DKR-KABUM-04-NGA-007-wylie

From Khyentse Lineage - A Tsadra Foundation Project

Template:WyliePageHeader

<div class="wylie-content"


@#/__/rin chen gter mdzod chen mo spar du bskrun pa'i rtogs brjod 'jig rten gsum khyab lha yi rnga sgra zhes bya ba bzhugs so// @#/__/mdo rgyud mtshan nyid kun rdzogs mkhas shing grub/_/gsan bsam sgom pa'i yon tan pha mthar son/_/sangs rgyas dngos byon 'jam mgon rnam pa gsum/_/byang chub ma thob bar du rjes 'dzin mdzod/_/mtshan dpe'i pad+mo mjal ba'i skal dman yang*/_/bla ma'i drin las gsung gi bdud rtsi'i bcud/_/myong ba'i skal bzang thob pa'i drin gzo'i phyir/_/rnam dkar phra mo bgyis pa'i rtogs brjod spel/_/de yang nges pa'i don du srid rtsa'i 'ching ba kun nas grol pa'i sangs rgyas rnams kyang gzhan don 'ba' zhig la dgyes pas sprul pa'i rnam rol du mas zhing kun tu rtse zhing rgyu bas/_rgyal bstan rin po che'i snang ba yang rgyas zhing 'phel ba'i ngo mtshar rgyun mi 'chad du ston pa las/_rtsa gsum rgyal ba rab 'byams spyi dang khyad par gsung rdo rje 'od dpag med rig 'dzin gyi 'khor lo'i bsgyur ba'i rnam par bzhengs pas/_sku tshe gcig gi steng rdo rje theg pa'i dgongs spyod rgya mtsho bla na med pa rdzogs pa'i tshul bstan pa'i khyab bdag srid zhi'i spyi dpal chen po he ru ka dang gnyis su med pa gang*/_rje btsun brtan pa'i 'khor lo bsil ldan bod kyi yul du mi'i rje bo sa yi tshangs pa'i rigs kyi thig ler byon nas/_sngon gyi smon lam dang thugs bskyed 'gran zla med pa'i bsod nams kyi gzi brjid rgyas pa'i mgron du khug ste/_rdo rje theg pa'i chos kyi gsang mdzod brdol nas/_rje 'bangs stangs dpyal rdo rje'i rigs can thams cad rdo rje bzhi yi dkyil 'khor du gtor blugs kyi cho gas smin grol chig rdzogs su gyur te nam mkha' gang ba'i rig 'dzin dang mkha' 'gro'i tshogs chen po'i dbus su khams gsum chos kyi rgyal po'i rgyal thabs la 'dzegs/_grub pa'i mchog rnams dang gnyis su med pa'i go 'phang brnyes/_gsang ba rgya mtsho'i lde'u mig phyag tu son/_chos kun ye shes kyi rol rtsed du gzigs pa'i chos rgyun gyi ting 'dzin la dbang 'byor pas phrin las dang dngos grub 'dzad pa med pa'i theg pa mchog gi rgyal khab la dbang bsgyur ba'i 'og min rdo rje dbyings dang gnyis su med par gyur pa'i tshe/_'phags pa'i rnam thar ni gzhan la phan pa kho nar gyur/_ma 'ongs phyi ma'i 'dul skal ji ltar yod pa sgrib med du mkhyen/_snang srid zil gnon gyi brtul zhugs grub pas/_'khor ba myang 'das sems can sangs rgyas su tshegs med pa yud tsam gyis bsgyur bar bzhed de/_bod dang bod chen po'i ljongs 'dir rnyogs pa lnga dang ldan pa'i dus kyi char/_dus gsum byon pa'i mkhas grub kun dang rnam thar mtshungs kyang che ba'i yon tan 'gran zla dang bral bas rgyu skar gyi dbus na chu shel dbang po'i bdud rtsi'i lang tsho mog por byed pa'i dge mtshan shar nas/_bod yul skal pa dge ba'i dus kyi mkhan slob chos gsum gyi mdzad pa'i me ro rming nas gsos te/_sa yi gzer thams cad bshad sgrub rgyas pa'i gtsug lag gi bkod pas mdzes par/_mdo sngags dge 'dun gyi sde gnyis mkhas grub kyi tshang brdol/_khyim na gnas pa kun kyang lha sngags kyi rnal 'byor la yid gzhol ba sogs rig 'dzin gyi rjes su slob/_lha klu mi dang mkha' 'gro'i gnas na bzhugs pa'i rgyud kyi glegs bam rnams dgongs pa'i rtsal dang brtul zhugs kyi nus pas dbang du bsdus nas bsgyur bshad nyan gsum gyis gtan la phab/_rig 'dzin lha dang DA ki'i 'du bas gangs brag ri mtsho thams cad gu ru rje 'bangs bcas pa'i sgrub gnas kyi sgo 'phar gsar du phye/_chos nor rdzas kyi gter kha gsar du spyan drangs pas