DKR-KABUM-19-DZA-004-wylie

<div class="wylie-content"

@#/__/pad+ma tshe yi snying thig las/_dbang gi rgyal po rta mchog rigs lnga'i sgrub thabs bar chad kun sel bzhugs// @#/__/na mo gu ru pad+ma kro d+ha ye/_'chi med tshe dang ye shes kyi dngos grub sgrub pa la bar chad bsal phyir pad+ma drag po rta mchog rigs lnga'i bskyed bzlas kyi rnal 'byor la brtson par 'dod pas sngon dngos rjes kyi las rim gsum las/_dang po sngon 'gro la yo byad kyi shom ni/_gzhung mthun rten gyi drung du sman raka gtor gsum nyer spyod dang*/_dkar bgegs tshogs kyi dam rdzas sogs kyang bshams/_brgyud 'debs sngon du 'gro bas/_gnyis pa skyabs sems ni/_na mo:_bdag dang khams gsum 'gro ba kun:_rtsa gsum lha la skyabs su mchi:_gzhan don sangs rgyas thob bya'i phyir:_pad+ma khros pa'i rnal 'byor bsgom:_gsum pa tshogs bsags ni/_rdo rje slob dpon sogs/_bzhi pa gtor ma gtang ba ni/_dkar gtor dgos tshe spyi ltar btang la/_bgegs gtor yod na byin gyis brlabs/_hU~M:_nga ni dbang chen he ru ka:_'khor 'das yongs kyi rje btsan te:_tshe bdud log 'dren bar chad bdud:_brlag par 'gyur gyis phyir dengs shig:_hU~M bzhi'i sngags dang yungs kar gyis brab/_gu gul bdug_/lnga pa srung 'khor ni/_hU~M:_snang srid ye shes lha yi dal:_snang grags rig pa sku gsung thugs:_srung ba'i gur gyis phyogs mtshams gtams:_mtshams kyi dkyil 'khor lhun gyis grub:_dz+nyA na badz+ra tsakra rat+na pad+ma khang+ga rak+Sha rak+Sha b+h+rU~M b+h+rU~M b+h+rU~M:_drug pa byin 'bebs ni/_hU~M:_pad+ma drag po'i lha tshogs rnams:_chos sku'i klong nas thugs rje bskyed:_longs sku'i rnam rol cir yang ston:_sprul sku'i dkyil 'khor brten par bcas:_dbang bskur byin phob rtags mtshan ston:_oM ru lu ru lu hU~M b+h+yo hU~M phaTa?:_sarba sa ma ya a be sha ya pheM pheM:_bdun pa gnas yo byin rlabs ni/_oM AHhU~M:_snod bcud phun tshogs bde chen zhing:_rang snang kun bzang mchod pa'i sprin:_zag med nam mkha' gang ba'i tshogs:_ye shes chen po'i rol par shar:_oM badz+ra ar+g+haM nas shab+da'i bar dang*/_sarba sa ma ya pU dza dz+nyA na AHhU~M:_oM sarba pany+tsa mr-i ta ma hA rak+ta ma hA ba ling+ta AHhU~MH_lan gsum/_gnyis pa dngos gzhi'i dang po dam tshig pa bskyed pa ni/_hrI:_de bzhin nyid dbyings ka nas dag:_kun snang snying rje sgyu ma'i gdangs:_zung 'jug sa bon yi ge hrIH_'od kyis snod bcud gzung 'dzin sbyangs:_stong pa'i ngang las ye shes kyi:_rang snang dag pa'i pho brang che:_pad+ma rA ga las grub pa'i:_gzhal yas zla gam sgo gcig pa:_rin chen rgyan gyi bkod pa rdzogs:_dbus su pad+ma 'dab bzhi pa'i:_lte bar bdud bzhi pad nyi'i steng:_hrIHyig yongs gyur skad cig gis:_pad+ma dbang chen rta skad 'tsher:_dmar nag dus mtha'i me ltar 'bar:_phyag g.yas pad+ma'i lcags kyu gdengs:_snang srid thams cad dbang du sdud:_g.yon pas tshe yi bum pa ni:_rgya gram phyag rgyas mtshan pa 'dzin:_dpal dang dur khrod rol pa'i chas:_gzi byin 'bar ba'i 'od phreng can:_zhabs gnyis brkyang bskum rol pa'i stabs:_rang 'od pad+ma gzi ldan sbyor:_pad phreng dung khrag bsnams pas 'khyud:_phyogs bzhir rdo rje rin po che:_bde gshegs las kyi h+ya gr-I:_dkar ser mthing ljang gtso dang mtshungs:_rigs kyi DA ki mnyam par sbyor:_sgo srung pad+ma dbyings phyug ma:_lcags kyu zhags gdengs sgeg bzhad khro:_gar gyi stang stabs sgyur bzhin du:_rus pa me