DKR-KABUM-01-KA-003-wylie

From Khyentse Lineage - A Tsadra Foundation Project

Template:WyliePageHeader

<div class="wylie-content"


@#/___/sangs rgyas mnyan sprul dgu pa'i rnam thar mdor bsdus dad pa'i sa bon bzhugs so/_/ @#/___/na mo gu ra we/_/phul byung brtson pas zung 'jug rdo rje'i grong*/_/sku tshe gcig gis legs par son pa las/_/sku bzhi'i khyab bdag gangs can grub pa'i rje/_/sangs rgyas mnyan pa'i zhabs la phyag 'tshal lo/_/mchog gi sgyu 'phrul skyes pa rabs kyi phreng*/_/rnam thar bzang po dag pa'i gser sbyang khams/_/snyigs mas ma smad mngon sum gsal ba'i gtam/_/cung zad 'chad 'di dad ldan kun dga'i gsos/_/de yang gangs can ljongs su rgyal bstan rin po che'i snying po sgrub brgyud shing rta chen po brgyad du grags pa'i ya gyal/_zung 'jug grub pa brnyes pa'i skyes bu nam mkha'i rgyu skar dang*/_sa chen po'i rdul lta bu da lta'i bar zam ma chad par byon pa'i sgrub brgyud rin po che karma kaM tshang gi don brgyud gser ri'i phreng ba las grub pa'i dbang po sangs rgyas mnyan pa zhes yongs su grags pa ni/_gdod ma nyid nas rdzogs pa'i byang chub kyi go 'phang brnyes zin kyang gang 'dul der snang gi rol pa 'gog tu med pas rgyal tshab ma pham pa sogs sa bcu'i byang chub sems dpa' du mar byang chub mchog tu thugs bskyed cing phrin las mi zad pa rgyan gyi 'khor lor grub cing*/_'gro ba'i don sna tshogs par mdzad pa las/_!_rgyal dbang thams cad mkhyen gzigs chen po bdun pa chos grags rgya mtsho'i thugs kyi sras su gyur cing kun mkhyen mi bskyod rdo rjes rigs kyi bdag por dbang bskur zhing zung 'jug gser ri'i phreng bar bzhugs su gsol ba nas bzung sangs rgyas mnyan pa grub chen bkra shis dpal 'byor zhes yongs su grags pa yin/_rje 'di nyid ni/_'khrungs ma thag nas gsung smra zhing*/_lo gcig nas dran pas zin/_nges 'byung gis rgyud bskul te/_dgung lo lnga nas gtsug phud rang gis bcad de btsun pa'i mtshan rtags bzhes/_karma pa'i mtshan gsan pa tsam gyis mos gus khyad par can 'khrungs nas/_dgung lo drug gi steng karma pa chos grags rgya mtsho'i drung du bcar/_mtshan bkra shis dpal 'byor du gsol/_/dgung grangs brgyad steng*/_ban sgar pa dang dge bshes dpal 'byor don 'grub gnyis las rab tu byung*/_lo bdun tsam ring bla ma 'bral med du bsten cing mdo sngags gzhung sogs smin grol gyi rigs mtha' dag gsan/_kam po gnas nang*/_spang phug mtshur phu sogs su g.yos pa'i zas ma gsol bar lo brgyad kyi bar du rlung bcud len kho na mdzad pas mtshon thos bsam sgom gsum phrug mar mdzad/_dgung grangs zhe gsum gyi steng 'dan yul chos sde chen po btab/_bsam sbyor ngan pa'i skye bo 'ga' zhig gi rtsod pa byung ba na/_sa g.yo chen pos de dag gi snod bcud phal cher bshig_/rje de nyid khang pa thog bzhi'i steng na bzhugs pa'i skabs khang pa zhig ste nam mkhar 'phur ba nas bzung mnyan pa grub thob ces grags so/_/de nas dgon pa spos te byang chub gling btab/_dge 'dun gyi sde chen po tshugs/_rje brgyad pa'i rigs kyi bdag po mdzad cing smin grol gyis bskyangs pa sogs bstan la sman pa'i bya ba ma tshang ba med pa bsgrubs shing*/_dgung lo re lnga bzhes skabs dgongs pa mya ngan las 'das so/__/'di yi sprul gzhi yang rgyal tshab byams pa/_rgya gar gyi slob dpon dpal ye shes snying po/_g.yag phrug sangs rgyas pa sogs yin par grags shing khyad par du dam pa de nyid mya ngan las 'das nas zhag bdun song ba'i nub mo rgyal dbang brgyad pa'i gzim lam du/_ye shes mkha' 'gro zhig gis glu ru blangs pa 'di ltar/_sngon gyi tshe na rgyal ba bde ba'i glu/_/snyigs ma'i dus na dran pa ye shes nyid/_/da lta byang phyogs rnam par bkod pa na/_/drug 'bum bdun khri'i dge slong mdun bdar te/_/'dan ma grub chen tshul ni de ltar ro/_/zhes paN+Di ta smr-i ti gzhan don du srid pa nye bar bzung bar snang zhes kun mkhyen d+harmA ka ras gsungs/_de lta bu'i grub brnyes kyi skyes bu de nyid mthon mthing cod pan 'chang ba rim byon dang 'brel bar gzhan don du gzugs skur snang ba ste/_mnyan pa gnyis pa lhun po rab brtan/_dge legs snying po/_dge legs rgya mtsho 'dis da lta yongs su grags pa'i ban chen dgon chags btab/_dge legs snying po/_sgrub brgyud bstan dar/_shes rab snying po/_bstan 'dzin grub mchog ste sku phreng rim byon de dag kyang bstan 'dzin gyi skyes bu'i rang rtags kyis 'gro 'dul phrin las pa chen po sha stag yin/_dam pa de'i sku'i skye phreng dgu pa karma bshad sgrub bstan pa'i nyi ma zhes yongs su grags pa de nyid kyi rnam par thar pa mdor bsdus kyi rim pa skal ldan dad pa'i gsos su sbyin pa la/_don gsum/_thog mar sku 'khrungs pa'i nges pa dang ngo mtshar ba'i rnam pa ci rigs gsal ba'i rnam thar 'da' khar bstsal ba nyid khungs su smos/_mkhas btsun bzang po'i rnam thar bye brag tu bshad pa/_mtha' ma'i mdzad pa ji ltar bstan pa'o/_/dang po ni/_dam pa de nyid dgung grangs drug cu re drug tu phebs pa rab rgyal dge byed chu stag tha skar zla ba'i dmar phyogs tshes nyer gcig nyin dgongs pa rdzogs la nye ba'i skabs rje nyid kyis rnam thar mdor bsdus phyag bris su bstsal ba zhal bshus pa 'di lta ste/_kho bo rgan bu nad 'di'i 'og nas thar te skyabs gnas dkon mchog gi thugs rjes lo shas 'tsho yang srid/_ma 'tsho na yang*/_dus la babs na dpag bsam shing yang 'gyel/_/gsungs pa ltar rang gzhan kun la bya thabs med cing*/_rang ngos nas bya ba thams cad tshar bas 'gyod pa spu tsam yang med/_des na rgyud las/_'da' ka 'od kyi gong bu sgra yis 'pho/_/zhes pa ltar 'chi ba lam khyer gyi skabs su babs pa yin/_'jig rten pa'i gtam dpe la/_'chi khar gtam ma mang*/_nyal khar ja ma mang zhes pa ltar smra ba nyung na legs pas rang lo drug cu re drug tu son pas chos dang 'jig rten gang gi bya ba la bshad pher ba spu tsam med kyang*/_'jam mgon kong sprul rin po ches/_skye snga ba'i yon tan cung zhig yod/_gsungs pa ltar deng sang gi dus la dpag na skye snga ba'i skal bzang gi tshul cung zad 'dug pa ma bcos par bshad na/_skyes pa'i yul ni mdo khams shar phyogs/_gling khri