DKR-KABUM-07-JA-014-wylie
<div class="wylie-content"
@#/__/grub thob chen po'i thugs tig las/_sgrub thabs snying po skor lnga'i bla ma zhi ba'i phrin las bklag chog tu bkod pa bka' gter bdud rtsi'i nying khu bzhugs// dpal rdo rje sems dpa' la phyag 'tshal lo/_/mkhyen brtse'i dkyil 'khor rdzogs pa'i chu shel dbang*/_/phyogs dus rgyal ba'i rnam thar ri dwags bkra/_/sa gsum kun dga'i bdud rtsi'i snang ba can/_/mtsho skyes bla ma yid kyi rgya mtshor mchod/_/rgya che bka' yi rgya mtsho'i gting zab klong*/_/ngo mtshar zab gter gser ri'i mu khyud mdzes/_/rig 'dzin rnam bzhi'i lha dbang sgrogs brjid pa'i/_/phrin las shing rta'i lam srol 'di ru 'byed/_/de la 'dir bka' bab slob dpon chen po'i zhal lung rtsod pa med pa man ngag lta ba'i phreng ba'i dgongs pa/_grub thob chen po thang stong zhabs kyi zab gter pany+tsa'i snying po/_slar yang kun mkhyen bla ma 'od gsal sprul pa'i rdo rje zab gsang dgongs pa'i gsang mdzod klong lnga'i dbyings kyi sgrom bu nas spyan drangs pa'i bla ma zhi ba'i phrin las bklag chog tu bkod pa la/_sbyor dngos mjug gsum las/_dang po/_thog mar yo byad 'du bya ba ni/_yid dang rjes su mthun pa'i gnas su yar mar gyi tshes bcu sogs dus khyad par can dang*/_gu ru'i sku tshab sogs rten khyad par can gyi spyan sngar/_phyi nang gi mchod pa sman gtor tshogs kyi yo byad rol mo sogs dam tshig gi rdzas rnams bzang zhing bkod pas mdzes pa mthong rgyun bzhin bshams/_rang nyid rten gyi dkyil 'khor la phyogs nas bde bar 'dug la/_gnyis pa brgyud 'debs ni/_sku dang ye shes khyab bdag snang mtha' yas/_/rnam snang longs spyod yongs rdzogs spyan ras gzigs/_/bde chen gar gyi dbang phyug rta mchog dpal/_/gsol ba 'debs so smin grol dngos grub stsol/_/sku lnga rigs brgya'i khyab bdag pad+ma 'byung*/_/gsang 'dzin DA ki'i rgyal mo mkhar chen bza'/_/lo chen bai ro mnga' bdag khri srong la/_/gsol ba 'debs so smin grol dngos grub stsol/_/gsang chen rgyud sde'i shing rta sgrol ba'i mgon/_/zab gter sgo 'byed sha mi rdo rje rgyal/_/zung 'jug sgrub pa'i spyi mes thang stong rgyal/_/gsol ba 'debs so smin grol dngos grub stsol/_/thub bstan yongs rdzogs srog 'dzin 'jam pa'i dbyangs/_/khyab bdag 'od gsal sprul pa'i rdo rje dngos/_/'jam mgon chos kyi rgyal po blo mtha' yas/_/gsol ba 'debs so smin grol dngos grub stsol/_/chos kyi rgya mtsho 'gyur med tshe dbang grub/_/kun gzigs 'jam dbyangs chos kyi blo gros dang*/_/rtsa brgyud bla ma yi dam mkha' 'gro'i tshogs/_/gsol ba 'debs so smin grol dngos grub stsol/_/phan nus zab mo'i dbang gis rgyud smin zhing*/_/zag bcas lam lnga'i bskyed pa'i rnal 'byor dang*/_/thabs grol zab mo'i rig 'dzin bzhi mthar son/_/sku lnga lhun grub rdo rje 'chang 'grub shog_/gsum pa skyabs 'gro ni/_bla ma rig 'dzin phyogs dus skyabs yul rgya mtsho'i tshogs dang bcas pa mdun gyi nam mkhar badz+ra sa mA dzaH_na moH_mkha' mnyam 'gro rnams bsgral ba'i phyir:_bla ma dkon mchog rtsa gsum la:_byang chub snying por mchis kyi bar:_rtse gcig gus pas skyabs su mchi:_lan gsum/_bzhi pa sems bskyed pa ni/_hoH_ma gyur rigs drug sems can la:_byams dang snying rje chen po'i blos:_byang chub mchog la 'god pa'i slad:_zab mo'i lam la 'jug bar bgyi:_lan gsum/_lnga pa tshogs bsags pa ni:_hoH_bla ma yi dam mkha' 'gro gshegs:_nyi zla pad+ma'i gdan la bzhugs:_lus ngag yid gsum gus phyag 'tshal:_phyi nang gsang ba'i mchod pa 'bul:_nyams chags sdig sgrib mthol zhing bshags:_gsang sngags bsgrub la rjes yi rang:_smin grol gsang sngags chos 'khor bskor:_mya ngan mi 'da' bzhugs gsol 'debs:_snying po sems can don du bsngo:_yang dag rdo rje'i don rtogs shog:_lan gsum/_drug pa bgegs bskrad pa ni/_rang nyid skad cig gi dpal chen po pad+ma he ru ka zhal gcig phyag gnyis pa rdo rje dang dung khrag 'dzin pa'i skur gyur/_bgegs gtor/_ra~M ya~M kha~M gis bsregs gtor sbyangs/_oM AHhU~M ha ho hrIH_gnod byed bgegs kun tshims byed pa'i/_/zag med 'dod yon bdud rtsir gyur:_s+thA na k+She tra pA lany+tsa na maHsarba ta tha ga te b+h+yo bi shwa mu khe b+h+yaHsarba thA khaM utag te s+pha ra Na i maM ga ga na khaM swA hAH_lan gsum gyis gtor ma phul/_hU~M/_gsang sngags sgrub la bar gcod pa'i:_bgegs dang log 'dren 'byung po'i tshogs:_gnas 'dir ma 'dug gzhan du dengs:_'das na brlag par gdon mi za:_hU~M bzhi'i sngags dang yungs thun 'thor gu gul bdug_/bdun pa mtshams bcad pa ni/_hU~M/_sems nyid stong chen gdod ma'i mkhar:_sems byung rdo rje srung ba'i gur:_ye shes me 'od rab 'bar bas:_gnyis snang bgegs tshogs mtshams bcad do:_oM badz+ra dz+nyA na dz+wa la b+h+rU~M:_brgyad pa sgo dbye phyag bshags ni/_hoH_rig rtsal rol pa'i sgo dbye zhing:_gnyis med yid kyis mjal phyag 'tshal:_glo bur gzung 'dzin 'khrul pa'i sgrib:_mnyam nyid chos sku'i klong du bshags:_sa ma ya pra be sha ya phaTa?:_a la la hoH_a ti pU hoH_pra tIts+tsha hoH_spro na ye shes sku mchog