DKR-KABUM-02-KHA-048-wylie
<div class="wylie-content"
@#/__/bla ma rgyang 'bod byin rlabs sprin phung sdud pa'i pho nya zhes bya ba bzhugs so/__bla ma mkhyen no/_/bla ma kun tu bzang po mkhyen no/_/gzhi dbyings ka dag klong nas gzigs shig_/rgyal ba dgongs brgyud byin rlabs dbang bskur/_/rig stong skad cig ngo bor stsol mdzod/_/bla ma rdo rje sems dpa' mkhyen no/_/'od gsal lhun grub klong nas gzigs shig_/rig 'dzin brda brgyud byin rlabs 'pho bas/_/gzhi snang bde chen 'char bar mdzod cig_/bla ma dga' rab rdo rje mkhyen no/_/kun khyab thugs rje'i klong nas gzigs shig_/zab lam theg rtse'i snyan brgyud chen pos/_/khyad chos drug gis grol bar mdzod cig_/rig 'dzin shrI sing ha mkhyen no/_/snang srid chos sku'i klong nas gzigs shig_/'khor 'das srog zin rig pa'i rtsal dbang*/_/bdag la da lta nyid du skur mdzod/_/paN chen bi ma mi tra mkhyen no/_/dwangs bsil rtse lnga'i zhing nas gzigs shig_/zag pa rang zad 'byung ba rang dengs/_/'pho chen rdo rje'i sku thob mdzod cig_/o rgyan pad 'byung thod phreng mkhyen no/_/rnga yab dpal ri'i zhing nas gzigs shig_/snyigs ma'i gdul bya gangs can bod 'bangs/_/mkhyen brtse nus pas dbugs 'byin mdzod cig_/grub chen rje 'bangs nyer lnga mkhyen no/_/sgyu 'phrul rdo rje'i dbyings nas gzigs shig_/gsang sngags smin grol zab mo'i lam gyis/_/myur bar rig 'dzin sa ru drongs mdzod/_/so zur gnubs kyi rig 'dzin mkhyen no/_/rang snang 'og min zhing nas gzigs shig_/gsang sngags chu bo bzhi yi bka' bab/_/bdag la da lta nyid du stsol cig_/'gro 'dul gter ston brgya rtsa mkhyen no/_/gang 'dul ye shes klong nas gzigs shig_/zab rgyas lam gyi smin grol rgya mtshos/_/mchog thun dngos grub brnyes par mdzod cig_/kun mkhyen klong chen yab sras mkhyen no/_/nang gsal chos zad klong nas gzigs shig_/khyab bdag ye shes dgongs klong mngon gyur/_/'khrul snang ka nas dag par mdzod cig_/'jam dbyangs mkhyen brtse'i dbang po mkhyen no/_/mkhyen gnyis ye shes dbyings nas gzigs shig_/thub bstan lung rtogs gsang mdzod rgya mtsho/_/zab don ji bzhin rtogs par mdzod cig_/kun mkhyen blo gros mtha' yas mkhyen no/_/kun khyab thugs rje'i rol pas gzigs shig_/snyigs ma'i mun pa drung nas 'byin pa'i/_/rgyal bstan shing rta 'dren nus mdzod cig_/mchog gyur bde chen gling pa mkhyen no/_/pad+mas khebs pa'i zhing nas gzigs shig_/rgyal kun gsang ba zab mo'i chos kyis/_/'gro kun thar par 'dren nus mdzod cig_/bka' gter brgyud pa'i bla ma mkhyen no/_/'od gsal rdo rje'i dbyings nas gzigs shig_/rim dgu'i theg pa'i lam gyi spang rtogs/_/myur du rgyud la 'char bar mdzod cig_/bka' gdams lam 'bras brgyud pa mkhyen no/_/byang chub sems gnyis dbyings nas gzigs shig_/rgyud gsum lam gyis rdo rje'i sar bgrod/_/gzhan phan mkha' dang mnyam par mdzod cig_/bka' brgyud shangs pa yab sras mkhyen no/_/zung 'jug grub pa'i dbyings