gong 'og bar gsum las bar pa/_mdo khams sgang drug las 'bri zla zal mo sgang*/_chu bo gser ldan 'bab pa'i 'gram rje btsun myur ma dpal mo dgyes par bzhugs pa'i sman ljongs 'dan glang thang sgrol ma zhes mtha' 'dul gyi gtsug lag khang gis mdzes pa'i mdo khams 'dan yul zhes su grags pa/_mdo smad gnas chen nyer lnga'i nang tshan sku yi thugs kyi gnas mchog pad+ma ri dang*/_phrin las 'gro 'dul sprul pa'i gnas brgyad kyi bye brag drag po'i gnas mchog seng+ge gnam rdzong sogs gnas chen gnas phran du mas bskor zhing*/_'dan ma rtse mang*/_paN chen smr-i ti dz+nyA na sogs skyes chen nyi zla ltar grags pa du ma 'khrungs shing bzhugs pa'i yul gyi srib phyogs/_sngon nas bde mchog gi gnas su grags shing*/_phyis kyi dus 'dir mi pham 'jam pa'i dbyangs kyis ched du bka' bstsal te sgrub pa yun ring mdzad cing*/_rgyud kyi rgyal po dpal dus kyi 'khor lo'i chos 'khor bskor zhing ri gling gi bkod pa byang phyogs sham+b+hAl dang mtshungs par bsngags te gzugs sku'i bkod pa dbyings su bsdus pa'i gnas dpal ldan 'bras spungs kyi mchod rten gnyis pa go thi bkra shis dpal 'bar gling zhes grags pa'i ri bo lhun chags pa'i mdun du gangs can mkhas grub yongs kyi rgyal po pad+ma 'od gsal mdo sngags gling pa'i gter lung las/_rigs ni gnyos yin rus ni sga/_/zhes gsungs pa ltar dil mgo zhes rigs rus sogs mtho ris kyi yon tan phun sum tshogs pa du mas spras pa'i khyim du pha ma stobs 'byor bsod nams dang ldan par rab byung bcu bzhi pa'i skor me mo bya lor skyes/_chung ngu'i dus nas dge ba'i bag chags phra mo yod pa 'dra ste/_khyim de'i mdun ri lhun chags shig yod pa de'i ngos su nyi ma 'char sdud kyi rkyen las yin 'dra karma pa'i sku shin tu gsal ba zhig rtag par mjal/_rtse grogs byis pa gzhan la zhib tu dris pas gtan nas mjal rgyu mi 'dug zer/_sku mjal ba'i sa phyogs mtho dman che chung sogs zhib par bshad de blta bar bskul kyang mi 'dug zer ba dang*/_rtsed mo'i skabs lug gi sog pa las bcos pa'i DA ma ru zhig dkrol nas ngag tu/_pha bka' brgyud bla ma sprin ltar 'khrigs zhes 'don pa dang*/_mchog dman thams cad la mchod sbyin yid tshim pa zhig rtag tu zad pa med par ster nus na ci ma rung snyam pa'i bag chags yod/_rgyal mchog bco lnga pa chen por sangs rgyas mnyan pa'i yang srid ngos 'dzin zhus pas/_dag pa'i gzigs snang la ma gcig dpal ldan lha mo'i phyag gi me long nang rdo rje rtse lnga mthing nag zhig shar/_slar yang gzigs pas 'dan dil mgo'i khang pa khra lam mer gsal bas thugs kyi sprul pa zhig der 'khrungs yod par nges gsungs te thugs thag bcad pas/_yab nas gdan sar khri bkod dang sdom pa gsum gyi rim pa rnams yongs su rdzogs pa'i phyir ston mchog thub pa'i dbang po'i rgyal tshab/_mkhan chen bla ma bkra shis 'od zer zhi ba'i snying po ched du gdan drangs pa bzhin phebs nas yab gzhis su na bza' ngur smrig gis bklubs shing byabs khrus gnang*/_karma dge legs grub pa'i nyi ma phrin las 'od zer kun khyab dpal bzang po zhes 'jig rten dbang phyug bco lnga pas bstsal ba nyid ming du gnang ste sangs rgyas mnyan pa'i mchog sprul du dril bsgrags/_rje mkhan chen bla ma/_rdza rgyal dgon gyi mkhan po sprel lu/_yab bcas gdan sa chen po ban chen dgon dpal ldan phun tshogs dar rgyas gling du rang lo brgyad pa'i steng rta thab ser sbreng sogs shin tu rgyas pas mdun bsus te phebs/_'chi med 'phags pad+ma'i snying thig gis mnga' dbul brtan bzhugs dang bcas te seng+ge'i khri la bkod pas ri klung 'ja' sprin gyis khengs pa sogs rten 'brel legs pa byung*/_yul lha dang bka' srung klu rgyal stobs rtsal thog med bcas la bsang*/_ri khrus/_rten 'dzugs dang bcas pa'i sgo nas phrin las bcol gnyer du gtad/_'jam dpal bstod sgrub kyi rig gtad bstsal cing*/_'bri klog thog mar bslabs/_'jam mgon kong sprul rin po che'i dngos slob/_mkhyen rtogs yon tan tshad med 'brong pa bla ma bstan 'dzin chos rgyal yongs 'dzin du bzhag pa dang*/_phyis a lo dpal 'byor dgon mkhan chen rang gi gdan sar rgyun ring por bsdad nas so thar dge tshul gyi bslab pa zhus te karma bshad sgrub bstan pa'i nyi ma phrin las kun khyab dpal bzang po zhes pa'i ming bstsal/_srol gnyis kyi byang chub sems sdom bstsal nas rgyal sras 'jam dbyangs blo gros phrin las rab rgyas zhes dang*/_dkon mchog spyi 'dus gu ru zhi drag seng gsum ga'i dbang khrid lung bcas/_kaM tshang phag mo lha lnga'i dbang gis mtshon sdom pa gsum ka gnang*/_mkhan chen bla ma rin po cher nye brgyud du bzhugs pa'i thar mdo'i ljags lung*/_gzhan yang jo lugs sgrol dkar/_mnga' ris tshul khrims bzang po'i yi ge drug pa'i rigs gtad/_lha btsun dag snang rat+na thod phreng gyi tshe dbang*/_shangs lugs mgon po phyag drug pa'i snying zhugs/_gnod sbyin k+She tra pA la'i bka' gtad sogs dbang gi skor dang*/_phyag chen sngon 'gro'i khrid nges don sgron me/_zhwa dmar gyis mdzad pa'i thub pa'i smon lam lnga brgya'i tshig bcad/_'jam mgon gsung sdom gsum gso sbyong*/_mkhas dbang karma nges don gyi sdom gsum snying po bsdus pa/_de yi 'grel pa bla ma bkra 'phel gyis mdzad pa sogs lung khrid skor rgya cher zhus/_lugs gnyis kyi bslab ston zhib par bstsal cing thun min thugs brtses rjes su bzung*/_kaHthog si tu paN+Di ta gdan sa dpal 'byor sgang du phebs pa las kaHdam pa bde gshegs kyi dag snang 'od dpag med pa'i dbang thob/_mkhar mgo dgon rab mdzes mchog sprul las 'brug kun mkhyen pad+ma dkar po'i bka' 'bum yongs rdzogs kyi lung*/_mkhan chen zhal slob bla ma kun 'jam las rnying ma rgyud 'bul gyi lung*/_khrung sprul karma rgyal mtshan las mar pa'i rnam thar/_mi la'i rnam thar/_mgur 'bum lung sogs mkhan chen mang+ga la nyid kyi bka' yis bskul te zhus/_'brong pa bla ma karma bstan 'dzin chos rgyal las bka' brgyud sngags mdzod kyi dbang khrid lung bcas/_kun rig sbyong dkyil bcu gnyis kyi dbang dang*/_gcig shes kun grol gyi rjes gnang*/_rata gling phur pa/_jo lugs sgrol dkar/_kaM tshang rgyal ba rgya mtsho/_kaM tshang bde mchog lha lnga/_phag