dang*/_yig brgya brjod/_dgu pa dam bca' sdom bzung ni/_hoH_bla ma mchog dang dkyil 'khor lha:_kun nas bdag la dgongs su gsol:_bdag gis dus 'di nas bzung ste:_byang chub snying por mchis kyi bar:_mtha' yas 'gro ba'i don gyi phyir:_so sor thar pa'i sdom pa dang:_byang sems bslab pas rgyud sbyangs nas:_khyad par gsang ba sngags kyi srog:_rtsa ba yan lag dam tshig kun:_srog gi phyir yang mi gtong gzung:_bla ma yi dam dbyer med pa:_rtse gcig bsgrub par dam bca' na:_ye shes chen pos byin brlabs gsol:_bcu pa byin dbab pa ni/_cang te'u dril bu sogs rol mo spos dang gdung dbyangs kyis bskul te/_hU~M:_ngo bo chos sku'i pho brang nas:_rtsa brgyud bla ma gshegs su gsol:_gnas 'dir dbang bskur byin phob la:_mchog dang thun mong dngos grub stsol:_rang bzhin longs sku'i pho brang nas:_yi dam lha tshogs gshegs su gsol:_gnas 'dir dbang bskur byin phob la:_mchog dang thun mong dngos grub stsol:_thugs rje sprul sku'i zhing khams nas:_gnas gsum dpa' bo rnal 'byor mas:_gnas 'dir dbang bskur byin phob la:_mchog dang thun mong dngos grub stsol:_legs nyes stangs 'dzin pho brang nas:_chos srung dam can rgya mtsho yis:_gnas 'dir dbang bskur byin phob la:_mchog dang thun mong dngos grub stsol:_sgrub mchog rgyud la bde chen spor:_sgrub gnas rdo rje'i zhing du sgyur:_sgrub rdzas ye shes rol pa'i rgyan:_'dod yon rgya mtshor byin gyis rlobs:_oM AHhU~M gu ru de ba DA ki nI sarba sa ma ya badz+ra dz+nyA na a be sha ya a aH_hrIM hrIM phaiM phaiM:_hU~M hU~M hU~M:_bcu gcig gnas dang mchod pa byin rlabs ni/_raM yaM khaM/_gzung 'dzin chos kun rnam dag dbyings:_ye shes rol pa'i zhing khams cher:_phyi nang gsang ba rmad byung ba'i:_mchod pa'i sprin phung mkha' khyab gyur:_badz+ra s+pha ra Na khaM:_oM badz+ra ar+g+haM pad+yaM puSh+pe d+hU pe A lo ke gan+d+he nai wi d+ya shab+da AHhU~M:_ma hA pany+tsa rak+ta ba liM ta oM AHhU~M hrIHThaH_lan gsum brjod do/__/gnyis pa dngos gzhi'i las rim/_dang po rnam shes lam byed/_dam tshig gi dkyil 'khor bskyed pa ni/_aH_dbyings nyid gdod nas stong pa che:_rig pa mtshan med snying rjer shar:_zung 'jug smon pa med pa'i rtsal:_rgyu yi ting 'dzin hrIHdkar po'i:_'od kyis gzung 'dzin stong par sbyangs:_stong pa'i ngang las skad cig gis:_snod bcud dag pa yum lnga'i mkha':_'byung ba rim brtsegs ri rab steng:_phung po dag pa gzhal med khang:_gru bzhi sgo bzhi mtshan nyid rdzogs:_rdo rje srung ba'i 'khor los bskor:_ye shes zang thal chen po'i dbus:_sna tshogs pad+ma nyi zla'i steng:_sems nyid dag pa rgyu yi hrIH_yongs gyur gnyug ma rang bzhin lha:_zhal phyag skur bzhengs pad+ma 'byung:_dkar dmar mdangs ldan zhi khro'i nyams:_phyag g.yas rdo rje thugs kar gtod:_g.yon pas mnyam bzhag b+han+d+ha dang:_'chi med tshe yi bum bzang bsnams:_gsang phod chos gos zab ber gsol:_dbu la pad+ma'i snyan zhus brjid:_zhabs zung rdo rje'i skyil krung gis:_ye shes 'od lnga'i klong na rol:_spyi bor chu skyes nyi zla'i dbus:_longs sku pad+ma tshe dpag med:_dmar gsal mnyam gzhag tshe bum rgyas:_rang 'od yum 'khyud mtshan dper 'bar:_de spyir pad nyi zla ba'i steng:_chos sku mi 'gyur kun tu 'chang:_mthing gsal rdo rje dril bu'i rgyas:_dbyings phyug yum 'khyud dar gos dang:_rin chen rus pa'i rgyan gyis spras:_phyi rol pad+ma 'dab bzhi'i steng:_mdun dang phyogs bzhir rigs mchog lnga:_thod phreng rig lnga'i rnam par bzhengs:_dkar ser dmar dang ljang ba'i mdangs:_so so'i rigs kyi btsun mor bcas:_kha sbyor bde ba'i rol par bzhugs:_de phyir rin chen zur brgyad la:_phyi nang sems dpa' sems ma'i dngos:_sprul pa'i gu ru mtshan mchog brgyad:_rang rang rigs kyi yum bcas gsal:_bar khyams steng 'og phyogs bzhi ru:_yang sprul gu ru rigs drug dang:_sgo bzhir mthar byed yab yum brgyad:_zhi ba rdo rje dbyings kyi lha:_rig 'dzin bla ma'i 'khor lor rdzogs:_gzhan yang steng 'og phyogs mtshams su:_rtsa gsum rgyal ba rab 'byams tshogs:_til gyi gong bu kha bye ltar:_snang stong zung 'jug chen por gsal:_byin brlab dbang bskur rgyas gdab ni/_gnas gsum rdo rje gsum gyi dngos:_yi ge gsum gyi phyag rgyas gdab:_nam mkha' gang ba'i dbang gi lhas:_bde chen bdud rtsi'i char 'bebs pas:_phung po gnas gyur nyon mongs dag:_ye shes dbang bskur cod pan rdzogs:_oM AHhU~M badz+ra kA ya wAka tsit+ta sa ma ya hoH_sa ma ya s+t+wa~M:_oM hU~M trA~M hrIHaH_a b+hi Shiny+tsa mi su ra tA s+t+wa~M a haM:_gnyis pa ye shes kyi 'khor lo spyan drangs pa ni/_hU~M:_o rgyan yul gyi nub byang mtshams:_pad+ma ge sar sdong po la:_ya mtshan mchog gi dngos grub brnyes:_pad+ma 'byung gnas zhes su grags:_'khor du mkha' 'gro mang po dang:_rig 'dzin bde gshegs zhi khros bskor:_khyed kyi rjes su bdag sgrub kyi:_byin gyis rlob phyir gshegs su gsol:_gnas mchog 'di ru byin phob la:_sgrub mchog bdag la dbang bzhi skur:_bgegs dang log 'dren bar chad sol:_mchog dang thun mong dngos grub stsol:_oM