DKR-KABUM-11-DA-013-wylie
<div class="wylie-content"
@#/__/seng chen nor bu dgra 'dul gyi gsol mchod don kun lhun grub lha yi rnga chen bzhugs/ @#/__/hU~M hrIH_bde chen nyams brgya'i rol rtsed dang 'grogs pa'i/_/'dod dgu'i phrin las glog gi rtse gar gyis/_/sa gsum brtan pa 'phrog byed dge legs char/_/myur 'bebs don grub dgra bla wer ma rgyal/_/gzhi dbyings 'pho med rig stong gnyug ma'i dbyings/_/'khor 'das kun gyi srog gi thig ler zlum/_/gzhi snang mkhyen brtse nus pa'i ye shes rtsal/_/'od gsal lhun gyis grub pa'i phrin las bdag_/dpal ldan rang byung sangs rgyas pad+ma skyes/_/kun khyab snying rje shing rta'i rlung shugs rtsal/_/bdud srin dam sri'i gshed gyur 'jigs mdzad kyi/_/rol pa mtha' yas stobs ldan dbang po'i sku/_/'og min mkha' spyod mthong ba kun smon gling*/_/bsam 'grub lha yi sku mkhar rtse dgu'i dbus/_/'dab stong nyi zla'i lha rdzas nor bu'i gter/_/phyogs kun dog por byed pa'i dbus rgyu ba'i/_/lha rta cang shes nor bu'i sga stan dang*/_/rin chen sna tshogs 'phyang 'phrul rab g.yo'i steng*/_/mi 'gyur ye shes snying po'i srog yig a/_/zla mdog yongs gyur don kun myur 'grub lha/_/dkar gsal nyi zla 'bum gyis brjid pa'i sku/_/snang srid zil gnon lhun po'i gtos dang mnyam/_/dag pa ye shes spyan gsum zlum la 'khyil/_/dgyes 'dzum zhi khro'i rnam 'gyur ci yang 'char/_/phyag g.yas sba lcag bsam pa'i don 'grub las/_/tshe dpal 'dod dgu'i char pa si li li/_/g.yon pas mdung mo khams gsum dgra 'dul gsor/_/dbang dang drag shul las byed pho nya spro/_/mdzes brjid dpal 'bar rdo rje'i sku yi dbyings/_/sna tshogs dgra bla'i chas kun yongs su rdzogs/_/zhabs zung rgyal po rol pa'i stang stabs kyis/_/khams gsum bran bkol zil gnon dpa' bo'i tshul/_/ma nges rol pa'i cho 'phrul cir yang ston/_/sku yi g.yas phyogs seng chen spyi dpon sogs/_/dpa' mdzangs dge ba'i blo ldan tshogs kyis bskor/_/g.yon du 'gar bza' seng lcam la sogs pa/_/mdzes sdug mo sman DA kis glu bro bsgyur/_/mdun du zhal dkar dgra bla'i rgyal po dang*/_/lha sras rtse rgyal la sogs zhi ba'i dmag_/g.yas su sku srung sga bde ber nag dang*/_/rgyal ba'i lhun grub la sogs rgyas pa'i dpung*/_/rgyab tu 'phrul ldan stag rong dpon po dang*/_/me ru tse sogs dbang byed las kyi tshogs/_/g.yon du stobs ldan 'dan ma spyang khra dang*/_/rong sras lha rgod la sogs drag po'i sde/_/kun kyang rdo rje'i go khrab sra la brjid/_/sna tshogs mtshon cha'i las byed sha ra ra/_/rdo rje'i rta mchog 'phyo zhing rgyug pa'i gar/_/ki bswo rnam rgyal gad mo 'brug ltar sgrog_/bar mtshams rtse grogs dgra bla bcu gsum dang*/_/dgra bla'i drwa ma che dgu lha klu gnyan/_/rang rang sprul pa'i dmag dpung 'bum phrag spro/_/'dod dgu'i phrin las thog med yud kyis sgrub/_/byin rlabs gzi 'bar dngos grub g.yang du 'khyil/_/srid zhi'i dpal kun rdzogs pa'i phyag rgyar shar/_/khyod kyi ngo bo 'khor 