DKR-KABUM-02-KHA-049-wylie
<div class="wylie-content"
@#/___/na mo shAkya mu na ye/__ston pa thub pa'i dbang po'i mdzad pa bcu gnyis ni/__rgyal tshab byams mgon gyis/__chos kyi sku las ma g.yos bzhin/__/sprul pa'i rang bzhin sna tshogs kyis/__/skye ba mngon par skye ba dang*/__/dga' ldan gnas nas 'pho ba dang*/__/lhums su zhugs dang bltams pa dang*/__/bzo yi gnas la mkhas pa dang*/__/btsun mo'i 'khor dgyes rol pa dang*/__/nges 'byung dka' ba spyad pa dang*/__/byang chub snying por gshegs pa dang*/__/bdud sde bcom dang rdzogs par ni/__/byang chub chos kyi 'khor lo dang*/__/yongs su ma dag zhing rnams su/__/mya ngan 'da' bar ston mdzad rnams/__/zhes gsungs pa ltar/__dang po lha yul dga' ldan du lha'i bu dam pa tog dkar po'i skye ba bzhes te dzam bu'i gling du gzigs pa rnam pa lngas gzigs te 'pho bar dgongs nas rgyal tshab byams pa la rang gi dbu rgyan gsol nas/__dam pa tog dkar gyis dung bus/__lha gzhan gyis rol mo dkrol bas dung gi skad kyis rol mo thams cad kyi sgra zil gyis mnan pa ltar dzam gling du mu stegs dang bdud thams cad zil gyis mnan par lung bstan/__lha rnams la 'chi 'pho sbyangs ba'i chos bstan to/___/gnyis pa sa ga zla ba'i tshes bco lnga la glang po thal kar gyi tshul gyis yab rgyal po zas gtsang ma'i rgyal khab ser skya'i gnas su yum sgyu 'phrul ma gso sbyong la gnas pa'i glo g.yas pa nas lhums su zhugs nas lhums gzhal yas khang du byin gyis rlabs nas lha rnams la skye ba rnam par sbyangs ba'i chos bstan/___gsum pa sku bltams pa ni/__lum+bi ni yi tshal du yum sgyu 'phrul phyag g.yas pa shing glag sha'i yal ga la bzung ba'i rtsib log nas byon pa/__lha'i dbang po tshangs pa dang*/__brgya byin gyis dar gyi stegs las blangs shing phyogs bzhir goms pa bdun bdun phebs te/__nga ni 'jig rten 'di na mchog yin no/___/zhes gsungs pas zhabs gang du reg par me tog re re skyes/__nam mkha' nas lha dang klu'i khrus gsol/__drang srong gis ltas brtags pas sangs rgyas su 'gyur bar lung bstan/__lha mchod par phebs pas lha'i sku gzugs bsu bar phebs pas lha yi lha zhes grags/__pad spungs mchod rten yab rgyal po zas gtsang mas bzhengs par grags/___bzhi pa bzo yi gnas la mkhas par mkhyen tshul ni/__yi ge 'bri klog mkhan po las rang nyid lhag par mdzad/__lus kyi sgyu rtsal mda' 'phangs bas/__shing ta la bdun/__lcags slang bdun/__lcags kyi pha gu bdun la mda' brgyabs pas/__dga' bo dang lhas sbyin gyis thams cad ma phigs/__gzhon nu don grub kyis thams cad phigs pa'i pha rol du sa la mda' zug pa las chu yan lag brgyad pa brdol/__glang chen lhas sbyin gyis thal lcag gis bsad/__dga' bos pang du blang ste rgyang ring du dor/__gzhon nu don grub kyis zhabs kyi mthe bos glang po'i mjug ma nas bzung ste 'phangs bas ra ba bdun/__'obs bdun 'das pa'i pha rol rgyang ring du 'phangs ba sa la gshong byung bas glang po'i gshong du grags pa sogs rdzu 'phrul drug cu rtsa bzhi la 'gran bral du grags/___lnga pa btsun mo'i 'khor la rol pa ni/__shAkya lag na be con gyi bu mo sa mtsho ma 'khor nyi khri/__grags 'dzin ma 'khor nyi khri dang bcas khab tu bzhes te btsun mo bsten par mdzad do/___/drug pa khab nas nges par 'byung ba ni/__skyed tshal du phebs pa'i pho brang gi sgo bzhi nas skye ba/__rga ba/__na ba/__shi ba'i ro rnams gzigs pas rgyal srid la thugs skyo ba'i tshul mdzad/__rab tu byung ba gzigs nas dben par gshegs su chas pa la/__pho brang gi sgo rnams dmag gis nyin mtshan kun tu bsrungs kyang btsun mo rnams mnal ba'i tshe chibs pa sngags ldan gyi rkang pa bzhi rgyal chen bzhis btegs/__lha'i dbang po'i kha lo pa byas te 'dun pa bcas nam mkha'i dbyings nas gshegs te mchod rten rnam dag drung du byon nas dbu skra bsil ba lha'i dbang pos khyer te lha yul du mchod rten bzhengs/___bdun pa dka' ba spyad pa ni/__phyi rol pa'i drang srong ring 'phur dang*/__lhag skyobs las 'jig rten gyi bsam gtan bslab tshul gyis chu bo nai rany+dza'i 'gram du lo drug la nas 'bru re dang*/__chu thigs pa re gsol nas bka' ba spyad pas mnyam par bzhag__/phyugs rdzis snyan du lcags kyi thur ma 'dzugs pa dang*/__snyan du dung bus kyang mnyam bzhag tu bzhugs/___brgyad pa byang chub snying por gshegs pa ni/__phyogs bcu'i sangs rgyas kyis bskul te rdo rje gdan du byon par/__rtswa 'tshong bkra shis ldan las rtswa bzhes/__zhing pa'i bu mo legs skyes mas ba nyis stong bzhos pa'i 'o ma'i nying khu bzhes pas sku lus gser gyi mdog tu gyur/__lha'i dbang po rngon pa'i tshul gyis na bza' chos gos phul ba bzhes te byang chub shing drung du rtswa ku sha'i gdan la bzhugs/___dgu pa bdud btul ba ni/__bdud kyi gnas su ltas du mas bskul bas ston pa sangs rgyas par shes nas/__dga' rab dbang phyug rngon pa'i tshul gyis sangs rgyas pa'i rgyu mtshan dris pas/__sa yi lha mo brtan mas dpang por mdzad pas pham/__bdud kyi bu mo rnams rgyan dang lang tshos bslu bar brtsams pas rgan mo'i gzugs su bsgyur nas pham/__dmag gi dpung sbran te mtshon cha'i char phab kyang me tog gi char du bsgyur te pham pas gnod pas brdzi ma nus so/___/bdud 'dul mchod rten bzhengs/__bcu pa rdzogs pa sangs rgyas pa'i mdzad pa ni/__bcu pa sa zla'i tshes bco lnga'i tho rangs la mngon par rdzogs par sangs rgyas te mnyam bzhag gis zhag bdun phrag bdun du bzhugs pa la/__lha'i dbang po brgya byin gyis dung*/__tshangs pas gser gyi 'khor lo phul nas chos 'khor bskor bar bskul te zhal gyis bzhes/__byang chub mchod rten bzhengs/___bcu gcig pa chos 'khor bskor ba dang cho 'phrul gyi mdzad pa ni/__wA ra NA sir phebs pa seng ge'i khri stong byung ba gsum la g.yas su bskor te/__bzhi pa'i steng rang nyid bzhugs nas 'khor lnga sde dang*/__lha brgyad khri la bden bzhi'i chos 'khor dang po bskor/__gnyis pa bya rgod spungs rir 'khor lo bar pa/__gsum pa lha mi'i gnas su 'khor lo tha ma bcas nyan rang byang sems kyi 'khor la bskor/__ston pa sku 'khrungs nas zhag bdun gyi steng yum mya ngan las 'das pa sum cu rtsa gsum du skyes par drin lan bsab pa'i mdo gsungs nas dbyar gnas gcig bzhugs nas/__dbyug zla'i tshes 22la rin po che'i them skas las mi yul du bab pa dang*/__mnyan du yod par/__rta pa zla ba'i tshes gcig nas bco lnga'i bar cho 'phrul mi 'dra ba res gdul bya mtha' yas pa'i don mdzad/___bcu gnyis pa mya ngan las 'das pa ni/__sku dngos kyi mdzad pa rdzogs te rtswa mchog grong du phebs nas shing sA la zung gi drung du seng+ge'i nyal stabs kyis bzhugs nas mya ngan las 'da' bar mdzad/__sku gdung me rang bzhes kyis ring bsrel mang du bzhag par mdzad pas skye dgu bsod nams kyi dpal 'phel zhing rgyas par mdzad pa'o/___/mang+ga las so/ !___rgyal ba sras dang bcas pa'i ye shes kyi spyi gzugs rje btsun 'phags pa 'jam dpal dbyangs la yid ches kyis bstod pa snyan tshig rgya mtsho'i sgra dbyangs zhes bya ba bzhugs so/___na mo gu ru many+dzu g+ho Sha ye/__sras bcas rgyal ba'i zag med ye shes sku/__/mtshan dpe'i dpal 'bar tshangs dbyangs gsung snyan sgrogs/__/zab gsal mkhyen gnyis bsam mi khyab pa'i thugs/__/ngo mtshar dpag yas 'das la gus bstod bgyi/__/gzod nas mngon sangs rgyas kyang 'gro ba'i phyir/__/rgyal sras gzhon nu'i mtshan dang sku'i bkod pas/__/phyogs dus rab 'byams zhing na snyan grags pas/__/phan bde zad mi shes pa rtag tu ster/__/khyod mtshan dran dang rigs pa'i sngags bzlas pas/__/mi zad blo gros spobs pa'i mchog stsol zhing*/__/srid dang zhi ba'i dpal kun stsol ba la/__/bsnyel ba med pa'i go cha rtag tu bzhes/__/dmar ser mdangs kyis sku mchog blta na sdug__/ye shes ral gri srid rtsa gcod phyir phyar/__/ut+pal glegs bam phyag g.yon mdzes bzhin du/__/zhabs zung skyil krung mi g.yo'i tshul gyis bzhugs/__/gzhon mdzes ut+pal gsar pa'i dri bsung gis/__/rkang drug kun tu dga' ba'i mchog ster bzhin/__/khyod spyan brtse bas g.yo ba'i 'phrul gyis kyang*/__/yid la mi zad blo yid dpal sbyin pa/__/'dzum pa'i mchu sgros bim pa ltar dmar las/__/tshangs dbyangs gsung gis bdud rtsi'i dpal stsol mdzad/__/mdzes sdug rdzogs pa'i zhal gyi dkyil 'khor ni/__/nyin mor byed bzhin yid kyi mun pa sel/__/mgon khyod thugs bskyed phrin las bsam mi khyab/__/nam mkha' bzhin du rab yangs kun la khyab/__/de las dge legs dpal gyi yon tan kyang*/__/dpyid kyi dga' pa'i char sprin bzhin du 'bebs/__/chos dbyings dang mnyam sangs rgyas kun gyi dpal/__/'jam mgon gsang ba gsum gyi rgyan bzhin mdzes/__/rje btsun zur phud lnga pa'i rnam thar gyis/__/sangs rgyas kun gyi mdzad pa mdzes shing ston/__/ye shes snang ba brgya pas mkha' khyab kyi/__/kun rmongs yid kyis mun pa sel ba'i dper/__/dbang sngon mdzes byed bcu