AHhU~M badz+ra gu ru de wa DA ki ni maN+Dal sa pa ri wA ra e h+ye hi:_sa ma ya hoH_sa ma ya s+t+wa~MH_e A ral+li hrIM hrIM phaiM phaiM:_gsum pa dam ye dbyer med du bzhugs su gsol ba ni/_hU~MH_rang byung sprul pa'i dkyil 'khor 'dir:_dbyings nas spyan drangs ye shes pa:_dam tshig 'khor lor dbyer med bzhugs:_mchog thun dngos grub char ltar phob:_sarba sa ma ya maN+Dal dz+nyA na badz+ra dzaHhU~M ba~M hoH_tiSh+Tha sa ma ya s+t+wa~M:_bzhi pa gus phyag 'tshal ba ni/_na moH_skye med chos sku'i ngang nyid las:_bde chen longs spyod rdzogs skur bzhengs:_gang 'dul sprul pa'i sprin phung 'phro:_dkyil 'khor lha la phyag 'tshal lo:_a ti pU hoH_pra tIts+tsha hoH_lnga pa mchod pa 'bul ba la/_thog mar kun bzang mchod sprin ni/_oM:_kun tu bzang po'i smon lam las:_ye shes rnam pa thams cad pa:_mchod pa'i sprin chen cir yang shar:_rdo rje'i longs spyod mchog tu rol:_oM na mas+sarba ta thA ga te b+h+yo bi shwa mu khe b+h+yaHsarba thA khaM utag te s+pha ra Na i maM ga ga na kha~M swA hAH_gnyis pa phyag zhabs bsil ba ni/_oM:_dri med yid du 'ong ba yi:_byang chub dam pa'i bdud rtsi'i chus:_phyag dang zhabs ni bsil nas kyang:_rdo rje'i gdan la dgyes par bzhugs:_na mas+sa man+ta bud+d+hA nAM ga ga na khaM sa ma ye swA hAH_gsum pa phyag rgya gar mchod ni/_oM hU~M/_phyag rgya chen po'i dkyil 'khor bar:_dam tshig phyag rgya'i brdas mtshon te:_chos dang las kyi phyag rgya yis:_dgyes pa'i byin bskyed thugs dam bskul:_sa ma ya hoH_sa ma ya s+t+wa~M:_sarba mu dra dz+nyA na gIrti pU dza hoH_bzhi pa thun mong nyer spyod kyi mchod pa ni/_oM/_spos kyi sprin lding me tog char chen 'bebs:_snang gsal gzi 'bar dri chab 'thor yab sbreng:_bza' bca' btung ba'i zhal zas tshogs rnams dang:_snyan 'gyur rol mo'i sgra yis kun tu mchod:_oM shrI badz+ra rA ga d+hU pe hU~M:_puSh+pe trA~M:_A lo ke hrIH_gan+d+he gan:_nai wi d+ya AH_shab+da sarba pU dza ho:_lnga pa dang po sman mchod ni/_oM:_don gyi bdud rtsi rtags su rigs lngar snang:_sha lnga bdud rtsi rtsa ba yan lag rdzas:_chos kyi bdud rtsi sgrub pa'i byin rlabs bcud:_gti mug rdo rje'i dam tshig mchog tu rol:_ma hA pany+tsa a mr-i ta kha ra~M khA hi:_brgyud mchod ni/_chos sku snang mtha' longs sku spyan ras gzigs/_/dbang chen rta mchog o rgyan rdo rje 'chang*/_/rje 'bang grogs gsum grub chen thang stong zhabs/_/sman mchod 'bul lo mthu dbang dngos grub stsol/_/ma hA pany+tsa a mr-i ta khA hi/_kun gzigs 'od gsal sprul pa'i rdo rje dang*/_/'jam mgon bla ma rtsa brgyud rig 'dzin tshogs/_/yi dam DA ki dam can gter bsrung la/_/sman mchod 'bul lo mthu dbang dngos grub stsol/_/ma hA pany+tsa a mr-i ta khA hi/_kA ya wAka tsit+ta a la la hoH_gtor ma'i mchod pa ni/_AH_snang ba snod kyi 'jig rten gtor gzhong du:_srid pa bcud kyi sems can gtor mar bshams:_ro bcud nus pa phun tshogs 'dod yon gter:_zhe sdang rdo rje'i dam tshig mchog tu rol:_ma hA ba liM ta kha raM khA hiH_rak+ta'i mchod pa ni/_hU~MH_khams gsum bsgral ba'i rak+ta'i rgya mtshor bskyil:_gI ti'i dbyings las drangs pa'i khrag gi rgyun:_'khor 'das dbyer med chen por mnyam sbyar ba:_'dod chags rdo rje'i dam tshig mchog tu rol:_ma hA rak+ta kha raM khA hiH_drug pa sbyor sgrol gyi mchod pa ni/_hoH_bde chen phyag rgya'i ye shes la sbyar bas:_gzung 'dzin rtog tshogs 'od gsal dbyings su bsgral:_zung 'jug dbyings rig dbyer med rdzogs pa che:_chos nyid don gyi mchod pa chen por bzhes:_ta na ga Na ma hA su kha d+harma d+hA tu pU dza hoH_bdun pa bstod pa ni/_oM/_ye shes rnam pa thams cad pa:_gang 'dul gzugs kyi sku ru shar:_tha mal snang zhen sbyong mdzad pa'i:_rdo rje'i sku la phyag 'tshal bstod:_AH_ye shes 'gag pa med pa'i rtsal:_mi shigs na dA'i dbyangs su sgrogs:_brtan g.yo'i sgra skad zil gyis mnan:_rdo rje'i gsung la phyag 'tshal bstod:_hU~M:_ye shes thig le gcig tu 'khyil:_mkhyen brtse'i rol pa bsam mi khyab:_gnyis snang rtog pa rang sar grol:_rdo rje'i thugs la phyag 'tshal bstod:_swA:_ye shes rmad du byung ba'i rgyan:_bum bzang dpag bsam ljon shing ltar:_gdul bya'i 'dod pa yid bzhin stsol:_yon tan rdo rjer phyag 'tshal bstod:_hAH_ye shes thogs pa med pa'i rtsal:_tshar gcod rjes 'dzin phan 'dogs pa'i:_sgyu 'phrul nyams brgya cir yang ston:_phrin las rdo rjer phyag 'tshal bstod:_hoH_ye shes kun gyi khyab bdag che:_sku gsung thugs yon phrin las ston:_gcig dang du ma'i mtha' las 'das:_'od gsal rdo rjer phyag 'tshal bstod:_ye shes drug gi rdo rje'i glus:_dkyil 'khor lha tshogs bstod pa yi:_bsod nams ye shes bla med pas:_dngos grub rnam gnyis thob gyur cig:_skabs 'dir lam nges rdzogs kyi dbang du byas te/_bsnyen pa phyag rgya gcig pa/_nye bsnyen phyag rgya spros bcas kyi rnam pa gsal ba/_nga rgyal brtan pa/_gzhi 'bras sbrel ba'i dag dran la bslab pa dang*/_bskyed rim gyi drod thob nas bdag mdun gyi dmigs bzlas dang*/_tshom bu tshogs sgrub sogs kyi