nas gzigs shig_/thabs bral gseng lam zab mor bgrod pas/_/lhan skyes ye shes rtogs par mdzod cig_/zhi gcod dus zhal mkhas grub mkhyen no/_/las rab rdzogs pa'i zhing nas gzigs shig_/gzung 'dzin zug rngu drung nas 'byin pa'i/_/mchog tu mi 'gyur bde chen dpyid stsol/_/ris med mkhas dang grub tshogs mkhyen no/_/gang 'dul mdzad pa'i gar gyis gzigs shig_/rdo rje'i gsum gyi byin rlabs chen pos/_/bdag nyid mngon par byang chub mdzod cig_/kun gzigs mi pham rgya mtsho mkhyen no/_/byang phyogs sham+b+ha la nas gzigs shig_/rang byung ye shes rdo rje'i nyi mas/_/'khrul rtogs mun pa drung 'byin mdzod cig_/khyab bdag pad+ma bi dza mkhyen no/_/sku gsum zhing khams klong nas gzigs shig_/stong nyid snying rje dbyer med rtogs pas/_/thugs yid gcig tu 'dres par mdzod cig_/'jam dbyangs chos kyi blo gros mkhyen no/_/mkhyen brtse nus pa'i klong nas gzigs shig_/'khor ba dong sprugs nus pa'i phrin las/_/ji bzhin spyod pa'i skal bzang stsol cig_/'jigs med mkhyen brtse'i 'od zer mkhyen no/_/gang 'dul ye shes rtsal gyis gzigs shig_/zab mo'i lam bzang mthar phyin ngang nas/_/sku bzhi'i rgyal sa zin par mdzod cig_/drin chen rtsa ba'i bla ma mkhyen no/_/rgyal kun dgongs pa'i dbyings nas gzigs shig_/snyigs ma'i gdul bya rjes su 'dzin pas/_/gtan du bde ba'i sa la drongs mdzod/_/e ma sangs rgyas kun gyi mkhyen brtse nus/_/bdag sogs 'dul phyir dge ba'i bshes kyi tshul/_/dpal ldan bla ma'i zhabs la gsol ba 'debs/_/gdung bas 'o dod 'bod la thugs rjes gzigs/_/nges 'byung bdud rtsis sems rgyud srid las grol/_/gzhan phan tshogs gnyis spyod pa'i dkyil 'khor rdzogs/_/dad mos rnam dkar zla ba rab gsal bas/_/theg mchog chos kyi sgo brgya 'byed par mdzod/_/mtshan ldan bla ma mnyes pa gsum gyis bsten/_/thos bsam sgom pas zab rgyas chos don rtogs/_/sdom gsum rnam dag smin grol char bzang gis/_/gzhi yi rigs kyi nus pa sad gyur cig_/snang grags rig pa rdo rje gsum gyi ngang*/_/bde gsal mi rtog don gyi ye shes rtsal/_/gnyis med chos sku phyag rgya chen po'i don/_/da lta rten 'dir rtogs par mdzad du gsol/_/khyad par dben pa'i sman ljongs nyams dga' bar/_/'dir snang chos brgyad 'khrul pas mi bslu bar/_/dad dang nges 'byung snying rje'i brtson pa yis/_/thar pa'i lam bzang tshul bzhin snyogs nas kyang*/_/gnas lugs rig stong gnyug ma rdo rje sems/_/'khrul pa'i rgyu 'bras ka nas dag pa'i dbyings/_/ngo shes rtsal rdzogs brtan pa mchog thob ste/_/'pho med rdo rje'i dbyings su sangs rgyas mdzod/_/sku gsum 'od gsal shes rab rang byung gdangs/_/zag zad gzhon nu bum pa'i gzhi klong du/__/mngon sangs rgyas pa'i sku gsum lam du rdzogs/_/grol ba drug gi mdzad pa lhun grub shog_/mdor na sangs rgyas 'phags pa'i spang rtogs kun/_/bla ma'i byin rlabs kho nas bdag rgyud du/_/rdzogs phyir rtse gcig gsol ba btab pa bzhin/_/mngon gyur mgon po khyed