mo rnams kyi dbang khrid lung bcas/_jo lugs dus 'khor dbang chen/_yongs dge mi 'gyur rdo rje'i gter byon pad+ma badz+ra/_gro lod rtsa gsum gyi dbang lung sogs bka' rnying gi dbang lung gnad chen du ma dang*/_cho ga phyag bzhes/_gos gyon stangs/_sdod tshul/_gzhan la slob ston byed tshul yan chad legs par bslabs pas 'brong pa bla ma 'di nyid 'jam mgon rnam gnyis kyi dngos slob mkhyen rtogs yon tan rgya che ba dang*/_sangs rgyas mnyan pa gong mas ban chen dgon gyi bstan pa la phan thog 'ong zhes ched du bdag rkyen mdzad pas ngos la bka' drin shin tu che zhing*/_ban chen dgon gyi bstan pa la'ang sgrub khang khag bzhi/_rdor sems sgrub chen/_dus 'khor sgrub mchod sogs gsar 'dzugs kyi phyag bzhes 'gran zla bral bar gnang ba yin/_rang lo brgyad kyi steng ru dam rdzogs chen dgon du phyin nas nags chung ri khrod du 'jam mgon thams cad mkhyen gzigs mi pham 'jam pa'i dbyangs kyi gser zhal thog mar mjal/_'jam dpal bstod sgrub dang mtshan brjod kyi ljags lung gnang*/_sprul sku 'dis sman zhig bslab na 'gro phan che bar 'byung gsung*/_de rjes khra 'gu ri khrod du theng gcig mjal bas rje nyid kyis mdzad pa'i mkhas 'jug gi phyag dpe zhig bstsal nas dbu nas mtshan don mchod brjod bcas kyi ljags bshad zhig gnang nas de'i gdams gtad dang*/_stan dkar rdo rje'i re khA bcas gnang nas rjes nas rim gyis bshad pa 'bul chog gsungs/_slar 'dan go thi'i ri khrod nas dpal dus kyi 'khor lo sdom pa'i rgyud kyi rgyal po'i 'grel chen gyi bshad khrid zla ba phyed gnyis kyi bar dang*/_jo lugs sgrol dkar 'od zer drug sbrag gi khrid/_rang lo nyi shur ma son gyi bar bslab bya lung bstan lta bu bstsal ba sogs thugs brtses rtag par bskyangs pas blun po ba glang rdzi lta bu ma byung ba 'di rje bla ma 'di'i bka' drin yin/_mi pham rin po che'i nye gnas bla ma 'od gsal las mi pham bka' 'bum phal cher gyi ljags lung*/_thugs dam rata gling tshe sgrub kyi don dbang lan mang du thob/_dpal yul sku chen o rgyan mdo sngags chos kyi nyi ma las gnam chos skor phal cher dang*/_bla ma yang tig yid bzhin nor bu'i dbang lung khrid bcas bstsal zhing phyis sku gshegs khar phran la yod pa'i dbang khrid thams cad khyod la yongs su rdzogs pa'i dgongs pa gtad tshul phyag bris gsung rtsom tshigs su bcad pa bcas bstsal/_rtsi ke'i mchog gling dkon mchog 'gyur med bstan pa'i rgyal mtshan las gter gsar sgrol ma 'jigs pa kun sel gyi dbang rgyas pa/_mkhas dbang bla ma karma bkra shis chos 'phel las 'jam mgon yon tan rgya mtsho'i bka' 'bum yongs rdzogs kyi lung*/_de'i nang bzhugs pa'i sangs rgyas rab bdun dang nye sras brgyad kyi rjes gnang*/_chos skyong glog phreng*/_bstan bcos shes bya kun khyab rtsa 'grel gyi bshad lung*/_nang brtag rgyud gsum/_gzhung chung gnyis dang bcas pa'i rnam bshad/_'jam mgon rin po ches mdzad pa'i 'grel pa rnams kyi bshad lung*/_mkhas dbang karma nges don gyis mdzad pa'i mngon pa mdzod 'grel sogs rgya cher gnang zhing thugs brtse chen pos bskyangs/_rdo rje 'dzin pa rdza dge bla ma bkra tshe las nyang gter bka' brgyad bde 'dus don dbang*/_rata gling phur pa yang gsang bla med dang*/_sangs gling dgongs 'dus don dbang rnams thob/_'jam mgon sku tsha bla ma blo gros seng+ge las kar lugs rtsa gsum dril sgrub/_gsang thig yab bka'/_yum bka' rnams thob/_khyad par 'og min mtshur phu'i gdan sar zla drug gi bar rgyal dbang thams cad mkhyen pa kun gzigs mkha' khyab rdo rje'i zhal snga nas phyag chen nges don rgya mtsho'i khrid lung zhib par bstsal te ngo sprod mdzad pas sems don skor gyi zhus lan da lta bka' 'bum du gsal/_bka' brgyud gser phreng rnam thar zla ba chu shel gyi lung*/_nag rgya phag gsum gyi gzhung pod/_nA ro chos drug gi khrid skor yongs rdzogs rje nyid kyis mdzad pa'i mgon phrin rgyas pa'i ljags lung sogs bstsal nas mgon khang khyad par can zhig gsar bzhengs thub pa'i khas len zhus pas thugs shin tu mnyes tshul gyis/_mgon po/_lha mo/_dam can/_zhing skyong rnams kyi bla rdo srog 'khor bca' sgrub gnang nas nang rten du bstsal/_tshe sgrub gsang 'dus don dbang*/_gter chen rdo rje gling pa'i rdzogs chen hU~M skor snying thig mkhyen brtse'i nye brgyud can sogs kyang thob/_rgyal dbang mchog gi zhabs brtan mgon po'i bskang mdos kyi dbur rdor slob dgos par bka' gnang ba ltar bsgrubs te mdos thog khar phul dus khyed la skad legs po 'dug pas ngas khyed rang bka' brgyud pa'i mgon blar bskos pa yin zhes zhal rtsed gnang*/_khams su 'gro khar rje nyid kyis bzhes pa'i na bza' cha tshang gnang zhing thugs 'phreng tshul mdzad/_sku gshegs khar bstsal ba'i phyag bris nang kho bo la mchis pa'i dbang lung man ngag thams cad khyod la rdzogs par thob pa yin/_bka' brgyud kyi bstan pa nyag phra ba la dgongs nas 'dzin spel skyong gsum gal che tshul sogs zhal chems su bstsal/_de skabs zur mang gter ston zil gnon nam mkha'i rdo rje mtshur phur phebs pas rang gter tshe sgrub 'chi med srog tig gi dbang rgyal dbang rdo rje 'chang dang lhan cig zhus/_byams mgon chos kyi rgyal po kan ting tA yi si tu pad+ma dbang mchog rgyal po'i zhal snga nas bka' brgyud sngags mdzod kyi dbang lung khrid bcas/_kun mkhyen mi bskyod rdo rje'i khrid thung*/_mgon po ber can gyi dbang chen/_ma mgon zhal sbyor gyi gtor dbang*/_dwags po paN+Di ta bkra shis rnam rgyal gyi 'od zer skor gsum gyi lung*/_thugs dam jo lugs sgrol dkar gyi rjes gnang snga phyi lan du ma/_bsnyen rdzogs kyi bslab pa thob pas mtshon smin grol rgya cher dang*/_dpal spungs yid dga' chos 'dzin gyi gdan sar lan du mar phyin nas rgyun ring por bsdad pas/_lugs gnyis kyi thugs brtse'i bdag rkyen thugs kyi sras mchog ltar rjes su skyong bar mdzad/_sku gshegs khar snyun g.yog_/gsol sman 'bul ba sogs dang*/_'das rjes sku gdung rin po cher zhabs tog bcas zhus shing*/_dgongs pa rdzogs la nye ba'i skabs sku rtsed lta bus na bza' sku yi drod can phan tshun brje ba dang*/_bzhes 'phro phan tshun gnang ba sogs du ma mdzad