snyigs ma'i bstan 'gro'i dbugs dbyung bas nag phyogs zil gyis mnan pas nad mug mtshon gyi tsha ngar bcag_/dkar phyogs kyi ru mtshon bsgrengs pas bstan pa rin po che'i mnga' thang rgyas pas phyogs kyi go skabs dog por byas pa'i tshe/_de bzhin gshegs pa rnams kyis ston 'khor dgongs pa gcig pa'i dbang bskur/_rdo rje btsun mo rig pa'i lha mo rnams rtse dga'i bde bas snyems/_rig 'dzin grub pa rnal 'byor gyi dbang phyug mkhas pa'i dam pa rnams kyis/_e ma khyod ni khams gsum chos kyi rgyal po'i rgyal thabs la rang stobs kyis 'dzegs nas/_mkhyen brtse nus stobs kyi chos kyi 'khor lo'i bsgyur ba zhig go_/zhes snyan pa'i gling bu snyan 'jebs su sgrogs pas sa gsum kun tu dge bar mdzad pa'i phyag bzhes rgyal bstan rin po che dbyig gi snying po nor bu'i tog gi blo gros zhes lha klu mi'i chos rnams kyis gtsug phud du bcings ba 'bum gyis mi mtshon pa'i mdzod chen rnam pa lnga yan lag dang bcas pa rnams ni kha ba'i ljongs 'dir mchis so cog gi mdo sngags kyi gdams pa tha dad pa/_mkhas grub tshad ma'i skyes bu'i brgyud pa gzhan dang gzhan las 'ong ba/_yul sna tshogs su 'thor thabs su spyod pa/_'ga' zhig mi mngon pa'i dbyings su nub la phyogs pa dag kun nas dka' ba med par 'dod dgur spyod pa'i pha nor khyad par can 'di dag gis rgyal ba'i phrin las kyi mtha' dang gnas tshad ma rdzogs par rgya gar dang mtha' yi rgyal khab thams cad du yang mdzod lnga yan lag dang bcas pas thog drangs ris med mkhas grub du ma'i legs bshad nor bu'i phreng ba dag rang nor gzhan la bcol ba rang gis len pa bzhin spyod du yod cing*/_de 'dzin gyi skyes bu chos spyan dang ldan pa 'tsho zhing gzhes pa'i ngo mtshar gyi rten 'brel phun sum tshogs pa'i tshe/_rgyal ba'i phrin las gzugs can du byon nas 'gro la blang dor gyi mig 'byed pa'i yi ge'i glegs bam bskrun na rang gzhan gyi don gnyis sgrub pa'i rnam dkar rmad du byung ba dang*/_bstan pa rin po che'i zhabs tog_/khyab bdag bla ma rnams kyi sku drin gso ba dang*/_zhabs brtan/_rang la sangs rgyas dngos byon mkhyen brtse rin po che'i mtshan mchog yid bzhin nor bu spyi bor thob kyang rang gshis ngan pas bstan 'gro'i zhabs tog mi 'grub pa'i steng*/_mtshan mchog de la bsten nas nyams chag mang po bsags pa'i bshags sbyang dang*/_rang gi gter chos yin pa skad rnams kyang mkhyen brtse'i zab gter gyi cha shas yin pa'i zol zog gi sgrib sbyang dang*/_bza' btung kham re zos pa yang dkor nag kho na las ma 'das pa'i sgrib sbyang*/_khyad par gsang ba zab mo'i mnga' bdag rigs kyi bdag po rnams kyi skye kun rjes su bzung zhing gsung gi bdud rtsi la spyod pa'i skal bzang can du gyur pa'i smon lam 'debs phyir rin chen gter mdzod 'phrul spar du bskrun skabs legs tshogs mthun sbyor gyi gtso bo lho ljongs chos kyi rgyal po 'jigs med sang+ge dbang phyug_/rgyal yum skal bzang chos sgron yum sras dang*/_rgyal yum sku bgres phun tshogs chos sgron dbus/_blon 'bangs che phra thams cad dang*/_sngon gyi smon lam stobs su gyur pa'i a ri'i nang chos khyab spel gyi blon chen rgyu mtshan shes pa'i blo gros kyi mig stong bkra ba ljin 'jam dbyangs rnam rgyal/_khams bod 'brug 'bras kyi nang blon/_gzhan yang dad ldan sbyin bdag khag nas rnam dkar gyi 'brel mtshon phul rigs/__!