rig 'dzin bzhi'i lam mthar dbyung ba'i tshul khrid yig ltar shes par bya'o/__/brgyad pa yan lag bzlas pa'i rnal 'byor gyi dang po bsnyen pa ni/_bdag nyid dkyil 'khor gtso mchog gi:_phung po khams dang skye mched kun:_gdan gsum sgyu 'phrul zhi khro yi:_dkyil 'khor chen po lhun rdzogs pa'i:_thugs kar pad+ma nyi zla'i steng:_ye shes sems dpa' kun tu bzang:_mthing gsal mnyam bzhag yum dang 'khril:_de yi thugs dbus nyi zla'i sbubs:_hrIHyig dkar dmar mtha' bskor du:_sngags phreng rang sgra sgrogs bzhin par:_g.yas bskor 'od zer 'phro bar bsam:_de nyid kho nar sems bzung nas:_oM AHhU~M badz+ra gu ru pad+ma sid+d+hi hU~M:_grangs tshad 'bum phrag bzhi/_gnyis pa nye bsnyen gyi dmigs bzlas ni/_slar yang thugs srog sngags phreng gis:_bskor las gnyis pa bar med byung:_rang gi zhal nas rang 'od kyi:_yum gyi zhal zhugs gsang bar brgyud:_mgal med lta bur 'khor ba yis:_mchog tu mi 'gyur bde chen 'bar:_sbyor mtshams nas thon dkyil 'khor pa'i:_lha tshogs rnams kyi thugs kar zhugs:_rang rang thugs srog las byung ba'i:_sngags phreng mgal me bzhin du 'khor:_bde stong ye shes nyams 'bar nas:_thugs rje lhag par nye ba yis:_rang rgyud byin gyis brlabs par bsam:_oM AHhU~M badz+ra ma hA gu ru sarba sid+d+hi hU~M:_gsum pa sgrub pa'i dgongs pa ni/_thugs srog sngags las 'od zer 'phros:_dkyil 'khor lha tshogs ye shes bskul:_gtso 'khor kun gyi thugs ka nas:_bde chen gzi byin dpal du 'bar:_mkha' khyab rtsa gsum rab 'byams mchod:_byin rlabs dngos grub rang la thim:_slar 'phros 'gro kun sdig sgrib sbyangs:_dregs pa gtum po las la bkol:_zhi rgyas dbang drag mchog thun gyi:_gang 'dul phrin las lhun grub bsam:_oM AHhU~M badz+ra gu ru pad+ma thod phreng rtsal badz+ra sa ma ya dzaHsid+d+hi pha la hU~M AH_'bum phrag bzhi bzlas phrin las 'grub:_skabs su sngags sham ci rigs spel:_oM shAn+tiM ku ru swA hAH_puSh+TiM ku ru oM:_hrIHwA shaM ku ru hoH_hU~M mA ra ya phaTa?:_grangs 'bum phrag bzhi/_bzhi pa sgrub pa chen po'i dgongs pa ni/_slar yang 'od zer mkha' khyab 'phros:_sa chu spyan dang mA ma kI:_me rlung gos dkar dam tshig sgrol:_nam mkha' dbyings kyi dbang phyug ma:_srid gsum ye nas sangs rgyas zhing:_gnyug mar gnas pa mngon du sad:_nang bcud 'gro drug sems can kun:_rig 'dzin bla ma'i phyag rgyar shar:_phung po khams dang skye mched chos:_gdan gsum dkyil 'khor chen por rdzogs:_sgra grags sngags kyi rang sgra 'ur:_dran rtog 'od gsal khyab gdal che:_snang srid gzhir bzhengs rdo rje gsum:_dag pa rab 'byams ngang nas bzlas:_oM AHhU~M ma hA gu ru pad+ma badz+ra bo d+hi tsit+ta ma hA su kha dz+nyA na d+hA tu AH_oM ru lu ru lu hU~M b+h+yo hU~M:_grangs 'bum phrag bzhi bzla bar gsungs so/__/dbang dang sgrub chen gyi skabs sgrub sngags gtso bor bzla bar gsung zhing*/_dbang sogs dgos pa dang 'brel na/_skabs 'dir tshe sgrub kyi dmigs bzlas sbyor dgos pas/_hrIH_dkyil 'khor gtso mchog spyi gtsug tu:_pad sdong nyi zla 'od 'bar dbus:_'chi med mgon po tshe dpag med:_dmar gsal pad+ma rA ga'i mdangs:_nyi ma bye ba'i gzi brjid can:_longs spyod yongs rdzogs rgyan gyis spras:_mnyam gzhag phyag rgyas bum pa bzang:_bdud rtsi'i bcud kyis bskang ba bsnams:_rang 'od bde ster tsaN+Da lI:_mda' dar tshe bum bsnams pas 'khril:_rdo rje pad+ma'i skyil krung gis:_ye shes 'od zer 'phro ba'i klong:_zhi 'dzum mtshan dpe'i phung por 'bar:_dam tshig ye shes dbyer med pa:_rtsa gsum tshe lha'i sprin phung 'phro:_rigs bdag tshul du bzhugs par gyur:_hrIHhrIHhrIH_gdod ma'i mgon po bla ma tshe dpag med:_'chi med tshe yi yum mchog tsaN+Da lI:_tshe lha rnam gsum rgyal ba rab 'byams la:_gsol ba 'debs so phyi nang bar chad sol:_byin gyis rlobs shig tshe dbang dngos grub stsol:_oM a mA ra Ni dzI ban+ti ye swA hAH_tshe sgrub dmigs gsal dgos na bsnyen grangs 'bum phrag bzhi gsungs/_de ltar bla ma zhi drag gi:_sgom dang bzlas pa sgrub pa'i rtags:_rab dngos 'bring nyams tha ma ni:_rmi lam zhal mthong gsung thos dang:_phyag mtshan rnyed dang ye shes skye:_sgrub rdzas byin chags 'phel dang khol:_mar me rang 'bar dri bzang 'thul:_khyad par zhi ba'i rmi rtags ni:_nyi zla shar dang bdud rtsi btung:_me tog char 'bebs tshal du phyin:_skye bo mang pos gus bstod dang:_rig 'dzin mkha' 'gro'i 'du ba 'byung:_zhes gsungs so/__/thun mthar tshe 'gugs ni/_dad dang gdung shugs drag tu bskyed pa dang bcas mda' dar g.yab la/_hrIH_bcom ldan mgon po ye shes tshe dpag med:_rtsa brgyud bla ma yi dam zhi khro'i lha:_mkha' 'gro chos skyong pho nya mgyogs ma'i tshogs:_thugs dam bskul lo thugs rje'i mthu rtsal phyungs:_rnal 'byor bdag cag 'khor dang bcas pa yi:_bla tshe chad nyams yar ba rang sor tshud:_sa chu me rlung 'byung ba'i dwangs ma sdus:_'jig rten bsod nams can gyi tshe dpal stobs:_rtsa gsum bde gshegs rab 'byams mkhyen brtse'i tshe:_ye shes bdud rtsi'i rnam par spyan drangs nas:_bdag dang sgrub pa'i