dang mnyam par shog_/ces pa'ang rnam par dkar ba'i dad mos blo gros gsal ba 'brug chos rtse'i dge slong sangs rgyas chos 'grub nas ched du bskul ba bzhin rdzogs pa'i sangs rgyas dngos dang zhal mi gnyis pa'i ris med mkhas grub du mas rjes su bzung ba'i skal bzang thob pa'i mdo khams shar phyogs kyi ku sA li bkra shis dpal 'byor mkhyen brtse'i 'od zer du 'bod pas lho 'brug rgyal khab tu gnas pa'i skabs bris pa 'dis kyang skye kun dpal ldan bla mas rjes su 'dzin pa'i rgyur gyur cig_
!_bla ma rgyang 'bod byin rlabs sprin phreng bzhugs so/__/bla ma mkhyen no/_/ston mchog shAkya'i rgyal po mkhyen no/_/sku lnga lhun grub dbyings nas gzigs shig_/lnga brgya tha ma'i gdul bya thams cad/_/thar pa mchog gi lam du drongs shig_/o rgyan pad+ma 'byung gnas mkhyen no/_/zangs mdog dpal ri'i zhing nas gzigs shig_/bod yul rtsod dus 'gro ba ma lus/_/thugs rje myur mgyogs phyag gis zung zhig_/bka' gter brgyud pa'i rig 'dzin mkhyen no/_/sku gsum rgyal ba'i zhing nas gzigs shig_/grol ba drug gi phrin las chen po/_/'brel tshad phyir mi ldog par mdzod cig_/bka' gdams jo bo yab sras mkhyen no/_/gzhan phan byang sems klong nas gzigs shig_/gdul dka' dmu rgod 'gro ba thams cad/_/thugs bskyed zhags pas thar par drongs mdzod/_/sa skya brtse chen khu dbon mkhyen no/_/'og min dag pa'i zhing nas gzigs shig_/snyigs dus yid can 'khrul par 'khyams kun/_/thams cad mkhyen pa'i lam du drongs shig_/bka' brgyud mar mi dwags gsum mkhyen no/_/bde chen dag pa'i zhing nas gzigs shig_/chos brgyad gzung 'dzin zhen pas 'ching kun/_/zung 'jug grub pa'i rgyal sar sbyor cig_/mkhas grub khyung po rnal 'byor mkhyen no/_/mkha' spyod DA ki'i zhing nas gzigs shig_/las nyon sdug bsngal can gyi 'gro rnams/_/myur du rdo rje'i lam mchog ston cig_/dam pa sangs rgyas lab sgron mkhyen no/_/las rab grub pa'i zhing nas gzigs shig_/sdug bsngal drag pos gzir ba'i 'gro kun/_/bde chen thar pa'i gling du drongs shig_/chos rgyal rigs ldan jo zhal mkhyen no/_/byang phyogs sham+b+ha la nas gzigs shig_/nag phyogs kla klo'i 'jigs las bskyabs te/_/rdo rje'i sa la dbugs dbyung mdzod cig_/'phags bod lo paN thams cad mkhyen no/_/'gro 'dul thugs rje'i zhing nas gzigs shig_/ma lus 'gro ba'i sgo gsum 'khrul pa/_/rdo rje gsum du dag par mdzod cig_/'jam mgon nyi zla zung gcig mkhyen no/_/rab 'byams rgyal ba'i zhing nas gzigs shig_/rtsod dus mun pa'i gdul bya thams cad/_/'brel tshad don ldan sa la sbyor cig_/mi pham 'jam dbyangs rnam rgyal mkhyen no/_/rgyal kun thugs kyi dbyings nas gzigs shig_/sras bcas sangs rgyas kun gyi rnam thar/_/'gro kun 'jug cing spyod par mdzod cig_/rgyal tshab pad+ma rnam rgyal mkhyen no/_/'od gsal lhun grub dbyings nas gzigs shig_/mkha' khyab 'gro kun phyir mi ldog par/_/thams cad mkhyen pa'i sa la sbyor cig_/'jam dbyangs chos