DKR-KABUM-07-JA-015-wylie

From Khyentse Lineage - A Tsadra Foundation Project

Template:WyliePageHeader

<div class="wylie-content"


@#/__/grub thob chen po'i thug tig las/_sgrub thabs snying po skor lnga'i bla ma drag po'i phrin las dbang drag rdo rje'i me char zhes bya ba bzhugs// dpal pad+ma he ru ka la phyag 'tshal lo/_/bde stong ye shes snying rje'i dus rlung gis/_/bskul bas gdug can mthar byed rtse brgya'i mtshon/_/mi srun nag phyogs sbyin skyes pham mdzad pa'i/_/srid zhi'i spyi dpal mchog der gus btud nas/_/rtsod ldan bar chad g.yul las skyob pa'i rdzong*/_/grub gnyis 'dod pa 'jo ba'i thabs kyi mchog_/bka' gter bdud rtsi'i nying khu rmad byung zhig_/blo ldan kun dga'i skyes su 'bar bas bkram/_/'dir dbang thob cing dam tshig dang ldan pa'i sngags pas bla ma drag po'i rnal 'byor zab 'dril can nyams su len par 'dod pas rung ba'i gnas khang phyag dar byi dor byas pa'i gzhung mthun rten gyi drung du sman raka gtor ma zhi drag gi mchod pa 'du byas nas bde ba'i stan la 'khod pas/_sbyor dngos rjes gsum las/_dang po brgyud 'debs ni/_mkha' khyab gsung gi rdo rje snang mtha' yas/_/sku dang zhing gi khyab bdag spyan ras gzigs/_/rta mchog rol pa log 'dren 'dul ba'i gshed/_/gsol ba 'debs so smin grol dngos grub stsol/_/gangs can skyob pa'i mgon po pad+ma 'byung*/_/rje 'bangs grogs gsum grub chen lcags zam pa'i/_/gsang gsum byin rlabs sprul pa'i rdo rje la/_/gsol ba 'debs so smin grol dngos grub stsol/_/thub bstan shing rta gu Na sa mu dra/_/chos kyi rgya mtsho smin grol gdams pa'i bcud/_/rtsol mdzad 'jam mgon chos kyi blo gros la/_/gsol ba 'debs so smin grol dngos grub stsol/_/sku lnga lhun grub o rgyan rdo rje 'chang*/_/gdul dka'i gshed du pad+ma khrag 'thung gi_/ye shes rol pa rigs lnga'i dkyil 'khor lhar/_/gsol ba 'debs so smin grol dngos grub stsol/_/rgyud dag nus pa thob pa dbang gis smin/_/bskyed rdzogs lam gyi bar chad g.yul las rgyal/_/srid zhi'i spyi dpal gsum gyi gsang ba dang*/_/dbyer med mchog gi sa la lhun grub shog__/gnyis pa skyabs 'gro ni/_mdun gyi nam mkhar bla ma dpal chen he ru ka phyogs dus skyabs yul rgya mtshos bskor ba mngon sum bzhin du bzhugs par gyur/_na mo/_mkha' mnyam 'gro rnams bsgral ba'i phyir:_bla ma dkon mchog rtsa gsum la:_byang chub snying por mchis kyi bar:_rtse gcig gus pas skyabs su mchi:_lan gsum/_gsum pa sems bskyed ni/_ma gyur rigs drug sems can la:_byams dang snying rje chen po'i blos:_byang chub mchog la 'god pa'i slad:_zab mo'i lam la 'jug bar bgyi:_lan gsum/_bzhi pa bsags sbyangs ni/_hoH_bla ma yi dam mkha' 'gro gshegs:_nyi zla pad+ma'i gdan la bzhugs:_lus ngag yid gsum gus phyag 'tshal:_phyi nang gsang ba'i mchod pa 'bul:_nyams chags sdig sgrib mthol zhing bshags:_gsang sngags bsgrubs la rjes yi rang:_smin grol gsang sngags chos 'khor bskor:_mya ngan mi 'dar bzhugs gsol 'debs:_snying po sems can don du bsngo:_yang dag rdo rje'i don rtogs shog:_lan gsum/_lnga pa bgegs bskrad ni/_ra~M ya~M kha~M:_oM AHhU~M gis gtor ma byin gyis brlabs/_sarba b+hU ta A kar+Sha ya dzaHsa mgron bkug_/sarba big+h+nAn ba ling ta khA hi/_lan gsum gyis gtor ma bsngos la/_hU~M/_gsang sngags sgrub la bar gcod pa'i:_bgegs dang log 'dren 'byung po'i tshogs:_gnas 'dir ma 'dug gzhan du dengs:_'das na brlag par gdon mi za:_hU~M bzhi'i sngags dang thun gyis gzir gu gul bdug_/drug pa srung 'khor ni/_hU~M/_sems nyid stong chen gdod ma'i mkhar:_sems byung rdo rje srung ba'i gur:_ye shes me 'od rab 'bar bas:_gnyis snang bgegs tshogs mtshams bcad do:_oM badz+ra dz+nyA na dz+wa la b+h+rU~M:__bdun pa sgo dbye phyag bshags ni/_hoH_rig rtsal rol pa'i sgo dbye zhing:_gnyis med yid kyis mjal phyag 'tshal:_glo bur gzung 'dzin 'khrul pa'i sgrib:_mnyam nyid chos sku'i klong du bshags:_sa ma ya pra be sha ya phaTa?:_a la la hoH_a ti pU hoH_pra tIts+tsha hoH_yi ge brgya pa