gnyis bdag po yi/__/gzi brjid phreng ba tsam las med par nges/__/yid la kun dga'i sim ster zla ba dang*/__/srid zhi'i gdung ba sel ba'i dpyid kyi dpal/__/ci mchis mgon po khyod kyis phrin las dang*/__/thugs bskyed mtshon pa'i dpal du nye bar gnas/__/legs bris zas mchog mgon khyod thugs rje'i dpal/__/mtshungs zhes bda' dgu'i ro tsam ma yin te/__/gtan bde'i lang tsho thogs med sbyin pa'i mthu/__/'chi med bcud kyi len du gyur 'dis kyang*/__/sangs rgyas kun gyi thugs gsang dpal be'ur/__/ye shes sems dpa' gzhon nu'i lang tsho can/__/mtshar sdug cha shas rdzogs pa'i ut+pa lar/__/rkang drug mdzes par g.yengs dang 'byed chos dben/__/yid 'phrog kun dga'i tshal gyis blta na sdug__/gsal byed steng 'thung 'khri shing snyems ma'i tshal/__/rab 'byams zhing na 'jam mgon zur phud lngas/__/rnam thar bkod pa 'bum phrag ci yang gsal/__/mkha' dbyings stong pas snod bcud 'jig rten khams/__/'khyud ces snyems pas khengs 'os ci zhig mchis/__/rgyal kun yab cig thugs bskyed zhags pa yis/__/ma bcings yid can srid zhi'i khyon mi gnas/__/mtho ris bsod nams dpal gyi lha'i rnga sgra/__/gdul bya'i dbang po 'byed pa'i blo ldan na/__/ngag gi dbang phyug dgyes pa'i rol mo yis/__/zab rgyas chos tshul 'doms dang cis mi mtshungs/__/kun mkhyen ye shes me long snang ba yis/__/dus gsum shes bya gzigs pa rjes dran pas/__/dwangs shel dkyil 'khor gzugs brgya bkra ba la/__/dad pa'i kun rtog g.yo la chas snyam byed/__/lha dbang gtsug gi nor bu'i snang zer gyis/__/sum rtsen tha grur khyab pa'i dga' ba'am/__/yab gcig smra ba'i nyi ma'i dgyes zhal zer/__/bdag la 'phos pa ma phyed 'phyang mo nyug__/yid la dran pas phan bde'i dbugs 'byin zhing*/__/las nyon rnyogs pa bgrungs pa'i ke ta ka__/bdog pa'i chu gter 'phos pa'i de ma thag__/'jam mgon ye shes snang bar gcig tu nges/__/'jam mnyen phyag gi ral gris srid rtsa gcod/__/ut+pal mkhyen brtse'i dpal gyis sim pa ster/__/glegs bam bsnams pas chos kun de nyid ston/__/ye shes snang ba brgya pa'i dbus na mdzes/__/nor bu'i 'od kyis sa 'og mun sel zhing*/__/snang byed zung gis gling bzhi'i khyon khyab dang*/__/mtshungs pa'i snang ba 'bum 'byed dpal mchis na/__/ngag gi dbang po'i thugs rje'i snang ster mtshungs/__/mdzes sdug dpal dang yid la dga' ster zhing*/__/gzi byin snang ba'i 'od 'byed byed pa yis/__/'jam mgon smra ba'i nyi ma bsngags min te/__/dran pas thar grol pad+ma bzhad 'dis kyang*/__/rab 'byams zhing na rgyal dang de yi sras/__/bzang po spyod pa rgya mtsho'i rlabs phreng dang*/__/bdag yid ngag gi dbang phyug sems pa las/__/gnyis su 'byed chos btsal kyang rnyed mi srid/__/shes bya'i dngos kun gzigs pa'i blo ldan zhes/__/rgyal kun yab gcig thugs snyems mi 'tshal te/__/chos dbyings dang mnyam mgon po thams cad kyang*/__/ye shes gzigs pa'i spyan yangs mnga' zhes grags/__/gsung 'phro can/ !___bla ma chos sku tshe dpag med la bstod pa 'chi med rdo rje'i rnga sgra zhes bya ba bzhugs//__ka dag dbyings snang 'od mi 'gyur ba'i rtsal/__/kha sbyor bde chen yan lag bdun gyi gzi/__/ga bur 'dzin gcig tshe dang ye shes mthu/__/nga bdag bdud bzhi'i mun sel lha mchog rgyal/__/ca co rab spangs rgyal kun tshangs dbyangs gsung*/__/cha byad dkyil 'khor 'khor lo'i dbang phyug tshul/__/ja hang thun mtshams sprin mtshungs mtshan dpe'i sku/__/nya zla mkha' la mdzes bzhin rjes su dran/__/ta ma la mtshungs mi bskyod tshe mtha' yas/__/tha dad rigs kyi 'khor lo'i bsgyur ston pas/__/dA na A yu rigs lnga'i dngos grub dkyil/__/na rga skye 'chi'i chu bzhi sgrol la bsngags/__/pa sangs 'char bas skya rengs sgo 'byed bzhin/__/pha mtha' yas pa'i dngos grub rgya mtsho'i dpal/__/ba mchog bzhin 'jo'i thog mar rdo rje'i tshes/__/mA ra'i 'jigs skyob 'chi med mgon du grags/__/tsa ko ra glu'i dpyid kyi dga' ba'i char/__/tsha grang gdung sel lhan du 'bod pa bzhin/__/dza d+nu'i rgyun bzhin rdo rje'i lang tsho'i dpyid/__/wa ler stsol ba'i dbang bcu'i phrin las rmad/__/zha rengs dang bral mi shigs d+hU ti'i klong*/__/za zi'i gzung 'dzin zhugs gnas thob pa'i mthar/__/'a 'ur skye 'chi med pa'i rdo rje'i sku/__/ya mtshan sbyin par byed po khyed gcig nges/__/ra ma Na yi snying stobs zil gnon mthu/__/la 'ur mtshan dang rig sngags bzlas tsam gyis/__/sha khrag nor dngos rdo rje'i srog sbyin pa/__/sa gsum sgron me'i khyod gcig bsngags min nam/__/ha ri'i dri bsung ngad ldang lho rlung bzhin/__/a ho gdod nas bde ba'i mchog ster mgon/__/a la la yi bstod pa'i me tog char/__/ha ha'i gad mo 'dzum bzhin phul ba'i mthus/__/i dam bsngags pa'i gling bu phra na yang*/__/u ma'i lang tsho'i cha yis sim byed bzhin/__/e ma sangs rgyas mthu stobs bsam mi khyab/__/o Di'i ming can bdag la stsol rgyur smon/__/bsngags brjod kyi rab byed dang po'o/ !___bla ma longs sku 'gro 'dul thugs rje'i dbang phyug la bsngags pa thugs rje'i bdud rtsi'i sprin sgra zhes bya ba bzhugs/__ka ru Ni ka'i chu shel sprin mdzes gter/__/kha ba ri pa'i gdul bya la chags pas/__/ga bur dbang po lta bu'i mtshan dpe'i mdangs/__/nga cag lhag pa'i lha gcig dang bas bsngags/__/ca co'i smre sngags 'don pa'i ngan 'gro'i gnas/__/cha byad sdug bsngal can la lhag par yang*/__/ja bzang bcud bzhin sim byed phrin las char/__/nya zla'i bdud rtsi'i zil ltar thugs rje'i spro/__/ta thA ga ta rkang gnyis gtso kun gyis/__/tha tshig 'gro ba sgrol ba'i phrin las sgo/__/dA na'i zas bzhin mgon po khyod bsngags pas/__/na gzhon lang tsho'i rgyan bzhin bdag gir bzhes/__/pa sangs shar rir chas las rab dkar 'od/__/pha mtha' brdal ba'i zhing khyab gangs chen mtsho'i/__/ba spu rer yang zhing dang ston pa'i tshul/__/ma lus ngo mtshar bkod pa bgrang yas ston/__/tsa tur phyag gis thal sbyar pad dkar phreng*/__/tsha grang rigs drug 'gro la rjes brtse'i spyan/__/dza ya bskal bzang 'dren mchog 'khor bsgyur stong*/__/wa ler rnam 'phrul ston pa gangs can lha/__/zhwa ltar brgyud mar 'khyil ba'i 'khor mtsho'i 'gro/__/za ma tog tu bcug ltar thugs rjes bzung*/__/'a 'ol tsam min mtshan dang rig sngags sgras/__/ya mtshan mngon mtho nges legs dpal la sbyor/__/rwa ltar gshis ngan sha za srin mo yang*/__/la 'ur byams pa'i bdud rtsis sim mdzad nas/__/sha sha d+hA ras 'od 'phel ku muta bzhin/__/sa lam yon tan mchog la ngal gso sbyin/__/ha lo'i me tog ltar mdzes dad mos kyis/__/a ho spro dga'i thal mos khyed bsnyen phyir/__/a la la zhes bstod pa'i gling bu yang*/__/ha ho ngoms pa'i sems kyis bstod 'dis kyang*/__/i shwa ra sogs che rgu'i tshangs gnas tog__/u dA d+hi bzhin gsang gsum bdud rtsi'i gter/__/e ma ngo mtshar dad pas legs mchod nas/__/o Di yA na'i ston pa mchog bzhin mdzod/__/bsngags brjod kyi rab byed gnyis pa'o/ !___bla ma sprul sku snang srid zil gnon la bsngags pa byin rlabs rdo rje sgra dbyangs zhes bya ba bzhugs so/___ka ma la yi 'dab brgya'i 'khri shing rtser/__/kha dog lnga ldan ye shes dwangs ma'i bcud/__/ga bur ltar bsil sin+d+hU'i dwangs mtsho ru/__/nga cag gdung sel pad+ma 'byung gnas rgyal/__/ca co rab mang srid pa'i chu bzhi brgal/__/cha shas yongs rdzogs zhi ba cher sim kyang*/__/ja hong mtshams sprin thar pa'i rgyal mtshan 'dzin/__/nya zla ltar mdzes shAkya seng+ger 'dud/__/ta na ga na rdo rje'i gsang spyod kyis/__/tha mal las 'das ye shes gzi brjid che'i/__/da lta sku bzhi'i dbang bsgyur rnal 'byor che/__/na chung DA ki'i tshogs rje nyi ma 'od/__/pa ra mi ta'i sa bcu'i yon tan gyi/__/pha mthar son pa'i tshogs gnyis nyin byed kyis/__/ba glang ltar rmongs 'gro sgrol thabs mkhas kyis/__/ma lus skyong mdzad pad+ma rgyal zhes grags/__/tsa ko ra glus 'gran min chos kun spel/__/tsha zer brgya pas 'dab stong bzhin bkral nas/__/dza ya'i mdo sngags lam kun ston nus thugs/__/wa ler rab gsal blo ldan mchog sred grags/__/zhwa nye ltar lci'i mu stegs log par spyod/__/zwa ltar rab rtsub mthu stobs kyis bsgral nas/__/'a 'ur tsam min phan bde'i sar sbyor mthu/__/ya mtshan gsang bdag seng+ge sgra sgrogs rgyal/__/ra rib kun bral mkhyen brtse'i me long ngogs/__/la la tsam min spang rtogs yongs rdzogs dpal/__/sha mang ltar mdzes 'phags bod snyan pas khyab/__/sa gsum mgon gyur pad+ma saM b+har grags/__/ha lo'i me 'bras dang mtshungs mi srun sde/__/a la la yi gad rgyangs kyis bsgral nas/__/ha ri'i tshal dkyu stag mo'i steng 'gyings ba/__/a ho khro rgyal 'jig rten gsum 'dul grags/__/in+d+ra de wa la sogs che rgu yis/__/u rgyan mkhan po'i zhabs la gus btud bzhin/__/e ma bsngags pa'i gling bu phra mo yang*/__/o Di'i slob dpon rjes su 'jug des phul/__/bsngags brjod kyi rab byed gsum pa'o/ !