kyi blo gros mkhyen no/_/tshad med thugs rje'i klong nas gzigs shig_/mkhyen brtse'i thugs bskyed chen po'i shugs kyis/_/bla med thar pa'i lam du drongs shig_/rang byung rig pa'i rdo rje mkhyen no/_/kun khyab thugs rje'i dbyings nas gzigs shig_/ma lus 'gro kun srid zhi'i g.yang las/_/sgrol te thar pa'i grong du khrid mdzod/_/'jigs med mkhyen brtse'i 'od zer mkhyen no/_/spyi gtsug bde chen zhing nas gzigs shig_/smin grol chos kyi gdams ngag zab mos/_/bdag rgyud smin cing grol bar mdzod cig_/ris med mkhas grub rgya mtsho mkhyen no/_/gang 'dul thugs rje'i klong nas gzigs shig_/bstan pa yongs rdzogs chos kyi bdud rtsis/_/skal bzang rnam grol sa la drongs shig_/sangs rgyas kun gyi thugs rje'i ye shes/_/gang 'dul bla ma'i gzugs su ston pas/_/ma lus 'gro kun bde nas bde bar/_/myur du dbyugs dbyung byin rlabs stsol mdzod/_/sku gsung thugs kyi rdo rje'i dbyings su/_/sgo gsum smin cing grol bar gyur nas/_/don gnyis lhun grub sku bzhi'i go 'phang*/_/mngon sum grub pa'i skal bzang mdzod cig_/oM AHhU~M badz+ra ma hA gu ru sarba dz+nyA na sid+d+hi hU~M/_zhes mos gus rtsal du sprugs pas gsol ba rtse gcig tu gdab bo/_/zhes pa'ang lho 'brug gi dge sbyong spong ba pa karma tshul khrims gzhan phan pas spar du bsgrubs par bla ma rgyang 'bod zhig dgos zhes bskul ba ltar mkhas grub bla ma du mas rjes su bzung ba'i skal bzang can mang+ga las bris pa 'gro kun chos bzhin spyod pa'i dge ba'i bshes kyis rjes su 'dzin pa'i rgyur gyur cig__/dge'o/ !__bla ma rgyang 'bod byin rlabs thugs rje'i lcags kyu zhes bya ba bzhugs so/__bla ma mkhyen no/_lan gsum/_ston mchog shAkya'i rgyal po mkhyen no/_/srid zhi kun khyab dbyings nas gzigs shig_/lnga brgya tha ma'i gdul bya thams cad/_/don gnyis lhun grub sa la drongs shig_/rgyal dbang mtsho skyes rdo rje mkhyen no/_/sku lnga ye shes klong nas gzigs shig_/'khrul snang 'khor ba'i mtsho las sgrol te/_/rnam grol sa la dbugs dbyung mdzod cig_/rje btsun bzhad pa rdo rje mkhyen no/_/mkha' spyod mngon dga'i zhing nas gzigs shig_/gcig pu ri khrod dben gnas zin nas/_/nyams rtogs ye shes 'char bar mdzod cig_/kun mkhyen klong chen rab 'byams mkhyen no/_/lhun grub 'od lnga'i klong nas gzigs shig_/klong chen dgongs pa'i rtsal chen rdzogs nas/_/sku gsum btsan sa zin par mdzod cig_/rig 'dzin 'jigs med gling pa mkhyen no/_/dbyings rig dbyer med klong nas gzigs shig_/dgongs brgyud rtogs pa'i pha phog thob nas/_/da lta thugs yid dbyer med mdzod cig_/'jam dbyangs mkhyen brtse'i dbang po mkhyen no/_/mi 'gyur rdo rje'i dbyings nas gzigs shig_/sgrib gnyis ka dag chen po'i klong nas/_/dgongs pa'i btsan sa zin par mdzod cig_/'jigs med ye shes rdo rje mkhyen no/_/khrag 'thung mngon rdzogs zhing nas gzigs shig_/rmad byung mkhyen brtse nus pa'i stobs kyis/_/khams gsum 'khor ba dong nas sprugs