brjod/_brgyad pa sdom bzung ni/_hoH_bla ma mchog dang dkyil 'khor lha:_kun nas bdag la dgongs su gsol:_bdag gis dus 'di nas bzung ste:_byang chub snying por mchis kyi bar:_mtha' yas 'gro ba'i don gyi phyir:_so sor thar pa'i sdom pa dang:_byang sems bslab pas rgyud sbyangs nas:_khyad par gsang ba sngags kyi srog:_rtsa ba yan lag dam tshig kun:_srog gi phyir yang mi gtong gzung:_bla ma yi dam dbyer med pa:_rtse gcig bsgrub par dam bca' na:_ye shes chen pos byin brlab gsol:__dgu pa byin dbab pa ni/_spos dang rol mo bcas gdung shugs bskyed la/_hU~M:_ngo bo chos sku'i pho brang nas:_rtsa brgyud bla ma gshegs su gsol:_gnas 'dir dbang bskur byin phob la:_mchog dang thun mong dngos grub stsol:_rang bzhin longs sku'i pho brang nas:_yi dam lha tshogs gshegs su gsol:_gnas 'dir dbang bskur byin phob la:_mchog dang thun mong dngos grub stsol:_thugs rje sprul sku'i zhing khams nas:_gnas gsum dpa' bo rnal 'byor mas:_gnas 'dir dbang bskur byin phob la:_mchog dang thun mong dngos grub stsol:_legs nyes stangs 'dzin pho brang nas:_chos srung dam can rgya mtsho yis:_gnas 'dir dbang bskur byin phob la:_mchog dang thun mong dngos grub stsol:_sgrub mchog rgyud la bde chen sbor:_sgrub gnas rdo rje'i zhing du sgyur:_sgrub rdzas ye shes rol pa'i rgyan:_'dod yon rgya mtshor byin gyis rlobs:_oM AHhU~M gu ru de ba DA ki nI sarba sa ma ya badz+ra dz+nyA na a be ya ya a aH_hrIM hrIM phaiM phaiM:_hU~M hU~M hU~M:__bcu pa gnas dang yo byad byin gyis brlab pa ni/_raM yaM khaM/_gzung 'dzin chos kun rnam dag dbyings:_ye shes rol pa'i zhing khams cher:_phyi nang gsang ba rmad byung ba'i:_mchod pa'i sprin phung mkha' khyab gyur:_badz+ra s+pha ra Na khaM:_oM badz+ra ar+g+haM pad+yaM puSh+pe d+hU pe A lo ke gan+d+he nai wi d+ya shab+da AHhU~M:_ma hA pany+tsa rak+ta ba liM ta oM AHhU~M hrIHThAH_lan gsum brjod/_gnyis pa dngos gzhi la gnyis las/_dang po sku bskyed pa phyag rgya'i rnal 'byor la dngos dang*/_yan lag gnyis las/_dang po ni/_aH_dbyings nyid gdod nas stong pa che:_rig gdangs mtshan med snying rjer shar:_zung 'jug smon pa med pa'i rtsal:_rgyu yi ting 'dzin hU~M dmar po'i:_'od kyis gzung 'dzin stong par sbyangs:_stong pa'i ngang las skad cig gis:_snod bcud dag pa yum lnga'i mkha':_'byung ba rim brtsegs ri rab steng:_phung po dag pa gzhal med khang:_gru bzhi sgo bzhi mtshan nyid rdzogs:_dur khrod 'jigs pa'i chas kyis brjid:_rdo rje srung ba'i 'khor los bskor:_ye shes zang thal chen po'i dbus:_pad nyi rgyal bsen bsnol ba'i steng:_sems nyid dag pa rgyu yi hU~M:_yongs gyur gnyug ma rang bzhin lha:_zhal phyag skur bzhengs drag po rtsal:_dmar nag zhal gcig phyag gnyis pa:_phyag g.yas gnam lcags rdo rje gsor:_g.yon pas lcags sdig snying nas gzir:_dur khrod rol pa'i chas kyis brjid:_khro gtum gar dgu'i gzi byin 'bar:_spyan gsum zhal bgrad mche ba gtsigs:_smar smin dbu skra me ltar g.yo:_zhabs gnyis gyad kyi dor thabs kyis:_drag me 'khrugs pa'i klong na rol:_sbyor yum rdo rje phag mo mthing:_gri thod phyag rgya 'dzin pas 'khyud:_spyi gtsug khyung chen rigs lnga 'phro:_gnas lngar gshin rje rta mchog dpal:_gsang bdag mkha' 'gro sde lnga dang:_yak+sha me dpal go chas gtams:_phyi rol 'khor lo rtsibs bzhi pa'i:_mdun dang phyogs bzhir pad nyi'i steng:_bud+d+ha badz+ra rat+na dang:_pad+ma karma drag po rtsal:_dkar mthing ser dmar ljang gu'i mdog:_rgyan dang cha lugs gtso bo'i tshul:_rang 'od yum 'khyud bde stong sbyor:_de phyir gser dang khrag khyams la:_gnas yul ma mo phra men dang:_sgo bzhir sgo ma gdong can bzhi:_phyi 'khor dbang phyug nyer brgyad sogs:_pho nya dam can sprin ltar gtibs:_gzhan yang steng 'og phyogs mtshams su:_rtsa gsum rgyal ba rab 'byams tshogs:_til gyi gong bu kha phye ltar:_snang stong zung 'jug chen por gsal:_zhes gsal zhing*/_gnas gsum rdo rje gsum gyi dngos:_yi ge gsum gyi phyag rgyas