rdzas la dbyer med stims:_rnal 'byor sgo gsum rdo rje'i srog tu sgrubs:_mi 'gyur mi shigs rtag pa dam pa yi:_tshe dang ye shes mchog thun dngos grub stsol:_badz+ra A yur+dz+nyA na sa ma ya dza dzaH_dzaHhU~M ba~M hoH_zhes bkug shing rgyas gdab bya/_aH_'khor 'das tshe bcud rdo rje'i srog tu 'dus:_de nyid gnyug ma mi shigs dbyings su thim:_lus la rdo rje'i go chas rgyas btab pas:_rang byung ye shes chen po'i srog 'grub shog:_dz+nyA na A yu She badz+ra rak+Sha b+h+rU~M a aH_bzlas pa'i mthar dbyangs gsal rten snying dang mchod bstod mdor bsdus dang*/_yig brgya brjod/_skabs 'dir gur mgon sprin zhags can dang*/_lcags zam mgon po bdun rdzogs sogs bka' gter gyi srung ma'i gsol mchod rgyas bsdus gang dgos btang*/_gsum pa rjes kyi rim pa la/_zhing ngam gcan gzan gyi pags pa'i steng thabs shes bza' btung gi rdzas bkram la skabs 'dir lcags zam mgon po'i bshags skong rgyas par spro na/_nyer spyod sman gtor rak+ta sogs 'du byas la/_bshags skong zur byang ltar sbyar/_dang po tshogs byin rlabs ni/_bdud rtsi'i bsang chus bran la/_ra~M ya~M kha~M:_stong pa'i ngang las dbyings kyi b+han+d+ha ru:_rig pa ye shes bdud rtsi'i rgya mtshor 'khyil:_'dod pa'i yon tan rnam pa thams cad pa'i:_tshogs kyi longs spyod mkha' khyab rgyan du gyur:_oM AHhU~M ha hoHhrIH_gnyis pa tshogs zhing spyan 'dren pa ni/_hU~M:_sku gsum dag pa'i zhing khams rab 'byams nas:_bla ma bde gshegs yi dam mkha' 'gro'i tshogs:_rdo rje'i dam tshig mchog la 'dir gshegs shig:_mi 'gyur bde chen ye shes byin chen phob:_badz+ra sa ma ya dzaH_gsum pa tshogs phud dang po 'dod yon du dmigs la/_hU~M:_bla med mchog gi tshogs kyi mchod pa ni:_ye shes lnga ldan bdud rtsi'i sprin chen po:_gzugs sgra dri ro reg bya'i char 'bebs pa:_dgyes par bzhes la mchog thun dngos grub stsol:_ma hA ga Na tsakra pany+tsa kA ma gu Na pU dza hoH_bzhi pa bshags pa bdud rtsi dang sha lngar dmigs la/_hoH_bdag cag thog med dus nas da lta'i bar:_ma rig las nyon 'khrul pa'i gzhan dbang gis:_bsags pa'i sdig ltung nyams chags ci mchis pa:_zhal zas tshogs kyi mchod pas bskang zhing bshags:_yi ge brgya pa brjod/_lnga pa bsgral bstab ni/_dmigs bya'i rU pa'am tshogs tha ma'i rten la/_nr-i tri badz+ra ang+ku sha dzaH_dzaHhU~M ba~M hoH_hU~M:_gzung 'dzin 'khrul ba'i dgra bgegs 'byung po'i tshogs:_dam tshig rdzas la dgug bsgral zhal du bstab:_kha sbyor bde chen rol pa'i gzi byin bskyed:_bla med mchog gi phrin las yongs rdzogs mdzod:_sarba nr-i tri sha trUn big+h+nAn dzaHhU~M ba~M hoH_mA ra ya phaTa?:_kyis bsgral/_nyams pa'i sha khrag bdud rtsi bran la/_ma hA mA~M sa rak+ta kiM ni ri ti ga Na tsakra pU dza khA hi:_zhal du bstab/_drug pa bskang bshags ni/_skong rdzas nam mkha' mdzod kyi sngags rgyas brlab te/_hU~M:_cir snang dag pa rab 'byams zhing khams su:_'dod yon mi zad mchod pa'i phyag rgya che:_bde ba'i longs spyod rnam pa thams cad pa:_mi zad nam mkha' mdzod kyi 'khor lo 'dis:_dgongs pa brda dang snyan nas brgyud pa yi:_dus gsum rig 'dzin bla ma'i thugs dam bskang:_zhi khro rab 'byams sgyu 'phrul drwa ba'i sprin:_yi dam dkyil 'khor yongs kyi thugs dam bskang:_nye rgyu'i grogs mdzad mchog thun phrin las bdag:_gnas gsum dpa' bo mkha' 'gro'i thugs dam bskang:_legs nyes stangs 'dzin sangs rgyas bstan pa srung:_rdo rje'i chos srung rgya mtsho'i thugs dam bskang:_'dod rgu'i char 'bebs dngos grub stsol mdzad pa:_gnod sbyin nor lha gter bdag thugs dam bskang:_snang srid gzhir bzhengs ye shes rol par shar:_'khor 'das mgron gyur kun gyi thugs dam bskang:_hU~M:_thugs dam dgyes par skong ba'i rdzas mchog ni:_mchod yon zhabs bsil me tog bdug pa dang:_mar me dri chab zhal zas rol mo sogs:_lha rdzas nyer spyod mchod pas thugs dam bskang:_gzugs mdzes sgra snyan dri zhim ro bda' dang:_reg bya 'jam 'khril gsang ba pho nya mo'i:_'dod yon bde chen gcig tu lhun rdzogs pa'i:_rmad byung nang gi mchod pas thugs dam bskang:_bkra shis rdzas rtags rgyal srid rin chen bdun:_gling bzhi ri rab lha mi'i 'byor ba'i phul:_bcu drug bde ster rdo rje'i rig ma sogs:_ngo mtshar rnam mang mchod pas thugs dam bskang:_rtsa brgyad yan lag stong sbyar a mr-i ta:_khams gsum 'khor ba rgyun gcod dmar chen po:_bza' bca' btung ba longs spyod gtor ma'i tshogs:_khyad par gsang ba'i mchod pas thugs dam bskang:_rtsa rlung byed rtsol dbu ma'i dbyings su bsgral:_thig le zag med lhan cig skyes par sbyor:_zung 'jug shin tu rnam dag rdzogs pa che:_bla med mchog gi mchod pas thugs dam bskang:_zhi rgyas dbang drag las kyi phyag rgya dang:_rdzas dang longs spyod 'byor pa'i khyad par sogs:_bzhed dgur 'char ba'i dam tshig rmad po che:_sgyu 'phrul rgyan gyi rol mos thugs dam bskang:_bdag cag 'khor ba thog ma med pa nas:_tha ma da lta'i lus blangs yan chad du:_bsags pa'i sdig sgrib nyes ltung dri ma'i tshogs:_snying nas 'gyod pas bshags shing bsdam par