DKR-KABUM-08-NYA-037-wylie

<div class="wylie-content"

@#/__/yang zab bde chen dpal mo'i thugs kyi me long las/_dbyangs can dmar mo'i gsang sgrub/_yid bzhin 'phrul mdzod kyi phyi dbang gi mtshams sbyor bde chen dpal mdzes bzhugs// @#/__/na mo gu ru swa ra swa sti pradz+nyA de wa b+h+yaH_'di la gsum/_sbyor ba bshams bkod ni/_rdul tshon nam ras bris gang rung gi dkyil 'khor zla gam dmar po sgo gcig pa'i dbus pad+ma 'dab brgyad mdzes tshon can gyi lte bar hrIHyig dmar pos mtshan pa'i steng many+dzi la rin po che'i bum pa so lnga'i bcud ldan/_gsang thod/_rig tsaka_/sin+d+hU ra'i rdul gyi thig le byas pa'i me long*/_man shel/_phyag mtshan pi waM gzhung ltar bca' sgrub byas pa/_zhi chas bcas kyi mthar nyer spyod mchod pas bskor/_sman raka gtor ma/_tshogs/_bka' srung*/_chad brtan gyi gtor ma/_'byor na mar me'i mchod pa gtsang la dag pa brgya rtsa sogs ci 'byor bcas bshams/_slob dpon gyi mdun du DA ru/_rdor dril/_'thor nas sogs dgos pa'i yo byad thams cad tshogs par byas nas/_sgrub pa po bde ba'i stan la 'khod pas nges 'byung dang dad pas rgyud bskul te brgyud pa'i gsol 'debs/_skyabs sems nas brtsams/_bdag mdun dbyer med bzlas bsgom byas la bsnyen bzlas ci nus bya/_bum pa rang byung gi gzhal yas khang du 'phags ma dbyangs can ma rigs bdag dang bcas pa ma 'dres gsal rdzogs su bzhugs pa'i sku las byang sems bdud rtsi'i rgyun bab pas bum pa yongs su gang bar gyur/_zhes gsal la gzungs thag bzung ste/_bzlas pa ci nus byas nas/_mchod bstod yig brgya'i mthar/_oM AHhU~M gis mchod yon phul bas/_bum pa'i lha 'od du zhu nas bum chu ye shes bdud rtsi'i rang bzhin du gyur/_zhes 'od zhu byas la rig pa'i me tog dor/_bskang bshags sngon du 'gro bas tshogs kyi mchod pa bcas byas nas/_khrus bgegs bskrad/_srung 'khor bcas dbang dngos kyi dang po sbyor ba'i chos ni dad brtson ldan pa'i slob ma bos la/_lo rgyus kyi khyad par/_de yang thar pa dang thams cad mkhyen pa'i lam yang dag pa zhig sgrub pa la rno myur zab pa'i shes rab khyad par can sgrub 'os te/_ma hA gu ru'i zhal nas/_tshe dang dbang thang 'byor ldan kyang:_shes rab med na kun gyis brnyas:_de phyir 'di dang phyi ma'i don:_shes rab ldan pas 'phral du 'grub:_ces gsungs pa ltar yon tan thams cad kyi phyi mo shes rab yin cing*/_der ma zad thams cad mkhyen pa'i go 'phang sgrub pa'i lam yang dag pa ma nor ba'i rtsa ba shes rab kho nar bsngags shing shes rab kyi mchog lhag mthong bdag med rtogs pa'i shes rab ni 'phags pa'i sa mngon du ma gyur gyi bar rgyud la bskyed mi nus kyang*/_rgyal ba thabs mkhas la thugs rje che bas rdo rje theg pa gsang sngags kyi bskyed rdzogs rim pa gnyis kyi ting nge 'dzin la brten nas shes rab zab myur dang*/_mi brjed pa'i gzungs kyi sgo dang*/_spobs pa'i gter chen po sgrub pa'i thabs mdo rgyud man