gdab:_nam mkha' gang ba'i dbang gi lhas:_bde chen bdud rtsi'i char 'bebs pas:_phung po gnas gyur nyon mongs dag:_ye shes dbang bskur rigs kyi bdag:_thod phreng rigs lnga'i cod pan rdzogs:_oM AHhU~M badz+ra kA ya wAka tsit+ta sa ma ya ho:_sa ma ya s+t+wa~M:_oM hU~M trA~M hrIHAH_a b+hi Shiny+tsa mi su ra ta s+t+wa~M a ha~M:_dbang bskur rgyas gdab bcas byas la/_gnyis pa phrin las kyi yan lag_/dang po ye shes pa spyan drangs pa ni/_hU~M/_pad+ma gsang chen mchog gi zhing:_dur khrod rol pa'i pho brang nas:_che mchog drag po thod phreng rtsal:_sgyu 'phrul drwa ba'i phyag rgyar bzhengs:_rgyal bsen dam sri tshar gcod cing:_gzung 'dzin dgra bgegs 'dul ba dang:_tha mal snang zhen sbyang ba'i phyir:_drag shul stobs kyis gnas 'dir gshegs:_oM shrI he ru ka pad+ma kro d+ha sa pa ri wA ra e h+ye hi:_badz+ra sa ma ya dza dzaH__gnyis pa dam ye dbyer med du bzhugs su gsol ba ni/_hU~M:_rang byung sprul pa'i dkyil 'khor 'dir:_dbyings nas spyan drangs ye shes pa:_dam tshig 'khor lor dbyer med bzhugs:_mchog thun dngos grub char ltar phob:_sarba sa ma ya maN+Dal dz+nyA na badz+ra dzaHhU~M ba~M hoH_tiSh+Tha sa ma ya s+t+wa~M:__gsum pa phyag 'tshal ba ni/_na moH_skye med chos sku'i ngang nyid las:_bde chen longs spyod rdzogs skur bzhengs:_gang 'dul sprul pa'i sprin phung 'phro:_dkyil 'khor lha la phyag 'tshal lo:_a ti pU hoH_pra tIts+tsha hoH__bzhi pa mchod pa'i dang po kun bzang mchod sprin ni/_oM:_kun tu bzang po'i smon lam las:_ye shes rnam pa thams cad pa:_mchod pa'i sprin chen cir yang shar:_rdo rje'i longs spyod mchog tu rol:_oM na mas+sarba ta thA ga ta b+h+yo bi shwa mu khe b+h+yaHsarba thA khaM utag te s+pha ra Na i maM ga ga na kha~M swA hAH__gnyis pa phyag zhabs bsil ba ni/_oM:_dri med yid du 'ong ba yi:_byang chub dam pa'i bdud rtsi'i chus:_phyag dang zhabs ni bsil nas kyang:_rdo rje'i gdan la dgyes par bzhugs:_na mas+sa man+ta bud+d+hA nAM ga ga na khaM sa ma ye swA hAH__gsum pa phyag rgya gar mchod ni/_oM hU~M/_phyag rgya chen po'i dkyil 'khor bar:_dam tshig phyag rgya'i brdas mtshon te:_chos dang las kyi phyag rgya yis:_dgyes pa'i byin bskyed thugs dam bskul:_sa ma ya hoH_sa ma ya s+t+wa~M:_sarba mu dra dz+nyA na gIrti pU dza hoH__bzhi pa thun mong nyer spyod ni/_oM/_spos kyi sprin lding me tog char chen 'bebs:_snang gsal gzi 'bar dri chab 'thor yab sbreng:_bza' bca' btung ba'i zhal zas tshogs rnams dang:_snyan 'gyur rol mo'i sgra yis kun tu mchod:_oM shrI badz+ra rA ga d+hU pe hU~M:_puSh+pe trA~M:_A lo ke hrIH_gan+d+he gan:_nai wi d+ya AH_shab+da sarba pU dza ho:__lnga pa sman gtor rak+ta ni/_oM:_don gyi bdud rtsi rtags su rigs lngar snang:_sha lnga bdud rtsi rtsa ba yan lag rdzas:_chos kyi bdud rtsi sgrub pa'i byin rlabs bcud:_gti mug rdo rje'i dam tshig mchog tu rol:_ma hA pany+tsa a mr-i ta kha ra~M khA hi:_sman gyi brgyud mchod ni/_chos sku snang mtha' longs sku spyan ras gzigs/_/dbang chen rta mchog o rgyan rdo rje 'chang*/_/rje 'bang grogs gsum grub chen thang stong zhabs/_/sman mchod 'bul lo mthu dbang dngos grub stsol/_/ma hA pany+tsa a mr-i ta khA hi/_kun gzigs 'od gsal sprul pa'i rdo rje dang*/_/'jam mgon bla ma rtsa brgyud rig 'dzin tshogs/_/yi dam DA ki dam can gter srung la/_/sman mchod 'bul lo mthu dbang dngos grub stsol/_/ma hA pany+tsa a mr-i ta khA hi/_kA ya wAka? tsit+ta a la la hoH_AH_snang ba snod kyi 'jig rten gtor gzhong du:_srid pa bcud kyi sems can gtor mar bshams:_ro bcud nus pa phun tshogs 'dod yon gter:_zhe sdang rdo rje'i dam tshig mchog tu rol:_ma hA ba liM ta kha raM khA hiH_hU~MH_khams gsum bsgral ba'i rak+ta'i rgya mtshor bskyil:_gI ti'i dbyings las drangs pa'i khrag gi rgyun:_'khor 'das dbyer med chen por mnyam sbyar ba:_'dod chags rdo rje'i dam tshig mchog tu rol:_ma hA rak+ta kha raM khA hiH__drug pa gsang ba sbyor sgrol gyi mchod pa ni/_hoH_bde