DKR-KABUM-11-DA-015-wylie
<div class="wylie-content"
@#/__/dbang chen rdo rje'i rkyang rgod pher po la brten pa'i rta lha'i g.yang sgrub dge mtshan 'dod dgu'i sgo 'byed bzhugs/_/ @#/__/oM swasti/_dzam gling seng chen rgyal po'i rdzu 'phrul chibs kyi rgyal po la brten pa'i rta lha'i g.yang sgrub bya bar 'dod pas rgyas pa'i las la ched du bsngags pa'i dus tshes gza' skar dge zhing shis pa'i snga char gtsang ma'i gnas su bdag bskyed yi dam gang la brten pa'i mchod gtor dang*/_ge sar gyi gsol mchod rgyas pa sngon du 'gro dgos pas de nyid kyi rten rdzas gtor ma bcas gzhung mthun 'du byas pa'i mdun du rten mda' gtsang ma rgyan ldan dar snas bklubs pa'i mgul du rgya shog la gser ram/_mtshal gyis rta mgrin dang*/_rkyang rgod/_rta lha'i sngags/_'dod gsol brtan bzhugs can 'du bya/_gsol mchod tsam la 'brang rgyas nor gzugs 'khor rang 'dra brgyad bar rnams thebs kyu zas snas bskor bas kyang rung*/_gang ltar yang gtsang la dag pa'i mchod pa dang*/_bsang dang*/_gser skyems bcas 'du bya zhing*/_bdag nyid rta mgrin lta bu'i bskyed bzlas dang*/_seng chen gyi gsol mchod rgyas pa btang la/_mchod rdzas byin rlabs ni/_ra~M ya~M kha~M/_bdag nyid lhar gsal thugs ka nas/_/'od 'phros mchod rdzas gzung 'dzin sbyangs/_/dngos 'byor yid sprul longs spyod tshogs/_/mchod pa'i phyag rgya chen por gyur/_/na maHsarba ta thA ga te b+h+yo sogs nam mkha' mdzod sngags lan gsum dang*/_badz+ra s+pha ra Na khaM/_de nas rten bskyed pa ni/_kyai/_ye thog bskal pa'i dang po la/_chos dbyings stong pa'i ye shes rtsal/_/'gag med rten 'byung sgyu ma'i 'phrul/_/zung 'jug rol mo cir yang shar/_/rgyu 'bras kun rdzob rten cing 'brel/_ngo mtshar gsang ba zab mo'i dbyings/_/don gyi gnad kun legs rtogs pas/_/phan gnod 'khor 'das bkod pa 'char/_/dbyings la bzang ngan ma mchis kyang*/_/rol rtsal ma 'gag snang ba'i gnad/_/thabs dang rten cing 'brel 'byung las/_/'dod pa'i dngos grub sbyin pa'i phyir/_/rgyal kun rdo rje gsum gyi dbyings/_/'bras bu'i sems dpa' rigs gsum gyi/_/mkhyen brtse nus pa'i ye shes che'i/_/spro bsdu'i byed po rigs kun bdag_/rtsa gsum rgyal ba'i khyab bdag che/_/srid zhi'i spyi dpal he ru kaH_/snang srid zil gnon thod phreng rtsal/_/rang byung thugs rje'i ye shes gar/_/bdud dgra bdud 'dul dam sri'i gshed/_/sangs rgyas chos kyi dgra bla che/_/nag phyogs hor bdud 'joms pa'i gshed/_/dzam+bu gling gi skyes gcig pu/_/seng chen nor bu dgra 'dul rtsal/_/las smon dag pa thugs rje'i gzugs/_/'jigs bral dgra lha wer ma'i rgyal/_/dpa' bo chen po'i skur bzhengs tshe/_/phyi ru rdzu 'phrul chibs kyi mchog_/rdo rje rkyang rgod pher chen zhes/_/rta mchog pad+ma gar gyi dbang*/_/sgyu 'phrul rol pa'i bkod pa bstan/_/nang du rdo rje nyi ma'i me/_/chos kun za ba'i tsaN+Da li/_/'bar ba rngams zhugs dwangs ma'i dpyid/_/mi shigs thig le chen por zlum/_/gsang ba rdzu 'phrul rkang pa bzhi'i/_/ye shes dag pa'i ting 'dzin gyis/_/zab mo rgyal