bgyi:_hU~M:_de ltar bskangs shing bshags pa la brten nas:_dkyil 'khor lha tshogs dgyes pa'i gzi byin skyed:_rnal 'byor bdag la brtse bas nyer dgongs te:_mchog thun dngos grub rgya mtsho'i phrin las mdzod:_nyams chags rtogs sgrib mi mthun phyogs kun zhi:_tshe bsod dpal 'byor ye shes snang ba rgyas:_snang sems dbang 'dus gzung 'dzin dgra dang bgegs:_tshar gcod drag po'i phrin las 'grub par mdzod:_bstan 'dzin zhabs brtan thugs bzhed lhun gyis grub:_bshad sgrub bstan dang dge 'dun 'dus pa 'phel:_snod bcud dus kyi rgud pa kun zhing zhing:_chos mthun bde skyid 'phel ba'i phrin las mdzod:_'gal rkyen bar chad rdo rje'i mkhar du srungs:_byad phur rbod gtong dmod pa'i stobs kyis zlog:_gdug pa can rnams bsad gzir bskrad nas kyang:_phyogs las rnam par rgyal ba'i phrin las mdzod:_mthar thug snang zhen lha dang sngags su dag:_rtsa rlung thig le rtogs tshogs dbyings su thim:_sku dang ye shes phrin las rmad byung ba'i:_mchog dngos myur du 'grub pa'i phrin las mdzod:_bla sgrub sger bskang ni/_hU~M hrIH_rnam kun mchog ldan dbyings kyi rgyan shar ba'i/_/'od gsal sgyu 'phrul 'og min pad+ma 'od/_/phyogs dus rgyal ba dgyes pa'i dkyil 'khor 'dir/_/rab 'byams rtsa gsum rgyal ba gshegs su gsol/_/gdod nas 'du 'bral med pa'i klong bzhugs te/_/ye shes rang gi rig pa'i phyag 'tshal zhing*/_/yul dang dbang po gnyis med bde mchog gi_/kun tu bzang po'i mchod pas thugs dam bskang*/_/snang spyod bde chen shar ba'i nyer spyod bdun/_/tshogs drug ye shes dag pa'i 'dod yon lnga/_/cir snang mchog tu mi 'gyur bde ba'i gar/_/srid zhi'i rgyan tu gyur pas thugs dam bskang*/_/chos don rtags kyi bdud rtsi'i zhal skyems mtshon/_/phung khams gdan gsum dkyil 'khor ba ling ta/_/'khrul pa ka nas dag pa'i ru d+hi ra/_/rdo rje'i longs spyod tshogs kyis thugs dam bskang*/_/ka dag rnam thar sgo gsum yum gyi mkhar/_/'od gsal lhun grub rdo rje'i sbyor ba las/_/zag med sku dang zhing khams dga' ba bzhi'i/_/ye grol gnas lugs rtogs pas thugs dam bskang*/_/don dam mchod dang mchod bya mi dmigs kyang*/_/kun rdzob zag med 'byor bas lhun rdzogs pas/_/gzhi lam 'bras bu du ma ro gcig gis/_/gnas lugs mngon sum rtogs pas thugs dam bskang*/_/hU~M hrIH_ngo bo ka dag kun bzang 'od mi 'gyur/_/rang bzhin lhun grub thugs rje pad dkar 'chang*/_/gnyis med phyogs dus rgyal ba'i rnam thar mdzod/_/sku gsum khyab bdag bla ma'i thugs dam bskang*/_/ye shes rol pa mi zad rgyan gyi sprin/_/rigs brgya'i 'khor lo'i dbang phyug dkyil 'khor gtso/_/zhi rgyas dbang drag mchog gi phrin las can/_/gu ru thod phreng sde lnga'i thugs dam bskang*/_/yul dus dbang po 'phags lam brgyad du dag_/tshar gcod rjes 'dzin phrin las bsam mi khyab/_/gang 'dul der snang mchog gi sprul pa'i sku/_/gu ru mtshan mchog brgyad kyi thugs dam bskang*/_/rtag chad mtshan ma'i 'khrul rtog dbyings su bsgral/_/tshad med bsdu bzhis skal ldan rjes su bskyangs/_/ye shes rang snang dkyil 'khor khro mo'i tshul/_/sgo skyong yab yum rnams kyi thugs dam bskang*/_/ye shes dgongs klong dag pa'i mkha' dbyings las/_/brda rtags rgyud lung man ngag gsang sgo 'byed/_/snyan brgyud bdud rtsi'i rnam grol sgo 'byed mdzad/_/brgyud gsum rig 'dzin bla ma'i thugs dam bskang*/_/dbang bzhi'i nus pa bskyed rdzogs lam gyis gso/__/rdo rje'i rig 'dzin sa lam mthar son pas/_/sku bzhi'i go 'phang phrin las bzhi mthar phyin/_/yi dam zhi khro'i lha tshogs thugs dam bskang*/_/rdo rje gsang mchog sa lam pha mthar son/_/gsang sngags rnal 'byor ma sring spun ltar brtse/_/phrin las rmad byung mkha' 'gro rgya mtsho dang*/_/rdo rje chos skyong rnams kyi thugs dam bskang*/_/snod bcud rgyud gsum sku dang ye shes la/_/nyams dang bshags par bya ba ma dmigs kyang*/_/glo bur 'khrul rtog nongs pa ci mchis pa/_/bsal bzhag spang blang bral ba'i ngang du bshags/_/gdod nas ye rdzogs rig 'dzin bla ma lhar/_/'du 'bral med pa mnga' dbang rdzogs pa yis/_/mi slob zag med 'dus ma byas pa'i klong*/_/mngon sum btsan sa zin pa'i mchog stsol cig_/yig brgya brjod/_ces pa phyi yi tshogs kyis rtsa gsum dkyil 'khor gyi lha tshogs dgyes pa bskang*/_bdun pa dam rdzas la bsam ste nang rdo rje phung po'i gdan gsum gyi lha tshogs 'bar 'dzag gi mnyes par bya ba'i phyir/_hoH_lhun grub rdo rje phung po'i grong:_rtsa rlung thig le'i gzi 'od 'bar:_ye shes chen po'i lha tshogs rnams:_kha sbyor bde ba'i rol pa che:_rdo rje'i dam tshig bla med pa:_tshogs kyi mchod pa dgyes par bzhes:_rmad byung bsod nams tshogs rdzogs shing:_bde chen ye shes rgyas gyur cig:_a ho ma hA su kha ga Na tsakra a la la hoH_gsang ba 'khor lo lnga'i lha rnams snyoms 'jug gi dga' bzhis mnyes par bya ba'i phyir/_hoH_e yi cha byad bzang po yi:_dbus su waM gyi rnam par brgyan:_sangs rgyas rin chen za ma tog:_'du shes gsum gyis mnyam sbyar bas:_dga' ba bzhi yi ye shes bskyed:_stong pa bzhi yi nyams myong drangs:_bde