pas mtshon mthing dmar cod pan 'chang ba yab sras gnyis ka'i thugs kyi bu chen lta bur rjes su bzung*/_'jam mgon mchog sprul dpal ldan mkhyen brtse'i 'od zer las grol tig zhi khro/_bka' 'dus chos kyi rgya mtsho'i dbang khrid sbrag ma/_rgyal mchog bco lnga pa'i bla sgrub kyi dbang*/_de'i gsung ma mgon zhal sbyor gtor dbang bka' rgya can/_mgon po'i g.yang sgrub skor lung*/_kar lugs rgyal ba rgya mtsho'i rgyun khyer/_mchog gling pad+ma sgyu 'phrul drwa ba'i 'gro don phyi'i smin grol sogs thob/_rgyal mchog phyag na pad+mo bcu drug pa rang byung khyab bdag rig pa'i rdo rje las bka' brgyud sngags mdzod yongs rdzogs kyi dbang khrid/_gdams ngag rin po che'i mdzod kyi dbang khrid lung bcas zhib rgyas/_kaM tshang rgyal ba rgya mtsho'i dbang chen/_mgon po 'khor lnga yongs rdzogs kyi dbang bcas thob cing thun mong ma yin pa'i thugs brtses shin tu bskyangs par mdzad/_zur mang drung rin po che karma chos kyi nyin byed las kaM tshang bde mchog lha lnga/_kar gling zhi khro'i don dbang sogs thob/_khyung po bla ma rin chen las tshe gsang don dbang*/_rang byung rdo rje'i snying gtam tshig gcig gi khrid dang*/_'dan rnam gling bla ma rin po che dam chos las mar mi dwags gsum gyi bla sgrub kyi dbang khrid lung bcas dang*/_spyan snga bla ma 'jam dbyangs grags pa las lam rim ye shes snying po'i bshad pa/_rnal 'byor dbang phyug drung lam rgyal sprul rin po che las mnyam med dwags po'i thar rgyan gyi khrid lung*/_mkhyen brtse rin po che'i gshin rje thugs tig_/nam snying tshe sgrub sogs du ma dang*/_bla gro'i mkhas dbang 'gyur med rnam rgyal las ma ti'i 'jam dkar/_dam pa'i smra seng*/_bram ze phur bu'i dbyangs can ma'i rjes gnang rnams thob/_grub dbang rdzogs chen lnga pa thub bstan chos kyi rdo rje las dkon mchog spyi 'dus kyi tshe dbang lan du ma dang*/_rdzogs chen mkhan rin po che 'jigs med pad+ma blo gsal las bla ma yang tig gi dbang*/_khrid lung bcas/_klong snying yang gsang bla sgrub kyi dbang dang*/_sum rtags si tu'i 'grel chen dang*/_dbu ma rtsa ba shes rab/_dbu ma 'jug pa/_sdom gsum rnam nges/_'grel chen dpag bsam snye ma/_mngon pa mdzod rnams zhib khrid du bstsal zhing thugs brtses lhag par bskyangs/_sku mya ngan las 'das khar thugs dam phyag phreng*/_sku stod/_byams chos sde lnga/_dbu ma rtsa sher/_chos dbyings mdzod rtsa 'grel bcas kyi phyag dpe gnang*/_zhe chen rgyal tshab rin po che 'gyur med pad+ma rnam rgyal las mnyam med dwags po'i dus chen steng srol gnyis kyi byang sdom/_snga 'gyur bka' ma sgyu 'phrul zhi khro/_na raka dong sprugs/_yang dag_/tshogs chen 'dus pa/_sems klong gnyis/_snying thig ya bzhi'i dbang lung khrid bcas/_bi ma snying thig ma bu'i khrid yig mi 'gyur dpal sgron gyis mdzad pa/_bka' gter bka' brgyad don dbang pad+ma shel phug_/gu ru chos dbang phur pa yang gsang spu gri'i dbang*/_de'i rnam bshad nyid kyis mdzad pa'i khrid/_sgrub thabs 'dod 'jo bum bzang yongs rdzogs kyi dbang lung*/_gnyug sems skor gsum/_gzhung spyi'i dka' gnad dang bcas pa'i bshad lung sogs 'jam mgon mi pham rin po che'i bka' 'bum yongs rdzogs kyi lung*/_rata gling tshe sgrub gsang 'dus kyi dbang chen/_don dbang*/_smin gter rdor sems thugs kyi sgrub pa'i dbang*/_sngon 'gro dngos gzhi'i rtsa ba yan lag gi khrid/_rdzogs pa chen po a ti zab don snying po'i dbang khrid/_thugs rje chen po bde gshegs kun 'dus kyi dbang khrid/_mgon po tshogs bdag gi dbang*/_rgyal tshab rin po che mchog gi gsung mchod chog skor yongs rdzogs/_blo sbyong gi khrid bdud rtsi'i bum bzang*/_dkon mchog rnam bzhag_/'jam mgon gter byon gro lod gsang sgrub kyi dbang dang bsnyen yig_/ma ti'i 'jam dkar dang*/_brab ze phur bu'i dbyangs can dkar mo'i bsnyen yig sogs/_zhe chen kong sprul rin po che pad+ma dri med las rnying ma bka' ma mdo sgyu dong sprugs yang dag sogs kyi sgrub dkyil gyi lung*/_rgyal tshab rin po che'i gsung nges don snying po'i bshad lung skor dang*/_zhe chen rab 'byams rin po che 'gyur med kun bzang bstan pa'i nyi ma las smin gter gshin rje dregs 'joms/_mkhyen brtse'i dgongs gter grub thob thugs tig bla sgrub/_dag snang tsaN+Da li'i tshe dbang sogs dang*/_rgyal tshab rin po che'i yang srid 'gyur med pad+ma rdo rje las smin gter 'chi med yang snying kun 'dus kyi dbang rnams thob/_bstan pa'i shing rta mkhyen brtse rin po che 'jam dbyangs chos kyi blo gros las srol gnyis ka'i byang chub sems sdom/_rnying ma bka' ma phal cher/_klong snying rtsa pod gnyis/_rdor sems mngon dga'i zhing sbyong gi rtsa ba yan lag_/snying tig_/jo lugs sgrol dkar/_snying thig lugs kyi sems sdom/_mkhyen brtse rin po che'i snyan brgyud phur pa'i dbang khrid/_phur pa rtsa dum gyi 'grel pa 'jam mgon gsung*/_rjes dran lce btsun snying thig gi dbang khrid lung bcas dang*/_'khon lugs phur pa jo nang rje btsun rin po che'i ljags bsgrigs stod las smad las kyi dbang*/_kun mkhyen 'jigs gling rgyud phur dbang chen/_sa lugs mgon po gur gyi dbang chen/_zhal dang lha mo'i rjes gnang*/_nA ro mkha' spyod ma'i byin rlabs thun mong thun min gnyis/_zhwa lu lugs kyi dpal dus kyi 'khor lo'i dbang chen/_sher phyin sdud pa'i 'grel pa mi pham rin po che'i gsung*/_tshar lugs sgrol dkar gyi dbang*/_'chi med 'phags ma'i snying thig gi dbang*/_bdud 'joms mchog sprul rin po che las 'jam mgon kong sprul rin po che'i gter byon gro lod gsang sgrub kyi dbang*/_bde chen chos 'khor chos mgon rin po che las dkon mchog spyi 'dus kyi tshe dbang*/_mdo khams pa brgyad pa don brgyud nyi ma las dkon mchog spyi 'dus kyi tshe dbang thob/_sa skya bdag chen phun tshogs pho brang ngag dbang kun dga' bsod nams las sa lugs dmar po skor gsum gyi bye brag rig byed ma'i rjes gnang*/_bstan pa yongs rdzogs kyi mnga' bdag 7gong sa thams cad mkhyen pa ngag dbang blo bzang bstan 'dzin rgya mtsho las jo bo'i byang chub lam sgron gyi ljags lung dang*/_gtsang paN chen rin po che blo bzang chos kyi nyi ma las