ba'i chos kun la/_/dbang 'byor nus pa'i ye shes nyid/_/rnam pa rdo rje cang shes rgyal/_/seng ltar 'gying zhing stag ltar rngams/_/'brug bzhin 'phyo la khyung ltar lding*/_/rnam pa sna tshogs rol rtsed kyis/_/las bzhi'i phrin las cir yang ston/_/skyes bu'i chibs kyi kha lo bsgyur/_/phrin las las rigs klung rta'i lha/_/gang 'dod las kun thogs pa med/_/yid bzhin sgrub pa'i dpa' bo che/_/mdun du mkha' spyod dag pa'i zhing*/_/sku gsum rgyal ba'i zhing gi mchog_/ngo mtshar mthong ba kun smon gyi/_/bkod pa rmad du byung ba'i dbus/_/rin chen pad+ma zla ba'i steng*/_/cang shes 'phrul gyi rgyal po che/_/thun mtshams chu 'dzin gsar pa'i mdangs/_/rdzu 'phrul rkang bzhis gar stabs bsgyur/_/ze rngog sprul pa'i rtsa gsum 'phro/_/rin chen sga srab dar snas brgyan/_/mdzes brjid phun sum tshogs pa la/_/don grub wer ma'i rgyal pos chibs/_/sku gsung thugs kyi ye shes ni/_/phyogs dus de bzhin gshegs kun gyi/_/bde chen gsung gi rdo rje'i bdag_/dpal ldan pad+ma gar gyi dbang*/_/rta mchog rol pa'i dkyil 'khor te/_/gsang ba mi zad rgyan gyi dbyings/_/sku dang ye shes ngo bor grub/_/thugs ka chos kyi 'khor lo nas/_/bde stong dwangs ma'i dpyid thig gi_/rnam rol khro bo re man+ta/_/dmar ser nyi ma 'char ka'i mdog_/khro 'dzum sgeg bzhad dpa' bo'i gzugs/_/bse khrab dngul rmog 'khor gsum can/_/rdo rje rtse lnga ne'u le bsnams/_/mdung dar dmar po gru g.yon 'chang*/_/sngon po chu ris rgyan ldan chibs/_/bya khyung lcags khra 'jum zhing lding*/_/stag dang seng chen mdun rgyab 'phyo/_/rta sngon sgab ser rol du khrid/_/sprul pa rta lha 'bum gyi tshogs/_/gtso 'khor bkod pa bsam yas bcas/_/ma nges mkha' la sprin ltar 'khrigs/_/dam tshig thugs ka'i 'od zer gyis/_/spyan drangs badz+ra sa ma dza/_/de nas spyan 'dren pa ni/_kyai/_dad pa dang ni dam tshig gis/_/ye shes dbyings nas gang 'dul gar/_/rigs gsum rgyal ba'i phrin las gzugs/_/skyes mchog nor bu dgra 'dul gyis/_/rdzu 'phrul chibs kyi kha lo bsgyur/_/dbang chen cang shes phel po ni/_/gsang gsum dgyes dgu'i rol mo yis/_/gnas 'dir spyan 'dren gshegs su gsol/_/ri rab ri yi rtse mo nas/_/re man+ta mchog gshegs su gsol/_/'od stong nyin byed mdun rol nas/_/nyi ma'i sras po gshegs su gsol/_/lha yi spyan pa rno so ba/_/dpa' rab 'chang ba gshegs su gsol/_/lam lha mdzad cing rta sri sgrol/_/khro rgyal re man gshegs su gsol/_/lcang lo can nas gnod sbyin che/_/gang ba bzang po gshegs su gsol/_/rin chen pho brang bdun brtsegs nas/_/rnam mang thos sras gshegs su gsol/_/rtsub 'gyur rdo rje'i dga' tshal nas/_/ma hA kA la gshegs su gsol/_/rta rnam srung spel zla ba'i sras/_/ku be ra ya gshegs su gsol/_/rta lha lnga brgya gnod sbyin 'bul/_/nor lha bye ba 'bum gyi sde/_/'dod dgu'i dngos grub stsol mdzad pa'i/_/'khor dang bcas kun gshegs su gsol/_/oM shrI ma hA a shwa rat+na ha ya gr-I wa re man+ta sarba de wa sa pa ri wA ra badz+ra sa ma ya dzaHdzaH_dzaHhU~M ba~M hoH_sa ma ya tiSh+Tha