ngag gi dgongs pa du ma 'byung ba bzhin bsgrubs na bde blag tu shes rab khyad par can bskyed nus pas/_de'i tshul bka' gter dag snang gi bka' bab mtha' yas pa zhig bzhugs pa'i bye brag snga 'gyur bstan pa'i rgyan gcig 'jigs med phrin las 'od zer gyi thugs sras pad+ma thugs mchog rdo rje'am/_rgyal sras chos kyi go cha zhes pa mkhas shing dngos grub brnyes pa'i skyes bu khyad par can mdo smad byang phyogs reb skong rig pa'i 'byung gnas kyi bstan 'gro'i dpal mgon chen po gang gi dgongs klong ye shes kyi gsang mdzod las byung ba'i shes rab lha mo dbyangs can dmar mo'i gsang sgrub yid bzhin 'phrul mdzod kyi byin rlabs dbang gi cho ga bgyid pa la thog mar maN+Dal phul/_gsol ba gdab pa 'di'i rjes zlos mdzod/_kye ho thugs rje'i sogs/_dbang gi thog mar don dam ye shes kyi mkha' 'gro gdod nas lhan skyes su bzhugs pa mngon du bya ba'i phyir kun rdzob rnam pa rtags kyi mkha' 'gro rgyal kun yum gcig mtsho byung dpal mo skyabs kun 'dus pa'i bdag nyid rdo rje dbyings kyi yum chen la dad pas skyabs su gsol bas bden gnyis 'du 'bral med pa'i de nyid mngon du gyur cig snyam pas 'di'i rjes zlos lan gsum mdzod/_na mo/_gdod nas rnam dag sku gsum mkha' 'gro yi:_ngo mtshar rang byung lhun grub dkyil 'khor la:_shes dang shes bya bdag nyid gcig pa ru:_'du 'bral med pa'i ngang nas skyabs su mchi:_chos nyid bde ba chen po'i thig ler rang gzhan yid can thams cad gzhan du ma g.yos par gnas kyang gnas lugs ji bzhin ma rtogs pa'i 'khrul snang rgyu 'bras la spyod pas med snang srid pa'i sdug bsngal bsal ba'i phyir mchog tu mi 'gyur bde chen ye shes kyi bdag mo bsgrub nas 'pho med bde ba chen po'i go 'phang mngon du bya ba'i bdag gis rgyud smin pa'i lam la 'jug snyam pas sems bskyed pa 'di'i rjes zlos lan gsum mdzod/_hoH_mtha' med 'khor ba'i sems can thams cad kun:_yang dag zhi ba mchog gi sar 'god phyir:_ye shes mkha' 'gro dbyangs can khyod sgrub nas:_'gro rnams bde chen sa la 'god par bgyi:_tshogs kyi zhing de dag gi spyan sngar rgyud rnam par dag cing lam bde blag tu bgrod pa'i phyir bsags sbyang gi snying po yan lag bdun pa'i rjes zlos lan gsum mdzod/_hU~M:_gzhi dbyings klong du sogs/_phyogs dus 'dren pa yongs kyi rnam thar bzhin sdom gsum gnang bkag gi rim pa las ma 'das pa blang zhing bsrung bar bgyi snyam pas rjes zlos/_bde bar gshegs pa khyed ci 'dra/_/de 'dra kho nar bdag gyur cig_/spyod pa rmad byung bsam yas pa/_/'gro la phan phyir bdag gis bskyed/_byang chub sems mchog dam pa dang*/_/sku gsung thugs kyi phyag rgya 'di/_/srog gi phyir yang mi gtang na/_/rdo rje rgyal pos byin brlab mdzod/_/lan gsum/_dbang gi gzhi 'god pa ye shes pa dbab pa'i phyir sgo gsum tha mal du ma song bar dmigs pa 'di ltar mdzod/_oM ma hA shU n+ya ta dz+nyA na sogs/_snod bcud rgyud gsum tha mal 'khrul