chen phyag rgya'i ye shes la sbyar bas:_gzung 'dzin rtog tshogs 'od gsal dbyings su bsgral:_zung 'jug dbyings rig dbyer med rdzogs pa che:_chos nyid don gyi mchod pa chen por bzhes:_ta na ga Na ma hA su kha d+harma d+hA tu pU dza hoH__bdun pa bstod cing dngos grub gsol ba ni/_hU~M:_gtum chen dus mtha'i me ltar 'bar:_'jigs pa'i gad mos sa gsum g.yo:_bde stong ye shes dbyings su rol:_he ru ka la phyag 'tshal bstod:_yon tan phrin las bsam mi khyab:_sprul pa'i sgyu 'phrul cir yang spro:_pad+ma drag po'i dkyil 'khor lhar:_gus pas bstod do dngos grub stsol:_skabs 'dir spro na gter gzhung las/_lhar gsal tha mal snang ba dang:_sems 'dzin zhen pa kun sbyangs te:_nga rgyal brtan cing dag pa dran:_bskyed rim gyad du gyur pa bslab:_ces gsungs pa ltar bya/_gnyis pa gsung bzlas pa la/_bsnyen sgrub las gsum las/_dang po ni/_snying dbus phyag rdor thugs ka ru:_tsit+ta rin chen zur brgyad pa'i:_lte ba rdo rje rtse dgu'i sbubs:_nyi ma'i gdan la hU~M yig mthar:_sngags phreng rang sgra sgrogs bzhin 'khod:_'bar ba chen po'i 'od zer gyis:_bdag nyid byin rlabs nus bskyed bsam:_oM shrI he ru ka pad+ma kro d+ha ru lu ru lu hU~M b+h+yo hU~M phaTa?:__gnyis pa sgrub pa'i dmigs bzlas ni/_slar yang thugs srog sngags phreng gi:_'od kyis rtsa gsum rgyal ba mchod:_byin rlabs dngos grub rang la thim:_'gro kun sgrib sbyangs snod dang bcud:_pad+ma khrag 'thung phyag rgyar sad:_zhi rgyas dbang drag mchog thun gyi:_dngos grub kun la dbang 'byor bsam:_oM AHhU~M artsika ni rtsika na mo b+ha ga wa te ru lu ru lu hU~M b+h+yo hU~M phaTa?:_a hU~M hU~M phaTa?:_bsnyen sgrub thun mong gi las sbyor chig dril 'bum phrag bzhi gsungs/_gsum pa khyad par drag po'i las sbyor ni/_gsang gnas yak+sha me dpal las:_rang 'dra'i sprul pa grangs med 'phros:_snod bcud thams cad khyab par bdal:_sde brgyad dregs pa las la bkol:_rgyal bsen dam sri tshar thag bcad:_dgra bgegs 'byung po rdul du brlag:_mngon spyod phrin las mthar phyin bsam:_sgrub sngags kyi sham bur/_badz+ra hU~M:_yak+sha b+h+rU~M:_rak+sha hU~M:_aHyaHmaHduHruHtsaHshaHnaHsa ma ya sarba duSh+TAn mA ra ya hU~M hU~M phaTa? phaTa?:_khri phrag gcig tu gsungs/_dgos pa dang 'brel na drag sngags ar gtang kyi spu gri gdags par gsungs bas/_oM badz+ra tsakra/_e snying kha rag duSheta rbad:_phung byed srog la rbad:_'gong po'i dbugs la rngub:_bdud mo'i sha la chems:_phung byed 'gong po'i sha rus khrag la nur nur:_ma tsa du a ya sha ga la haM shaM:_badz+ra tri hrig:_baM ma ra ya rbad:_badz+ra gI maM d+har rak+Sha:_badz+ra a ri a ri ni:_nA ga tsa trig rbad tri:_ha ri ha ri:_tri ma tri ma phung byed 'gong po'i srog rtsa la gtubs gtubs:_spyir lta dgongs kyi gdeng dang ldan pa'i/_gong bsnyen mang du ma song na shin tu gnyan par gsungs pas rang nyams dang sbyar ba gal che la/_bsnyen sgrub las sbyor gyi rtags tshad kyang gzhung las/_drag por gdug pa thul ba dang:_go gyon mtshon thog g.yul las rgyal:_ri brag bshig dang rgya mtsho 'thung:_lha khang 'bag seng gog po bcom:_lus las me 'bar chu 'brub sogs:_ngo mtshar cho 'phrul cir yang 'byung:_gang yang rlom dang zhum pa spangs:_re dogs med par lta gding bskyed:_mnyam par bzhag la lam du bslang:_zhes gsungs so/__/tshe sgrub sbyar bar spro na/_spyi bo'i bud+d+ha thod phreng gi:_spyi gtsug pad sdong nyi zla'i steng:_bla ma mgon po tshe dpag med:_dmar gsal mnyam bzhag tshe bum 'dzin:_longs sku'i rgyan rdzogs yum dang sbyor:_rdo rje'i skyil krung 'od phung 'bar:_thugs kar zla steng hrIHyig mthar:_rdo rje tshe yi rig pas bskor:_bzlas pas thugs dam rgyud bskul mthus:_'od kyis 'khor 'das kun tu khyab:_rang gi bla tshe yar nyams dang:_'khor 'das brtan g.yo'i dwangs ma'i bcud:_dbang med bsdus te bum nang zhugs:_zhu zhing khol ba'i bdud rtsi'i rgyun:_bdag gi tshangs pa'i sgo nas zhugs:_lus gang nad gdon sdig sgrib sbyangs:_tshe yi bar chad