'das yongs la khyab/_/rnam pa 'gag med gang 'dul de bzhin snang*/_/rdzu 'phrul dgyes dgu'i rol pa mi zad pas/_/rang snang dag pa'i gnas 'dir dgyes spyon la/_/phun tshogs rnam dkar las kun rdzogs pa'i khab/_/thub bstan yongs 'dus skabs gsum kun dga'i tshal/_/lung rtogs 'byor pa bye bas brgyan pa 'dir/_/phyogs las rnam rgyal dgra bla'i rgyal po bzhugs/_/kun bzang he ru ka dngos spyi dpal che/_/rigs gsum pad+ma'i tha tshig ma bsnyel bar/_/rdo rje'i g.yar dam gnyan po'i zhal bzhes mthu/_/mngon sum ston pa'i dam las ma 'da' shig_/phyi yi mchod sprin kun bzang rnam par rol/_/dag pa'i lha rdzas dpag bsam skyed mo'i tshal/_/bkra shis rdzas rtags rgyal srid rin chen bdun/_/dri zhim lha bsang dkar mngar chang gi skyems/_/gdung sel bdud rtsi'i char dang nad 'joms sman/_/kun tu sim byed zhi ba'i mchod pa 'bul/_/phun tshogs bsod nams gter gyi bum bzang dbyig_/nor bu'i sprin chen ma rmos lo tog zhing*/_/'dod 'jo'i ba dang bsam 'phel gter mdzod sogs/_/dpag yas nam mkha' mdzod kyi dgyes mchod 'bul/_/phun tshogs bsod nams gter gyi bum bzang dbyig_/nor bu'i sprin chen ma rmos lo tog zhing*/_/'dod 'jo'i ba dang bsam 'phel gter mdzod sogs/_/dpag yas nam mkha' mdzod kyi dgyes mchod 'bul/_/kun dga'i sim gter 'dod yon lnga'i rtse 'jo/_/myos byed bcud kyi phud dang mdzes ma'i glu/_/yid 'ong 'dod pa'i sgyu rtsal la sogs pa/_/yid kyi brtan 'phrog dbang gi mchod rdzas stob/_/nyams pa sgrol byed go mtshon dpa' bo'i chas/_/sha khrag dbang po'i me tog tshil gsur sprin/_/che brjid rol mo la sogs drag shul gyis/_/rngams pa'i mchod pa chen po yongs su bzhes/_/bde stong dgyes dgu'i chags pa'i zur gyi mig_/rigs ldan dpa' mo'i dpyid du lhung ba'i mod/_/dga' bzhi'i nyams 'gyur rdzogs pa'i sgyu rtsal che/_/lhan skyes dbyings su sbyor ba'i mchod pa 'bul/_/dmigs med snying rje'i yus kyis khros pa'i thugs/_/bdud bzhi'i snying la rngams pa'i chu srin khas/_/gdul dka' mi 'dor drag shul rdo rje'i sgyogs/_/'bebs mdzad sgrol byed srin po'i las kyis mchod/_/sgyu ma'i cho 'phrul mchod dang 'bul ba ltar/_/snang yang nyag gcig ye shes de kho nar/_/gnyis med dgyes pa'i dam tshig bla na med/_/rang bzhin mnyam rdzogs rdo rje'i mchod pas mchod/_/bde chen lhun rdzogs chos sku'i ye shes la/_/'khor 'das spang blang gnyis med rtsal du shar/_/rig rtsal rol pa sku dang ye shes kyi/_/mi zad rgyan gyi 'khor lo'i bkod pa snang*/_/chos dbyings rol rtsal mkhyen brtse nus pa'i dpal/_/dbang dang stobs bcu'i nus pa'i mthu ldan pas/_/phan bde'i 'dod dgu zad mi shes pa yis/_/ji ltar 'dod pa'i las kun yid bzhin stsol/_/rmad byung smon lam thugs bskyed btsan po'i dpung*/_/gdul dka' snyigs mar lhag par mthu che bas/_/rab 'byams las kun khyod la gnyer gtad phyir/_/myur du sgrub pa'i phrin las rtsal ma zhan/_/nyi zla'i 'gros dang dus gzhug me rlung las/_/mthu rtsal