mdzod/_/'jam mgon yon tan rgya mtsho mkhyen no/_/ngo bo nyid sku'i klong nas gzigs shig_/zag med 'dus ma byas pa'i sa ru/_/mngon par byang chub brnyes par mdzod cig_/mchog gyur bde chen gling pa mkhyen no/_/pad+ma drwa ba can nas gzigs shig_/rtag khyab lhun grub phrin las zab mos/_/'brel tshad pad+ma'i 'od du drongs shig_/mi pham phyogs las rnam rgyal mkhyen no/_/sgrib bral chos kyi dbyings nas gzigs shig_/lhan skyes gnyug ma'i rtog pa spor la/_/chos sku'i ye shes mngon gyur mdzod cig_/mkhan chen bkra shis 'od zer mkhyen no/_/dga' ldan lha brgya'i dbus nas gzigs shig_/gzhan phan thugs bskyed go cha chen pos/_/rdzogs smin sbyangs pa mthar phyin mdzod cig_/rgyal tshab pad+ma dgyes pa mkhyen no/_/rang snang 'og min zhing nas gzigs shig_/'od gsal lhun grub nyams rtogs bskyed la/_/nang gi ye shes mngon 'gyur mdzod cig_/rig 'dzin 'ja' lus rdo rje mkhyen no/_/'gro 'dul thugs rje'i dbyings nas gzigs shig_/snang srid dag pa rab 'byams klong der/_/sprul sku'i ye shes mngon 'gyur mdzod cig_/grub dbang 'jam dbyangs grags pa mkhyen no/_/brtse chen snying rje'i klong nas gzigs shig_/'brel tshad don ldan phrin las zab mos/_/'gro kun thar pa'i gling du drongs shig_/rje btsun d+harma shrI mkhyen no/_/rang byung ye shes dbyings nas gzigs shig_/'gro drug blo sna chos la bsgyur te/_/myur du phan bde'i sar spyod mdzod cig_/'jigs bral mkhyen brtse'i 'od zer mkhyen no/_/spyi gtsug bde chen zhing nas gzigs shig_/'bral med dgongs pa'i byin rlabs zab mos/_/tshe rabs kun tu rjes 'dzin mdzod cig_/rigs kun khyab bdag bla ma mchog rnams/_/snying dbus dad pa'i pad+mor bzhugs la/_/ngo mtshar byin rlabs snang ba chen pos/_/phyir mi ldog pa'i zhing du drongs shig_/'aH_aH_haH_shaH_saH_maH_oM badz+ra satwa AH_zhes ci nus su bzla/_rtag tu bla ma dran pas gsol 'debs 'di bzhin ci nus su brtson par bya'o/_/zhes dad ldan chos la bskul phyir mang+ga la shrI b+hu tis bris pa don dang ldan par gyur cig__/dge'o/ !__rnam 'dren 'khor lo'i mgon po mdo sngags kyi shing rta mchog la mos gus bla ma rgyang 'bod byin rlabs nyin byed 'dren pa'i shing rta zhes bya ba bzhugs so/_na mo gu ru/_'od gsal chos sku'i dbyings su bde chen gyi sgyu 'phrul/_/rab 'byams rigs kun khyab bdag lnga ldan gyi ston pa/_/gang 'dul thar pa'i ded dpon chen po ru bzhengs pa/_/dran pas yid kyi gdung sel nyi zla zung mkhyen no/_/gsang chen bka' yi sdud po rdo rje chos mchog nyid/_/bod yul chos kyi nyin byed mchog gcig tu bzhengs te/_/slar yang rgyal bas lung bstan 'jam mgon gyi bla ma'i/_/rnam 'phrul pad+ma dri med blo gros de mkhyen no/_/sangs rgyas stong gi 'dren pa nus ldan gyi rdo rje/_/gu ru'i thugs kyi khye'u chung lo tsA yi tshul gang*/_/bka' gter smin grol bdud rtsi'i 'byung gnas su byon pa/_/'jigs bral rig 'dzin ye shes rdo rje de mkhyen no/_/phyogs