thams cad bsal:_nyams pa gsos shing gnas pa spel:_dwangs bcud snying ga'i sa bon la:_thim pas rdo rje'i srog 'grub bsam:_oM a mA ra Ni dzI ban+ti ye swA hA:_grangs bsnyen byed na 'bum phrag gsum gsungs/_tshe 'gugs ni/_hrIH_bcom ldan mgon po ye shes tshe dpag med:_rtsa brgyud bla ma yi dam zhi khro'i lha:_mkha' 'gro chos skyong pho nya mgyogs ma'i tshogs:_thugs dam bskul lo thugs rje'i mthu rtsal phyungs:_rnal 'byor bdag cag 'khor dang bcas pa yi:_bla tshe chad nyams yar ba rang sor tshud:_sa chu me rlung 'byung ba'i dwangs ma sdus:_'jig rten bsod nams can gyi tshe dpal stobs:_rtsa gsum bde gshegs rab 'byams mkhyen brtse'i tshe:_ye shes bdud rtsis rnam par spyan drangs nas:_bdag dang sgrub pa'i rdzas la dbyer med stims:_rnal 'byor sgo gsum rdo rje'i srog tu sgrubs:_mi 'gyur mi shigs rtag pa dam pa yi:_tshe dang ye shes mchog thun dngos grub stsol:_badz+ra A yur+dz+nyA na sa ma ya dza dzaH_dzaHhU~M ba~M hoH_zhes bkug bstim zhing rgyas gdab bya:_aH_'khor 'das tshe bcud rdo rje'i srog tu 'dus:_de nyid gnyug ma mi shigs dbyings su thim:_lus la rdo rje'i go chas rgyas btab pas:_rang byung ye shes chen po'i srog 'grub shog:_dz+nyA na A yu She badz+ra rak+Sha b+h+rU~M a aH_khyad par mchog gi byin rlabs thun mong ma yin pa ni/__dpal ldan rtsa ba'i bla ma yi:_ye shes lnga yi ngo bo nyid:_spyi bo'i thod phreng rigs lnga la:_bzod med mos gus gdung shugs bskyed:_rdo rje'i tshig bdun gsol 'debs dang:_thod phreng rtsal gyi dzapa? bzlas nas:_spyi gtsug rigs bdag thod phreng lnga'i:_thugs rgyud bskul zhing gsol btab pas:_snyoms zhugs bde stong rol pa yi:_'od zer dpag yas mkha' khyab 'phros:_rtsa gsum rab 'byams thugs dam bskul:_de rnams kun gyi byin rlabs dang:_dbang dang dngos grub ye shes dbyig:_bdud rtsi'i rnam par spyan drangs nas:_zhal zhugs sku yi cha kun gang:_gzhir gnas byang chub sems rgyun dang:_dbyer med ro gcig nyid gyur pa:_sbyor mtshams nas byung rang nyid kyi:_spyi bo'i tshangs pa'i sgo nas zhugs:_'khor lo'i gnas bzhi mer gyis khengs:_rtsa rlung thig le'i gegs dang ni:_phyi nang gsang ba'i bar chad bsal:_dbang bzhi thob cing sgrib bzhi dag:_gsang gsum ye shes byin nus thob:_'bras bu sku bzhi 'grub pa yi:_skal pa rgyud la bzhag par bsam:_thugs yid bsres te mnyam par bzhag:_'di ni drag sgrub thams cad kyi:_gegs sel bogs 'don rgyal po ste:_'di med nus mthu tsam gyi ched:_bla ma drag po sgrub byed na:_phal cher bar chad dbang du 'gro:_go med g.yul ngor zhugs pa 'dra:_de bas shin tu gces par zung:_zab mo'i rnal 'byor gzhan la yang:_'di nyid sbyor na mchog tu 'gyur:_zhes gsungs pa drag sgrub mkhan po spyi la med du mi rung ba'i gdams pa nyams su len pa gal che'o/__/thun mthar dbyangs gsal rten snying mchod bstod yig brgya bya'o/__/gsum pa rjes kyi las rim la/_dang po tshogs kyi mchod pa la/_thog mar byin gyis brlab pa/_dam rdzas su 'os pa'i yo byad rnams bdud rtsi'i bsang gtor byas la/_spros pa rgyas na bskang bshags kyang sbyar/_ra~M ya~M kha~M:_stong pa'i ngang las dbyings kyi b+han+d+ha ru:_rig pa ye shes bdud rtsi'i rgya mtshor 'khyil:_'dod pa'i yon tan rnam pa thams cad pa'i:_tshogs kyi longs spyod mkha' khyab rgyan du gyur:_oM AHhU~M ha hoHhrIH__gnyis pa tshogs zhing spyan 'dren pa ni/_hU~M:_sku gsum dag pa'i zhing khams rab 'byams nas:_bla ma bde gshegs yi dam mkha' 'gro'i tshogs:_rdo rje'i dam tshig mchog la 'dir gshegs shig:_mi 'gyur bde chen ye shes byin chen phob:_badz+ra sa ma ya dzaH__gsum pa tshogs phud phul pa ni/_hU~M:_bla med mchog gi tshogs kyi mchod pa ni:_ye shes lnga ldan bdud rtsi'i sprin chen po:_gzugs sgra dri ro reg bya'i char 'bebs pa:_dgyes par bzhes la mchog thun dngos grub stsol:_ma hA ga Na tsakra pany+tsa kA ma gu Na pU dza hoH__bzhi pa bshags pa ni/_hoH_bdag cag thog med dus nas da lta'i bar:_ma rig las nyon 'khrul pa'i gzhan dbang gis:_bsags