rtog gi mtshan 'dzin dbyings su dag pa'i bde chen ye shes kyi rang rtsal ye shes rang snang 'og min rdo rje dbyings dang tha mi dad pa'i mkha' spyod sprul pa'i grong khyer chos dbyings d+hU ma thA la'i zhing mchog rnam pa lho phyogs rgya mtsho'i 'gram rig pa 'dzin pa dga' ba'i tshal/_ri bo nags tshal sman ljongs nyams dga' ba/_lha dang drang srong dri za'i tshogs kyis bsnyen pa'i gnas/_'o ma'i rgya mtsho/_me tog gi skyed tshal/_sman shing gi ngad pa ldang ba'i khrod du bya dang ri dwags bung ba rnams bag phebs shing*/_chos kyi don dang ldan pa'i glu snyan rol mo sgrogs pa'i dbus su 'khor 'das kyi snang cha thams cad bde chen 'du 'bral med pa'i thig le gcig tu sdom pa'i dbang gi pho brang bde drod kyi rang 'od 'khrigs pa'i dbus su pad+ma nyi zla'i dkyil 'khor gyi lte bar rang rig hrIHyig dmar po 'od du zhu ba las rgyal kun gsung gi rdo rje rjes chags dpal mo dbyangs can DA ki rgyal mo'i rnam par bzhengs pa/_brgyad zung lang tshos dregs pa'i smin legs kyi mtshan dpe/_mdzes sdug zhal bzang gi tshal du spyan zur mig gi bung ba gnag snum du g.yo ba/_'dzum pa'i zhal dang gtsang ma'i shangs bug la ut+pala'i dri ngad 'thul ba/_tshems phreng mu tig dog pa'i sbubs su 'jam mnyen ljags kyi rtse las rdo rje nA da'i dgyes glu dar dir sgrogs pas g.yo ba'i gar can/_pad+ma'i lcug ma ltar mnyen lcug gi phyag zung nor bu dbang gi gzi 'bar dang dri ma med pa'i me long 'gying zhing sgeg pas 'dzin pa/_mthon mthing ral pa'i nags tshal rin po che sna tshogs pa'i lan tshar can gyi thor tshugs la nyin byed ltar 'bar ba'i nor bus brjid cing*/_lhag ma lcang lo'i tshul du 'phyang ba/_'dod pa'i myos bum mtho zhing sked skabs phra ba/_rgyas pa'i chu skyes mkhregs shing brla yi chu skyes 'jam pa/_ljid kyis spangs ba'i lha rdzas kyi na bzas bklubs shing rin thang bzung mi nus pa'i rgyan chas bye bas spras pa'i zhabs zung mnyam pa'i stabs kyis bzhugs pa'i sku snang stong mkha' khyab mkha' yi rdo rje'i bkod pa blo las 'das pa'i dag pa rab 'byams gdan gsum rdo rje'i grong khyer yongs su rdzogs pa'i rigs kyi bdag po khyab bdag 'jam pa'i rdo rjer gsal ba'i gnas gsum oM AHhU~M dang hrIHyis mtshan pa gsal bas/_bla ma dang lhag pa'i lha tha mi dad par mos gus gdung shugs bskyed de bskul bas sku gsum dag pa rab 'byams kyi zhing nas chos dbyings bde ba chen po'i 'khor lor bzhugs pa'i rtsa gsum rgyal ba'i dkyil 'khor rab 'byams char drag tu bab pa bzhin byon nas sgo gsum la sib sib thim pas gnyis su med par byin gyis brlab par bsam la/_spos rol dbyangs dang bcas te/_e ma hoH_gnas 'og min mkha' spyod g.yu lo bkod:_yul lho phyogs rgya mtsho'i 'gram la sogs:_zhing dag pa rab 'byams gar bzhugs nas:_ma chos sku yum chen kun tu bzang:_dpal longs spyod rdzogs mdzad wa rA hi:_lha 'jam dpal dgyes skyed