'bul/_/'od gsal lhun grub ye shes rigs lnga'i zhing*/_/sku dang thig les ye nas brgyan pa 'di/_/rang snang dag pas legs par phul ba yis/_/kun bzang chos sku'i zhing la spyod par shog_/ces sho lo ka phyi ma la grangs bzung*/_mthar maN+Dal 'bul yul mchod rdzas bcas hU~M sngon po'i rnam par bsdus/_de yang rang la thim par bsam zhing tshogs chen lhun rdzogs kyi ngang du bzhag_/khrid gzhung du sku gsum gyi maN+Dal gyi tshogs zhing skyabs 'gro'i skabs ltar gsal yang rung bar gsungs pa ni dmigs pa'i rnam grangs mang po mi 'chun pa dang spyi mthun gyi phyag len stabs bde ba la dgongs pas rgyun gyi nyams len la de ltar rung zhing*/_grangs 'bum phrag sogs bsag na tshig rkang phyi ma rnams khri gsum lhag re dang chabs cig spyi mthun khri gcig kha skong bcas bsags pas rung ngo snyam/_lnga pa byin rlabs myur du 'jug pa bla ma'i rnal 'byor gyi khrid la/_spyi dang*/_khyad par gnyis/_dang po la/_tshogs zhing gsal 'debs pa ni/_snod bcud dag pa'i zhing khams chen po'i dbus/_/rang mdun nam mkha' ye shes 'od lnga'i klong*/_/seng khri pad+ma nyi zla'i gdan steng du/_/skyabs gnas kun 'dus rtsa ba'i bla ma dang*/_/dbyer med gdod ma'i mgon po kun tu bzang*/_/mthing gsal zhal gcig phyag gnyis mnyam bzhag can/_/dar dang rin chen rgyan rdzogs skyil krung bzhugs/_/steng gi cha la brgyud pa'i bla ma dang*/_/mtha' skor mchog gsum mkha' gro chos srung tshogs/_/snang stong zung 'jug ye shes sgyu ma'i sku/_/gsang gsum mi zad rgyan gyi 'khor lo'i sprin/_/gang 'dul mos ngor cir yang 'char bar gyur/_/zhes gsal btab sgo gsum 'jug pa gcig dril gyi mos gus rtse gcig pas/_spro na bla ma yang tig gi brgyud pa'i gsol 'debs yid bzhin sprin tshogs dang*/_bsdu na/_oM AHhU~M/_gdod ma'i mgon po kun bzang yab yum dang*/_/lhun grub rgyal ba zhi khro rab 'byams dang*/_/bde chen rgyal ba rdo rje 'chang chen la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/ye shes sgyu ma rdo rje sems dpa' dang*/_/dkyil 'khor mnga' bdag phyag na rdo rje dang*/_/rgyal ba'i rnam 'phrul dga' rab rdo rje la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/mkhyen rab sprul pa 'jam dpal bshes gnyen dang*/_/blo mchog mnga' ba shrI seng ha dang*/_/dngos grub mchog brnyes dz+nyA na su tra la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/mkhas grub chen po bi ma mi tra dang*/_/rang byung chen po pad+ma 'byung gnas dang*/_/tshogs chen gnyis rdzogs chos rgyal chen po la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/sems nyid dbang thob ting 'dzin bzang po dang*/_/thar gling snang byed ldang ma lhun rgyal dang*/_/'od gsal lus grub seng ge dbang phyug la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/chos nyid mi g.yo rgyal ba zhang ston dang*/_/gsung rab mdzod brnyes mkhas pa nyi 'bum dang*/_/dam chos rgyas mdzad gu ru jo 'ber la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/gzung 'dzin 'khrul zhig seng ge rgyab pa dang*/_/dngos grub mchog brnyes grub chen me long dang*/_/rig 'dzin chen po ku ma rA dza la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/'od gsal sgyu ma klong chen rab 'byams dang*/_/mkhas grub chen po khyab brdal lhun grub dang*/_/sprul pa'i sku mchog grags pa 'od zer la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/'khrul zhig chen po sangs rgyas dbon po