grub rgyal tshe dbang*/_dbu ma 'jug pa'i bshad lung sdom gtad bstsal bas mtshon grub mtha' ris med kyi mkhas grub rnams las dbang khrid lung bcas rgya cher thob ces 'di yan chad rje nyid kyi gsung sor bzhag lags/__/gnyis pa la gsum/_mkhas pa'i yon tan las brtsams te thos bsam gyi che ba/_btsun pa'i ngo mtshar gyis brgyan pa'i sgom rtogs drod rtags kyi che ba/_bzang po'i yon tan dang ldan pa'i mdzad pa phyag rjes kyi che ba'o/_/dang po ni/_thog mar dgung grangs brgyad son skabs 'bri klog dbu tshugs shing yab las phyag bris bslabs/_phyis 'brong pa bla ma bstan 'dzin chos rgyal gyis karma'i sgar bris su bsgyur/_de mtshungs lany+tsa wartu sogs legs par mkhyen/_yab rje dam pas bstan 'dzin gyi skyes bu zhes shes bya rig pa'i gnas thams cad mkhyen pa zhig dgos ces rtsol ba chen pos yongs 'dzin gdan 'dren pa sogs kyi bdag rkyen mdzad pa ltar/_lnga rig smra ba 'gyur med rgya mtsho las sum rtags/_dag yig ngag sgron/_dpal spungs byang 'dren bstan 'dzin rdo rje las rtogs ldan lhag bsam gyi sum 'grel/_'gyur med rgya mtsho las snyan ngag le'u bar pa/_skar rtsis lnga bsdus/_gza' lnga dbyangs 'char bcas gsan cing shin tu byang bar mkhyen/_gong smos dpal spungs byang 'dren pa las snyan ngag le'u thog mthar bar gsum mdo khams pa chen po'i 'grel chen gyi steng nas zhib par gsan/_dper brjod 'bri rtsom sogs la tshig snyan don zab brjod pa phul du byung zhes mkhas dbang bla ma bkra 'phel gyis gsungs/_yang 'gyur med rgya mtsho las dge rtse paN+Di ta'i rnam bshad kyi thog nas dbyangs can sgra mdo tshang bar gsan/_kun bshad kyi mtshan du dbyangs can dga' ba'i go cha zhes 'jam mgon mi pham rin po ches mgul dar bcas bstsal/_yang byang 'dren bstan rdor las sa bzang paN chen gyi 'grel pa'i steng nas sgra kA la pa zhib khrid mdzad/_'jam mgon mi pham rin po che'i dngos slob dpal spungs kyi 'tsho mdzad chen mo dzi gang ga dga' las gso rig rgyud bzhi zhib khrid mdzad cing*/_sman sbyor phyag bzhes gnang bas mchog dman kun la phan thog ha cang che ba byung*/_lha zhi drag gi rol sgeg sogs nyams 'gyur rmad du byung ba skyes stobs kyis mkhyen cing*/_sku'i thig tshad sogs zhib par gzigs/_sku 'dra li ma'i rgyu khyad sku tshugs sogs la mkhyen dpyod rgya che bas mtshon bzo rig pa phul du phyin/_dpal sprul rin po che dang dge mang dbon bstan 'dzin nor bu'i dngos slob rdza rgyal dgon gyi mkhan po sprel lu las spyod 'jug_/byams chos sde lnga sogs dang*/_klong chen mdzod bdun dang ngal gso skor gsum sogs kyang gsan/_dge mang mkhan rin po che yon tan rgya mtsho las/_byams chos sde lnga/_sdom gsum rnam nges mchan 'grel de nyid kyis mdzad pa/_'jigs med gling pa'i yon tan rin po che'i mdzod rnams zhib par gsan/_ba thul mkhan thub bstan chos 'phel las mi pham dbu ma rgyan 'grel/_mkhas 'jug_/dbu ma rtsa ba shes rab/_rigs tshogs lnga/_bzhi brgya pa/_'jug pa rnams gsan/_me nyag mkhan a dpal las mngon pa mdzod gsan pas mtshon mdo sngags rig gzhung rgya mtshor sbyang brtson lhur bzhes pas sku na chung ngu'i dus nas mkhas pa'i grags snyan phyogs bcur brdal bar gyur/_gzhan yang bod du dar ba'i grub mtha' bzhi'i ring lugs 'dzin pa'i dge ba'i bshes gnyen khyad par can kun la dad gus rgya cher gnang zhing de dag gi bstan rgyun las byung ba'i dbang chos gang zab gsan/_de dag kyang rgyu mtshan ci yang mi shes pa'i blun po grags rjes 'brang pa kho na ma yin par rnying phyogs kyi bka' gter shing rta spyi dang khyad par nyang gur byang gsum/_'ja' tshon/_smin gling gter chen/_rong klong sogs/_sa skya gong ma rnam lnga/_tshar chen/_ngor chen rdo rje 'chang zhwa lu blo gsal bstan skyong sogs dang*/_bka' gdams jo 'brom sku mched gsum/_dga' ldan rje yab sras/_rgyal dbang lnga pa/_paN chen dge 'dun grub sogs skyes bu chen po rnams dang*/_'jam mgon bla ma rnam gsum/_rgyal sras gzhan phan mtha' yas/_dpal sprul chos kyi dbang po'i bstan rgyun dang rnam thar la mi phyed pa'i dad pas de dag las byung ba'i chos brgyud gtsang ma gsan cing*/_rgyal dbang rang byung rdo rje dang*/_'jigs bral paN+Di ta mi pham rnam par rgyal ba'i bzhed dgongs kyi dbu ma'i zab gnad la thugs nges shes 'khrungs shing*/_mnyam med dwags po bka' brgyud kyi lta sgom spyod pa'i gnad kyi chos skad cha shas re la'ang thugs mos shin tu chen po bcos min du mnga' zhing*/_de dag gi gsung dang rnam thar phal cher dus dang rgyun par thugs kyi dpal be'ur bstims shing rjes su slob par mdzad pa dang*/_gsung gi zegs ma rnams kyang sdud spel gyi thabs la brtson pas mtshon lhag pa'i thugs bskyed che ba sogs thos bsam gyi ngo mtshar gzhal bar dka' ba'i gnas so/_/gong smos kyis mtshon dge ba'i bshes gnyen kun la dag snang dang*/_bka' drin dran pa'i bsngags brjod gsol 'debs yang yang mdzad/_sri zhu mi chung ba rtsal sprugs su gnang*/_zhal gdams rnams thugs la bzung zhing ngo lkog med par sgrub gnang mdzad pa sogs la mdo rgyud nas 'byung ba dang mthun par mdzad/_gnyis pa ni/_sangs rgyas mnyan pa nyid sprul gzhi rgyal tshab byams mgon du grags pa don la gnas pas sku phreng thams cad btsun pa'i tshad du grags pa ltar dam pa 'di yang 'dul khrims gtsang ma'i kun spyod 'ba' zhig la dgyes shing yon bdag gi bsngos sha dang*/_nya stong brgyad gsum la sha mi bzhes pa dang*/_sku'i nyer spyad/_mdzad pa thams cad 'dul ba dang mthun pa kho na gnang*/_sngags la kha g.yar ba'i deng sang gi spyod pa rtsing po'i rigs la gtan nas thugs mi mnyes pas zhal gdams gsung rtsom phal cher gyi mjug tu dben pa'i nags kyi shing drung zhig tu dge slong sbyangs pa'i yon tan la gnas pa 'ba' zhig la smon pa mdzad/_gzhan dag la'ang rang re thub pa'i rjes su 'jug pa rnams tshul khrims gtsang ma re byung na bstan pa'i sgor zhugs pa'i snying po 'di kho na yin/_rab tu byung ba'i gtan chus 'di yin zhes yang yang gsungs/_lhag par rje nyid dgung grangs bco brgyad skor yab gzhis su bzhugs skabs shig tu tho rengs khar gzigs snang du/_mkhan chen