tshangs sras mo:_yum rje btsun ar+Ya tA re ma:_mgon pad+ma'i lcam gcig mkhar chen bza':_yul nyer bzhi'i dpa' bo DAk+ki'i tshogs:_'dir gdung ba'i dbyangs kyis spyan 'dren na:_dus skad cig nyid la byon nas kyang:_don yum chen dgongs pa mngon gyur mdzod:_slar mi brjed gzungs dang mi 'jigs spobs:_don mi zad blo gros snang ba stsol:_mchog thun mong dngos grub char bzhin phob:_badz+ra DAk+ki ni sa mA ya hrIMHhrIMHdzaHdzaH_tiSh+Tha badz+ras brtan par bya/_gnyis pa dbang dngos la bzhi las/_dang po bum pa'i dbang gi slad du gtso mo'i thugs ka'i 'od kyi dbang lha mkha' khyab tu sad pa dang chabs cig bkra shis pa'i rnam pa du ma dang bcas bum pa'i dbang bskur bar gyur/_hU~MH_rin chen bum pa sogs/_bum pa bzang po las byung ba'i bdud rtsi'i rgyun gyis dbang bskur zhing khrus byas te myangs bas dri ma thams cad sbyangs/_ye shes dang yon tan bsam gyis mi khyab pa skyes/_lus snang stong sgrib bral du gyur pa'i byin rlabs kyi rgyun brtan pa'i phyir/_mdun rten 'phags ma'i sku las rang 'dra ba zhig rgyangs kyis byon nas dpral bar thim pas snang stong sku rdo rje'i lus la rgyas btab par mos shig__hrIH_snang stong gnyis med sogs/_'phags ma'i mgrin pa nas sngags kyi phreng ba bar ma chad du byung mgrin par thim pas grags stong gsung rdo rje'i ngag la rgyas gdab par mos shig_/sngags byang mgrin par bzhag la/_AH_zab cing rgya che sogs/_'phags ma'i thugs ka nas ye shes kyi phyag rgya pi waM chos sgra sgrogs bzhin pa byung ba snying gar thim pas thugs rdo rje'i yid la rgyas gdab par mos shig_/pi waM snying gar bzhag la/_hU~M:_stong nyid chos kyi rdo rje sogs/_'phags ma'i lte ba nas zag med kyi yon tan mtshon pa'i rgyan chas kyi rnam pa spros te mnga' gsol ba'i tshul du phul bas ye shes dang yon tan thams cad yongs su rdzogs par mos shig_/zhi chas gtad la/_hrIH_nang du zag med sogs/_de dag gis phyi mtshan ma'i dkyil 'khor la brten pa'i bum dbang rjes 'brel dang bcas pa thob pas/_sbyang gzhi snang stong sku rdo rje'i dkyil 'khor mngon du byas/_sbyong byed bum pa'i dbang thob pas lam dbyibs kyi rnal 'byor bsgom pa la dbang*/_sbyang bya kun rdzob snod bcud rgyud gsum 'khrul rtog dag_/sbyangs 'bras sprul sku'i go 'phang thob pa'i skal ba can du byas pa yin no/__/gnyis pa gsang ba'i dbang gi slad du mdun gyi 'phags ma rigs bdag 'jam dpal gzhon nu dang mnyam par sbyor ba'i bde chen byang chub sems kyi rgyun sangs rgyas thams cad 'dus pa'i ngo bo lce la byin pas rol par mos shig_/bdud rtsi myang du gzhug la/_hU~M:_dga' ba chen po sogs/_zhes bdud rtsi rol pas dwangs ma lus gnas thams cad la khyab pas bde ba'i ye shes rgyud la skye bar mos shig_/des slob dpon gyi rdo rje phung po'i grong khyer la brten pa'i gsang ba bdud rtsi byang chub sems kyi dbang thob/_sbyang gzhi grags stong gsung