DKR-KABUM-18-TSHA-031-wylie

<div class="wylie-content"

@#/__/'chi med pad+ma tshe yi snying thig gi brgyud 'debs 'chi med mchog stsol zhes bya ba bzhugs so/_bdud bzhi'i dpung bcom mgon po tshe dpag med/_/tshe yi yum mchog lha mo gos dkar mo/_/'chi med grub brnyes slob dpon dze tA rir/_/gsol ba 'debs so 'chi med mchog grub stsol/_/dkyil 'khor kun gtso 'chi med mtsho skyes rje/_/tshe yi dbyings phyug lha mo man+da ra/_/tshe lam gsang ba'i grogs mchog mtsho rgyal mar/_/gsol ba 'debs so 'chi med mchog grub stsol/_/chos rgyal yab sras gdams pa'i snod mchog ldan/_/lo chen bai ro gnubs ban nam mkha'i snying*/_/sangs rgyas ye shes rgyal ba mchog dbyangs la/_/gsol ba 'debs so 'chi med mchog grub stsol/_/sras bcas rgyal ba kun gyi ye shes sku/_/snyigs dus bstan dang 'gro ba'i dpung gnyen mchog_/kun mkhyen 'od gsal sprul pa'i rdo rje la/_/gsol ba 'debs so 'chi med mchog grub stsol/_/zab gter snyan brgyud gdams pa'i bka' bab mchog_/gter 'byin mkhas dang grub pa'i gtsug gi rgyan/_/pad+ma 'od gsal gling dang ma ti'i mtshan/_/gsol ba 'debs so 'chi med mchog grub stsol/_/las smon chos bdag brgyud par bcas pa dang*/_/'chi med bcom ldan tshe lha'i dkyil 'khor pa/_/yi dam mkha' 'gro chos skyong srung ma la/_/gsol ba 'debs so 'chi med mchog grub stsol/_/thun mong thun min sngon 'gros rgyud sbyangs shing*/_/phyi nang gsang ba'i lha sngags bzlas pa yis/_/sgo gsum rdo rje gsum du grub pa dang*/_/rlung dang gtum mo'i rnal 'byor mthar phyin shog_/rang lus thabs ldan mthar phyin gzhan lus kyi/_/pho nya'i gsang lam zab mo bgrod pa dang*/_/dbab ldog dga' bzhis srid zhi'i bcud bsdus nas/_/'pho med rdo rje'i lang tsho rgyas par shog_/rig stong mi shigs rdo rje'i sku ru smin/_/'gag med gsung dbyangs chos sgra rgyun chad med/_/mkha' ltar dag pa'i thugs mchog 'od gsal zhing*/_/yon tan phrin las rgya mtshor dbang 'byor shog_/ces pa'ang thog ma'i chos bdag tu dbugs dbyung thob pa chos kyi blo gros pas gsol ba btab pa sid+d+hi rastu//__//