bkra shis 'od zer de nyid phrug gzan dmar chen zhig bzhes te bzhugs pa mjal ba dang shangs du tshul khrims kyi dri tshor bas lhag par dad mos skye bzhin drung du bzhugs pas zhal 'dzum zhing thugs brtse ba'i tshul gyi tshul khrims bsrung ba'i phan yon tshul 'chal gyi nyes dmigs mang du gsungs te/_deng sang dus snyigs mar bka' brgyud pa 'dul ba'i bstan pa nyams dma' bas/_ngas so thar gyi bslab pa phog pa kun las zur mang bstan 'dzin sprul sku dang*/_khyed gnyis la re ba chen po yod pas tshul khrims rnam par dag pa mthar phyin pa zhig gyis zhes phyag g.yas pa brkyangs te sku rgyab tu reg pa'i drod kyis tsha chems mer byung ba'i rkyen gyis mnal sad/_de skabs mkhan chen bla ma dgongs pa rdzogs nas ring por ma lon stabs dran pa'i gdung shugs kyis spyan chab mang po bsil/_tshul khrims rnam par dag pa zhig bsrung ba'i dam bca' blangs pa yin gsungs/_de nas bzung phyi yi rtags su sku dang na bza' sogs la tshul khrims kyi dri ma 'thul ba zhig byung ba ni ngo mtshar ba'i gnas gzhal bar dka' ba'o/_/gzhi so thar gyi bslab pa gtsang ma dang ldan pa'i thog_/ban chen sgrub sde gsang sngags rig pa'i pho brang du rgyal dbang bco lnga pa'i bka' lung bzhin lo gsum phyogs gsum gyi sku mtshams bcad rgya shin tu dam po dang*/_gzhan yang snga rjes lo du ma sgrub pa mdzad de phyag chen sngon 'gro bzhi sbyor steng nas bsags sbyangs rgyas pa dang*/_de nas bzung mahal dang*/_sku phyag sku na gzhon pa'i skabs nyin re brgya rtsa/_phyis sku na smin nas kyang phyag nyi shu skor nyung mtha' byas pa chags med gnang ba dang*/_'jam mgon mi pham rin po ches lhag pa'i lha ru lung bstan pa'i jo lugs sgrol dkar gyi dus grangs kyi bsnyen pa rgyas bsdus lan du ma dang*/_mkhyen brtse'i snyan brgyud gshin rje'i thugs tig_/'jam dpal bstod sgrub/_snyan brgyud phur pa/_'phags ma'i snying thig_/rgyud sde bzhi 'brel sgrol ma/_'jam mgon gro lod gsang sgrub/_tshar lugs nA ro mkha' spyod/_rgyal tshab byams pa'i sgrub thabs/_mi pham rin po che'i man ngag rtog pa las gsungs pa'i ku ru kul+le/_'jam dbyangs mchog sbyin rdo rje/_thub chog_/tshig bdun bla sgrub/_rgyud lugs 'jam dpal zhi ba rnams rtsa ba'i thugs dam bsnyen sgrub lan grangs dang rgyun gyi nyams bzhes chag med gnang*/_grub rgyal tshe sgrub/_dus 'khor rgyun khyer/_rata gling yang gsang gud sbas/_dus mkhyen thugs dam kaM tshang bde mchog lha lnga/_bka' brgyud sngags mdzod du bzhugs pa'i rwa lugs 'jigs byed/_'jam dpal gsang ldan/_mgon po ber can sogs bka' brgyud rgyud sde'i skor dang*/_gu ru chos dbang phur pa yang gsang spu gri_/rata gling phyi nang gi sgrub pa/_'jam dpal rgyud lugs kyi sgrub thabs rgyas pa la bsten pa'i bsnyen sgrub/_'jam dpal dmar po longs spyod tshe 'phel/_rat+na'i phur pa yang gsang bla med/_mi pham rin po che'i gsung bdud rtsi'i 'od ldan gyi bcud len sogs la brten te/_bsnyen bzlas rgyas par gnang ba dang*/_dpal dus kyi 'khor lo'i bsnyen tshad/_gcod kyi tshogs brgya sogs dang*/_dus rtag par yar mar gyi tshes bcu la gu ru'i thugs sgrub gang rung dang*/_mkha' 'gro gang rung gi sgo nas tshogs mchod rgyas pa/_nyer dgur bka' rnying gi chos srung rnams kyi gsol bskang*/_tshes brgyad la sman chog rgyas bsdus gang 'os/_bco lnga gnam stong la gso sbyong dang*/_bshags smon/_mchod 'bul/_rgyun gyi zhal 'don/_sher phyin sdud pa khri tshar las mi nyung ba dang*/_thub chog_/kaM tshang sngon 'gro_/thun bzhi/_grub mtha' ris med kyi skyes chen rnams kyi gsol 'debs smon lam/_rje nyid la bka' drin che ba'i bla ma rnams kyi gsol 'debs/_zhabs brtan/_snga dgong dus su chu gtor/_gsur/_lus sbyin bcas rgyas par chag med du gnang zhing*/_de dag gi skabs su mchod 'bul mar me gtsor gyur pa dang*/_maN+Dal/_tshogs/_gtor ma sogs rgya cher gnang zhing mkhan chen bkra shis 'od zer/_'jam mgon mi pham/_zhe chen rgyal tshab/_byams mgon si tu rin po che sogs la lo bstar sku mchod tshogs dang*/_mchod pa brgya rtsa las mi nyung bar mdzad cing*/_mchod tshogs kun sdom jo bo rje lha gcig gis 'phags yul gtsug lag khang du mchod 'bul gnang skabs lha bshos mi tshad tsam brgyad stong bzhengs pa sogs kyi rnam thar bzhin byed dgos ces/_bka' gdams dge ba'i bshes gnyen rnams kyi phyag bzhes ltar rgya che ba/_spus nom ldan pa/_ser sna dang 'bags btsog gis ma gos par gtso bor phyag len du bstar ba sogs sgom sgrub kyi mdzad pa rmad du byung ba'o/_/gzhan yang blo sbyong don bdun ma dang*/_phyag rdzogs kyi rnal 'byor la rtag par thugs gzhol bas nyams rtogs kyi drod tshad mthon por 'khrungs pa 'dra ste/_phyi nang gi rtags su 'jig rten tshe 'di'i ched du gsog 'jog dang*/_mkho spyad kyis gzhan mgo bskor ba la thugs gtan nas mi mnyes/_thabs mkhas kyis gzhan ngo bsrung ba dang chen po'i rigs la ngo 'dzin gyis dkor sdud sogs re dogs kyi bya ba la ched gnyer mi mdzad/_chos brgyad la re dwogs kyi zhen pa chung ba mngon sum du grub pa dang*/_dngos grub kyi mtshan ma dngos nyams rmi lam du brnyes pa'i rtags kyang dgung grangs nyi shu skor phebs skabs mi pham rin po che'i bkas bskul ste rata gling gsang sgrub kyi ljags bsnyen skabs me tog ut+pal la sngon po'i chun po gsar pa zhig dge slong mthong na mi mthun pa med pa'i spyod lam can gyis ster ba dang*/_g.yu 'brug zhig nam mkha'i dbyings su gyen du 'gro ba sogs nub re bzhin rmi ltas ngo mtshar can re byung ba zla tho ngos ri mo bkod mdzad 'dug pa dang*/_de skabs gzim khang gi skar khung las nyi zer gyi steng 'od kyi rdo rje sngon po rtse lnga zhig sgra dang bcas shar gyis byung nas nyid la thim pa sogs dge mtshan du ma byung tshul 'brong pa bla ma tshe dbang rgya mtsho la gsungs pa dang*/_jo lugs sgrol dkar thog ma'i bsnyen sgrub skabs nub re bzhin gzhung gi rtags tshad dang mthun pa'i mnal ltas legs pa re byung ba dang mthun par sgrol bstod mdzad/_grub rgyal tshe sgrub kyi bsnyen pa'i skabs mdun dkyil bum pa'i rma bya'i sgro thig gcig 'od lnga'i thig ler gyur ba'i nang