___gu ru rgyal ba'i gdung 'dzin la bsngags pa bde stong dpyid kyi 'brug sgra zhes bya ba bzhugs so/___a haM zhu bde'i dpyid kyi dwangs ma'i gzugs/__/ha ho dga' bzhi'i bcu drug lang tsho'i dpal/__/a la la zhes sgeg 'dzum pad+ma'i tshal/__/ha ri'i dri bzhin sim ster mgon de rgyal/__/sa gsum yid kyi brtan pa 'phrog nus pa'i/__/sha khrag gdos bcas las 'das rdo rje'i sku/__/la lA ra sa d+hU tir thim pa'i gzugs/__/ra rib bral ba'i ston zla ltar bur mdzes/__/ya ma rA dza ltar 'khrugs brlang po'i 'gro/__/'a 'ur 'od dmar rlung zhags mchil pa yis/__/za ma'i yun tsam btab pas dag byas nas/__/zhwa ltar gtsug gis mchod pa'i dngos grub ster/__/wA ra hi yi mchog bde'i dpal sbyin bzhin/__/dza lan+d+ha rar rlung sems ngal 'tsho'i las/__/tsha zer brgya mtshungs rdo rje nyi ma'i zil/__/tsaN+Da lis bzhus bde chen bdud rtsi'i myos/__/ma la ya rlung reg byas sim ster bzhin/__/ba mchog 'dod 'jo rin chen bum bzang gter/__/pha mtha' yas pa'i dngos grub bdud rtsi'i skyes/__/pa sangs 'dzum bzhin stsol la ngal ba med/__/na gzhon rigs bzang dpal gyi 'du ba yang*/__/da lta 'gugs shing srid zhi'i 'dod dgu'i bcud/__/tha tshig tsam gyis rang dbang bgyid pa'i mthu/__/ta na ga na'i rdo rje'i gseng lam grogs/__/nya zla'i zil gyis reg pa'i dag byed bzhin/__/ja hang mdangs can gtum mo'i mes bzhus pas/__/cha shas yongs rdzogs bde stong lhan skyes mdangs/__/ca re dbang yul gsal ba'i 'pho med sku/__/nga bdag dpyis 'byin gzhom bral rdo rje'i gsung*/__/ga ga'i dbyings ltar zab yangs ye shes dpal/__/kha tsam ma yin snying nas gus bstod mthus/__/kA ya wAka tsit+ta'i dngos grub stsol/__/bsngags brjod kyi rab byed bzhi pa'o/ !___bla ma smra ba'i seng+ge la bstod pa mtsho byung dpal mo'i sgra dbyangs zhes bya bzhugs/__kim pa'i 'bras mtshungs srid rtsa drung 'byin cing*/__/khu phyug ngag las snyan pa'i chos kyi sgras/__/ge sar rab rgyas blo yi pad+mo 'byed/__/ngo mtshar lam gyi yal 'dab rgyas mdzad rmad/__/ci 'di 'jam mgon dgyes pa'i lang tsho 'am/__/chu shel shar ri'i phrag las 'phos dpyad tshe/__/je zhig thar grol pad+mo bzhad ma thag__/nyo tshong rgyal bzhin lhag lhar nges pa rnyed/__/ti la ka dbus ye shes sems dpa'i tshul/__/thu bo khyod gcig bsnyen pa'i mod nyid nas/__/de wa tshangs pa'i blo yang zil gnon byed/__/nor bzang lta bu'i blo dang spobs pa bstsal/__/pi waM ltar snyan rgyal gsung zab rgyas mtshor/__/phu nu dga' bas 'phrad bzhin 'jug pa'i tshe/__/be phrug zho yis 'brang bzhin skyes sbyangs blo/__/mo rmongs pa mchan ha'i dri ma sel ba'i dga' ston sbyin/__/tsi na'i yul du dwangs bsil ri rtse lnga/__/tshu rol smra ba 'dul phyir mtsho byung lha/__/dze ta'i tshal du thub dbang nye ba'i sras/__/wo dzi has kyang rnam 'phrul brjod nus min/__/zhi bsil snying rje'i bdud rtsi srid mtshor 'jug__/zur ra bdud kyi ming skyes sogs 'dul la ya mA ri/__/'e zhes sras bcas rgyal bas khyod bsngags phyir/__/yo ga bdag kyang dbang med bstod bsngags sgrogs/__/ri dbang rtse bzhin rmad byung rnam thar 'phags/__/lu ma'i tshal bzhin byang chub spyod mtha' yas/__/she mong dar ba'i gdong lnga'i nga ro bzhin/__/so so rig bzhi'i spobs pa'i gter brgyad mdzes/__/hi ma la ngogs ston zlas reg pa dang*/__/u ma de wI'i lang tsho las lhag pa'i/__/e ma khyod tshul dran pas gus bstod na/__/ho zhes tshim pa mchog gi byin stsol kyai/__/a la la zhes rab dga'i ge sar ngogs/__/a ho'i bstod tshig bung ba'i zlos gar 'di/__/a dbyings zab gsal dbyer med 'jam pa'i dpal/__/a don rtogs pas mngon sum mjal gyur cig__/bsngags brjod kyi rab byed lnga pa'o/ !___gu ru skyes mchog tshul bzang la bsngags pa 'dod 'byung dbyig gi sgra snyan zhes bya ba bzhugs/___ka la ping+ka'i glu ltar shis pa'i tshig__/kha rdul me tog las lhag rnam dkar 'bras/__/ga bur sman gyis tshad gdung bzhin sel lha/__/nga yi skyabs gcig skyes mchog tshul bzang grags/__/ca re tshogs drug yul du yid 'ong rdzas/__/cha byad gos rgyan zas nor 'dod dgu'i dbyig__/ja chang sa gsum dpal 'byor phun tshogs gter/__/nya zlas skyong ba'i chu gter bzhin stsol mdzad/__/ta na'i nu ma myos bum rab sgeg dpal mo'i grogs/__/tha dad sa gsum srid zhi'i dge legs gter/__/dA na'i pha rol phyin pa'i 'bras bu las/__/na tshod gsar du bdo bzhin stsol la bstod/__/pa ra sid+d+hi lung rtogs rdzogs ldan sprin/__/pha mtha' yas pa'i zhing khyab phan bde'i las/__/ba mchog rin chen bum bzang dpag bsam tshal/__/ma lus dbyig kun khyod kyi mthu las snang*/__/tsan+dan nags las 'phos pa'i lho rlung gis/__/tsha gdung sel bzhin khyod mtshan lha dbang rngas/__/dza yan+tu zhes bskul bas che rgu'i tshogs/__/wa skyes ltar 'khum phyag gis 'dud par byed/__/zhwa nye ltar lci'i lnga bdo'i rgud pa yis/__/za 'dre yi dwags bzhin du rgud pa'i dbal/__/'a 'ol tsam min sel mdzad gnod gnas dbang*/__/ya mtshan rmad byung dpal stug grags pas lcid/__/ra lug rta nor rngog chags gcan gzan khyu/__/la klung khyab pa'i phyugs dang rin chen dbyig__/sha za gnod sbyin zas nor go mtshon dang*/__/sa gsum phywa g.yang dngos grub 'dod dgu'i snyems/__/hwag gi zas bzhin khyod mtshan nor bu'i tog__/a ho dgyes pas mchod pa'i de ma thag__/a ru'i sman bzhin rgud sel bdud rtsi'i skyes/__/a ho dgos pa chen po stsol la bstod/__/e ma mgon khyod dpal la yid dwangs bas/__/a dI ka dI'i phreng ba'i tshigs su bcad/__/u rgyan bla ma'i sgyu 'phrul la bsngags mthus/__/o DI'i grong bzhin grub gnyis myur stsol gsol/__/bsngags brjod kyi rab byed drug pa'o/_ !___rig 'dzin bdud kyi gshed chen la bsngags pa zil gnon rdo rje'i rngams sgra zhes bya ba bzhugs/___kI la ya yi rdo rje'i ye shes mtshon/__/khu 'phang char ldan sgra brgya'i nga ro dang*/__/ge sar dmag gi dpung bzhin bdud sde'i ngor/__/ngo mthon khrag 'thung rje btsan bzhengs la bstod/__/ci nas brlang por spyod pa'i las nyon klung*/__/chu lon dang mtshungs shugs sgrol phrin las kyis/__/je zhig ma yin dran pa'i mod nyid nas/__/nyo tshong rdzas las lhag ster khyod mthu rbad/__/tig ta'i ro bzhin ngan 'gro'i rgyu 'bras skyob/__/thu bo zhi bde'i dga' ston sug rtser ster/__/de wa lha min dregs ldan yongs kyi gshed/__/nongs pa'i tshogs 'joms dpa' bo'i dbang phyug bsngags/__/pi pi ling gi ro bzhin mthu stobs dbal/__/phung krol bskyed la lhag par rngams pa las/__/be phur btab bzhin bdud dgras mi g.yo ba'i/__/mo rgyud 'phrog byed zhal can rigs lnga ston/__/tsir gyi kha bzhin 'dzin shes mi gtong ba'i/__/tshu rol zhen pa'i 'gro la thugs rjes bzung*/__/dze ta'i tshal du ston pa'i zhi bsil bzhin/__/wo dzi has kyang de tshul brjod nus min/__/zhi ba phyogs gcig zhen pa dman pa'i thog__/zur gyis gnas ngan 'byams pa srid pa'i 'gro/__/'e zhes ma bskul na yang byang chub cher/__/yo byad thob bzhin bkod pa'i mthu stobs mnga'/__/ri klung 'byung bzhi'i lus srog bar gcod phyi/__/lu gu rgyud 'brel rtsa thig rlung gi gegs/__/she mong dar bzhin dregs pa'i gzung 'dzin bgegs/__/so sor 'dul bas lam gyi g.yang sa sgrol/__/ha ha bzhad pa'i khrag 'thung gad rgyangs kyis/__/a dbyings khams gsum yongs sgrol spyi dpal che/__/he ru ka dpal 'bar ba'i rgyal po cher/__/e ma rab gus dad brgya'i dpal gyis bstod/__/mang mang tshig gi sbyor ba ches nyung yang*/__/dad dad bcos min kun rtog gis bskul bas/__/gus gus sgo gsum g.yo zol med pa yis/__/yang yang bstod pas dgyes pa'i dpyid gyur cig__/bsngags brjod kyi rab byed bdun pa'o/ !___gu ru dzam gling rgyan mchog la bsngags pa bde chen bdud rtsi'i sgra dbyangs zhes bya ba bzhugs/__ka nas dag pa'i chos dbyings zhi ba'i lhums/__/kha dog dngos mtshan rdul bral rtag sim yang*/__/ga bur zhu bde'i dpyid bzhin bde mchog gzugs/__/nga bdag rtog bral he ru ka dpal dgyes/__/ca co'i tshig gis mi mtshon nam mkha'i dkyil/__/cha med kun 'gro srid zhi'i srog zhugs kyang*/__/ja bzang bcud bzhin brjod med ros myos pa'i/__/nya gang zla bzhin ye shes 'phel 'grib med/__/ta na ga na'i thabs shes rdo rje'i spyod/__/tha mal las 'das khyod dbyings 'jug phyir te/__/da lta ma 'ongs 'das pa'i dus kun tu/__/na rga skye 'chi'i zug rngu gzhar yang med/__/pa sangs shar ri'i phrag par chas pa bzhin/__/pha mtha' yas pa'i chos nyid nyin byed 'od/__/ba mor reg bzhin 'char bas kun nyon mun/__/ma lus bgrungs ba rdo rje'i de kho na/__/tsA ri reg pa med pa'i mchod rten bzhin/__/tsha grang srid zhi'i gdung zhi 'bras bu mchog__/dza lan+d+ha ra'i tog bzhin srid zhi las/__/wa ler rnam grol 'phags pa'i mnyam bzhag yul/__/zha nye ltar lci'i 'khrul snang rgyu dang 'bras/__/zwa ltar rtsub pa khyod dbyings ngal gsos pas/__/'a 'ol ra rib bzhin du sangs nas kyang*/__/ya mtshan de nyid rtogs pas rab tu zhi/__/ra ba srid pa'i grong las brgal 'dod na/__/la 'ur khyod kyi rdo rje gsum dbyings su/__/sha rkyang ri la rtsen bzhin 'jug byas pas/__/sa bcu dbu mar rdzogs pa'i ngal 'tsho ster/__/ha la lta bu'i dug lnga ye shes dbyings/__/a ho ma spangs dag pa'i ngo mtshar gyis/__/a don rnam med chos dbyings btsun mo'i klong*/__/ha cang sim pa'i dpal ster ngo mtshar la/__/hi ma la rir ston zlas 'khyud pa bzhin/__/he zhes dgyes pas bsngags pa phra mos kyang*/__/e ma legs byas chu gter mi zad pa/__/o rgyan mkha' spyod tshal du phyin gyur cig__/bsngags brjod kyi rab byed brgyad pa'o/ !