rdo rje'i ye shes mngon du byas/_sbyong byed gsang dbang thob pas lam bdag byin rlabs pa'i rnal 'byor bsgom pa la dbang*/_sbyang bya nyi khri chig stong drug brgya'i las rlung rdo rje'i bzlas par dag_/sbyangs 'bras longs sku'i go 'phang thob pa'i skal ba rgyud la bzhag go__/gsum pa shes rab ye shes kyi dbang gi slad du mdun bskyed 'phags ma las rang 'dra gnyis pa spros/_rang 'jam dpal du gsal ba dang gnyis su med par rol pa'i bde ba ster bar mos shig_/rig tsaka gtad la/_AH_stong pa'i dbyings las sogs/_des gsang ba phyag rgya'i pad+mo'i reg pa la bsten pa'i shes rab ye shes kyi dbang thob/_sbyang gzhi bde stong thugs rdo rje'i ye shes mngon du byas/_sbyong byed sher dbang thob pas gzhan lus pho nya'i rnal 'byor bsgom la dbang*/_sbyang bya rang bzhin brgyad cu'i rtog tshogs bde ba chen po dag_/sbyangs 'bras chos sku'i go 'phang thob pa'i skal ba rgyud la bzhag go__/bzhi pa tshig dbang rin po che'i ngo sprad pa la/_gsum pa'i lhan skyes la brten pa'i rjes shes bzhi pa'i dbang don dgongs pas ngo sprad cing brda rdo rje sems dpa'i me long gis mtshon pas rdo rje'i tshig gi ngo sprad par mos shig_/shel rdo bstan la/_hU~M:_ye shes rnam pa sogs/_des de kho na nyid kyi dkyil 'khor la brten pa'i dbang bzhi pa thob/_sbyang gzhi rig stong rjen pa'i ye shes nyams su myong*/_sbyong byed dbang bzhi pa thob pas lam zung 'jug phyag chen bsgom pa la dbang*/_sbyang bya snang gsum 'pho ba'i zhen rtog 'gags/_sbyangs 'bras ngo bo nyid sku mngon du byas pa'o/__/des gsang ba dbyings kyi rgyal mo'i byin rlabs dbang gi rim pa grub pa yin pas 'di nyid lhag pa'i lhar bzung zhing lha sngags kyi rnal 'byor la brtson pa dang*/_chos spyod bcu'i rnam dkar la gcig dril du brtson pa sogs dam tshig khas blang ba 'di'i rjes zlos mdzod/_gtso bo'i ji ltar sogs/_gtang rag gi maN+Dal dang*/_lus 'bul/_dge bsngo smon lam bya zhing slob ma gyes/_slob dpon gyi lhag ma nas bzung cho ga'i rjes rim mthar dbyung bar bya dgos so/__/zhes pa'ang mdo smad byang phyogs kyi grub dbang nam mkha'i dgongs gter dbyangs can dmar mo'i dbang lung gi rgyun rje de nyid kyi mdun nas mkhas grub chen po chos dbyings stobs ldan rdo rje'i sku gsung thugs kyi sras mkhan chen zhi 'tsho'i mchog sprul sku phreng gnyis pa'i spyan snga nas dgyes bzhin nod pa'i dgos pa bzhin dad mkhyen yangs pa sngags btsun rdo rje 'chi med rnam rgyal nas ched du bskul ba bzhin na tshod smin pa'i sngags rgan lho phyogs ma la ya tsan+dan 'khrigs pa'i sman ljongs su kun tu rgyu ba'i skabs bris pa 'dis kyang gsang sngags snying po'i bstan pa'i lho rlung gi reg byas rmongs pa'i tsha gdung sel nas/_'chad rtsod rtsom pa'i dga' ston gyi dpal la rol pa'i bstan 'dzin gyi 'dus pas yangs pa'i dbyig 'dzin mdzes byed du gyur cig__/mang+ga laM/_dge'o//__//