tshe dpag med dmar po tshon gang ba zhig thor thun gyi ring bzhugs pa mjal ba dang*/_bde mchog gi ljags bsnyen skabs mnal lam du gtsug lag khang chen po zhig gi nang son pas seng khri mthon po zhig gi rtser chos rje karma pa dus gsum mkhyen pa na bza' sku ber ser po bzhes pa dang*/_phyag chos 'chad kyi phyag sor lnga yi rtser me tog kha dog lnga bkra lam mer gsal ba mngon sum lta bur gzigs pas mos gus tshad med pa 'khrungs pas phyir nyin dpal ldan dus gsum mkhyen pa la sku bstod zhig mdzad/_karma dgon gyi dus mkhyen gsung byon dang che chung mnyam pa'i gser zangs kyi zhal ras de las 'dra bsdus byas pa zhig dang*/_rgyal dbang mkha' khyab rdo rje'i phyag zhabs kyi rjes can la mnal lam dang mthun pa'i zhal thang rnams bzhengs par gnang*/_rgya gar gyi grong khyer rdo 'jog ces brag ri khog stong logs bzhir sgo bzhi yod pa zhig tu ston pa thub pa'i dbang pos bka' 'gyur gyi ljags lung bstsal ba red ces dge slong mang po 'dus shing tshogs pa la/_dge slong sku bong shin tu ring po na bza' rdo tshos can zhig bzhengs te yan lag bdun pa zhig la khrus gsol bcas rgyas par gsungs pa sogs mnal lam ngo mtshar can byung gsungs kyang zhib par ma dran/_bsam yas phebs skabs gling skor la brkyang phyag mdzad nub sku ngal gyis mnal mthug por song ba dbu rtse'i jo bo byang chub chen po'i mdun gyi mkhan slob chos gsum sku tshab mdun phebs 'dug pa chos rgyal khri srong gi sku de dngos su gyur pa'i phyag gis dbu yi la thod kyi rtse'i nor bu de blangs nas mdun gyi sa gzhir drag tu brgyabs pa dum bur 'thor ba bar snang du gu ru'i sku tshab lnga khra chem mer gsal bar mtshar snang skyes pa rmis pas rgyal po pe har gyi cho 'phrul min na nga yang gter ston zhig yin 'dra zhes zhal rtsed du gsungs pa dang*/_mkhan chen bla mas dge tshul gyi bslab pa phog skabs sdom rten du gnang ba'i thub dbang gi sku rgya gar li ma chung ngu zhig yod pa rtag par 'bral spang can de'i sku las dngos su bdud rtsi bab pa dang*/_yang rdzogs chen mkhan rin po che 'jigs med pad+ma blo gsal de nyid thang chen po zhig gi dbus zhal ras la dar zhig bkab nas bzhugs 'dug pa mdun du phebs pas dar bsal bas thugs dgyes tshul bstan/_bslab ston zhal gdams mang po zhig dang*/_khyad par deng sang dus snyigs ma yin pas mi la yang chags sdang gnyis ka'i phyogs su ma lhung ba kyis/_sa 'dir stan chags nas ma sdod/_khyed rang tshe smad du yer pa zla ba phug tu sgrub pa zhig gyis/_tshe yi mthar shug pa thar thor skyes pa'i ri khrod 'di yin snyam pa zhig 'ong bas shi sa der gyis gsungs pa rmigs gsungs/_phyis su gus bod du 'ong skabs phran da yer par sleb mi 'ong*/_dbu skra bubs gcig_/tshems gcig bcas bskur nas khyod nas skra 'di gnas der gtor/_tshems sgrub phug tu sbos shig gsungs bzhin rtsa gsum gyi tshogs skong khri lhag bcas bka' bstsal bzhin grub song*/_yang rgyal dbang thams cad mkhyen pa mkha' khyab rdo rje dgongs pa rdzogs nas zla ba gcig tsam ma lon pa'i skabs nam mkha' sku'i 'od kyis khyab pa'i dbyings su sangs rgyas mchog gi sprul pa'i sku shAkya'i dbang po lta bu zhig gi steng nas me tog gi char sil mar bab pa zhig mjal/_sku'i drung du phebs nas gsol ba btab pas zhing khams de'i sa gzhi thams cad rin po che bai DUr+Ya 'ba' zhig las grub pa yin 'dug_/da res dag pa'i zhing khams su skye thub 'dug snyam shin tu nyams dga' bar gyur pas sangs rgyas de nyid rgyal dbang mkha' khyab rdo rje zhwa nag gser mdangs bzhes pa zhig tu gyur song bas skyabs mgon rdo rje 'chang 'di dgongs pa rdzogs pas zhing khams 'di gsar du bkod pa yin 'dra snyam pa dang*/_zhal nas bu khyod da dung 'gro don ma rdzogs pas re zhig slar song phyis su 'dir 'ong chog gsungs byung bas sems skyo dung ngos phyir 'gros kyis cung zad 'ong ba dang mdun nas mar them skas rgya chen po zhig 'dug pa la skas re re bzhin phyir nud kyis bab pas lho brag mar pa nA ro pa grub thob pho mos bskor ba'i tshogs gral las bod du byon tshul de dran nas skas them rer phyag re 'tshal bzhin 'ong bas phyed tsam sleb pa dang mnal sad song gsungs nas zhing de'i bkod pa zhig phyag bris mdzad de phran la bstsal/_yang de rjes zhig la mnal lam du thang chen po zhig gi dbus rgya mtsho chen po/_mtsho de'i dbus na brag ri ya mtshan pa can zhig 'dug pa'i mtsho khar phyin pa'i 'di byang gnam mtsho red zer/_re zhig na mtsho de'i dkyil nas rkya mi mang po rta phyugs ri dwags sna tshogs la zhon pa'i skyes pa bud med mang po zhig mdun du tshur 'ongs bas mtshams zhig na chu glang sngo khra rwa cung zad mdun du gug pa la zhon pa'i bud med mdzes sdug khyad du 'phags pa zhig 'dug_/zhal 'dzum nas tshur gzigs te khyed su yin dris pas nga g.yu sgron ma yin gsungs/_khyed rnams gang du phebs zhus pas mdo khams shar du rgyal dbang karma pa sku 'khrungs pas mjal du 'gro ba yin gsungs/_dga' drags nas gang du 'khrungs dris pas shar du mdzub mo btsugs song ba phyir blta byas pas sa cha lung pa ngos ma zin kyang yab gzhis kyi pho brang mig lam du lam mer shar byung bas blo bde ba byung gsungs nas/_phyir nyin g.yu sgron ma la phrin bcol gsung mgur gyi rnam pa can zhig mdzad/_yang gtsang paN chen rin po che blo bzang thub bstan chos kyi nyi ma rgya nag nas dbus su phebs pa dang*/_byang rdza chu kha ser shul dgon du zhal mjal thog mar byung skabs mnyam med dwags po rin po che sku'i cha byad spyi ltar la sku rgyab nam mkha' sngo sang nge yod pa zhig mjal ba rmis gsungs/_yang bar zhig tu kun mkhyen 'jigs med gling pa red zer ba'i bla ma zhig mjal nas rab byung btsun pa'i cha byad can dbu zlum zhig mjal ba 'di sngags 'chang gi cha byad du mi 'dug 'jigs med gling pa min pa 'dra snyam pa dang*/_bzhad mo zhig mdzad nas khyed kyis nga la log rtog zhig 'dug pa sel ba'i thabs su nga rab byung gi chas byas pa yin/_nga rab byung dang sngags pa gang yin rgyu byas kyang 'gal ba med/_nga 'jigs med gling pa yin gsungs pas dad gus skyes par rmis gsungs/_yang