___gu ru pad+ma 'byung gnas la bsngags pa bde stong rdo rje'i rang sgra zhes bya ba bzhugs/__e dbyings sin+d+hU'i dwangs mtsho pad+ma'i rtser/__/waM yig dga' ba brgyad zung mtshan dpe'i dpyid/__/ma hA yA na theg mchog ston pa'i rgyal/__/ya mtshan rdo rje'i skur bzhengs bla ma rgyal/__/a ho bsam mi khyab pa'i ye shes dbyings/__/ha ri 'jigs byed rlung gis mkha' nyul bzhin/__/a ho rab dga'i dad pas der phyogs tshe/__/ha cang bstod pa'i rab byed bstar la rengs/__/sa bcu dbu mar rdzogs pa'i bral smin 'bras/__/sha med 'od sku mkha' khyab rdo rje'i gzugs/__/la lA ra sa'i gnyis spang rtog bral gyi/__/ra rib rdul bral ye shes nyin byed 'bar/__/ya mtshan skye 'chi las 'das sangs rgyas gnyis/__/'a 'ol tsam min bde chen phrin las sgo/__/za zi kun bral grol ba drug gi lam/__/zha rengs bral bas gdul dka' yud kyis sgrol/__/wa skyes ltar 'khum las nyon 'dam bying la/__/dza ti'i me tog ltar mdzes thugs brtse'i 'phrul/__/tsha zer brgya pa'i gzi byin ltar 'bar bas/__/tsa rtsub spangs ba'i dge legs dga' ston sbyin/__/ma rig lhan skyes kun brtags 'khrul pa'i nongs/__/ba mo drod kyis bzhus bzhin khyod mthus bsal/__/pha rol srid mtsho brgal ba'i kun phan gter/__/pa sangs shar ba'i skya rengs bzhin 'char mdzad/__/na rga skye 'chi'i chu bzhi dbyings su bcad/__/dA na la sogs phar phyin yon tan rdzogs/__/tha dad byang chub chos sku pha mthar son/__/ta thA gA ta sku lnga lhun gyis grub/__/nya zla cha shas rab rdzogs bdud rtsi'i zil/__/ja hang a yi reg pas bzhus pa'i bde/__/cha shas bcu drug dga' ba'i dwangs ma'i dpyid/__/ca re mngon gsum mdzes sku'i dpal du shar/__/nga bdag 'khrul pa'i zug rngu'i tsha dbal dgra/__/ga bur sman chen bcud kyis 'joms pa bzhin/__/kha sbyor yan lag bdun gyi mnga' thang gis/__/ka dag chos dbyings khyab par snyoms zhugs mdzod/__/bsngags brjod kyi rab byed dgu pa'o/_ !___gu ru khyad 'phags rig 'dzin la bsngags pa 'gro 'dul thugs rjes sgra dbyangs zhes bya ba bzhugs/__kwa ye sngon smon khyung sngon skyes kyi mthus/__/kha ba'i ljongs su stobs bcu'i nyin mor byed/__/ga gar gdul bya'i dad bsod kyis drangs pa/__/nga yi skyabs gcig khyad 'phags rig 'dzin grags/__/ca co'i ngag dang mi srun lha 'dre'i gzugs/__/cha byad srin po lta bu'i mtha' 'khob yul/__/ja dar nor dbul pre ta pu ri'i zhing*/__/nya zla lta bu'i thugs rje'i bsil mdzad mgon/__/tA re srin mo'i tshul gyis shes rab er/__/tha mal spre'u'i tshul 'dzin 'phags pa'i waM/__/da gsung 'phros/_ !___lhag pa'i lha mchog bde gshegs sgrub bka' brgyad rtsa gsum zhi khro'i lha tshogs la bstod pa'i tshigs su bcad pa'i phreng ba gzhom med rdo rje'i glu dbyangs zhes bya ba bzhugs so/___chos kyi dbyings kun rgyas 'gengs pa'i/__/rab 'byams rgyal ba thams cad pa'i/__/zag med gsang ba bsam mi khyab/__/mi zad rgyan gyi 'khor lo'i bdag_1_/bde gshegs sgrub bka' rnam brgyad ces/__/bla med nang rgyud sde gsum gyi/__/yi dam yongs 'dus lha ru grags/__/nges gsang bstan pa rgya mtsho'i dbus/_2_/rin chen lhun po 'di gcig zhes/__/bsngags pa'i gling bu mi zad pa/__/pad 'byung rdo rje'i dbyangs kyis bsgrags/__/de tshul shes pa'i blo mtsho las/_3_/ring nas mchog tu dang ba'i sprin/__/dpyid kyi dga' ba'i dus nyid kyis/__/bskul las che ba'i me tog phreng*/__/snyan ngag sor mos mdzes bstar nas/_4_/rab dkar lhag pa'i blos 'bul na/__/ji snyed rgyal ba skyed mo'i tshal/__/nyul tshe mkhyen brtse'i nyin zer gyi/__/snang bas bdag blor legs sbyangs nas/_5_/dngos grub sbrang rtsi'i zil mngar 'bum/__/ci dgar 'jo ba'i dpyid gyur cig__/shis pa'i tshig gis mdun bdar te/__/bstod pa'i rgyud mang gsar pa zhig_6_/dga' dang gus pa'i gar dang bcas/__/'bul la rjes su brtse bar mdzod/ !___kun bzang dang po'i sangs rgyas la bsngags pa rang byung dbyangs kyi dpal mo'i gling bu zhes bya ba/__na mo gu ru d+harma kA ya sa man+ta b+hadra dz+nyA na ye/__sri zhi kun tu khyab pa'i ye shes ni/__/srid zhi las 'das chos dbyings zhi ba'i klong*/__/srid zhi thams cad bzang po'i gser bzhin du/__/srid zhi'i dpal du 'bar 'di e ma ho/_1_/'khor dang myang 'das yongs ye mi 'da' pa'i/__/ye shes nyag gcig klong du 'ub chub pas/__/mnyam rjes bral ba nam mkha' lta bu'i dbyings/__/'dus ma byas shing lhun gyis grub par bzhugs/_2_/de yi ngo bo zag med yon tan ni/__/nyi dang 'od bzhin rang gshis nyid gyur pas/__/'khor 'das mtha' bral mya ngan 'das chen po/__/mi slob 'bras bu'i mchog tu gdod nas dgyes/_3_/ye shes nyid la ye shes kyis gzigs pas/__/ji snyed dag dang ma dag chos thams cad/__/ma 'dres yang dag gzigs pa'i spyan stong bkra/__/ji bzhin nyid las nam yang nyams pa med/_4_/srid par rnam mang srid du mi gnas te/__/gnas snang ye dag sku dang ye shes chos/__/zhi bar grags kyang ye grol gnyug ma'i gshis/__/rgyu rkyen las 'das rtag pa'i chos su grub/_5_/sangs rgyas kun kyang khyod las gzhan min kyang*/__/mtshan dang thugs bskyed rnam thar mdzad pa brgya/__/'phel 'grib med par ston kyang rgyud tha dad/__/ma mchis ye shes nang gsal gcig tu 'khyil/_6_/khyed kyi ye shes dag pa'i gzigs pa'i ngor/__/dmyal me'i rlubs kyang dag pa'i zhing mchog gi__/bde 'byung pad+ma'i tshal ltar mngon gyur pa/__/shes bya'i gshis lugs lhums su zhugs pa'i rtags/_7_/dngos mtshan 'pho 'gyur bri gang dag ma dag__/ji ltar snang yang khyed ni dus gsum kun/__/'pho med bde ba chen po'i dgongs pa las/__/g.yo 'khrul med pa'i thig le gcig tu 'khyil/_8_/stobs dang dbang bcu rdzu 'phrul mngon par shes/__/ngo mtshar yon tan bsam mi khyab la yang*/__/mchog 'dzin snyems rtogs rtsol sgrub ma mchis kyang*/__/nyi dang zer bzhin rang bzhin lhun gyis grub/_9_/kun tu smra bsam brjod pa'i yul 'das pa/__/khyod kyis brjod na brjod pa kun gyi mchog__/rdo rje gsang ba rgyud kyi dngos po zhes/__/chos phung brgyad khri'i brjod bya gcig tu nges/_10_/bden gnyis shes bya'i chos kyi rnam grangs dang*/__/zab rgyas theg pa'i sgo 'phar bsam yas kun/__/khyod kyi rang bzhin gcig las ma 'das pa/__/khyed tshul brjod na nam yang zad pa med/_11_/sras dang bcas pa'i rgyal ba ma lus pas/__/grangs med bskal par sgrub pa'i ngal ba brgya/__/dang du bzhes pa khyod kyi gsang ba la/__/snyoms par 'jug pa'i thabs tshul 'ba' zhig lags/_12_/khyed ni dang po'i dus nas ye shes kyi/__/klong las ma g.yos 'pho med dgyes bzhugs pas/__/grangs med bskal ba'i ngal ba ma dgos pa/__/bde chen gnyug ma'i rgyal thabs zin 'di rmad/_13_/rtog bral ye shes chen po'i 'jug pa'i las/__/shin tu mthu myur rtswa skam me mched 'dra/__/zab cing rgya che sa dang rgya mtsho bzhin/__/srid zhi brtan g.yo'i nyer 'tsho gcig tu grub/_14_/de phyir de la bstod pa'i man+dA ra/__/bsod nams sbrang rtsi zad mi shes 'byung phyir/__/dad pa'i sor mo'i khyod sku'i rgyan nyid du/__/bstar nas 'bul na khyed kyi gnas thob mdzod/_15 !