DKR-KABUM-10-THA-059-wylie

<div class="wylie-content"

@#/_gtor bsngos rig 'dzin dga' ston rgyas par btang tshul rtsa gsum dgyes pa'i rol mo zhes bya ba bzhugs so// 'jam mgon bla ma gu Na sA ra'i rdo rje'i gsung gtor bsngos rig 'dzin dga' ston la bskang bshags mdor bsdus sbyar bar spro na/_mchod gtor byin rlabs nas brtsams spyan 'dren gtor 'bul/_rnal 'byor bsam pa 'grub pa'i sdong grogs mdzod/_ces pa'i bar gzhung mthar chags su btang rjes/_thog mar bskang rdzas byin rlabs ni/_ra~M ya~M kha~M/_skong ba'i gnas mchog 'og min gsang chen zhing*/_/rten gyi rdzas rnams dam tshig longs spyod che/_kun bzang sgyu 'phrul drwa ba'i mchod pa'i sprin/_/mgron rigs dgyes pa bskang ba'i nus ldan gyur/_/nam mkha' mdzod kyi sngags rgyas lan gsum gyis byin rlabs/_badz+ra s+pha ra Na kha~M/_gis mkha' khyab tu spel/_hU~M hrIH_'od gsal dbyings las ye shes sgyu ma'i 'phrul/_/snod bcud rnam dag 'og min stug po bkod/_/phun tshogs dpal kun yid bzhin 'char ba'i zhing*/_/rgya khyon chos kyi dbyings dang mnyam pa ru/_/ngo bo bde chen ye shes gcig gi 'phrul/_/rnam pa mchod bskang rten sgrub dgyes pa'i rdzas/_/sa gsum longs spyod dpal 'byor bsam mi khyab/_/gnyis med mnyam pa'i cho 'phrul rmad byung ba/_/yid bzhin lhun grub kun bzang mchod pa'i mchog_/mi zad nam mkha' mdzod kyi sprin chen po/_/rdo rje'i nyer spyod srid zhi'i dpal yon dang*/_/rnam dag dam tshig dad pa'i mchod sprin ches/_/rig 'dzin rtsa ba brgyud pa'i bla ma'i tshogs/_/rtsa gsum rgya mtsho'i khyab bdag pad+ma 'byung*/_/sku gsum thod phreng rigs lnga mtshan brgyad sogs/_/ye shes bkod pa'i rol mo bsam yas dang*/_/brgyud pa drug ldan snga 'gyur bka' gter chos/_/bka' gdams gsar rnying lam 'bras sa ngor tshar/_/bka' brgyud che bzhi chung brgyad shangs pa dang*/_/dus kyi 'khor lo sbyor ba yan lag drug_/rdo rje gsum gyi bsnyen sgrub khrid phran sogs/_/gangs can bshad bka' bcu dang sgrub brgyud brgyad/_/ris med mkhas grub rgya mtsho'i thugs dam bskang*/_/sku gsung thugs kyi gsang ba zab mo yis/_/mngon sum byin rlabs smin grol dbang bskur stsol/_/phyi nang gsang ba bla med de kho na'i/_/mchod pa'i sprin phung zag med bdud rtsi'i bcud/_/thugs dam bzhed dgu cir yang 'char ba 'dis/_/bya rgyud rigs drug spyod dang rnal 'byor rgyud/_/bla med bde gshegs sgyu 'phrul zhi dang khro/_/mnyam sbyor la sogs tan+t+ra sde bco brgyad/_/tshogs chen 'dus pa theg rim dgu yi lha/_/sgrub pa bka' brgyad bka' 'dus chos rgya mtsho/_/dkyil 'khor nyer gcig bla ma dgongs pa 'dus/_/gu ru drag po dmar mthing rigs lnga sogs/_/bde dgyes gsang gsum 'jigs byed dus 'khor lo/_/gdan bzhi sgrol ma rnal 'byor spyan ras gzigs/_/pha ma gnyis med rgyud sde rab 'byams tshogs/_/ye shes rol pa chen po'i thugs dam bskang*/_/zag med bde chen dbyings su rtag dgyes pas/_/thun mong mchog gi dngos grub char du bsnyil/_/phung khams bde stong dwangs ma'i dpyid smin pa'i/_/sman gtor rak+ta tshogs kyi 'khor lo'i bcud/_/rigs lnga'i dam tshig rdzas kyi mchod pa che'i/_/gdod nas grub pa'i gnas yul dur khrod kyi/_/zhing sngags lhan skyes dpa' bo rnal 'byor ma/_/dbyings yum kun tu bzang mo rigs lnga'i yum/_/gsang ba ye shes phag khros seng gsum dang*/_/dbyings phyug rnam dgu rigs byed gdugs dkar mo/_/'od zer can dang