lhan/_kyai/_lha rnams dgyes byed kun bzang mchod pa'i rdzas/_/yid 'ong nyer spyod 'phags nor rin chen bdun/_/'phags lam bkra shis dge ba'i rdzas mchog brgyad/_/rnam par thar pa'i rtags brgyad byang chub lam/_/rgyal srid bdun dang stobs kyi 'dod yon lnga/_/tshogs gnyis bzhed dgu'i thugs dam dgyed bskang rdzas/_/pha rol phyin bcu'i stobs ldan cang shes khyu/_/srid zhi'i dpal 'byor 'dod 'jo'i dpag bsam tshal/_/ma lus lhun grub rgyal ba dgyes pa'i lam/_/bla med chos kyi dbyings dang mnyam par 'bul/_/oM sarba pU dza sa ma ya AHhU~M/_gtor ma 'bul ba ni/_oM a mr-i ta hU~M hU~M phaTa?/_oM swa b+hA was sbyangs/_stong pa'i ngang las b+h+rU~M las rin po che'i snod yangs shing rgya che ba rnams kyi nang du gtor ma 'od du zhu ba lha yi zhal zas bdud rtsi'i rgya mtsho 'dod yon gyi zegs ma 'phro bar gyur/_oM AHhU~M/_lan gsum/_oM shrI ma hA a shwa rat+na h+ya gr-I wa sa pa ri wA ra i daM ba ling+ta kha kha khA hi khA hi/_oM badz+ra kro d+ha re man+ta i daM ba ling+ta kha kha khA hi khA hi/_oM bud+d+ha krod+ha re man+ta i daM ba ling+ta kha kha khA hi khA hi/_oM Ar+Ya re man+ta i daM ba ling+ta kha kha khA hi khA hi/_oM ku we ra re man+ta i daM ba ling+ta kha kha khA hi khA hi/_oM ma hA kro ta re man+ta i daM ba ling+ta kha kha khA hi khA hi/_oM pUr+Na b+ha drA ya i daM ba ling+ta kha kha khA hi khA hi/_oM bai shra ma NA ya i daM ba ling+ta kha kha khA hi khA hi/_oM ma hA kA la g+ho ra de wa i daM ba ling+ta kha kha khA hi khA hi/_oM ku bai rA ya i daM ba ling+ta kha kha khA hi khA hi/_oM sarba yak+Sha g+ho ra de wa i daM ba ling+ta kha kha khA hi khA hi/_zhes so sor lan gsum res 'bul/_bstod pa ni/_hrIH_rnam kun mchog ldan dbyings kyi thig le che/_/rnam thar sgo gsum rdzogs pa'i nye reg gis/_/rnam bcas bde ba'i gzi byin 'bum phrag gzugs/_/rnam mkhyen lam gyi ded dpon 'char la bstod/_/mdzes sdug mtshungs med byi ru'i lhun po bzhin/_/che brjid rngams pa'i 'od phreng 'bum gyis 'khyud/_/dbang chen bzhad pa'i rdo rje'i gad rgyangs can/_/dbang byed pad+ma'i rigs mchog 'char la 'dud/_/gang 'dul sgyu 'phrul bdud rtsi'i sprin phreng las/_/cang shes char 'bebs Ar+Ya re man+ta/_/rnam 'gyur ma nges 'dod dgu'i glog phreng gis/_/phrin las rma bya'i zlos gar rtsen la 'dud/__kyai/_srid pa'i lha rabs gnyan po rnams/_/mchod cing bstod de thugs dam bskul/_/de ring bkra shis nyi ma la/_/dngos grub 'dod dgu'i phya g.yang stsol/_/phyi snod sa chu me rlung mkha'i/_/dwangs ma dpal gyi g.yang kun khug_/nang bcud skye rgu lha klu mi'i/_/bsod nams tshe dpal g.yang kun khug_/steng 'og bar gyi 'jig rten gyi/_/dge legs yon tan dpal kun khug_/rab 'byams rgyal ba'i zhing khams nas/_/tshogs gnyis 'byor ba'i dpal yon khug_/rgyal ba sras dang bcas rnams kyi/_/thugs bskyed phrin las dpal kun khug_/ma lus mkhas dang grub pa yi/_/bshad sgrub las kyi mdzad dpal khug_/phun tshogs snyan dang grags pa yi/_/'byung gnas dpal 'byor