___khyab bdag rdo rje sems dpa' la bsngags pa bde chen snyems ma'i dgyes glu zhes bya ba bzhugs/__na mo gu ru saM b+ho kA ya badz+ra satwa ma hA su kha ye/__gnyis su mi phyed stong chen rdo rje'i thugs/__/bde chen snying rje'i sems ches rab dpa' bas/__/mtha' yas dkyil 'khor rgya mtsho'i spro bsdu'i bdag__/mtshungs med lhag pa'i lha gcig dwangs bas bsngags/_1_/bde stong gnyis med ye shes nyag cig gis/__/gzhi lam 'bras bu'i rdo rje sems snang yang*/__/thabs shes stong nyid snying rje'i ye shes la/__/'pho 'gyur med pa rtag cing brtan pa nyid/_2_/'khor 'das chos kun ye shes de'i bsdus kyang*/__/ngo bo gcig las 'phel 'grib bri gang bral/__/mchog tu mi 'gyur bde ba chen po yis/__/thugs rgyud gang zhing rgyas ba'i dpyid kyis sgeg_3_/khyed kyi de nyid ye shes chen po'i gshis/__/rtogs bya'i mthar thug 'bras bu'i phul phyin pa/__/zag med chos khams rgya mtsho'i mdzod brnyes pas/__/sgrib pas ma rnyogs gtsang zhing nges par dag_4_/mtha' klas dkyil 'khor rgya mtsho'i spro bsdus bdag__/bdag nyid cher grags bdag rtog zug rngu zhi/__/zhi ba chen po'i mthar son zab mo'i dbyings/__/dbyings chen rnam dag rdo rje'i sku chen po/_5_/zag med bde mchog bde ba'i longs spyod kyi/__/'byor ba chen po'i gsang gsum khyon mdzes pas/__/ngo mtshar dpal gyi mnga' thang yongs rdzogs mgon/__/chos dbyings klong nas dgyes pa'i dpyid kyis rol/_6_/'khor dang mya ngan 'das pa'i chos thams cad/__/kun kyang 'pho med bde stong kha sbyor gyi/__/ye shes sgyu 'phrul drwa ba'i bdag nyid las/__/ma 'das bkod pa'i re khA cir yang bkra/_7_/dpag yas thugs bskyed smon lam btsan po'i mthu/__/rdzogs smin sbyangs mthar son pas khyod mtshan thos/__/gsang sngags bzlas dang dran pa kho nas kyang*/__/srid pa'i gdung sel bde chen dbyings la skyel/_8_/thabs la mkhas pa'i rnam thar tshon/__/phyogs dus kun la gsal snang yang*/__/'bad dang rtsol bral dbyings nyid du/__/rang bzhin med ngang snyoms par zhugs/_9_/rang nyid tshogs gnyis pha mthar son gyur pas/__/mi slob 'bras bu'i go 'phang brnyes bzhin du/__/gzhan don mdzad pas phyogs dus kun khyab pa'i/__/dmigs med snying rje'i yongs su gang bas gzigs/_10_/'khor ba srid pa ji srid gnas kyi bar/__/phrin las snang ba rgyun mi 'chad ston pas/__/phan bde'i 'bras bu zad mi shes 'jo bas/__/srid zhi nyer 'tsho'i dpal du mdzes par ston/_11_/snang stong mkha' khyab ye shes rdo rje'i sku/__/ba spu re rer sangs rgyas zhing dang sku'i/__/mdzad pa rgya mtsho ston pa'i ngo mtshar gyis/__/bsam yas mi zad rgyan gyi 'khor lor rdzogs/_12_/don dam chos nyid brjod bral dbyings kyi srog__/brjod pa'i mchog gyur tshangs dbyangs bcu phrag drug__/mtha' yas chos sgo gang 'dul ston pa'i gsung*/__/bsam mi khyab pas 'gro sgrol dpal la dad/_13_/ye shes chen po shin tu zhi ba'i dbyings/__/bsam gyis mi khyab mnyam rjes bral ba'i thugs/__/mkhyen brtse'i snang rgyas nyi zlas rtag 'khyud pa'i/__/srid zhi kun khyab lhun gyis grub par ston/_14_/khyod tshul brjod pa'i pha mthar gtugs min kyang*/__/dang pa'i blo ngor cha tsam 'char mtha' dag__/tshigs su bcad pas bsngags pa tsam gyis kyang*/__/rdo rje'i gsang ba rgyan gyi dpyid grub shog_15 !___zhing 'di'i ston mchog thub pa'i dbang po la bsngags pa yid ches dad pa'i gling bu zhes bya ba/__na mo gu ru nIrma kA ya ma hA mu na ye/__srid zhi kun khyab phyogs dus kun 'gro ba'i/__/dpe bral rgyal kun dbyings dang gcig 'khyil yang*/__/zhing 'dir lhag par thugs brtses bzung ba'i mthu/__/rnam 'dren stong las pad dkar ltar bsngags rgyal/_1_/sngon tshe bde gshegs dbang po'i tog la sogs/__/rkang gnyis gtso bo sangs rgyas 'phags pa'i tshogs/__/gang+gA'i bye snyed tshul 'dzin mtha' klas 'gro/__/sgrol pa'i ded dpon chen por ston la 'dud/_2_/de bzhin gshegs pa rin chen snying po yi/__/spyan sngar mi mjed zhing gi gdul bya'i phyir/__/snying rje'i gzhan dbang gyur pa'i smon lam gyis/__/dam bca' lnga brgya'i go cha bzhes la bstod/_3_/mtshan gyi nyi mas las sgrib mun sel zhing*/__/bdud rigs dpa' bkong mi 'khrug rgyal ba dang*/__/sku tshe 'od snang 'dus pa dpag med pa'i/__/mtshan thos bde chen zhing 'dren mgon po rnams/_4_/zhing bkod 'dzin pa'i smon lam bskul bas mtshon/__/da lta phyogs bcu'i zhing gi rdzogs sangs rgyas/__/sangs rgyas spyan gyis gzigs kun mgon khyod kyis/__/smin par ma mdzad med pa'i phrin las mnga'/_5_/rnam dag dga' ba brgya ldan skyed tshal las/__/'phos te dam pa tog dkar ri bong 'dzin/__/shAkya'i rigs 'tshol rtse dga'i khrus zhugs gnas/__/'jam dpal dpa' bo zas gtsang mi dbang brtan/_6_/mngon byang lnga rdzogs mtshan dpe'i nyin mor byed/__/shes bya'i bzo rigs bcu phrag sum zung bzhi/__/mkhyen dpyod me long ring nas gsar ba'i gzugs/__/mthong bas mkhas mang yid 'phrog lha yi lha/_7_/don kun grub pa'i rgyal po'i mtshan snyan bsgrags/__/'dod sred 'ching bas btang yang thabs mkhas dang*/__/nges don rdo rje btsun mo go la'i dbus/__/zhing gi dpal mo brgyad cu khab bzhes te/_8_/chags chen spyod pas sa bcu rdzogs par mdzad/__/nges par 'byung ba'i rkyen bzhis rgyal khab dbyung*/__/shin tu spros med spyod pas lo drug tu/__/dka' spyad gdung ba bzod pa'i go cha la/_9_/phyogs bcu'i bde gshegs dgyes nas 'tshang rgya bskul/__/byang chub snying por gshegs tshe dga' mo dang*/__/dga' stobs zhing pa'i bu mos ba mchog gi__/zas dang bcas pa'i snyoms 'jug nye rgyu yis/_10_/mngon 'tshang rgya bar bzhed pa'i ngo mtshar bstan/__/yid srub mi 'khrugs khrag khrig gcig gi dpung*/__/sgrol ma bzhad pa brgyad dang mi g.yo bas/__/bdud kyi bu mo rab bkram chags chen gyis/__/bskul nas mngon 'tshang rgyas pas sgrib kun bcom/_11_/snying rje brtse chen ri dwags gzugs bkra zhing*/__/grangs med gsum gyi cha shas legs rdzogs nas/__/rnam 'dren bzhi pa'i bdud rtsi'i dkyil 'khor gyis/__/lnga brgya'i gdung ba bsnyil pa'i dge mtshan 'char/_12_/gting mtha' mi mngon 'khor mtshor bying pa'i 'gro/__/'khor lo gsum gyi rin chen gru yi mthus/__/thar dang thams cad mkhyen pa'i nor bu'i gling*/__/'god pa'i phrin las tshad dang bsam las 'das/_13_/log rtog rig pas rgol brtsams mu stegs dpung*/__/ngo mtshar cho 'phrul mnyan yod nas bstan te/__/lha mi'i dad pa'i 'dab brgya grol ches pas/__/nag phyogs skyengs dang gzi brjid mgo 'phang smad/_14_/skye shi las 'das dbyings su snyoms zhugs kyang*/__/dkar po'i chos rab spel ba'i ring bsrel gyis/__/'gro kun sgrol la khyod dang mtshungs pa yi/__/go 'phang rten 'dir longs su spyod gyur cig_15_/bla ma sku gsum rgyal ba'i tshogs la bstod pa'i sde tshan dang po'o/ !___sngags kyi ston pa rdo rje'i bla ma pad+ma thod phreng rtsal la bsngags pa zab don rdo rje nA da'i gling bu zhes bya ba bzhugs/__na mo badz+ra gu ru pad+ma thod phreng rtsal ye/__brtan g.yo kun khyab ye shes nam mkha'i gzugs/__/'chi med dwangs ma'i lang tshos sgeg pa'i dpyid/__/rab 'byams rgyal ba'i mkhyen brtse'i stobs dar ba'i/__/mgon po mchog la bstod pa'i me tog spel/_1_/mkha' khyab mkha' yi rdo rje'i ye shes sku/__/rab 'byams rgyal ba'i zhing khyab kun tu 'gro/__/rang byung mtshan dpe'i rgyu skar do shal ni/__/skye 'chi gzhom gzhig bral ba'i dpal la 'dud/_2_/snying rje'i spyod yul dag ba'i sprin chen las/__/zab rgyas chos tshul rgya mtsho'i gru char rgyun/__/zad mi shes pas phyogs dus 'gro rgyud zhing*/__/rnam grol snye mas 'gengs pa'i byed po che/_3_/gcig dang du bral chos dbyings rin chen khams/__/smra bsam brjod bral mkha' la snying rje'i thugs/___/nang gsal ye shes gzhon nu bum pa'i klong*/__/mnyam rjes ris med bde chen dgyes pa che/_4_/mi zad rgyan gyi 'khor lo'i sgyu 'phrul gar/__/sras bcas rgyal ba'i ye shes do rar rtsen/__/bsam gyis mi khyab smon lam bum bzang du/__/rdzu 'phrul 'du 'god ngoms pa med par ston/_5_/zag med chos khams rgya mtshor dbang bsgyur kyang*/__/phrin las nam mkha'i mtha' mnyam bkod pa ste/__/'dren pa kun las rmad byung thugs bskyed mthu/__/rdo rje'i go cha khyod mtshungs gzhan ma mchis/_6_/blo las 'das pa'i ye shes yon tan rdul/__/dad pa'i ge sar cha tsam phebs pas kyang*/__/yid ches nges pa'i tshon brgya bkra ba yi/__/mos gus skyed mo'i tshal mchog dbang med dar/_7_/de tshul brjod pa'i spobs pa na phra yang*/__/bcos min dad pa'i nyams chung gsol 'debs ngag__/yab gcig snyan du gson pas zhal bzhes bzhin/__/ye shes spyan gyis 'bab stegs 'cha' la re/_8_/rig stong don gyi dgongs pa gtad pa'i mod/__/'khrul rtog brag ri rdul du mthar byas nas/__/ye shes gsang pa'i dbyings su snyoms zhugs pa'i/__/dga' ston mngon sum stsol cig pad+ma 'byung*/_9_/khyed kyi rdo rje bzhi yi dkyil 'khor du/__/rdo rje'i gtor blugs btso sbyangs nus pa yis/__/sgo gsum cha mnyam mi zad rgyan 'khor gyi/__/ltad mo'i sku bzhi'i grong khyer mthong mdzod kye/_10_/snang srid mkha' khyab ye shes sku rdo rje/__/rig 'dzin bla ma 'dus pa'i dkyil 'khor du/__/legs shar yongs grub chen po'i bskyed rim gyis/__/skye bzhi'i 'khrul ba'i bag chags dag gyur cig_11_/rlung sngags gnyis med rdo rje'i bzlas pa yis/__/bsnyen sgrub rnam bzhi'i gseng lam mthar phyin pa/__/grags stong gsung gi rdo rje nA da'i dbyangs/__/chos phung brgyad khri'i 'khor lor rdzogs gyur cig_12_/'khor 'das chos kun rang rig gdod ma'i dbyings/__/ye dag rang grol khyab brdal dgongs pa'i klong*/__/mnyam rdzes re dogs bral ba'i blo bral gyis/__/gdod ma'i rgyal thabs rten 'dir smin byin rlobs/_13_/gdod nas dag pa'i chos sku 'od mi 'gyur/__/zag med mkhyen brtse'i yon tan 'od stong gzis/__/phyogs dus rab 'byams rgyal ba'i ye shes dang*/__/gnyis su med pa'i dpal stug la bsngags pas/_14_/phul byung bsod nams dag pa'i sprin dkar kyang*/__/de rjes 'brang ba chos dbyings mkhar bres te/__/ngo mtshar ye shes nam mkha'i gzugs can nyid/__/rdzogs par snying la sad pa'i dpal gyur cig_15 !