dus 'dren pas ma thul snyigs ma lnga'i sems can/_/kun khyab thugs rje'i phyag gis co to nas bzung ste/_/kun mkhyen nor bu'i gling du 'dren pa yi skyabs gcig_/mtshungs med mkhas dang grub pa'i ded dpon rje mkhyen no/_/zab rgyas smin grol bdud rtsi'i chu klung gi 'byung gnas/_/dgongs rgyud byin rlabs gzi 'bar ye shes kyi snang bas/_/rtsod dus gdung sel mdo sngags ston pa yi rgyal tshab/_/dge legs phan bde'i 'byung gnas gcig pu de mkhyen no/_/kun phan thugs bskyed nor bu'i 'od zer gyi phreng bas/_/lnga bdo snyigs ma'i mun pa sel byed kyi phrin las/_/smin grol chos kyi dpal 'byor phongs med du bstsal bas/_/yang dag thar ba'i lam mkhan rmad byung de mkhyen no/_/phyogs su ma lhung mtha' yas gdul bya'i tshogs kun la/_/brtse chen thugs rje'i gang 'dul phrin las kyi rol pas/_/rjes 'dzin rnam grol mchog gi ngal stegs la bkod pa'i/_/bka' drin mtshungs zla bral ba'i mgon po zung mkhyen no/_/khyad par bdag rgyud las nyon 'dam rdzab kyi khrod du/_/ye shes nor bu'i 'od kyis thar grol gyi pad tshal/_/bzhad mdzad bka' drin rjes su dran pa yi ngang nas/_/yab gcig rnam 'dren rgya mtsho'i dbang phyug de mkhyen no/_/srid las nges par 'byung ba'i blo mchog gi zhing sar/_/gzhan phan byang chub sems kyi dbyar skyes tshal dar bas/_/bla ma mchog gsum byin rlabs snye ma yis dud de/_/sdom gsum ma nyams 'bras bu phyug pa ru mdzod cig_/mtshungs med rdo rje bzhi yi dkyil 'khor du smin pas/_/snang srid bla ma'i ye shes dkyil 'khor du shar te/_/lhan skyes bde ba chen po'i dngos grub kyi dga' ston/_/mchog gi rig 'dzin brnyes pa'i byin rlabs kyi mthu stsol/_/bzod nas rnam grol 'od gsal chos sku yi bla ma/_/'du 'bral med pa'i mos gus snying dbus su skyes te/_/sku bzhi rang la rdzogs pa mngon gyur du sad de/_/thugs yid dbyer med 'dres par byin gyis rang rlobs shig_/ces mtshungs med mgon po zung gi dad slob bla ma rdo rje rnam rgyal nas bskul ngor mnyam med bla ma mchog gi 'bangs 'gyur med theg mchog bstan pa'i rgyal mtshan gyi cho 'phrul zla 1_tshes 10_la bris pa skye kun rnam 'dren mkhas grub rgya mtsho'i rjes su 'dzin pa'i rgyur gyur cig !__bla ma rgyang 'bod byin rlabs bdud rtsi'i 'byung gnas bzhugs/_bla ma mkhyen no/_gzhi dbyings rdo rje snying po tshangs pa yi rnga sgra'i/_/zhing kun mdzes byed phyogs dus rgyal kun gyi mkhyen brtse/_/gcig bsdus rdo rje slob dpon pad 'byung gi mtshan can/_/dran pa'i srid zhi'i gdung sel bla ma rje mkhyen no/_/bka' gter pad+ma'i lang tsho dar bab kyi tshal du/_/mkhas grub rnam thar lus stobs rdzogs pa yi lag ldan/_/snyigs dus bstan 'gro dbugs 'byin mtshungs med kyi 'dren pa/_/khyab bdag 'jigs bral ye shes rdo rje de mkhyen no/_/mtshungs bral rnam 'dren rgya mtsho'i ye shes kyi snang bas/_/legs skyong ris bral thub bstan snying po yi bdud rtsis/_/dad blo sim pas thar grol 