dang*/_/rgyal ba'i gdung 'tshob zla ba grags pa dang*/_/grub pa'i dbang phyug kun bzang rdo rje la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/snying po'i mnga' bdag rgyal mtshan dpal bzang dang*/_/rgyal bas lung bstan sna tshogs rang grol dang*/_/'khor 'das rgya grol bstan 'dzin grags pa la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/shes bya kun gzigs mdo sngags bstan 'dzin dang*/_/gsang bdag dpa' bo 'phrin las lhun grub dang*/_/brgyud srol kun 'dus gter chen bla ma la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/bI ma'i rnam 'phrul rin chen rnam rgyal dang*/_/mtsho rgyal dngos snang mi 'gyur dpal sgron dang*/_/thams cad mkhyen pa o Di ya na la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/rig 'dzin 'gyur med phrin las rnam rgyal dang*/_/gdod ma'i mgon po phrin las chos sgron dang*/_/kun mkhyen bla ma rdo rje gzi brjid la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/bai ro dngos snang yon tan rgya mtsho dang*/_/snang bzhi mthar son sna tshogs rang grol dang*/_/theg mchog shing rta chos kyi rgya mtsho'i zhabs/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/dgongs klong tshad phebs pad+ma bstan 'dzin dang*/_/rdo rje 'chang dngos chos kyi blo gros dang*/_/bka' drin mnyam med rtsa ba'i bla ma la/_/gsol ba 'debs so thugs rje'i spyan gyis gzigs/_/ka dag lhun grub zab mo'i gnas lugs mchog_/da lta nyid du rtogs par byin gyis rlobs/_/re dogs blo zad 'khor 'das chos skur grol/_/lhun grub 'od gsal zang thal rig par shar/_/sku gsum rtsal rdzogs 'pho 'gyur med par rtogs/_/bdag gzhan yongs grol kun bzang thob par shog_/slar yang rtsa ba'i bla mar phur tshugs su gsol ba 'debs pa ni/_kye bla ma rdo rje 'dzin pa ni/_/khams gsum 'khor ba'i gnyen gcig pu/_/'gro ba skyabs med rnams kyi skyabs/_/thar pa'i them skas chen po ste/_/ma rig sel ba'i sgron me la/_/mun pa'i tshogs bdag skyabs su mchi/_/'khor ba 'dam gyi mtsho nang du/_/bying ba skyabs med bdag la skyobs/_/nyon mongs me yis gdungs pa la/_/thugs rje'i char gyis bsil bar mdzod/_/bla ma sangs rgyas rin po che/_/bdag la re sa gzhan na med/_/deng nas byang chub snying po'i bar/_/skyid sdug re ltos khyed mkhyen pas/_/mgon med bdag la thugs rjes gzigs/_/nad gdon bgegs dang bar chad sol/_/sku gsung thugs kyi byin gyis rlobs/_/mchog dang thun mong dngos grub stsol/_/ces pas mos gus kyi nyams ma skyes bar du gsol ba btab pa'i mthar dbang blang ba ni/_'khor gyi lha tshogs rnams rtsa ba'i bla ma'i sku la thim pas bla ma sngar bas kyang gzi byin cher 'bar ba'i gnas gsum du oM AHhU~M dkar dmar mthing gsum 'od 'bar bas mtshan pa/_de bzhin gshegs pa thams cad kyi rdo rje gsum gyi bdag nyid du gyur/_bdag dang mkha' khyab kyi sems can thams cad dbang bzhi'i chu bos rgyud smin cing grol bar byin gyis brlab tu gsol/_zhes gsol ba btab pas/_gu ru'i spyi bo'i oM las 'od zer dkar po 'phros/_rang gi spyi bor thim pas bum pa'i dbang thob/_lus kyi dri ma sbyangs/_lam bskyed rim bsgom pa la dbang*/_'bras bu sprul sku thob pa'i skal pa can du byas/_mgrin pa'i AHlas 'od zer dmar po 'phros/_rang gi mgrin par thim pas gsang ba'i dbang thob/_ngag gi dri ma sbyangs/_lam rtsa rlung bsgom pa la dbang*/_'bras bu longs sku thob pa'i skal pa can du byas/_thugs ka'i hU~M las 'od zer sngon po 'phros/_rang