___rang byung sangs rgyas mtsho skyes pad+ma 'byung gnas la bsngags pa bde stong dpyid kyi gling bu zhes bya ba/__na mo gu ru pad+mA ka ra ye/__/e yig stong chen dga' mar rjes chags sprin/__/waM yig bde chen sprin gyi rol sgeg las/__/rang byung zung 'jug dkyil 'khor rgya mtsho'i bdag__/kun bzang pad+ma 'byung gnas snying nas gus/_1_/srid zhi'i 'o mtsho bsrubs pa'i dwangs ma'i dpyid/__/lnga ldan ye shes 'od brgya'i drwa ba yis/__/rab mdzes sin+d+hu'i dwangs mtshor pad+ma'i sbubs/__/mdzes phyir kun dga'i gar gyis cis mi bsten/_2_/khyed tshul ye shes dag pa'i me long du/__/ma lus chos kun bde chen bde dbyings las/__/nam yang ma g.yos chos kun snying po la/__/mdzes pa'i gzhon nu'i lang tsho'i mtshar sdug ngoms/_3_/pad tshal mgron du khug pa'i bung ba bzhin/__/sras bcas rgyal bas shis pa'i me tog dang*/__/lha dang DA ki'i bstod bsngags rol mo yi/__/phyogs kyi bu mo kun dgar byed ces grags/_4_/de tshe mkha' dbyings kun gsal sgeg mos kyang*/__/srid zhi'i dpal gyi brtan pa dbang med du/__/'phrog pa'i ngo mtshar 'di ko ci zhig ces/__/rgyu skar mig stong bgrad nas blta ba bzhin/_5_/sangs rgyas las kyang dkon pa'i dgongs pa'i bcud/__/khyed thugs bum par bskyil ba'i dge mtshan gyi/__/ngo mtshar rin thang rmad du byung ba'i lci/__/brtan ldan 'dzin mas theg 'di cis mi mtshar/_6_/'di na gsang rgyud rgya mtsho'i rlabs phreng can/__/khyed kyi mkhyen rab gser gyi dbyig 'dzin du/__/chil chil g.yo ba ma bzod mkha' spyod kyi/__/mig yangs khyod skur rtsen la phan tshun 'gran/_7_/nam yang mi g.yo ye shes nam mkha'i gzugs/__/dus gsum g.yo med rdo rje'i lhun po ltar/__/brtan pa'i dgongs pa kun bzang 'od gsal snying*/__/rgya chad phyogs lhung bral klong mnyam par bzhag_8_/cha las rnam grol khyod kyi mdzad pa ni/__/'bad rtsol bral ba rang byung shugs 'byung gis/__/'dul ba rnam bzhi'i sgyu 'phrul bsam brjod las/__/rab 'das srid zhi'i khyon kun rgyas par 'gengs/_9_/rgyal ba gzhan gyi mdzad pa rtul de ru/__/mgon po'i phrin las tsha zer brgya ba'i zer/__/lhag par rno bas skal bzang 'dab brgya yi/__/na tshod gsar pa smin pa'i gnyen du grags/_10_/skal bzang rin chen lta bu rdo rje'i rigs/__/smin grol bdud rtsi'i zil pas reg ma thag__/dngos grub sbrang rtsis phyug pa'i zil mngar gyis/__/dri bsung mkha' mtha' brdal ba'i mes po che/_11_/rdo rje'i gsang mdzod bsnyen pa'i grub mchog dang*/__/lhan skyes 'gugs pa'i pho nya'i mig yangs kun/__/khyed kyi gsang ba mi zad kun dga'i tshal/__/mdzes par bgyid pa'i cho gas rtag tu brel/_12_/rdo rje'i brtul zhugs grub pa'i ma dA nas/__/kun nas myos pa'i ngang tshul ma bzod nas/__/yid srub dpung bcas lus med mda' lnga bcas/__/mi smra'i dka' thub bsten nas mgo bo dud/_13_/chags chen dga' bas chags rtog drung nas 'byin/__/rdo rje'i zhe sdang gtum rngams 'bar zil can/__/mi shes mun pa 'byin pa'i 'od chen pos/__/grong khyer gsum gyi zug rngu 'byin mdzad la/_14_/bstod bsngags pad+ma'i phreng ba dad gus kyis/__/sor mo'i phreng du brgyus dang lhan cig par/__/gus phyag sri zhus khyod mgul brgyan pa las/__/zag med yon tan 'byung ba'i gnas thob shog_15 !___gu ru pad+ma rgyal po la bsngags pa sa gsum brtan 'phrog pad+ma'i dga' tshal zhes bya ba/__na mo gu ru pad+ma rA dza ye/__snying sdug pad+ma'i 'dzum gyis 'gro kun yid/__/kun tu dga' byed lang tsho'i dpyid grub pas/__/mtshon min mtshan gyi rnga chen rgyal kun zhing*/__/mdzes par grags pa'i rgyal po yid rab dwangs/_1_/'dam skyes pad+ma 'dam gyi ma gos bzhin/__/srid na mi 'jigs sgyu ma'i rol rtsed kyis/__/'dab brgya'i lang tsho'i rgyags pa'i zil mngar las/__/'gro khams rgya mtsho'i don mdzad ngal mi mnga'/_2_/kun rmongs sgrib pa'i shun pa las grol pa'i/__/ngo mtshar rnam thar tshon sna brgya pa'i mdangs/__/rtsod dus gdung bas nam yang ma sbas par/__/mtshar sdug rdzogs pa'i brtan pa ches cher dar/_3_/rgyal ba'i phrin las gzugs can bzhin ston pa'i/__/gsung gi rdo rje'i byed pa ngo mtshar can/__/phyogs dus kun tu rgud med lang tsho'i dpal/__/rnam sad bu mo'i dar bab na tshod bzhin/_4_/reg 'jam pad+ma'i lcug mtshungs thugs bskyed kyis/__/'gro khams dam por 'khyud pa 'di gzigs nas/__/'dren pa rgya mtsho'i gsang ba mi zad dbyings/__/khyed dang gnyis su med ces bsngags pa bzhin/_5_/pad+mas 'thung ba'i nyi zer drod bcud bzhin/__/khyed thugs zab gsang lung rtogs bdud rtsi'i rgyun/__/'dzad med phyogs dus zhing gi gdul bya la/__/spro bas dbugs 'byin khyod mtshungs su zhig mchis/_6_/khyod mtshan thos dang dran pa tsam gyis kyang*/__/gtan bde'i lang tshod dar la bab byed pa/__/pad+ma'i lding khang nyul ba'i bung ba dang*/__/mtshungs pa'i ngo mtshar yid rab mi dwangs su/_7_/mtshan dpe'i mtshar sdug yid kyi mtshor bkod cing*/__/bsnyen bzlas rkang drug glu yis thugs dam bskul/__/ye shes myong pa'i ze'u 'bru'i mchod pa'i mod/__/grub gnyis dpal gyis sgo gsum dbugs 'byin mdzod/_8_/'pho med ye shes nam mkha'i khor yug tu/__/rjes chags rdo rje nyi ma'i gzi byin gyis/__/brgyan pa'i zer phreng g.yo bas gdul bya'i yid/__/phan bde'i dbugs 'byin yud kyis stsol mdzad rje/_9_/'dab stong dga' ma'i lang tsho'i nyams 'gyur bzhin/__/gcig tu mi gnas thabs mkhas mdzad pa brgya/__/phyogs dus mkha' khyab zhing na ston pa yi/__/dpal stug rdzogs ldan nor bu'i sprin phreng bres/_10_/zab gsang rdo rje theg pa'i gseng lam gyis/__/spang rtogs ri gling bkod pa mtha' yas pa/__/khyed kyi mdzad pa gcig la rdzogs pa 'dis/__/dkyil 'khor rgya mtsho'i khyab bdag nyid du grub/_11_/'dab stong gdan dang me tog do shal brgyan/__/mdzes pa'i phyag rtags mtha' dag steng 'thung gis/__/byed bzhin 'gro ba'i nyer 'tsho rgyal kun dbus/__/u dum wA ra'i tshal bzhin lham mer gsal/_12_/pad+ma'i bsung zhim 'grogs pa'i dri bzhon bzhin/__/mgon khyod mdzad pa'i cha shas re res kyang*/__/dad brgya'i mig yangs kun dga'i sor mo yis/__/bstod pa'i rgyud mang brdung la chog mi shes/_13_/lha klu mi yi rgyan mchog steng 'thung zhes/__/grags snyan kun tu dge bzhin bdag gi ngag__/bstod phreng ut+pal do shal 'di phul ba'i/__/dbyangs snyan rab 'byams zhing kun grags par shog_14_/pad rtsa ltar dkar dad brgya'i ku mu dA/__/tshig snyan 'dab mas phyug pa'i zab don gyi/__/ke sa ra yi mtshar sdug ma rnying pas/__/mkha' khyab 'gro dang bstan mchog ngal 'tsho shog_15 !___mkhas pa blo ldan mchog sred la bsngags pa tshangs sras dpal mo snyems pa'i gling bu zhes bya ba/__na mo gu ru/__kun gzigs ye shes me long 'char pa'i lha/__/chos rab rnam 'byed spobs pa'i rol sgeg kyis/__/snyems tshe blo ldan mchog sred mtshan gyi rngas/__/rab mdzes rgyal sras chen por bstod la brel/_1_/gzod nas chos kun mkhyen pa'i mthar son bzhin/__/zhing 'dir mtshungs med rig pa 'dzin zol gyis/__/mkhyen gnyis snang byed zung gis khyed thugs mkhar/__'du 'bral med pa'i 'gro 'ong g.yo bas mdzes/_2_/mtha' yas shes bya'i chos tshul rgya mtsho'i gzugs/__/mgon khyod ye shes gser gyi brtan ldan ngogs/__/legs bskyed thugs brtse'i rlabs phreng mu tig gi__/do shal mtshungs pas rtag tu rgyan pa las/_3_/ma lus 'gro rgyud mi shes srid pa'i nongs/__/sel phyir dpag med chos sgo'i ma Ni ka__/phrin las rgyal mtshan rtse mor brjid pa las/__/dge legs shis pa'i char bzang zad mi shes/_4_/gzungs spobs blo yi na tshod dar bab pa'i/__/blo ldan gnyis 'thung khyu mchog tshogs pa'i dbus/__/'jigs med mkhyen rab sum zung mche ba can/__/rgyu skar dbus na bdud rtsi'i gter bzhin snyems/_5_/rgyal dgongs drang nges theg pa che chung gi__/rnam bzhag tshon rigs brgya ldan dbang po'i gzhu/__/khyed thugs 'chi med lam kun mdzes pa las/__/blo ldan bye ba'i mig gi bdud rtsir sim/_6_/mtha' dag tha snyad rig gzhung dal 'gro bzhi/__/mkhyen zab ma dros chu gter las thon pas/__/rgyal ba'i chos gter gdengs can dbang po yis/__/nor bu'i mdzod kyi lde'u mig khyed la mnga'/_7_/chos sgo gcig gis mtha' yas 'gro sgrol yang*/__/tshig don 'dzad med dbyar gyi char bzhin du/__/'jo bas blo yi dri ma 'khrud dang bcas/__/kun mkhyen lang tsho'i dpal yon cir yang dar/_8_/zab dang rgya che rnam pa thams cad gsung*/__/ji ltar bstan kyang mthar thug rnam mkhyen gyi/__/dpal la dbugs 'byin byed pa kho na ste/__/mthar thug dgongs bcud rgya mtsho gcig tu 'khyil/_9_/mthong thos dran dang reg pa'i skal bzang la/__/chos bzang nor bu'i zhags pas legs bzung nas/__/rnam grol gling du drangs pa'i gsung rdo rje/__/ngag gi dbang phyug dpal gyis yongs su brgyan/_10_/khyod thugs shes bya kun la 'jug pa'i mthus/__/ye shes nor bu'i gzi 'od dad blo yi/__/brtson pas mchod pa kun kyang chos thams cad/__/gzigs pa'i spyan ras bde myur bkra bar mdzod/_11_/rab 'byams rgyal ba'i thugs dbyings dpal be'ur/__/ye shes sems dpa' gyad kyi nor bu bzhin/__/bzhugs pas chos kyi dbyings kun rgyas 'gengs pa'i/__/zag med yon tan snang ba blos mi dpog_12_/srid pa'i rtsa ba bdag tu lta ba yi/__/ma rig gshed du dpa' ba khyod gcig phyir/__/blo ldan dad dang mos pa'i rtsal 'chang kun/__/khyod zhabs pad+mor ma'i bsten su ma mchis/_13_/srid zhi'i dpal kun mtsho las nor bu bzhin/__/khyed las 'byung zhing 'khor 'das srog gi snying*/__/ye shes lus can grags pa'i dbyar rnga yis/__/bdag yid rma bya sgeg pa'i gar gyis btud/_14_/gting dpog dka' ba'i ye shes nam mkha'i dbyings/__/mos pas btud cing bstod pa'i bsod nams kyang*/__/mkha' dang rgya mtsho'i 'jings bzhin mtha' yas pas/__/'gro ba'i nyer 'tsho'i dpal du bdag gyur cig_15 !