sgrol ma grub pa'i rgyal/_/gu ru'i thugs kyi dgyes sde lnga la sogs/_/ye shes las dang 'jig rten mkha' 'gro dang*/_/dam tshig sha za 'bum phrag yangs pa'i ma/_/rab 'byams dpa' bo DA ki'i thugs dam bskang*/_/las bzhi grub brgyad phan bde'i phrin las kyis/_/don gnyis 'dod dgu lhun gyis grub par mdzod/_/gsang ba rdo rje'i tan gan spyod pa'i dpal/_/mchod bskang rten sgrub dam tshig 'os pa'i rdzas/_/nam mkha' bar snang sa gzhi'i khyon brdal bas/_/rgyal ba'i bstan srung legs ldan ljang sngon drag_/stag zhon phyag drug gri gug bing ber nag_/pho rgyud rdo rje srin po he ru ka_/e ka dza Ti sngags bdag rang byung rgyal/_/re ti mched bzhi dud sol dmag zor sogs/_/shes rab dbyings kyi phyag rgya mo rgyud tshogs/_/dpal mgon ma ning sde dpon sngags bdag sogs/_/gnyis su med pa snang srid dregs pa'i sde/_/thugs dang mthun pa'i bzhed dgu'i bskang rdzas kyis/_/gsang gsum khyab 'bul ci bcol phrin las mdzod/_/phun tshogs srid zhi'i dpal 'byor nam mkha' mdzod/_/'dod dgu lhun gyis grub pa'i yo byad kyis/_/rnam sras dzaM lha yab yum tshogs kyi bdag_/rdo rje bdud 'dul lha klu gnyan chen rigs/_/rin chen gter 'chang gnod sbyin nor lha'i tshogs/_/thugs dam dgyes bskang tshe bsod dpal 'byor spel/_/gtsang sbyar dkar dmar phud gtor gser skyems spel/_/dkar phyogs lha srung mnyes byed mchod tshogs kyis/_/gza' dang rgyu skar phyogs skyongs klu sa bdag_/dpal mgon bdun cu lo zla zhag dus lha/_/brtan skyong ya ma mgul lha dge bsnyen che/_/gnyan chen sde bzhi sing chen wer ma'i rje/_/dgra bla dpal thul dwangs sman 'go ba'i lha/_/gnas chen srung ma yul 'di'i zo dor sogs/_/dkar phyogs gter srung gzhi yi bdag pa sogs/_/'jig rten skyong ba 'khor bcas thugs dam bskang*/_/snod bcud rgud zhi las kyi sdong grogs mdzod/_/mchod sbyin mgron kun dgyes mnyes dpal dam pas/_/nyams chags nyes ltung 'gal 'khrul thams cad bshags/_/nongs pa sor chud dag cing tshangs pa yis/_/dngos grub rnam gnyis 'bad med thob par mdzod/_/sangs rgyas bstan dar bstan 'dzin 'phel zhing rgyas/_/dus kyi rgud zhi mtho ris yon tan dar/_/rnam dkar bsam sbyor 'phel rgyas brtan pa yis/_/dge legs bkra shis rtag tu 'bar gyur cig_/mchod gtor 'bul bar spro na smin lugs dam can spyi gtor ltar/_na mo/_rig 'dzin rtsa brgyud kyi dpal ldan bla ma sogs gtor 'gugs nas/_gtor ma byin rlabs/_sngags 'bul/_hU~M/_chos kyi dbyings nas 'bar ba'i skur bzhengs sogs nas/_byang chub bar du srung zhing skyobs par mdzod/_gtor ma phul mthar/_dmigs bsal drag bskul bzlog bsgyur dang bcas dgos na/_hrIH_gdod nas chos nyid zhi las ma g.yos kyang sogs rgyal dbang bco lnga pa'i gsung gi 'dod gsol mthar ye shes dbyings las mthu stobs rtsal sprugs la/_bdag cag dpon slob yon mchod 'khor bcas la/_/'gal rkyen nad gdon bar chad byad phur dang*/_/mi mthun gnod pa'i tshogs rnams thams cad kun/_/bzlog cing bsgyur ba'i phrin las dus la bab/_/rtag tu mi 'bral srung zhing skyobs pa dang*/_/dgra bgegs dam sri bsgral ba'i phrin las mdzod/_/ces sbyar mthar/_dngos 'byor yid sprul mchod pas sprin rgya mtsho'i/_/rtsa gsum lha tshogs dgyes pa'i dpal bskyed cing*/_/mgron rigs kun gyi sku gsung thugs yon tan sogs bstod pa nas brtsams rjes rim mthar dbyung bas grub pa'o/__/zhes pa'ang nyer mkho'i ched mang+ga las so//_//