stobs ldan phrin las 'dod 'jo bas/_/rdzogs ldan dus kyi dga' ston ma bstsal na/_/snyigs dus bstan 'gro skyob pa'i byed po su/_/dbul phongs 'byung bzhi'i gnod sogs mi mthun zhi/_/tshe dpal lung rtogs yon tan grags snyan rgyas/_/che dgu sa gsum dpal kun dbang du byed/_/bdud dgra nag phyogs rtsad nas brlag par mdzod/_/khyad par srid zhi phan dang bde dga'i dpal/_/kun 'byung ris med thub bstan yid bzhin nor/_/de 'dzin bcas pa'i dbu 'phang dgung du bstod/_/lung rtogs dbyar mtsho nyi bzhin 'phel rgyas srungs/_/mtha' klas 'gro dang khyad par gangs ri'i khrod/_/khyod kyis rjes su bzung ba'i gdul bya'i phyir/_/nad mtshon dus kyi rgud pa rgyun chod la/_/dge legs phan bde'i dpal gyi mel tshes skyongs/_/nang gi dug lnga shugs drag snyigs 'gro'i yid/_/nag phyogs rgyal bsen dam sris dbang byed pa'i/_/smon log bstan dgra'i gnyen po khyod bsngags pas/_/drag shul rdo rje'i mtshon gyis mgo bo khos/_/dbu yi rmog dkar rgyal ba'i don grub las/_/steng gi lha dmag bye ba dung phyur spros/_/legs ldan dgra bla 'bum gyi ki bswo chas/_/dkon mchog rin chen gsum gyi dbu 'phang bstod/_/khams gsum dgra 'dul mchan gyi mdung dmar las/_/bar gyi gnyan dmag rlung nag 'tshub ma bkyes/_/gnyan chen sde bzhi'i dge snyen dmag dpung bcas/_/dkar phyogs gling gi rgyal khab srung bar mdzod/_/klu yi bla zhags sbal sbrul 'doms dgu las/_/'og phyogs sa bdag klu dmag mtsho ltar phyur/_/klu brgyad dpung gi kha rlung mdze sprin can/_/bstan bshig mtha' yi dmag la mun ltar gnag_/stag dong 'khyil ba dgra lha'i rdzong chen las/_/thog ltar myur ba'i mda' mtshon bu yug 'tshub/_/gzig shub 'bar ba wer ma'i bla gnas nas/_/rwa rgod 'khyil ba'i mchog dkar gza' brgyad 'khyugs/_/'ja' ris swog lham sde brgyad zil gnon las/_/phyogs skyong las byed sprul pa rdul ltar 'tshubs/_/mkha' 'gro'i bla rdo sna tshogs nor rgyan las/_/snang srid ma mo 'bum phrag yangs pa sogs/_/rgyud gsum sde brgyad drag po'i dpung gi sde/_/kun kyang sha za gzan la chas pa ltar/_/gtum rngams dpa' bo'i go mtshon sprin ltar gtibs/_/'jigs rung ki bswo rngams pa'i cha sgra ldir/_/drag shul snying rjes khros pa'i stang stabs kyis/_/dug gsum rU tra 'dul ba'i gshed du chos/_/dge 'dun sde bshig gtsug lag rten gsum 'jig_/yon sbyor sbyin pa'i bdag po'i mnga' thang 'phrog_/nag phyogs ru mtshon bsgrengs ba snyigs ma'i dgra/_/skyob pa'i rgyab brten khyed la rtse gcig bcol/_/rdzu 'phrul nus pa mi zad bskal pa'i me/_/gdung shugs rlung gis bskul ba'i za byed lce/_/bdud srin dam srin mtha' dmag nags tshal la/_/thebs pa'i dpal rtags dus 'dir mngon sum ston/_/bsam ngan dug gi mtshon cha rang gshed phob/_/rtsub sbyor las kyi nus pa g.yo med chings/_/phung bshig bstan dgra'i kha rje dbang thang bcas/_/rngams 'khrugs bzhad pa'i zhal du myur bar rol/_/thub pa'i bstan dang de 'dzin skyes bu'i tshogs/_/ye shes rdo