___slob dpon pad+ma saM b+ha la bstod pa yon tan rgya mtsho'i sgra dbyangs 'byung ba zhes bya ba/__na mo gu ru pad+ma saM b+ha wa ye/__thub bstan yangs pa'i chu gter 'khyil ba'i klong*/__/dpag med mkhyen brtse'i ded dpon mkhas pa yis/__/thos bsam sgom pa'i rin chen grur zhugs nas/__/rmad byung yon tan nor bu'i mdzes de rgyal/_1_/mi slob lam gyi de nyid mngon gyur bzhin/__/cha shas yon tan nor bu'i rdul phran rer/__/'bad pa brgya yis dang du bzhes pa yi/__/thabs mkhas 'phags pa'i rnam thar cis mi dad/_2_/mdo sngags chos sgo'i rnam 'gyur tshon sna brgyas/__/bkra der mdzes pa'i mdzad bzang sum rtsen lhas/__/dga' ba'i rol gar zad mi shes dang bcas/__/rtsen pas mkhas pa'i khyu mchog chen po grags/_3_/gsang gsum mdzad pa'i zlos gar dbang po'i gzhu/__/skyon bral lang tsho'i mdzes bzhin gzhan phan gyi/__/sbrang char 'od brgya'i snang ba'i dpal bsam bzhin/__/nyes bral btsun pa'i ngang tshul gcig tu gtsang*/_4_/mkhas dang grub pa'i rnal 'byor lang tsho'i sgeg__/'chad rtsom rtsod pa'i nor bu'i rgyan brgyas spud/__/'phags bod bstan 'dzin lha phrug rtsen pa'i dbus/__/lhun po gser ri'i bskor bzhin khyed gcig 'phags/_5_/thun mong mchog gi dngos grub rin chen mdzod/__/mtha' dag nyams 'og chud pas bshad sgrub las/__/ngo mtshar rgyal thabs skyong la dpa' 'dzangs brtan/__/theg mchog chos kyi 'khor los bsgyur dbang nyid/_6_/de tshe gzhan phan mdzes ma'i mig yangs mas/__/khyed thugs bskul mthus ji tsam gdul dka' bzhin/__/phrin las gser gyi 'khor lo'i 'jug pa yis/__/rnam grol kun mkhyen gling du thabs kyis 'dren/_7_/rdo rje theg pa'i smin grol bshad dang sgrub/__/rgyud sde rgya mtsho'i snying po rin chen dbyig__/kun kyang khyed thugs nor bur ma sim pa/__/med nges gsang 'dzin dpa' bo'i khyim bdag rmad/_8_/'khor 'das lam gyi chos kun 'dod dgu ru/__/dbang byed rig pa rtsa gyi dbang thob pas/__/lta stangs gcig gis srid zhi'i khyab bdag tu/__/snyems pa'i spobs pa 'chi med lam las mtho/_9_/de tshe dzam gling tha gru'i snod bcud la/__/khyed kyi phyag rgya'i re khAs ma btab pa/__/med phyir grub pa rgya mtsho'i lta dgongs dbus/__/khyed kyi grags snyan 'di kun las kyang 'phags/_10_/bkod pa chen po'i ri mo'i nyams 'gyur stong*/__/gdul bya'i skal bzang yongs su mdzes byas pas/__/tshar gcod rjes su 'dzin pa'i dpal yon gyis/__/sa gsum yid kyi brtan pa yang yang 'phrog_11_/tshul de gzigs pas rgyal dang de yi sras/__/nyan rang srid 'di'i che rgu thams cad kyis/__/'dar ldan lag pa'i pad+mo zum bzhin du/__/thor tshugs nor bu'i khyod zhabs byi dor brtson/_12_/rab 'byams zhing na khyed kyi ngang tshul kun/__/bsngags pa'i gling bu'i 'gyur khug la bskyon pa/__/zad med ngo mtshar re re'i rtogs brjod kyang*/__/smra la tshangs chen blo yang ngal ba byas/_13_/phrin las kun gsal do ra ches yangs bzhin/__/srid zhi'i dpal gyi bdud rtsi'i zil mngar 'bum/__/'phro bas dge legs chu gter rgyas mdzod de'i/__/'jig rten gsum gyi 'gro kun rab dgas snyems/_14_/khyed kyi yon tan cha shas re re yang*/__/phal gyis bskal mang 'bad pas bsgrub dgos na/__/mtha' dag rnam thar rdzogs pa dpal stug de'i/__/sangs rgyas kun gyi gsang ba dpyid kyis brgyan/_15_/ma lus 'dren pa'i rmad byung rnam thar la/__/bsam na de kun khyed gcig la rdzogs pa'i/__/gnas de bsam bzhin bdag blo rmongs pa yang*/__/ngo mtshar 'dren byed stong gis blta la brel/_16 !___bdud 'dul shAkya seng ge la bsngags pa rab 'byams rgyal kun dgyes pa'i rol mo zhes bya ba/__na mo gu ru shAkya seng ha ye/__mkhyen brtse'i cha shas rdzogs pa'i nyin mor byed/__/kun mtshams sprin pa'i mdangs 'dzin ngur smrig gis/__/mdzes bklubs mchog gi sprul sku'i ngang tshul gyis/__/rgyal ba dgyes pa'i snang 'od spro mdzad rgyal/_1_/thub bstan 'dzin mar tshangs spyod gur gum gyis/__/mdzes par dkrigs pas lhar bcas kun dga'i yid/__/dad pa'i rlabs phreng g.yo ba'i rtser 'dzegs pa'i/__/ngo mtshar lha'i bu mu tig dogs pas sgeg_2_/chags bral pad+ma dkar po'i gsang ba gsum/__/nyes pa'i ra ri'i gzhar yang ma gos pa'i/__/mngar po'i dri bsung zhing kun khyab brdal ba'i/__/mdzes sdug lang tsho'i srid zhi'i brtan pa 'phrog_3_/zag med yon tan nor bu'i mchog mtha' dag__/dri med khrims gsum lha dbang gtsug rgyan du/__/mchod pas dge legs 'dod dgu mi zad pas/__/'gro pa'i yid kyi shing rta yongs su 'gengs/_4_/zhi dul bag yod khrims kyis nyer 'tsho kun/__/'phags tshogs gser ri'i mu khyud rab mdzes dbus/__/mnyam med thub chen ri dbang lhun chags pas/__/rnam grol gtan bde'i chab srid ches cher dar/_5_/rab 'byams sde snod 'chad nyan gling bu yis/__/blo ldan yid kyi ri skyes kun sim pas/__/dri med shing rta gnyis kyi lta grub glu'i/__/skyes sbyangs shes rab mgrin lam yangs por phyes/_6_/tshul khrims lang tsho rdzogs pa'i ri dwags mig__/ting 'dzin rgyan chas mdzes par sgeg bzhin du/__/thos bsam sgom pa'i shes rab zur mig gis/__/chos tshul rgya mtsho'i dpal kun bdag gir bzhes/_7_/rnam 'dren bzhi pa'i mtshan dpe dbyings bdo yang*/__/rgyal tshab skyes bu'i bdud rtsi'i thig le yis/__/bstan 'gro'i dge mtshan ku muta dar byas pas/__/yid srub snying la zug rngu'i mun pa 'khrigs/_8_/'phags chen go cha gdul dka'i ngor mkhregs pa/__/thugs bskyed dus bab dpa' bo'i bgos pa'i mod/__/rtsod dus dpung las rgyal ba'i lha'i rnga gsang*/__/rab snyan dpal gyis zhing gi khor yug brdal/_9_/thub dbang bstan pa'i rnam rgyal lha'i rgyal khab/__/dam pa'i dpung gis dus kun ma btang bas/__/nag phyogs phru mas brdzi bar ma nus pa'i/__/ngo mtshar ru mtshon srid zhi'i bla na bsgrengs/_10_/theg mchog dpal 'byor rgyal kun gces nor te/__/rgyal sras bye bas bsags srung spel ba'i mthus/__/dus kyi mthar yang rdzogs ldan kun dga'i dpyid/__/ma nyams 'gro ba'i nyer 'tsho kho nar gyur/_11_/'gro blo'i sgo gsum rin chen shing rta yang*/__/'phags pa dgyes pa'i lam srol la 'jug pas/__/ngo mtshar phrin las lha klu mi yi dbyig__/kun 'dus lung rtogs dpal yon zad mi shes/_12_/de tshul shes pas bshad sgrub las gsum gyis/__/spel ba'i nus stobs shin tu na phra yang*/__/rgyu mtshan shes pa'i bstod bsngags tam+bu ra/__/snyan par bsgrengs pa'i bsod nams rgya mtsho'i dpal/_13_/nam yang mi 'grib tshogs zung rin chen gru/__/srid pa'i rgya mtsho chen po'i pha mtha' brgal/__/zhi ba'i dpal thob snying rje'i 'gro kun khur/__/dang du len la chog mi shes pa yis/_14_/byang chub spyod pa'i ngo mtshar yongs rdzogs nas/__/mtha' yas zhing 'di'i khor yug thams cad du/__/dpa' bo'i grags snyan sprin sgra'i shis pa'i dbyangs/__/dge legs dpal gyi kun tu g.yo ba'i 'od/__/chos dbyings mkha' la gya gyur rtsen gyur cig_15___!___rnal 'byor dbang phyug nyi ma 'od zer la bsngags pa rig 'dzin dpa' bo snyems pa'i rol rtsed zhes bya ba/__na mo gu ru sUr+Ya rasmi ye/__mdzad 'phro/ !