DKR-KABUM-21-ZHA-025-wylie
<div class="wylie-content"
rgya chen bka' yi rtsa ba rab brling zhing*/_/zab pa gter gyi me 'bras kho lag rdzogs/_/mkhas grub rnam sad khye'u'i rol pa yi/_/smin grol lang tsho dar ba snga 'gyur pa/_/bdag gi 'dren mchog gdod ma'i mgon rnams bar/_/don brgyud rtogs pa'i sa srung gnyar 'dzegs pas/_/bshad sgrub rtse brgya'i mtshon gyis theg mchog gi_/rgyal thabs skyong ba'i ngo mtshar su yis 'gran/_/deng sang rang gzhan 'dir snang rba la g.yeng*/_/gzugs brnyan tsam gyis chos brgyad bstan pa spel/_/rtogs pa'i rin thang dbyings su stor ba de'i/_/yig cha 'on pa'i rol mos ci zhig bgyi/_/'on kyang smin grol rin chen nor bu'i sgrom/_/bshad sgrub rgyal mtshan rtse na bsnyen bkur gyis/_/stobs 'di gsang sngags rnying ma'i khyad chos phyir/_/yab mes rnam thar rjes su rkang pa bkod/_/bdag rgyud sgrib bcas sems kyi 'dam khrod du/_/zab gter puN+Da ri ka'i mtshar sdug 'di/_/brgyud gsum bla ma nyin byed mthus sad pas/_/skal pa bzang snyam bstan 'gro'i btsas su bzhag_/rig pa'i phur bu 'khor 'das srog la thebs/_/byang sems phur bus bde chen rtsal gsum rdzogs/_/srid pa'i phur bus snang zhen lhar 'char bas/_/rdzas kyi phur bus sdang byed tshar bcad de/_/rgyal kun phrin las don rtags phyag char mdzes/_/bdud bzhi'i dpung las rgyal ba'i gad rgyangs kyis/_/bstan 'gro'i dbu 'pha gung du bsnyegs pa yi/_/dge mtshan lha yi rgyal rnga brdung gyur cig_/g.yengs dang 'du 'dzis spang ba'i dben pa ru/_/lus srog thed la bor bas sgrub pa'i mkhar/_/bzung nas rig 'dzin rnam bzhi mthar son pa'i/_/dad brtson skal bzang thob par rtse gcig smon/_/dad brtson rin chen gzings kyi bgrod pa yis/_/bka' gter phur pa'i rgyud lung rgya mtsho'i mthar/_/brgal nas man ngag gdeng can gtsug rgyan dbyig_/'dod dgu'i skyes su thob 'di skal bzang snyam//_mang+ga las so//_//