tog phreng bas brgyan:_dbang gi zhing khams skyong ba yi:_dbang mdzad dbang gi lha tshogs kun:_nyi zer rdul ltar 'khrigs pa yis:_bar chad bdud bgegs thams cad 'dul:_gnas gsum rdo rje'i yig 'bru gsum:_sku gsung thugs kyi phyag rgyar rdzogs:_spyi bo'i gnas lngar rigs lnga yi:_sa bon lnga las rigs lnga yi:_byang sems bdud rtsis dbang bskur bas:_phung khams rigs kyi 'khor los bsgyur:_bde gshegs lnga yi ngo bor rdzogs:_oM AHhU~M/_hrIHhU~M trA~M oM AH_gnyis pa ye shes kyi 'khor lo spyan 'dren pa ni/_hrIH_bde chen phyogs lhung bral ba'i zhing:_'od gsal sgyu 'phrul drwa ba'i lha:_rta mchog rol pa'i dkyil 'khor lha:_ye shes dbyings nas gshegs su gsol:_gnas mchog 'di ru byin phob la:_sgrub mchog bdag la dbang bzhi bskur:_bgegs dang log 'dren bar chad sol:_mchog dang thun mong dngos grub stsol:_sarba maN+Da la sa ma ya dzaH_gsum pa gnyis med du bstim pa ni/_dzaHhU~M ba~M hoH_tiSh+Tha lhan:_bzhi pa phyag 'tshal ni/_na mo na ma mi:_lnga pa mchod pa ni/_hrIH_bde chen sgyu ma'i cho 'phrul las:_'char ba'i rmad byung mchod pa'i sprin:_phyi nang gsang ba bla med pas:_rang byung rang shar chen por mchod:_hrIHh+ya gr-I wa sa pa ri wA ra ar+g+haM nas/_shab+da sarba pU dza hoH_ma hA pany+tsa a mr-i ta rak+ta ba liM ta khA hi:_d+harma d+hA tu aH_drug pa bstod pa ni/_hrIH_gsung gi rdo rje dkyil 'khor bdag:_dbang chen 'bar ba gar dgu'i gzugs:_bde chen phyag rgya chen po'i dbyings:_'du 'bral med pa'i lha la bstod:_bdun pa bzlas pa ni/_rta mchog rol pa'i thugs ka ru:_pad nyi'i steng du hrIHdmar gsal:_rdo rje'i sngags kyi phreng bas bskor:_'od zer spro bsdus don gnyis byas:_dbang chen rol pa'i lha tshogs kyi:_sku dang yig 'bru phyag mtshan gyi:_pho nya nam mkha' khyab par spros:_tshe bdud bar chad dbyings su bsgral:_gzung 'dzin 'byung po srung mtshams bcad:_byad phur rbod gtong bzlog cing bsgyur:_snang srid sku gsung thugs kyi dbyings:_mnyam nyid dgongs pa'i rtsal rdzogs gyur:_hrIHpad+mAn+ta kr-ita badz+ra kro d+ha h+ya gr-I wa sarba big+h+nAn ha na ha na hU~M phaTa?:_bskyed bzlas tshul bzhin byed na rnam pa gsal ba/_nga rgyal brtan pa/_dag dran bcas gzhung spyi ltar dang*/_gsal snang cung zad brtan pa dang bzlas pas bogs 'byin pa bcas bskyed rim spyi ltar byas kyang rung*/_bsnyen sgrub kyi bar chad sel ba kho na'i skabs bskyed bzlas khyug tsam byas pas don 'grub cing*/_grangs bsnyen byed na 'bum phrag bzhi bzla'o/__/thun mthar dbyangs gsal rten snying bzlas la mchod bstod yig brgya bzla/_skabs 'dir bka' srung gtor bsngo bya/_gsum pa rjes la dang po tshogs mchod bya ba ni/_thabs shes kyi dam rdzas tshogs par byas la chu chang nang mchod kyis dran/_ra~M ya~M kha~M:_dbyings kyi b+hany+dzar rig pa'i bcud:_ye shes lnga ldan bdud rtsi'i phud:_'dod yon zegs ma bsam yas 'phro:_mkha' khyab tshogs kyi 'khor lor gyur:_oM AHhU~M:_byin gyis brlabs/_hrIH_chos sku'i zhing na 'od mi 'gyur:_longs spyod yongs rdzogs tshe dpag med:_sprul pa'i gar bsgyur dbang gi rgyal:_bcom ldan dkyil 'khor lha tshogs rnams:_tshogs kyi 'du bar spyan 'dren na:_ye shes dgongs pas gshegs su gsol:_sarba sa ma ya dzaHdzaH_dz+nyA na sid+d+hi ho:_tshogs zhing mkha' khyab tu spyan drangs pa la/_ho:_rdo rje bza' ba'i dam tshig rdzas:_longs spyod mchod pa rmad du byung:_'chi med grub