___grub mchog brtson 'grus bzang po la bsngags pa'i me tog bstar la brgyus pa 'chi med bdud rtsi'i mchod sprin bzhugs/__oM swasti sid+d+hi b+ha wan+tu/__ka ru Ni ka'i mkhyen brtse'i sprin dkar g.yos pa las/__/kha ba'i ljongs kyi grub pa'i ded dpon rmad byung mthu/__/ga bur 'dzin dbang cha shas rab rdzogs rnam thar can/__/nga bdag las nyon rnyogs pa bgrungs phyir dad pas bsngags/__/ca co'i tshig tsam ma yin don gyi pad 'byung dngos/__/cha shas mtshan gyi zegs ma thos kyang 'jigs kun skyob/__/ja hang mdangs 'dzin dbang chen he ru ka dpal mchog__/nya yi tog can mthar mdzad dpa' bo khyod la bstod/__/ta na ga Na'i rdo rje'i gsang spyod grub pa yis/__/tha mal las 'das rdo rje nang gi nyin byed gsal/__/da lta snyigs ma'i mun sel grub pa'i rol rtsed kyis/__/na rga skye 'chi mtsho las rab brgal 'chi med grub/__/pA ra mi ta shes rab phar phyin brgyad stong pa'i/__/pha mtha' yas pa'i tshig don rmad byung bdud rtsi'i skyes/__/ba ku la yi gnas brtan che las legs gsan nas/__/ma rig mun sprul sel mdzad mgon khyod gcig tu gus/__/tsA ri tra sogs rdo rje'i gnas yul dur khrod du/__/tsha grang ro snyoms rdzu 'phrul chen pos legs bgrod nas/__/dza lan+d+ha bzhin dpa' bo DA ki'i tshogs rjer byon/__/wa ltar skyob med kla klo'i tshogs kun brtul mdzad bsngags/__/zha rengs bral ba'i dbu mar sa bcu rdzogs pa las/__/zwa ltar rtsub pa'i rlung sems ngal gsos dga' bzhi'i 'gros/__/'a 'ol tsam min lhan skyes ye shes srog smin pa'i/__/ya mtshan nye rgyu rdo rje phag mos bstsal la 'dud/__/ra me shwa rir gsang spyod snyan brgyud srog gi zungs/__/la lA ra sa d+hU tir dag byed pho nya'i lam/__/sha sha d+hA ra'i dkyil 'khor bzhin mdzes smin grol gyis/__/sa gsum gdul bya skal bzang byas pa'i ngo mtshar rmad/__/ha ri'i nags tshal rlung gis g.yos pa'i ngad bzang bzhin/__/a ho grub pa mchog gi rnam thar mtshar sdug gis/__/ha cang yid rab 'phrog byed dad brgya'i shugs g.yos pas/__/a la la zhes bsngags pa'i gling bu sgrogs 'dis kyang*/__/o Di ya na'i slob dpon chen po'i mchog grub bzhin/__/e ma bdag kyang 'chi med rdo rje'i srog grub nas/__/u da d+hi ltar rab dkar sgo gsum las mtha' dag__/e ma ris med bstan 'gro'i sman mchog nyid gyur cig__/ces pa'ang me 'brug gnam lo gsar 'char dga' ston du mtshungs med grub pa chen pos dgyes par bskyangs ba'i 'bangs 'od gsal thugs mchog rdo rjes gang shar sor mo'i rta la bskyon pa'i srin rjes dge bar gyur cig_ !__rgya gar skad du/__sarba dz+nyA many+dzu g+ho Sha d+harma ma ti stu te/__bod skad du/__thams cad mkhyen pa 'jam dbyangs chos kyi blo gros la bstod pa/__'jam dpa'i dbyangs la phyag 'tshal lo/__/ka dag dbyings su snga 'gyur chos sku kun tu bzang*/__/kha sbyor bdun ldan bde chen thod phreng lnga/__/ga bur ltar bsil phrin las rmad byung bas/__/nga bdag mun sel ye shes rdo rje rgyal/__/ca co bka' gdams mang ldan srid las nges 'byung thugs/__/cha shas rdzogs pa'i zla ltar gzhan phan las/__/ja chang bzhin min phar phyin bcu rdzogs pas/__/nya bzhin srid 'gro sgrol mdzad rgyal ba'i sras/__/ta la'i bka' brgyud nags su sgrub pa'i srog mkhar btsugs/__/tha mal shes pa 'od gsal chos skur sad/__/da lta sku bzhi'i rgyal sar mnga' dbang 'byor/__/nA da'i srog grub rnal 'byor dbang phyug rgyal/__/pA ra lam rim mi/__ta'i lam las ches 'phags pa'i/__/pha mtha' yas pa gsang mtha'i rgyud sde'i bcud/__/ba mchog 'jo ltar snang rgyud lam mthar son/__/ma lus dkyil 'khor khyab bdag gyur la gus/__/tsA ri __shangs chos/__tra sogs rdo rje'i gnas nyul te/__/tsha grang gtum mo mthar phyin thang stong bzhin/__/dza lan+d+ha rar rlung rig sems ngal 'tsho'i/__/wa ler ye shes nyin byed 'char khyod dran/__/zhwa gos __zhi gcod/__tsam la bstan pa mi 'dzin cing*/__/za 'dod bral ba'i dka' thub ro snyoms che'i/__/'a 'ur tsam min mdo sngags dam chos snying*/__/ya mtshan zhi gcod grub pa'i srol 'dzin mchog__/ra rib __sbyor drug__/kun bral ye shes rjen pa ru/__/la 'ur rnal 'byor yan lag drug ldan pas/__/sha khrag rdul bral nam mkha'i rdo rje'i klong*/__/sa bcu mthar son dang po'i sangs rgyas dngos/__/ha lo rdo rje'i bsnyen sgrub lta bu'i rlung sems dbu mar sdud/__/a dbyings rdo rje'i rnam thar gsum ldan klong*/__/a hat+ta dwangs ma'i bcud kun sdud pa yis/__/a ho zung 'jug grub brnyes mgon gcig pu/__/e ma dad pa'i 'dab stong yid mtshor rgyas/__/o DI yA na'i zhal skyin bla ma dran/__/u da d+hi ltar dkar ba'i mos gus kyis/__/i shwa ra bzhin bstod pas rjes 'dzin shog__/ces pa'ang chu khyi snron zla'i tshes 6_dus kyi mchod pa'i nyin 'jam dbyangs bla ma'i 'bangs mang+ga la shrI b+hU tis mtha' 'khob mun pa'i gling du bstod pa'i tam bu ra cung zad bsgrengs ba sid+d+hi rastu/_ !___bstan srung rdo rje'i chos skyong ba'i tshogs la bstod pa rdo rje'i sgra dbyangs zhes bya ba bzhugs so/__ka dag dbyings klong srid zhi'i spyi dpal he ru ka__/kha dog rab brtan mi sdug rdo rje srin po'i gzugs/__/ga Na pa ti'i yab gcig lega~Ms ldana~M he ru ka__/nga bdag ru tra 'joms mdzad dpal mgon mchog la bstod/__/ca co rab sgrogs dur khrod chen po'i dbus gnas pa'i/__/cha byad rab khros ye shes mgon po phyaga~M bzhi~M pa/__/ja ril thod mkhar khrag mtsho'i rlabs 'khrugs pad nyi'i dbus/__/nya rgyas zla 'dra'i gzi brjid rngam pas 'gying la bstod/__/ta ma la bzhin rab 'khrugs 'khyol ba'i khro rgyal che/__/tha dad phrin las bsam mi khyab pas bstan 'gro'i phyir/__/da lta myur bar 'dod dgu sgrub mdzad ma~M ninga~M nag__/nA tha sde brgyad dregs tshogs dbang bsgyur dpa' bor bstod/__/pa sangs ser dmar nag dang ljang pa'i zhal ras bzhi/__/pha rol phyin mchog shes rab dbu ma'i bstan pa srung*/__/ba mchog 'jo bzhin phrin las gar gyis sgrub mchog skyong*/__/ma lus zhing skyong stobs 'phrog dbang po khyod la bstod/__/tsA ri tra sogs rdo rje'i gnas yul dur khrod du/__/tshar gcod rjes 'dzin phrin las 'dod dgur rtag rgyu ba'i/__/dza lan+d+ha ra la sogs grub brnyes yongs kyi 'bangs/__/wA ra hi dngos sngags kyi srung ma ral gcig bstod/__/zhwa ltar mngon mtho dregs ldan che rgu lang tshos rgyags/__/za gos dpal 'byor phun tshogs ldan mtshon sa gsum 'gro/__/'a 'ur 'brug sgras rma bya bzhin du dbang byed mthu/__/ya mtshan rab mnga' ma hA de wa yum bcas bstod/__/ra ma Na sogs 'jug pa bcu yi cho 'phrul gyis/__/la la tsam min sde brgyad yongs kyi gtso bo'i mchog__/sha zan srin po gdengs can sras mchog khyab 'jug che/__/sa bcu'i dbang phyug rdo rje gtum po'i pho nyar bstod/__/ha ri'i ljon pa dpag bsam shing sogs 'dod dgu'i gter/__/a ho sim stsol dpa' chen sems dpa' rin chen mang*/__/a la la zhes dwangs bas bskul na bstan 'gro'i dpal/__/ha ho sim stsol ngal gsos bu mchog gcig tu bstod/__/in+d+ra sa steng sa 'og spyod pa'i grong khyer gsum/__/u rgyan gtso bo'i thugs gsung sku yi 'khor lo'i bdag__/e ma rtsod dus bstan 'gro ngas skyong tha tshig can/__/o rgyan bla ma'i bka' sdod zhing skyong ma mor bstod/__/i shwa ra sogs mtshan dang sku'i bkod pas/__/u rgyan DA ki'i gces mdzod bya ra ba/__/e ma gsang sngags rnal 'byor yongs kyi grogs/__/o rgyan bka' srung zhing skyong seng gdong bstod/__/a ho rdo rje theg pa'i mdzod srung phyir/__/ha la'i bza' ba lta bu'i phrin las kyi/__/a ho dgyes dgur skyong mdzad sde dpon che/__/ha ha ngo mtshar gad rgyangs dang bcas bstod/__/sa gsum gdug can 'dul mdzad phur pa'i bran/__/sha za lce spyang zhon rgyu ma mo'i gtso/__/la 'ur phrin las glog gi gar mkhan che/__/rwa ltar gdul dka'i gshed ma bcu gnyis bstod/__/ya lad mtshon 'chang dpa' bo'i phru ma las/__/'a 'ur ches myur bde stong 'phrul zhags kyi/__/za gos bzhin tshim bstan srung sman btsun rgyal/__/zhwa bzhin bsten 'os ma mo bcu gnyis bstod/__/wa skyes ltar zhum 'gro sgrol chos kyi snying*/__/dza ya'i bstan dang sgrub mchog skyong ba'i tshul/__/tsha ngar phrin las mthu ldan rdo rje legs/__/tsA gangs sogs bzhugs rnal 'byor dgra lhar bstod/__/ma lus skye dgu sgrol dang theg mchog chos/__/ba mos be'u bzhin skyong bstan srung che/__/pha mtha' yas pa'i gtsug lag skyong ba'i lha/__/pa sangs ltar bsngags sku lnga'i rgyal chen bstod/__/na rga skye 'chi'i 'jigs sgrol thub pa'i bstan/__/da lta legs par srung ba'i las mdzad du/__/tha tshig phog pa'i dbang chen pad+ma'i 'bangs/__/ta thA ga ta'i bka' sdod mched bdun bstod/__/nya zla ltar mdzes dgongs 'dus gser chos srung*/__/ja dar gser dngul nor bdag gnod sbyin tshul/__/cha lugs 'bar ba'i btsan rgod mched bdun la/__/ca co'i dbyangs kyi 'gyur ba snyan dgus bstod/__/nga bdag rgyal btsan dam sri mthar byed gshed/__/ga ru TA dang pad+ma he ru kas/__/kha ba can btul zab gter skyong ba'i bdag__/ka ma la bzhin rab gus yid kyis bstod/__/myur myur phrin las 'dod dgus skyong mdzad lhar/__/legs legs dga' ston stsol ba'i gtang rag tu/__/'grigs 'grigs bstod pa'i gling bu sgrogs 'dis kyang*/__/mos mos gdung bas rtag tu rjes bskyangs te/__/bstan pa mnga' thang yang yang dar ba dang*/__/mtha' dag skal bzang 'phags lam la gnas pas/__/gzhan phan dpal 'bar lam bzang pha mtha' yas/__/rnam dag sa lam dpal la gnas mdzad 'tshal/__/zhes pa'ang rgya mtsho'i mthar gnas pa'i grong khyer kun tu rgyu ba'i tshe srung ma'i dbang po dag la bstod tshogs rgya cher ma 'byor ba'i nongs bshags dang*/__gnam lo gsar 'char gyi dga' ston du sngags kyi rnal 'byor pa'i rtags tsam 'dzin pa'i rgan po 'gyur med theg mchog bstan pa'i rgyal mtshan gyis me 'brug rta zla'i tshes nyer dgu la a ri b+hi na Dar bris pa bstan 'gro'i dpal yon rgyas pa'i rgyur gyur cig/___//