pa'i sdig ltung nyams chag ci mchis pa:_zhal zas tshogs kyi mchod pas bskang zhing bshags:_yi ge brgya pa brjod/_lnga pa bsgral bstab ni/_na moH_rig 'dzin rtsa brgyud kyi dpal ldan bla ma dam pa rnams kyi bka' bden pa dang*/_sangs rgyas kyi bka' bden pa dang*/_chos kyi bka' bden pa dang*/_dge 'dun gyi bka' bden pa dang*/_gangs sngags dang rigs sngags dang*/_gzungs sngags dang*/_snying po dang*/_phyag rgya dang*/_ting nge 'dzin gyi bden pa dang*/_chos nyid gdod nas dag cing chos can rgyu 'bras bslu ba med pa'i bden pa dang*/_khyad par che mchog pad+ma drag po'i dkyil 'khor gyi lha tshogs bka' sdod dam can rgya mtsho'i tshogs dang bcas pa rnams kyi bden pa dang*/_bden pa chen po'i byin rlabs kyis ma rungs pa'i sems can bsgral ba'i zhing du gyur pa thams cad mtshan ma rdzas kyi rten 'di la mchis par gyur cig_/oM AHhU~M artsika nirtsika na mo b+ha ga wa te ru lu ru lu hU~M b+h+yo hU~M phaTa?:_dgra bgegs A kar+Sha ya dzaH_dzaHhU~M ba~M hoH_hU~M:_gzung 'dzin 'khrul ba'i dgra bgegs 'byung po'i tshogs:_dam tshig rdzas la dgug bsgral zhal du bstab:_kha sbyor bde chen rol pa'i gzi byin bskyed:_bla med mchog gi phrin las yongs rdzogs mdzod:_sarba nr-i tri sha trUn big+h+nAn dzaHhU~M ba~M hoH_mA ra ya phaTa?:_ma hA mA~M sa rak+ta kiM ni ri ti ga Na tsakra pU dza khA hi:__drug pa bskang bshags ni/_bskang rdzas nam mkha' mdzod kyi sngags rgyas brlab cing*/_s+pha ra Na phaTa? kyis spel la/_hU~M hrIH_snang srid gdod nas dag pa chos kyi dbyings/_cir snang bde ba chen po'i longs spyod sprin/_/'dod yon mi zad sgyu 'phrul drwa ba'i gter/_/rdo rje'i longs spyod rnam pa thams cad pas/_/dgongs brda snyan nas brgyud pa'i rig 'dzin tshogs/_/rgyal ba'i gdung 'dzin yongs kyi thugs dam bskang*/_/rgyud sde drug gi dkyil 'khor rnam rol can/_/yi dam lha tshogs rab 'byams thugs dam bskang*/_/rdo rje nang gi sa lam mthar phyin pa'i/_/gnas yul dpa' bo DA ki'i thugs dam bskang*/_/rgyal kun phrin las bstan srung nag mo'i tshul/_/rgyud gsum chos srung yongs kyi thugs dam bskang*/_/tshogs gnyis rin chen gter la dbang 'byor ba'i/_/gnod sbyin nor lha gter bdag thugs dam bskang*/_/dag pa rab 'byams lhun rdzogs stug po bkod/_/rgyal ba'i dkyil 'khor shar bas thugs dam bskang*/_/hU~M hrIH_bde chen 'bar ba dbang gi dkyil 'khor nas/_/che mchog pad+ma drag po'i thugs dam bskang*/_/dbyings yum shes rab bdag nyid mkha' 'gro'i rgyal/_/ma gcig khros ma nag po'i thugs dam bskang*/_/rigs lnga'i khro rgyal rnams kyi 'khor lo'i bsgyur/_/gtum po sde lnga yab yum thugs dam bskang*/_/tshad med rnam bzhis 'gro kun sgrol mdzad pa'i/_/sgo srung gdong mo rnam bzhi'i thugs dam bskang*/_/dpal gyi bka' sdod legs nyes stangs 'dzin pa/_/gnas yul phra men pho nya'i thugs dam bskang*/_/gsang ba mi zad rgyan gyi 'khor lo'i lha/_/rigs gsum khro rgyal mkha' 'gro me dbal dang*/_/khyung chen rigs lnga bcas pa'i thugs dam bskang*/_/hU~M hrIH_dgyes pa skyed pa'i lha rdzas nyer spyod bdun/_/rdo rje'i 'dod yon longs spyod rnam pa lnga/_/shis pa'i rtags rdzas gling bzhi ri rab bcas/_/bcu drug rig mas bde chen dpal spel zhing*/_/sman gtor rak+ta'i longs spyod bsam mi khyab/_/thabs shes sbyor sgrol mchod dang mchod yul kun/_/ye shes sgyu mar rol bas thugs dam bskang*/_/srung bzlog bsad pa'i phrin las rmad byung bas/_/nyams chags kun zhi ye shes snang ba rgyas/_/rlung sems dbang 'dus nyams pa tshar bcad nas/_/rtog 'khrul nyes ltung mun pa kun sangs te/_/ye shes snang ba rgyas pa'i dngos grub stsol/_/yig brgya brjod/_bdun pa tshogs la rol pa ni/_hoH_lhun grub rdo rje phung po'i grong:_rtsa rlung thig le'i gzi 'od 'bar:_ye shes chen po'i lha tshogs rnams:_kha sbyor bde ba'i rol pa che:_rdo rje'i dam tshig bla med pa:_tshogs kyi mchod pa dgyes par bzhes:_rmad byung bsod nams tshogs rdzogs shing:_bde chen ye shes rgyas gyur cig:_a ho ma hA su kha