gi snying gar thim pas shes rab ye shes kyi dbang thob/_yid kyi dri ma sbyangs/_lam thig le bsgom pa la dbang*/_'bras bu chos sku thob pa'i skal pa can du byas/_slar yang gnas gsum las 'od zer dkar dmar mthing gsum 'phros/_rang gi gnas gsum du thim pas dbang bzhi pa thob/_ye shes kyi dri ma sbyangs/_lam rdzogs pa chen po bsgom pa la dbang*/_'bras bu ngo bo nyid sku thob pa'i skal pa can du byas so/_slar yang dus gsum sangs rgyas thams cad kyi ngo bo sku bzhi'i bdag nyid dpal ldan bla ma dam pa la gsol ba 'debs so/_/bdag la dbang bskur byin gyis brlab tu gsol/_zab lam gyi rtogs pa khyad par can rgyud la skye bar byin gyis brlab tu gsol/_ka dag gnas lugs kyi lta ba rtogs par byin gyis brlab tu gsol/_lhun grub snang bzhi'i ye shes mthar phyin par byin gyis brlab tu gsol/_zhes mos gus gdung shugs drag pos gsol ba btab pas bla ma 'od lnga'i gong bur gyur pa rang gi tshangs bug nas sib kyis thim pas/_rang gi sgo gsum dang bla ma'i rdo rje gsum dbyer med par gyur bsam la blo 'das gnyug ma'i rang ngo la mnyam par bzhag go_/gnyis pa ni/_yang tig yid bzhin nor bu'i bla ma'i rim pa dngos grub rgya mtsho ltar nyams su len pa ni/_oM AHhU~M/_ngan 'gro'i 'jigs pa skyob mdzad pa/_/dkon mchog gsum la skyabs su mchi/_/nges pa'i don du sems bskyed nas/_/'gro la phan phyir bla ma bsgom/_/chos thams cad rang bzhin gyis ma skyes pa'i ngang las/_rang gi spyi bor pad+ma dkar po dang nyi zla ga'u kha sbyor bsam pa'i nang na a dkar po las 'od 'phros pas rtsa ba'i bla ma spyan drangs nas/_skyil krung phyed pas bzhugs pa la brgyud pa'i bla ma dang chos 'brel yod tshad thams cad thim pa'i mthar/_yi dam dkyil 'khor gyi lha tshogs mkha' 'gro dam can rgya mtshos bskor ba sprin phung 'thibs pa ltar bsam/_'dir yid kyis mchod cing bstod par gsungs pas de kho nas chog kyang da lta'i gang zag phal cher la ngag 'don med na rnam pa mi gsal bas de ltar na/_oM AHhU~M/_chos kyi dbyings kyi pho brang nas/_/skye med bla ma gshegs su gsol/_/longs spyod rdzogs sku'i pho brang nas/_/gsal dag bla ma gshegs su gsol/_/sprul pa sku yi pho brang nas/_/thugs rje can rnams gshegs su gsol/_/'ja' dang 'od du kyi li li/_/sku dang thig le shigs se shig_/spyi gtsug nyi zla'i gdan steng du/_/bdag dang dbyer med brtan par bzhugs/_/lus ngag yid gsum gus phyag 'tshal/_/phyi nang gsang gsum mchod pa 'bul/_/sku gsung thugs kyi nyams chag bshags/_/smin grol dbang dang gdams pa zhu/_/oM/_sku skye ba med pa gsal la dwangs/_/rdo rje'i sku la gsol ba 'debs/_/lus la bde bar byin gyis rlobs/_/AH_gsung 'gags pa med pa chos kyi sgra/_/A li kA lir gsol ba 'debs/_/ngag la nus par byin gyis rlobs/_/hU~M/_thugs ka dag chen po kun bzang klong*/_/cir mi dgongs la gsol ba 'debs/_/zad sar 'khyol bar byin gyis rlobs/_/zhes chos spyod chen mo nas 'byung ba ltar brjod/_de nas/_bla ma rdo rje 'dzin pa ni/_/khams gsum 'khor ba'i gnyen gcig pu/_/'gro ba mgon med rnams kyi skyabs/_/thar pa'i them skas chen po ste/_/ma rig sel ba'i sgron me la/_/mun pa'i tshogs bdag skyabs su mchi/_/'khor ba 'dam gyi mtsho nang du/_/bying ba skyabs med bdag la skyobs/_/dug gsum me yis gdungs pa la/_/rang byung rlan gyis bsil bar mdzod/_/ma rig 'khrul pas bcings pa yi/_/gdos bcas lus ngag yid rnams kun/_/rang dengs 'od kyi rang bzhin du/_/lhag med