stong dbyer med lhan cig skyes:_mchog tu mi 'gyur 'od gsal ba:_a la la:_de kho na nyid 'khor gsum rtog bral bde ba chen po'i klong du mnyam par bzhag__/brgyad pa lhag ma ni/_lhag ma bsdus te phud cung zad bsnan la/_pany+tsa a mr-i ta ga Na pU dza hU~M ha ho hrIH_slob dpon gyi dam tshig gi kha phru btab/_e A ral+li hrIM hrIM phaiM phaiM:_lhag mgron spyan drangs la/_hU~M:_ye shes rol pa dpal gyi lhag sdud dang:_las las grub pa'i mkha' 'gro dbang phyug ging:_'dir gshegs dam tshig lhag ma'i tshogs la rol:_'khor srungs rkyen zlog rnam bzhi'i phrin las mdzod:_oM uts+tshiSh+Ta ba liM ta khA hi:_zhes rol mo dang bcas pas srin mo'i za lam du spungs/_rjes 'brel rdo rje'i glu gar bya ba ni/_oM AHhU~M hoHa ho ma hA su kha a la la hoH_gsang ba mchog gi dgyes pa'i grong na gsang chen rol pa'i rnal 'byor pa:_lhan cig skyes dga'i bde ba'i thabs kyis stong pa'i 'od gsal mngon du gyur:_zung 'jug ye shes skye 'gags gnas bral rdo rje nam mkha'i dkyil lta bu:_'khor 'das dbyer med srid zhi kun khyab thig le gcig tu lhun gyis grub:_ma hA su kha dz+nyA na gI ti a la la hoH_DA dril rol mo bcas bya/_oM:_bkra shis gang zhig tshogs kyi spyod pa la brten nas:_gnas skabs gegs zhi bsod nams ye shes phrin las 'phel:_mthar thug sa bcu lam lnga'i go 'phang myur du 'grub:_rtag tu dpal gnas dge legs snang bas khyab gyur cig:_ces shis pa brjod/_dgu pa thugs dam bskul ba ni/_hU~M:_nam mkha'i mtha' dang mnyam pa'i dkyil 'khor nas:_srid zhir mi gnas ye shes sku brnyes pa'i:_longs spyod rdzogs dang sprul pa'i lha tshogs rnams:_thugs dam bskul lo thugs rje'i rtsal shugs phyung:_las nyon sdig sgrib 'gal rkyen mi mthun tshogs:_mthu rtsal me yis bsregs shing sbyang du gsol:_phrin las bzhi dang grub pa chen po'i phul:_ye shes chu yis bskyed cing 'phel bar mdzod:_gsang ba'i dgra sod 'jigs pa'i bdud bzhi thul:_bar chad 'phrang gsum dbyings kyi thig ler stims:_bden gnyis dbyer med lhag pa'i chos sku che:_rang byung 'od gsal rtogs pa'i phrin las mdzod:_bcu pa chad tho ni/_hU~M:_sngon tshe 'og min chos dbyings pho brang du:_gdod ma'i mgon po bde gshegs sras bcas kyis:_byin gyis brlabs pa'i ye shes chos srung rnams:_mchod gtor 'di bzhes gzung 'dzin dbyings su sgrol:_bar du lha gnas gsum dang dzam gling du:_brda brgyud rig 'dzin grub pa che rnams kyis:_dam la bzhag pa'i mkha' 'gro chos skyong tshogs:_mchod gtor 'di bzhes tshe dpal nyams rtogs spel:_tha ma 'phags bod rdo rje'i gnas rnams su:_snyan brgyud tshul bzhin 'dzin pa'i rnal 'byor gyis:_thugs dam bskul ba'i las byed dregs pa'i sde:_mchod gtor 'di bzhes snang sems dbang du sdus:_da ltar bsnyen cing sgrub pa'i tshogs khang 'dir:_bde gshegs gdung 'dzin rnal 'byor bdag cag la:_'go zhing skyong ba'i dam can tshogs rnams kun:_mchod gtor 'di bzhes rnam bzhi'i phrin las mdzod:_sarba d+harma pA la kiM ka ra ma hA ba liM ta khA hi:_bcu gcig pa brtan ma ni/_bshal chu'i bdud rtsi bran la/_hU~M b+h+yoH_dus sbyor bcu gnyis gnas su dag pa la:_bden don bcu gnyis rdo rje'i DA ki ni:_brtan ma bcu gnyis skyong ma ya ma'i tshogs:_dkyil 'khor pham phab dam tshig mgron du gshegs:_sngon tshe slob dpon pad+ma thod phreng dang:_dpal gyi seng ge'i spyan sngar zhal bzhes ltar:_gtor ma'i bshal chu bdud rtsi 'di gsol la:_rnal 'byor bdag cag 'khor dang bcas pa yi:_'gal rkyen kun sol mthun rkyen yid bzhin sgrubs:_gangs can phyogs bzhi'i mtshams kyi so kha srungs:_mtha' dbus 'gro kun bde zhing skyid pa dang:_thub bstan bshad sgrub 'phel ba'i phrin las mdzod:_ma ma d+hA ki nI ba liM ta khA hiH_bcu gnyis pa rta bro ni/_gtor gzhong kha sbubs pa ri rab tu gsal bas/_zhing bcu'i log 'dren mnan par bsams la rdo rje'i rgyas btab ste/_hU~M:_sgrub la 'tshe ba'i dam sri sgab 'dre'i tshogs:_e dbyings bkug gzir lhun po'i phyag rgyas gdab:_srid pa spyi gnon rdo rje'i rta bro yis:_byang chub bar du mi ldang mnan par bya:_oM badz+ra kro d+ha ha ya gr-I ba hi hi hi hU~M phaTa?:_ya ma dam sri s+t+wa~M b+ha ya e laM nan:_bcu gsum pa dngos grub blang ba ni/_byin rlabs sngon du 'gro bas/_gtang rag mchod bstod mdor bsdus ni/_hU~M:_bla med mchog gi mchod pa ni/_/ye shes lnga yi 'od zer 'phro/_/yul dang dbang po gnyis med pa/_/bde chen longs spyod chen por bzhes/_/oM AHhU~M badz+ra gu ru de wa DA ki ni sa pa ri wa ra ar+g+haM sogs nas/_shab+da ma hA pany+tsa rak+ta ba liM ta ta na ga na d+harma d+hA tu pU dza ho:_hoH_ye shes kun gyi khyab bdag che:_sku gsung thugs yon phrin las ston:_gcig dang du ma'i mtha' las 'das:_'od gsal rdo rjer phyag 'tshal bstod:_hoH_ye shes dkyil 'khor lha tshogs rnams:_dang por bsnyen cing bar du bsgrubs:_tha ma las kyi dngos grub che'i:_phrin las gsol ba'i dus lags na:_rtag rgyun shugs kyi thugs rje la:_bskul zhing gsol 'debs mi 'tshal yang:_gdul bya'i yul la 'jug pa'i phyir:_da lta thugs dam gnad nas bskul:_ma