ga Na tsakra a la la hoH_gsang ba dngos sam ye shes kyi:_phyag rgyar snyoms zhugs tshogs spyod bya:_hoH_e yi cha byad bzang po yi:_dbus su waM gyi rnam par brgyan:_sangs rgyas rin chen za ma tog:_'du shes gsum gyis mnyam sbyar bas:_dga' ba bzhi yi ye shes bskyed:_stong pa bzhi yi nyams myong drangs:_bde stong dbyer med lhan cig skyes:_mchog tu mi 'gyur 'od gsal ba:_a a a:_zhes phyi nang gsang ba'i tshogs la tshims pa drug gi rol zhing*/_brgyad pa lhag ma bsdus la/_pany+tsa a mr-i ta ga Na pU dza hU~M ha ho hrIH_slob dpon gyis dam tshig gi kha phru btab la/_e A ral+li hrIM hrIM phaiM phaiM:_hU~M:_ye shes rol pa dpal gyi lhag sdud dang:_las las grub pa'i mkha' 'gro dbang phyug ging:_'dir gshegs dam tshig lhag ma'i tshogs la rol:_'khor srungs rkyen zlog rnam bzhi'i phrin las mdzod:_oM uts+tshiSh+Ta ba liM ta khA hi:_rjes 'brel rdo rje'i glu gar bya ba ni/_oM AHhU~M hoHa ho ma hA su kha a la la hoH_gsang ba mchog gi dgyes pa'i grong na gsang chen rol pa'i rnal 'byor pa:_lhan cig skyes dga'i bde ba'i thabs kyis stong pa'i 'od gsal mngon du gyur:_zung 'jug ye shes skye 'gags gnas bral rdo rje nam mkha'i dkyil lta bu:_'khor 'das dbyer med srid zhi kun khyab thig le gcig tu lhun gyis grub:_ma hA su kha dz+nyA na gI ti a la la hoH_DA dril rol mo bcas bya/_oM:_bkra shis gang zhig tshogs kyi spyod pa la brten nas:_gnas skabs gegs zhi bsod nams ye shes phrin las 'phel:_mthar thug sa bcu lam lnga'i go 'phang myur du 'grub:_rtag tu dpal gnas dge legs snang bas khyab gyur cig:_ces shis brjod bya/__dgu pa thugs dam bskul ba ni/_hU~M:_nam mkha'i mtha' dang mnyam pa'i dkyil 'khor nas:_srid zhir mi gnas ye shes sku brnyes pa'i:_longs spyod rdzogs dang sprul pa'i lha tshogs rnams:_thugs dam bskul lo thugs rje'i rtsal shugs phyung:_las nyon sdig sgrib 'gal rkyen mi mthun tshogs:_mthu rtsal me yis bsreg cing sbyang du gsol:_phrin las bzhi dang grub pa chen po'i phul:_ye shes chu yis bskyed cing 'phel bar mdzod:_gsang ba'i dgra sod 'jigs pa'i bdud bzhi thul:_bar chad 'phrang gsum dbyings kyi thig ler stims:_bden gnyis dbyer med lhag pa'i chos sku che:_rang byung 'od gsal rtogs pa'i phrin las mdzod:__bcu pa chad tho'i gtor skyong ni/_bka' gter srung ma'i gtor ma spyi ltar 'bul rjes/_hU~M:_sngon tshe 'og min chos dbyings pho brang du:_gdod ma'i mgon po bde gshegs sras bcas kyis:_byin gyis brlabs pa'i ye shes chos srung rnams:_mchod gtor 'di bzhes gzung 'dzin dbyings su sgrol:_bar du lha gnas gsum dang dzam gling du:_brda brgyud rig 'dzin grub pa che rnams kyis:_dam la bzhag pa'i mkha' 'gro chos skyong tshogs:_mchod gtor 'di bzhes tshe dpal nyams rtogs spel:_tha ma 'phags bod rdo rje'i gnas rnams su:_snyan brgyud tshul bzhin 'dzin pa'i rnal 'byor gyis:_thugs dam bskul ba'i las byed dregs pa'i sde:_mchod gtor 'di bzhes snang sems dbang du sdus:_da ltar bsnyen cing sgrub pa'i tshogs khang 'dir:_bde gshegs gdung 'dzin rnal 'byor bdag cag la:_'go zhing skyong ba'i dam can tshogs rnams kun:_mchod gtor 'di bzhes rnam bzhi'i phrin las mdzod:_sarba d+harma pA la kiM ka ra ma hA ba liM ta khA hi:_bcu gcig brtan ma skyong pa ni/_hU~M b+h+yoH_dus sbyor bcu gnyis gnas su dag pa la:_bden don bcu gnyis rdo rje'i DA ki ni:_brtan ma bcu gnyis skyong ma ya ma'i tshogs:_dkyil 'khor pham phab dam tshig mgron du gshegs:_sngon tshe slob dpon pad+ma thod phreng dang:_dpal gyi seng ge'i spyan sngar zhal bzhes ltar:_gtor ma'i bshal chu bdud rtsi 'di gsol la:_rnal 'byor bdag cag 'khor dang bcas pa yi:_'gal rkyen kun sol mthun rkyen yid bzhin sgrubs:_gangs can phyogs bzhi'i mtshams kyi so kha srungs:_mtha' dbus 'gro kun bde zhing skyid pa dang:_thub bstan bshad sgrub 'phel ba'i phrin las mdzod:_ma ma d+hA ki nI ba liM ta khA hiH__bcu gnyis pa rta bro ni/_hU~M:_sgrub la 'tshe ba'i dam sri sgab 'dre'i tshogs:_e dbyings