rje'i gur gyis srung zhing skyobs/_/mi mthun rgud pa kun zhi dge legs dpal/_/dkar phyogs tshes pa'i zla ba lta bur mdzod/_/rgyal bstan shing rta mes dbon rnam gsum gyis/_/lam srol phyes pa'i chos 'khor gsum la sogs/_/phan bde'i dpal gyur gtsug lag 'dus pa'i sde/_/nyams med dzam gling rgyan du rtag brtan mdzod/_/sgrub brgyud chu 'go shing rta che brgyad kyi/_/smin grol gdams pas slar yang gangs can gdal/_/bshad sgrub las kyi 'khor lo rnam gsum gyis/_/mdzes pa'i skyes bu'i sku tshe 'phrin las spel/_/mdor na mnyam med shAkya'i dbang po yi/_/ring lugs chos bzhin spyod la mthun pa'i rkyen/_/dri bzang pad+mo'i bung ba bzhin sdud pas/_/phyogs dus gnas skabs kun tu 'phel rgyas mdzod/_/de la 'khu sems log par lta ba'i sde/_/kun kyang tshar gcod rjes 'dzin mdzad bzang gis/_/mnyam med thub pa chen po'i ring lugs dpal/_/'phel dang brtan pa'i grogs su 'gyur bar mdzod/_/bstan mchog 'dzin pa'i skyes bu'i sku tshe dang*/_/phrin las grags snyan nam mkha'i mu khyud brtol/_/kun tu dge ba'i klung rta'i stobs shugs rgyas/_/pha rol mi mthun rgol ba tshar chod cig_/mdor na ji ltar 'dod pa'i legs byas dpal/_/yid bzhin 'grub la thogs pa med pa yi/_/sa gsum 'jig rten dge ba'i dpal yon gyis/_/rtag khyab ngo mtshar bkra shis dpal 'bar shog_/ces pa'ang rang lo nyi shu'i skor rang byung pad+ma rgyal po'i byin rlabs nyin byed snang bas bstsal ba'i seng chen dgra bla'i chos skor mang dag zhig mchis kyang dus kyi 'gyur pas ak+Sha ra dbyings kyi DA ki'i phyag tu bsdus pa slar yang rang rig mtsho skyes rdo rje'i skal bzang gi dga' ston du chos kyi snying po thob pa'i byin rlabs kyi skya rengs 'char ba dang lhan cig 'jig rten dbang phyug rgyal mchog phyag na pad+mo bcu drug pa'i phrin las dpal gyi sgo 'phar brgya phrag 'byed pa'i sku ngo rnam par dkar ba'i mkhyen brtse'i dpal rab tu rgyas pa karma bsam 'grub nas bkra shis pa'i lha rdzas/_rin chen maN+Da\u0f88\u0f91 bzang po'i skyes bcas bka' yis ched du bskul ba bzhin/_skyabs mgon rgyal ba'i dbang po'i slob gral du mchis shing*/_kun bzang karma bka' brgyud la las smon bzang pos 'brel ba'i shAkya'i rig sngags 'chang ba pad+ma gar dbang 'od gsal mdo sngags gling pa'am 'jigs med mkhyen brtse'i 'od zer bkra shis dpal 'byor gyis rum stegs chos kyi sgar chen nas gsang chen rgyud sde rgya mtsho'i chos 'khor bskor ba'i dga' ston rdzogs ldan dang po'i snang ba la spyod pa'i skabs dbyar 'bring chu stod zla ba'i dkar phyogs kyi 'phel tshes dga' ba gsum pa lhag pa lha mtshams kyi grub pa'i sbyor ba nas dbu 'dzin gyis bris pa 'dis kyang bsil ldan bstan 'gro'i dpal mgon skyabs mgon mthing dmar cod pan 'chang ba yab sras gtsos bstan dang de 'dzin gyi bshad sgrub phrin las kyi dpal 'byor 'jig rten gsum na rtag khyab lhun gyis grub pa'i rgyur gyur cig_/sarba bi dza yan+tu/_dge'o/__/mang+ga laM//_//