__rang slob rnams nas dad blo kho nas zhabs tog zhus pa lo gsum gyi nang grub pa ste de dag gi skabs 'gro song sogs kyi grangs ni smos ma dgos par shugs kyis rtogs par sla zhing*/_dus kyi tha ma rgyal bstan spyi dang bre brag shin tu nyag phra ba'i skabs sangs rgyas kyi phrin las nam yang dus las yol ba med cing*/_khyad par snyigs 'gro spyi dang gangs can bod kyi 'gro ba la sangs rgyas las kyang bka' drin che ba o rgyan chen po'i thugs bskyed dang phrin las rmad du byung ba zab gter gyi bstan pa/_ma 'ongs sangs rgyas byams pa'i phrin las kyi nyin byed ma shar bar dus las yol ba med par rdo rje'i lung bstan du ma nas 'byung ba bzhin/_da skabs mthong ba'i chos la rten 'byung gi skya rengs dang po gangs can mkhas grub rgyu skar gyi dbus na nyi zla ltar 'dzam gling yangs pa'i tha grur grags pa mkhyen kong mchog gsum gyi bka' yi bsdu ba/_dbang lung gi 'chad nyan gyis bshad sgrub las gsum zla shel bdud rtsis reg pa'i chu gter ltar 'phel zhing*/_rje btsun bla ma dag gi thugs sras grub mtha' ris med pa'i skyes chen rnams kyis thugs bskyed dang phrin las rmad du byung ba'i bka' drin las/_khams bod bka' brgyud kyi gdan sa che shos dpal mtshur gnyis su shing par bzhugs pa'i rten 'byung gi rgya bal 'bras 'brug phyi rgyal khag tu chos gter gyi nyin byed 'gog med 'char ba'i rten 'brel gyi sgo 'phar dngos su phye ba'i me ro yongs su gso ba'i thugs bskyed kyi go cha dil mgo mkhyen brtse'i sprul skur grags pas lhur blangs te glegs bam brgya phrag gcig dang bcu gcig gi grangs ldan legs par grub pa ste/_rnam dkar bgyis pa'i phan yon dang dam pa'i chos 'dzin pa ni byang chub sems dpa'i bzang po spyod pa'i smon lam rdzogs par gsungs pas rgyas par mdo rgyud rnams la gzigs pas khyab pa'o/_/lhag bsam a shwa ta yi sa bon las/_/chos mchog sngon med ljon bzang 'di 'khrungs pa/_/rgyal bstan lha dbang 'dun sa mdzes byas nas/_/mkhas grub gzhon nu'i rtse dgas rol gyur cig_/zab gter sna res dus kyi rgud pa sel/_/rdo rje'i lung gis bsngags pa don gnas phyir/_/mi srun snyigs ma'i skal ngan bzlog nas kyang*/_/bstan 'gro'i dge mtshan rgyas shing brtan gyur cig_/sangs rgyas las kyang bka' drin che ba yi/_/mtsho skyes rgyal ba'i mdzad par log rtog gi_/dam sri'i ngan g.yo rnam dkar 'dis bsal bas/_/kun kyang ma hA gu ru'i gdul byar shog_/bcud mchog 'phrog byed lus bzang bdud rtsi'i zas/_/snod bzang sa yi zla bas bzung nas kyang*/_/dbang rnon chos rjes 'brang ba'i dad gus kyis/_/srid pa'i mthar yang 'dzin spel srung bar shog_/bka' gter mdo sngags rin chen lhun po'i rtser/_/mchog dngos bskyed rdzogs grub pa'i sum rtsen khab/_/thun mong las bzhi'i bang rim rnam bkra ba'i/_/srid zhi'i nyer 'tsho mchog 'di rtag brtan shog_/de 'dzin skye kun zhabs brtan bzhed pa 'grub/_/bshad sgrub las kyi 'khor lo'i thub bstan gso/_/'gro kun yid kyi 'jug pa chos phyogs su/_/gzhol bas phan bde'i dga' ston 'phel rgyas shog_/bdag dang 'brel bcas gu rus rjes su bzung*/_/'og min pad+ma drwa ba'i mdun sar tshogs/_/gsang chen chos kyi dga' ston mi zad pas/_/zab rgyas 'di 'dzin spel dang sdud par shog_/dpa' chen byang chub sems dpa'i spyod pa kun/_/dam chos 'dzin srung spel la rdzogs pas na/_/rnam dkar las 'dis rigs gsum rgyal ba yi/_/gsang ba mi zad dpal dang ro gcig shog_/bkra shis mkhan slob chos kyi rgyal po yis/_/bkra shis gangs can bstan 'gro'i dpal spel ba'i/_/bkra shis nyi ma nam yang nub med pa'i/_/bkra shis rtag khyab lhun gyis 'grub gyur cig_/ces pa'ang legs byas de nyid mthar phyin pa'i tshe rnam dkar bgyid pa po 'gyur med theg mchog bstan pa'i rgyal mtshan gyis lho 'brug mtha' yang 'dul gyi gtsug lag khang spa gro skyer chu'i gnas su nyung ngu'i ngag gis brjod cing smon pa bzhin 'grub pas rang byung sangs rgyas dpal pad+ma'i snying po'i bstan pa la bya ba mchog tu byed par gyur cig_/sarba mang+ga laM/_dge'o/_/