bcud kun khug_/tshe ring 'byor ldan longs spyod kyi/_/zad med mnga' thang stobs 'byor khug_/khyad par dbang chen he ru kaH_/pad+ma rta mchog rol pa'i 'phrul/_/rdzu 'phrul rkyang rgod pher po'i mthus/_/cang shes rta yi phya g.yang khug_/spu mdog li khri'i 'jo sgeg gis/_/mdzes sdug rta yi phya g.yang khug_/thogs med rkang bzhi'i gom stabs kyis/_/myur mgyogs rta yi phya g.yang khug_/seng ltar brjid cing dpa' ba yis/_/stobs ldan rta yi phya g.yang khug_/ze rngog sprin ltar 'tshubs pa yis/_/zad med rta yi phya g.yang khug_/phrum phrum dung gi zhur mdzes pas/_/rta mang 'phel ba'i phya g.yang khug_/sting stobs rdo rje ltar brtan pas/_/mi shigs stobs kyi phya g.yang khug_/spyan zung nyi zla 'khyil ba yis/_/dwangs gsal mig ldan rta g.yang khug_/dpung pa rlung gi 'phrul 'khor gyis/_/mgyogs myur dgra lha'i dpal g.yang khug_/rmig bzhi pad+ma'i rta rjes kyis/_/kun kyang dbang byed phya g.yang khug_/sgal tshigs stobs myur shugs kyi lhas/_/mthu stobs rtsal ldan phya g.yang khug_/rtsibs logs mgyogs pa'i bangs ldan pas/_/rlung rtar mgyogs pa'i phya g.yang khug_/gdan gsum rdo rje'i grong khyer gyi/_/cho 'phrul bkod pa rmad byung ba'i/_/khro bo Ar+Ya re man+tas/_/'do ba rta yi g.yang kun khug_/dpa' rab 'chang ba'i mgon po yis/_/'gal rkyen zhi ba'i phya g.yang khug_/dpal ldan re man+ta ser pos/_/legs tshogs rgyas pa'i phya g.yang khug_/gzhon nu re man+ta dmar pos/_/dpal kun dbang sdu phya g.yang khug_/khro bo re man+ta nag pos/_/drag shul rol pa'i phya g.yang khug_/re man+ta ni rigs bzhi yis/_/thun mong phrin las rnam pa bzhis/_/cang shes rta mchog rin po che'i/_/phya g.yang rgya mtsho 'khyil bar mdzod/_/gnod sbyin rgyal po gang bzang gis/_/'dod dgu'i gter gyi phya g.yang khug_/rgyal chen rnam mang thos sras kyis/_/zad med nor gyi phya g.yang khug_/dgra lha mgon po lcam dral gyis/_/thogs med nus mthu'i phya g.yang khug_/rta bdag ku we ra nag pos/_/srung skyob byin rlabs phya g.yang khug_/mdor na rdzu 'phrul rta yi lha/_/cang shes nyi ma'i snying po sogs/_/'dod dgu'i dngos grub ster mdzad pa/_/nor lha 'khor dang bcas rnams kyis/_/'dod dgu'i phya dang g.yang kun khug_/lus kyi rtsal dang mdangs ldan cing*/_/stobs chen 'gros myur bzhon pa'i mchog_/cang shes rta yi rgyal po yi/_/dpal gyi g.yang kun gnas 'dir khug_/bsgrub pa'i rdzas la gnyis med bstims/_/ye shes phyag rgya btab pa'i mthus/_/phya g.yang mi nyams rgyas shing brtan/_/dge legs don kun lhun grub mdzod/_/sdus sdus phya g.yang puSh+TiM ku ru ho/_zhes brjod/_bzlas dmigs ni/_mdun bskyed lha tshogs thugs ka'i 'od zer gyis/_/snod bcud srid zhi'i dpal gyi dwangs ma dang*/_/khyad par rdzu 'phrul stobs ldan rta mchog tshogs/_/'phel rgyas brtan pa'i dngos grub 'od zer tshul/_/bsdus nas rten dang mdun bskyed rnams la bstims/_/slar yang de las 'phros pa'i 'od zer gyis/_/khyab par brdal las 'dod 'byung nor bu'i tshogs/_/zad med phab pas phyur bur khengs pa'i mthus/_/ci 'dod don kun yid bzhin 'grub par mdzod/_/oM pad+ma kro d+ha ha ya gr-i wa ma hA tu rang+ga a shwa rat+na sarba ar+tha sid+d+hi puSh+TiM ku ru oM/_zhes dang*/_gzhan yang*/_oM badz+ra krod+ha re man+ta ha na ha na hU~M phaTa? swA hA/_oM bud+d+ha kro d+ha re man+ta ha na ha na hU~M hU~M phaTa?