bkug gzir lhun po'i phyag rgyas gdab:_srid pa spyi gnon rdo rje'i rta bro yis:_byang chub bar du mi ldang mnan par bya:_oM badz+ra kro d+ha ha ya gr-I ba hi hi hi hU~M phaTa?:_ya ma dam sri s+t+wa~M b+ha ya e laM nan:__bcu gsum pa dngos grub blang ba ni/_byin rlabs sngon du 'gro bas mchod bstod mdor bsdus ni/_hU~M:_bla med mchog gi mchod pa ni/_/ye shes lnga yi 'od zer 'phro/_/yul dang dbang po gnyis med pa/_/bde chen longs spyod chen por bzhes/_/oM shrI pad+ma he ru ka sa pa ri wA ra ar+g+haM sogs shab+da ma hA pany+tsa rak+ta ba liM ta ta na ga na d+harma d+hA tu pU dza hoH_hU~M:_gtum chen dus mtha'i me ltar 'bar:_'jigs pa'i gad mos sa gsum g.yo:_bde stong ye shes dbyings su rol:_he ru ka la phyag 'tshal bstod:_hU~M:_ye shes dkyil 'khor lha tshogs rnams:_dang por bsnyen cing bar du bsgrubs:_tha ma las kyi dngos grub che'i:_phrin las gsol ba'i dus lags na:_rtag rgyun shugs kyi thugs rje la:_bskul zhing gsol 'debs mi 'tshal yang:_gdul bya'i yul la 'jug pa'i phyir:_da lta thugs dam gnad nas bskul:_ma g.yel dgongs pa'i rtsal skyed la:_phrin las bzhi dang grub pa brgyad:_mchog tu mi 'gyur sku gsung thugs:_ye shes rdo rje'i dngos grub stsol:_kA ya wAka tsit+ta dz+nyA na karma sarba sid+d+hi pha la hoH_bcu bzhi nongs bshags ni/_hoH_don dam dbyings la bshags bya ma dmigs kyang:_kun rdzob bsnyen sgrub phrin las brtsams pa la:_lhag chad 'gal zhing 'khrul sogs nongs pa'i tshogs:_snying nas mthol bshags tshangs pa bstsal du gsol:_yig brgya bzla/_bco lnga nyer bsdu ni/_rten bzhugs sngon du 'gro bas/_aH_'gag med rig rtsal rol pa'i dkyil 'khor pa:_rim gyis bdag thim 'od gsal stong nyid dbyings:_skye med spros bral ma bcos gnyug ma'i ngang:_spang blang spro bsdu bral ba'i ngang du bzhag:_a a a:__bcu drug pa ldang bas spyod lam la 'jug pa ni/_oM AHhU~M:_slar yang chu las rlabs kyi phreng ba ltar:_dbyings rig rang shar phyag rgya gcig pa'i sku:_sgo gsum sku gsung thugs kyi srog ldan pas:_lha sngags chos sku'i spyod yul mchog la 'jug:_badz+ra ma hA mu dra kA ya wAka tsit+ta rak+Sha haM:__bcu bdun pa bsngo smon ni/_hoH_gnyis med byang chub sems kyi dkyil 'khor du:_dus gsum bsags pa'i dge tshogs ci mchis pa:_mkha' khyab 'gro ba'i don du bsngos pa'i mthus:_bdag gzhan mi gnas ye shes myur thob shog:__bco brgyad pa shis brjod ni/_oM/_spang rtogs phrin las mthar phyin rdzogs sangs rgyas:_zhi bsil bdud rtsi'i char 'bebs dam pa'i chos:_rig grol yon tan rmad byung dge 'dun sdes:_'jig rten dge legs 'phel ba'i bkra shis shog:_rig 'dzin rtsal 'chang rtsa brgyud bla ma dang:_sgyu 'phrul drwa ba'i skur snang yi dam lha:_rnal 'byor grogs mdzad gnas gsum mkha' 'gro yis:_dngos grub dpal 'byor rgyas pa'i bkra shis shog:_shin tu zhi ba chos sku'i dbyings nyid las:_rig pa rang shar bde chen longs spyod rdzogs:_gang 'dul 'gro ba'i don mdzad sprul pa'i sku:_dbyer med mngon par byang chub bkra shis shog:_ces brjod cing phyogs dus kun tu dge legs su bya'o/__/rgyud kyi khung btsun lung dang man ngag gi_/khyad par rnam bkra snga 'gyur bstan pa'i srog_/nyams su blang bde dgos pa kun tshang chos/_/blo ldan chos 'dod yongs kyi dpal gyur cig_/rje grub thob chen po lcags zam pa'i thugs tig sgrub thabs snying po skor lnga'i bla ma drag po'i las byang bklag chog tu bkod pa 'di'ang rje btsun bla ma 'jam dbyangs chos kyi blo gros rin po che'i dam rdzas kyi rten bcas bka' bstsal rjes su sgrub pa dang*/_bal yul gu ru'i lha khang du dus mchod tsam la nyer mkho'i dbang gis rnying sngags rgan po 'gyur med theg mchog bstan pa'i rgyal mtshan gyis lho 'brug chos kyi rgyal khab lte ba bde chen chos gling du bris pa yi ge gnyis pa grub sras chos mdzad pad+ma chos skyid dbang mos zhus pa 'dis kyang snyigs dus nag phyogs kyi mun pa sangs shing bde chen ye shes kyi snang ba rgyas pa'i rgyur cig__/dge'o//__//mang+ga laM//__//