'dab stong gi mdzes pa'i/_/'gyur med theg mchog bstan pa'i rgyal mtshan de mkhyen no/_/rgyal kun thugs rje'i rol pa gang 'dul gyi sprin dkar/_/mos gus mkha' la 'du 'bral med pa ru bzhugs pas/_/gsol 'debs khu byug myos pa'i glu dbyangs kyis bskul na/_/byin rlabs char chen phob cig dpal mgon gyi bla ma/_/'jigs rung srid las nges 'byung mthun phyogs kyi rlung gis/_/rab bskul dal rten rin chen gru gzings kyi ba dan/_/rgyu 'bras yid ches brtson pa mi lhod par bgrod pas/_/nges legs nor bu'i gling du da lta rang skyel mdzod/_/gzhan phan byang sems yid bzhin nor bu yi tog mdzes/_/tshogs gnyis za 'og rgyal mtshan rtse mo ru mchod nas/_/gdul dka' mi 'dor go cha'i chu ba'i rtser mdzes pas/_/don gnyis 'dod dgu 'byung ba'i dga' ston la sbyor mdzod/_/smon lam dbang bzhi sos ka'i char bzang gi dga' ston/_/gzhi rgyud zab gsal gnyis med chos sku'i zhing bran pas/_/bskyed rdzogs rin chen snye ma g.yur du rang za bas/_/sku bzhi'i 'bras bu dud pa'i byin rlabs mchog stsol cig_/khyad par mos gus khyung sngon skyes rta yis drangs pa'i/_/rdo rje nang gi nyin byed rtsol med du shar nas/_/yid dpyod blo yi sbubs brtol don brgyud kyi pad tshal/_/gsang chen kun dga'i do ra mdzes nus su mdzod cig_/dri med sdom gsum mig gi 'bras bu bzhin bsrungs nas/_/lha sngags chos sku'i snang grags rig pa kun lam khyer/_/mtha' klas bstan 'gro'i don chen yid bzhin du 'grub pa'i/_/mthun gyur rje btsun dpal ldan bla ma yis mdzod cig_/ces pa'ang gtsug lag du ma blta ba'i blo gros kyi mig dang ldan pa lho brag lha lung theg mchog rab rgyas gling gi btsun pa ngag dbang mchog legs nas gsung bskul bzhin dpal mgon bla ma rnams kyi bran du skyes ba'i rgan po mang+ga las bris pa don dang ldan par gyur cig
!__a ho/_srid zhi'i khyab bdag rang byung dang po yi sangs rgyas/_/'od gsal sku dang yon tan mi zad pa'i 'byung gnas/_/chos dbyings khyab brdal ye shes sku can gyi ston pa/_/chos sku'i bla ma rdo rje thugs mchog rtsal mkhyen no/_/rab 'byams dkyil 'khor rgya mtsho'i rnam rol gyi bkod pa/_/bsam yas spro dang bsdu ba'i cho 'phrul gyi byed po/_/bde stong 'pho 'gyur med pa'i thig le ru shar ba/_/longs sku'i bla ma pad+ma dbang chen rtsal mkhyen no/_/ma lus sras dang bcas pa'i rgyal kun gyi phrin las/_/'jam mgon dpal ldan bla ma'i mtshan dpe ru bzhad pas/_/ris med bstan 'gro'i dge mtshan 'dod pa ru 'jo mdzad/_/sprul sku'i bla ma mkhyen brtse'i 'od zer de mkhyen no/_/bka' drin mtshungs zla bral ba'i drin chen gyi bla ma/_/'bral med spyi gtsug rgyan du rtag pa ru bzhugs nas/_/dgongs brgyud byin rlabs zab mo'i nyin byed kyi snang ba/_/myur du snying la phob cig ye shes kyi dbang bskur/_/dad dang snying rje nges 'byung byang sems kyis rgyud dul/_/bskyed dang rdzogs pa mthar son dbang bzhi yi lam gyis/_/mthar thug gdod ma chos sku'i rgyal thabs la 'god pas/_/thugs yid gcig tu 'dres par byin gyis rang rlobs shig_/ces bsgrub brtson sne'u gdong ban tshang bla mas bskul ngor bla ma'i gzugs brnyan mang+ga las shrI b+hU tis bris pa dge zhing don dang ldan par gyur cig__/mang+ga lat+ta/