/_sarba shAn+tiM ku ru swA hA/_/oM rat+na Ar+Ya re man+ta kro d+ha rak+Sha rak+Sha ye swA hA/_sarba puSh+TiM ku ru oM/_oM pad+ma Ar+Ya re man+ta bdag gi dbang du g+ho ra sarba bA shaM ku ru ye swA hAH_oM ma hA kro d+ha re man+ta duSh+Tan mA ra ya ha na ha na hU~M phaTa?/_oM pUr+Na b+ha dra g+ho ra rak+Sha rak+Sha swA hA/_oM bai shra ba Na sa ma ya rta rnams srungs shig_/oM ma hA kA la ru ru sha te ga te ni swA hA/_oM ku be ra swA hA/_g+ho ra rak+Sha rak+Sha b+h+rU~M b+h+rU~M srungs shig_/zhes sngags rnams bzlas la/_thun mthar gtor ma gso bran dang skyems phud rnams sbrengs te/_kyai/_mchod do 'do rje rta yi lha/_/bskul lo ma g.yel las la bzhengs/_/dbang chen pad+ma he ru kaH_/rdo rje'i thugs dam gnad nas bskul/_/sngon gyi zhal bzhes dam bca' bzhin/_/bdag cag dad pas khyod bsten te/_/rtse gcig sgrub cing bsnyen pa bzhin/_/cang shes rta rnams spel zhing srungs/_/dbang chen ha ya gr-I ba yi/_/ye shes rdo rje'i srung gur du/_/rta rnams tshud pas gnod byed bgegs/_/rta sri bar chad kun las skyobs/_/rngog chags srung ma re man+tas/_/rta rnams mel tshes spel bar mdzod/_/lha yi spyan pa dpal rab 'chang*/_/rta yi gnod pa kun zhi mdzod/_/nyi ma'i sras po gzhon nu yis/_/rta rnams 'phel rgyas dar bar mdzod/_/khro bo chen po re man+tas/_/rta sri god 'dre sgrol cing sod/_/gnod sbyin gang ba bzang po yis/_/'dod 'byung rta yi 'byor ba spel/_/rgyal po chen po rnam sras kyis/_/rta phyugs dpal 'byor 'phel brtan mdzod/_/mgon po ma hA kA la yis/_/rta la gnod pa'i dgra bgegs sgrol/_/zla ba'i sras po ku be ras/_/rta rnams bya ra mel tshes skyongs/_/rta sri god 'dre 'gong po thul/_/rta yi nad dang bar chad zhi/_/rta g.yang sgab 'phel dar zhing rgyas/_/rta mchog rin chen dbang du sdus/_/rta yi dngos grub bdag la stsol/_/mdor na ji ltar 'dod pa'i las/_/yid bzhin 'grub pa'i sdong grogs mdzod/_/bkra shis dge legs dpal 'byor pas/_/don kun lhun gyis grub par mdzod/_/ces brjod/_ye d+harma dang*/_su pra tiSh+Thas brtan bzhugs bya zhing*/_seng chen gsol mchod kyi las byang gzhug bsdus pas don grub pa'o/__/don gnas grub pa'i man ngag la/_/rnam pa rten 'brel thabs kyi sgo/_/bkra shis 'dod gu'i lde'u mig gis/_/dge legs don kun grub gyur cig_/ces pa'ang skyabs rje mdo khams pa chen po'i sku'i rim gro pa 'brong sprul ngag dbang blo gros phrin las mchog grub nas lha rdzas rten bcas gsung bskul ngor rgyal khams pa 'jigs med mkhyen brtse'i 'od zer phrin las rol pa rtsal gyis phun tshogs chos 'khor gling gi gzim spyil du bris pa 'dod dgu'i dngos grub yid bzhin du 'grub pa'i rgyur gyur cig_/sarba mang+ga laM/_dge'o//__//