mya ngan 'das thob mdzod/_/bla ma sangs rgyas rin po che/_/bdag la re sa gzhan na med/_/thugs rje'i spyan gyis gzigs mdzod la/_/'khor ba'i mtsho las bsgral du gsol/_/tshe 'dir legs pa kun 'grub cing*/_/bgegs dang bar chad med pa dang*/_/'chi khar zab mo'i 'od gsal zin/_/bar do'i 'phrang las sgrol bar mdzod/_/lus dang ngag yid brtsams pa kun/_/rtag tu gzhan la phan pa dang*/_/rkyen rnams byang chub lam mchog tu/_/de ring nyid nas bsgyur du gsol/_/bdag gis 'bad kyang thar bar dka'/_/mgon po khyod kyi thugs rje'i grus/_/mgon med bdag dang 'gro ba kun/_/thar pa'i gling du phyin par mdzod/_/gang dag bdag la dad gyur tam/_/smod dam bskur pa 'debs kyang rung*/_/de dag sdig byang nyon mongs med/_/srid pa'i chu bo spang bar shog_/nam zhig bdag gi ming tsam gyis/_/'gro ba'i 'dod dgu rab sgrub cing*/_/phyogs bcu gang ba'i zhing rnams su/_/mchod pa'i sprin gyi char 'bebs shog_/dge ba 'di yis lus can kun/_/thams cad srid las rnam grol nas/_/ye shes dam pa gnyis thob ste/_/don gnyis lhun gyis grub par mdzod/_/ces gsol ba drag tu btab pas/_zhabs kyi mthe bong las bdud rtsi'i rgyun babs/_bdag dang sems can thams cad kyi spyi bo nas zhugs lus phyi nang thams cad la khyab pas/_lus kyi sgrib pa dag_/sku yi dngos grub thob/_mgrin par babs/_ngag gi sgrib pa dag_/gsung gi dngos grub thob/_snying gar babs/_yid kyi sgrib pa dag_/thugs kyi dngos grub thob/_lte bar babs/_dri ma thams cad dag_/yon tan gyi dngos grub thob/_gsang bar babs/_phrin las kyi dngos grub thob/_bde ba dang stong pa gnyis su med par gyur/_mthar mos gus kyi shugs kyis bla ma 'od du zhu nas rang la thim pas dbyer med du gyur par mos la bcos bslad bral ba'i rang rig gi ngo bo ci nus bskyang ngo*/_thun las ldang ba na/_rang bzhin dag pa'i dge ba 'dis/_/'khor ba ngan song dong sprugs nas/_/srid na 'ga' yang mi gnas par/_/thams cad sangs rgyas myur thob shog_/ces sogs bsngo smon gyis mtshams sbyar te spyod lam la 'jug_/thun mtshams thams cad du'ang snang grags rig gsum bla ma'i gsang ba gsum gyi ye shes su lam du khyer zhing tshogs gnyis zung 'brel gyi rnal 'byor la brtson par bya'o/_tshogs bsag gi rim pa 'di dag so sor 'bum ther la sogs pa thun du bcad de brtson pa'i skabs so so'i sngon du skyabs sems dang rjes su bsngo smon gyis rgyas gdab pa dang*/_thun mtshams rnams su skabs de dang der 'brel ba'i lam khyer gyi gnad sogs kyi spyi ltar shes par bya'o/_spyir tshul 'di la kun mkhyen gnyis pa 'jam dbyangs mkhyen brtse'i dbang po'i ngag 'don mchis bzhin gsar bsgrigs dgos pa mi che yang*/_gdams mdzod sprul pa'i glegs bam du bzhugs pa'i khrid yig dri med zhal lung du sngon 'gro spyi yi chings smin gling gter chen rin po che'i phyag bzhes ltar dang*/_khyad chos bye brag pa rnams yang tig yid bzhin nor bu'i dgongs pa ltar ma bu bsdebs pa'i dgongs pa 'jam mgon chos kyi rgyal po rnam gnyis kyi phyag rgyun du gsungs pa nyid/_ngag 'don khol phyungs byung na rang gzhan lam 'dir 'jug 'dod la phan pa'i blos theg mchog rdzogs pa chen po la mos pa lam byed kyi ku sA li 'gyur med theg mchog bstan pa'i rgyal mtshan gyis lha ri 'bras ljongs sprul pa'i sbas gnas nyul ba'i skabs dus gcig tu bris pa theg mchog snying po'i bstan pa mi nub dar zhing rgyas pa'i dge mtshan du gyur cig_/dge'o/_/bkris shog_/sarba mang+ga laM//__//