pa'i sa ra yan:_dkyil 'khor lha la 'bul gyis bzhes:_ga Na tsakra pU dza hoH_dang pos mchod pa 'bul/_hrIH_bde chen sgyu mar rol pa yi:_rdo rje'i zhing gi bkod pa'i mchog:_ngo mtshar rgyan gyi rol mo che:_dbyings dang mnyam par spro zhing shar:_rang snang bkod pa rmad byung ba:_phyi nang gsang ba'i mchod rdzas che:_bla na med pa'i dam tshig gi:_rol pa'i cho 'phrul rmad byung ba:_ngo mtshar bsam mi khyab pa 'dis:_dbang gi rgyal po'i dkyil 'khor gtso:_rigs kyi tshom bu dang bcas pa:_thugs dam gnyan po dgyes par bskang:_dam tshig nyams chag 'gal 'khrul bshags:_phyi nang gsang ba'i bar chad sol:_'chi med tshe yi dngos grub stsol:_yig brgya bzla ba bar pas bskang bshags dang*/_hrIH_tshe bdud bar chad glo bur bgegs:_phyag rgya bzhi yis 'gugs 'ching sdom:_myos te lha phral rang gshed dbab:_rta mchog rol pa'i rdo rje'i mtshon:_nyams pa dgug bsgral dgyes mchod 'bul:_mA ra ya phaTa?:_mAM sa rak+ta gau ro tsa na keM ni ri ti khA hi:_tha mas bsgral bstab byas/_rdo rje'i rnal 'byor dang ldan pas dam rdzas la rol nas nang gi tshogs mchod bya/_gtsang dme'i lhag ma bsdus la zhal chab/_pany+tsa a mr-i ta ha ho hrIHsa byin gyis brlabs/_e a ral+li hrIM hrIM:_lhag mgron spyan drangs pa la/_hrIH_pad+ma dbang gi dkyil 'khor che:_skyong ba'i bka' nyan lhag sdud tshogs:_dpal gyi pham phab 'di bzhes la:_bcol pa'i phrin las 'grub par mdzod:_uts+tshiSh+Ta ba liM ta khA hi:_lhag ma phyi rol du phul/_bla med gsang ba'i dkyil 'khor du:_dam tshig chen pos mchod pa'i mthus:_tshogs gnyis yongs su rdzogs pa dang:_'chi med tshe yi dpal thob shog:_smon lam gdab/_gnyis pa dngos grub blang ba ni/_oM:_dbyings kyi ngang du 'khrul pa zhi:_rig pa'i rtsal las ye shes rgyas:_rlung sems dbang 'dus gzung 'dzin thul:_mchog dngos grub pa'i byin rlabs stsol:_oM pad+ma ha ya gr-I wa kA ya wAka tsit+ta ma hA pa ra ma sid+d+hi hU~M:_gtang rag mchod bstod mdor bsdus/_nongs bshags dang*/_rten yod na brtan bzhugs kyang bya/_gsum pa bsdu ldang ni/_snod bcud 'od zhu rang la thim/_/de yang mi dmigs 'od gsal ngang*/_/khro rgyal snang stong chen por shar/_/mi mthun phyogs kun srung bar gyur/_/badz+ra rak+Sha ho:_bzhi pa bsngo smon ni/_ho:_legs spyad dge ba'i tshogs thams cad:_'chi med rig 'dzin 'grub phyir bsngo:_lha dang skal ba mnyam pa yis:_don gnyis 'bad med 'grub gyur cig:__lnga pa shis brjod ni/_oM:_dbyings kyi ngo bo chos sku tshe dpag med:_rig pa rang snang dbang chen rta mchog dpal:_dbyings rig zung 'jug rtsa brgyud bla ma yis:_mchog thun gegs med grub pa'i bkra shis shog:_tshul 'di'i rgyun gyi rnal 'byor 'dod na/_skyabs sems rjes lha bskyed dang*/_spyan 'dren mchod bstod/_bzlas pa bsdu ldang dge bsngo shis brjod bcas byas pas grub pa'o/__/ces pa'ang lo chen bai ro'i thugs rje'i ye shes kyi rol mo zhwa de'u'i 'khrul zhig mchog sprul rin po che d+harma ma tis pad+ma tshe yi snying thig gi bsnyen sgrub nyams bzhes kyi skabs rgyang ring po'i lam nas gsung gis rten bcas ched du skul ma gnang ba bzhin zab lam gyi bka' bab pad+ma gar dbang mdo sngags gling pas lho 'brug skyer chu'i khang gsar bkra shis dga' 'khyil nas bris te phul bas bstan 'gro'i dpal yon rgyas shing bstan 'dzin skyes bu thams cad bar chad kyi g.yul las rgyal ba'i rgyur gyur cig_/dge'o/__/mang+ga la~M//_//