!__khyab brdal nam mkha'i ting 'dzin dbyings dang mnyam par/_/zang thal rig pa'i ltad mo 'bum phrag brdal klong*/_/rtag tu mnyam par bzhag pa'i he ru ka dpal/_/yab gcig dpal mgon bla ma snying dran byung*/_1_/col chung sems kyi spre'u rgyal khams yan pas/_/sna tshogs yul gyi snang ba 'ja' tshon ri mo/_/cir yang snang ba'i dbang gis gang shar rnam rtog_/thol byung glu ru len la spro snang 'char 'dra/_2_/lhun chags brag ri'i mgul na bag phebs dben pa/_/rnal 'byor grub pas brten pa'i rang byung sgrub phug_/ljon shing bya tshogs rnams kyang glu dbyangs dir dir/_/'di 'drar mnyam par bzhag pa 'dun pa'i rtse mo/_3_/'dir snang chu ris ded pa'i ngal dub mang po'i/_/chags sdang mdud pas rang sems dam por dkris nas/_/phyir ring 'khor ba'i gting rdo'i 'ching thag sgrub pa/_/yud kyis bor la dben pa'i bas mthar phebs dang*/_4_/phyin pa tsam gyis rig pa rang bzhin dwangs shing*/_/'du 'dzi'i spros chod ting 'dzin ngang gis 'char 'dir/_/mi g.yo lhod kyis klod pa'i gu yangs rnal 'byor/_/sngon byon grub thob de tsho e ma ngo mtshar/_5_/rgyal ba'i phrin las rgya mtsho'i dus rlabs mi yol/_/ri sul spong ba'i bsam gtan spyil bur nyams dgar/_/theng gcig phyin pas gsol 'debs smon lam zhus tshe/_/dga' spro'i snang ba ma bcos sems la shar song*/_6_/chos nyid rig stong dbyings su skyid sdug ro snyoms/_/'khrul pa ka nas dag pa gshis kyi bzhugs tshul/_/mngon sum rtogs pa min kyang mos pa'i gdeng gis/_/mnyam par bzhag khul byas pas skyid skyid 'dra lags/_7_/snang ba sgyu mar rtogs pas chos kun ma lus/_/ye shes rgyan du rdzogs pa'i lta stangs gcig gis/_/'khrul rtog yud kyis bcad pa'i grub thob chen po/_/ye shes lus can de tsho e ma ngo mtshar/_8_/rdo rje nang gi sa lam rdzogs pa'i gdeng can/_/bde stong dpa' bo DA ki'i 'du ba bcas te/_/brtul zhugs tshogs kyi 'khor lor mngon sum spyod pa'i/_/'dus pa de 'dra mthong na e ma dga' ba/_9_/kun khyab chos nyid lta ba skungs su sbas te/_/a 'thas 'khrul pa'i gsob la chos gzugs bcos pa'i/_/tha chad bdag 'dras dus kyi tha mar khengs pas/_/da ni ci bya med pa khyi bzhin 'khyams song*/_10_/lta ba nam mkha'i mdung skor grub thob spyod yul/_/sgom pa 'od gsal chu rgyun kha bshad tsam zhig_/spyod pa rang grol chen po stor nas song bas/_/tshol yang rnyed thabs mi 'dug skal dman bdag 'dras/_11_/skyo yang ci bya med pa dad mos tsam gyis/_/gsol 'debs smon lam bzang po'i 'brel bar zhus nas/_/phyi mar rdo rje'i rigs kyi skal bzang 'gyur bar/_/grogs mchog 'phags pa'i skyes bu'i mthun 'gyur gnang mdzod/__/ces pa 'di'ang mang+ga las so//__//