g.yel dgongs pa'i rtsal skyed la:_phrin las bzhi dang grub pa brgyad:_mchog tu mi 'gyur sku gsung thugs:_ye shes rdo rje'i dngos grub stsol:_kA ya wAka tsit+ta dz+nyA na karma sarba sid+d+hi pha la hoH_bcu bzhi pa nongs bshags ni/_hoH_don dam dbyings la bshags bya ma dmigs kyang:_kun rdzob bsnyen sgrub phrin las brtsams pa la:_lhag chad 'gal zhing 'khrul sogs nongs pa'i tshogs:_snying nas mthol bshags tshangs pa bstsal du gsol:_yi ge brgya pa brjod pas bshags/_bco lnga pa nyer bsdu ni/_ye shes pa rten la bzhugs su gsol/_dam tshig 'khor lo/_aH_'gag med rig rtsal rol pa'i dkyil 'khor pa:_rim gyis bdag thim 'od gsal stong nyid dbyings:_skye med spros bral ma bcos gnyug ma'i ngang:_spang blang spro bsdu bral ba'i ngang du bzhag:_a a a:_bcu drug pa snang cha lhar ldang ba ni/_oM AHhU~M:_slar yang chu las rlabs kyi phreng ba ltar:_dbyings rig rang shar phyag rgya gcig pa'i sku:_sgo gsum sku gsung thugs kyi srog ldan pas:_lha sngags chos sku'i spyod yul mchog la 'jug:_badz+ra ma hA mu dra kA ya wAka tsit+ta rak+Sha haM:_bcu bdun pa bsngo smon ni/_hoH_gnyis med byang chub sems kyi dkyil 'khor du:_dus gsum bsags pa'i dge tshogs ci mchis pa:_mkha' khyab 'gro ba'i don du bsngos pa'i mthus:_bdag gzhan mi gnas ye shes myur thob shog:_bco brgyad pa shis brjod ni/_oM/_spang rtogs phrin las mthar phyin rdzogs sangs rgyas:_zhi bsil bdud rtsi'i char 'bebs dam pa'i chos:_rig grol yon tan rmad byung dge 'dun sdes:_'jig rten dge legs 'phel ba'i bkra shis shog:_rig 'dzin rtsal 'chang rtsa brgyud bla ma dang:_sgyu 'phrul drwa ba'i skur snang yi dam lha:_rnal 'byor grogs mdzad gnas gsum mkha' 'gro yis:_dngos grub dpal 'byor rgyas pa'i bkra shis shog:_shin tu zhi ba chos sku'i dbyings nyid las:_rig pa rang shar bde chen longs spyod rdzogs:_gang 'dul 'gro ba'i don mdzad sprul pa'i sku:_dbyer med mngon par byang chub bkra shis shog:_ces brjod pa'i tshig gis dge legs su bya'o/__/de ltar las kyi phreng ba 'di la brten nas tshes bcu'i dus mchod dang*/_dbang gi cho ga la nyer mkho tsam te/_sgrub pa chen po'i tshogs sgrub sogs bya bar 'dod na sgrub khog logs su gsal ba ltar nyams su blang bar bya'o/__/brgyud gsum bla ma'i zhal lung mtho ris klung*/_/mkhas grub gdengs can bye bas mchod pa yi/_/smin grol rin chen dbyig gi rgyun bzang 'di/_/chos spyan dri med mnga' la chos brin yang*/_/deng sang chos byed chos brgyad rba la g.yeng*/_/grags pa gling bu'i rjes 'gro ri skyes la/_/dngos grub 'dod dgu'i rin thang mi shes pas/_/nyes bshad gyer dbyangs tsam la rnying ma rloms/_/'on kyang sngon gyi las 'phro mi dman pas/_/rnam 'dren mchog gi bka' bzhin rjes dran te/_/sgrub pa'i mchod sprin chos gter 'dzin rloms pas/_/rnam dkar chos dbyings dang mnyam rgyas gyur cig_/spyir o rgyan sangs rgyas gnyis pa'i thugs sgrub bye ba phrag brgya thams cad dngos mtshan dang byin rlabs bsam gyis mi khyab kyang*/_slob dpon chen po'i zhal lung rtsod pa med pa gsang ba snying po'i shin tu gsang ba man ngag gi snying po lta ba'i phreng ba'i dgongs don rgyud las lung du bsdebs pa'i sgrub thabs snying po skor lnga zhes bka' gter zung 'jug gi zab chos/_pad+ma'i bka' srol 'dzin pa rnams kyi gces spras su mdzad pa'i pha nor/_mtshungs pa med pa yin phyir 'di la dbang dang*/_sgrub thabs/_khrid yig rnams gal che bas bris zhes 'jam mgon mkhas grub kyi dbang phyug 'jam dbyangs chos kyi blo gros kyi zhal snga nas zab gsang bdud rtsi'i nying khu'i smin grol yongs rdzogs zhib rgyas su bstsal zhing*/_rje gong ma'i phyag bsnams li yi maN+Dal rin po che'i tshom bu bkod pa dang*/_sku gsung thugs rten bcas dmigs bsal du bka' bstsal ba bzhin/_spyi brtol bskyed de rang blos gang dpog tu bris nas spyan bstar zhus pa dgyes pas bzhes te bri bsnan gang 'os mdzad zin kyang*/_rtsod dus kyis 'gyur bas dpe yang gron pa la/_bal yul rang byung gi chos sku'i mchod sdong chen po'i drung zhe chen bstan gnyis dar rgyas gling gi 'dus sde gsar bskrun skabs mthong grol gu ru rje 'bangs dang bcas pa'i gtsug lag khang du dus mchod tsam btsugs pa'i nyer mkho ru dmigs te slar yang chog khrigs su bsdebs pas 'brel tshad sku lnga lhun grub bde gshegs smin pa rgya mtsho'i ye shes kyi dbyings su byang chub pa dang*/_gter mdzod spyan lam du phab pa rnams nas rang nor gyi rin thang rang gis mkhyen par phrin las spel ba'i zhu bskul du snyigs dus kyi sangs rgyas rig 'dzin rtsal 'chang yab sras kyi ring lugs la rgyu mtshan shes pa'i dad pa thob pa sngags btsun 'gyur med theg mchog bstan pa'i rgyal mtshan gyis lcags rta smin zla'i dkar phyogs kyi 'phel tshes bcu la lho 'brug spungs thang bde mchog pho brang du bris pas yi ge gnyis pa'i mthun 'gyur grub sras pad+ma chos skyid dbang mos zhus pa bka' gter zung 'jug snga 'gyur snying po'i bstan pa la bya ba byed par gyur cig_/dge'o//__//mang+ga laM//