dbyar kha zhig rgyam rgyal rdo thi'i mkha' 'gro phu ru phebs nas sgrub brtson bla ma dam pa karma dbang 'byor dang lhan cig rol rdor gter byon tshe sgrub lcags bum ma'i tshogs brgya zhig phul bas mnal lam du gangs ri'i tshad dang mnyam pa'i tshe dpag med kyi sku dar dpyang ljang gu can zhig mngon sum lta bur shin tu gsal ba mjal bas tshe sgrub 'di'i chos bdag mnyan pa dge legs rgya mtsho red zer bas yin pa 'dra gsungs/_yang mnal lam zhig tu 'jam mgon mi pham rin po che mjal skabs nyid kyis mdzad pa'i sngon 'gro'i nyams len zhig yod pas de'i khrid cig gsungs pa/_da kho bos sangs rgyas stong sku grub zin/_da rten bzhengs ga 'dra byed zhus pas mkhan slob chos gsum gyi sku zhig bzhengs gsungs pas 'jam dbyangs mkhyen brtse'i dbang po'i zhal bkod dang mthun pa'i sku shin tu sgros gtsang gsum bzhengs par mdzad/_gzhan byams mgon si tu pad+ma dbang chen gyi 'khris su yun ring bcar ba'i bag chags kyis yin pa 'dra rtag par mnal lam du mjal ba dang*/_zhe chen rgyab tshab rin po che sogs rang gi dad mos che ba'i bla ma rnams dang mjal tshul mang du gsungs/_sku chung ngu'i dus 'bru khog tu phebs skabs 'bru'i dge bsnyen yin nam snyam pa'i lha g.yag dkar po chen po zhig dge bsnyen gnas pa'i ri mdun du phebs pa dang bsu ba'i tshul du byung ba grwa 'khor dang bcas pas mthong ba dang*/_mnyan pa dge legs rgya mtsho bdud rtsi dil khra mo'i ri khrod nas ban chen dgon du gdan sa 'debs phyir phebs pa'i phyag phyir 'brang bar grags pa'i klu rgyal stobs rtsal thogs med rten mkhar btsugs pa'i skabs chu mig gi nang du sbrul dkar po dmar 'od can mkhyid gang lhag tsam 'dug pa kun gyis mthong ba dang*/_bod du phebs skabs mar lam bsam gtan gang bzang mdun du sgar bzhugs pa srod la zla ba shar ba dang rta gra ser zhig chibs drel gyi khrod du byung ba 'brog sde gzhan gyi rta zhig der byung ba red snyam yang der nyin kha shas bsdad skabs bdag po su yang ma byung bas/_phyis ban chen grwa rgan rnams nas mnyan pa sku phreng bod tu gang byon la bsam gtan gang bzang nas rta re phul srol yod zer ba ltar de yin nges ces gleng ba byung*/_sbyin bdag 'brog pa zhig gi 'khris su brag dil dmar po zhig 'dug pa 'dir btsan gnas pas mi nor la gnod pa 'byung 'dug pas thugs dmigs zhus skabs/_brag la phyag nas gtor bas ring por ma lon pa brag ri zhig pa sogs grub pa'i mtshan ma yin nam snyam pa byung gsungs pa sogs sgro skur med par bkod pa'o/__/gsum pa ni/_spyir gong smos ltar thos bsam rgyud thog tu 'khel bas thugs gshis gzhan la phan pa 'ba' zhig la dgyes pa sogs bzang po'i phrin las lhun gyis grub/_lhag par mchod sbyin rgya mi chung ba gnang ba thugs dam gyi mthil du gnang ba dang*/_rjes mthun bstan 'gro la phan pa'i mdzad pa phyag rjes kyi tshul yang*/_mnyan pa dge legs snying po'i sku dus su bzhengs pa'i sangs rgyas stong sku rtse sor lnga lhag tsam bzhengs 'phro lus pa bzhi brgya tsam yod pa yongs rdzogs gsar bzhengs gnang ba dang*/_de dag bzhugs khang dbyar gnas lha khang ka ba so drug_/yang thub dbang gi sku mda' tshad la seng khri rgyab yol can/_'khor nye sras brgyad khru tshad shin tu spus dag dang*/_gnas bcu rgya gar lugs shin tu spus dag khru tshad/_mi pham rin po che'i bka' yis bskul te rgyal tshab byams pa mda' tshad/_yab kyis bzhengs pa'i sgrol ma thog tshad/_yang rgya nag li ma byams pa mda' tshad lhag_/yab kyi ma Ni dung phyur sgrub rten du blus pa'i spyan ras gzigs bcu gcig zhal phyag stong mda' tshad lhag_/'jam mgon mi pham rin po che'i sku khru tshad lhag_/sgrol ma nyer gcig_/kar rabs bco lnga/_zhwa dmar sku phreng phal che ba'i sku brnyan dang*/_gtsug lag khang ka ring bcu drug_/ka thung chig brgya re bzhi bcas ka ba brgya dang brgyad cu can gyi dri gtsang khang du ston pa thub pa'i dbang po thig tshad bzo dbyibs 'gran bral zhal blugs pa/_gzhan brdung bzo'i thog tshad lnga dang*/_de'i 'khor du sangs rgyas sman bla/_gu ru rgya gar ma/_karma pa dus gsum mkhyen pa/_yab yum gyi sgrib sbyong ched du dmigs pa'i rdor sems rnams thog tshad re re can nye ba'i sras chen brgyad blug sku mi 'greng tsam dang 'khor sangs rgyas stong sku mkhyid gang lhag can blug sku kho na stong phrag lhag shin tu spus dag dpe 'os can rnams dang*/_thugs dam gzim chung du mgon po ber can/_phyag bzhi/_lha mo/_zhing skyong yab yum/_srin mgon rnams gsar bzhengs/_gur mgon tA ming li ma/_phyag drug pa'i sku li ma gnyis/_dpal ldan zla ba grags pa/_bu ston/_rje rin po che sogs li rnying du ma dang*/_ris med kyi skyes chen du ma'i sku mtho tshad las mi chung ba bcas phal cher 'brong pa bla ma bstan 'dzin chos rgyal gyi sku mched tshe dbang rgya mtshos bzhengs nas phul ba rnams dang*/_mgon khang chen por ber can sku shin tu khyad mtshar thog tshad/_zhing skyong yab yum mi tshad rje nyid kyi phyag bzo/_lha mo/_dam can rnams mi tshad bcas lder sku spus dag_/gro lod mgon khang du gu ru zhi ba mda' tshad gser zangs can/_sgrub khang khag bzhir so so'i yi dam dang chos skyong gi sku du ma dang*/_zhal thang la skyes rabs dpag bsam 'khri shing chos 'byung zhal bkod thang ga nyer lnga can la ston pa'i sku'i skye ba thams cad gser dbyibs byug_/yab kyi sgrib sbyong ched dmigs thub sku'i skyes rabs gsar bkod thang shar dgu_/bde gshegs sman bla mched brgyad kyi zhal thang g.yu thog pa dang bcas dgu_/thub dbang nye sras brgyad dang bcas pa'i zhal thang dgu_/'dzam gling rgyan drug gi thang ka bkod mdzes ston pa bcas dgu_/sgrol ma 'jigs pa brgyad skyob kyi thang ka dgu_/bka' brgyud gser phreng si tu thams cad mkhyen pa chos kyi 'byung gnas kyi phyag bris las bshus pa thang shar so brgyad/_rdor sems gser thang thog tshad lhag tsam/_thugs dam karma pa dus gsum mkhyen pa dang*/_'jam mgon chos kyi 'byung gnas yab sras phyag zhabs kyi rjes can/_mkhan chen bkra shis 'od zer la bka' brgyud gser phreng*/_bde phag_/ma mgon dam can bcas dang*/_'jam dbyangs smra seng*/_bde mchog_/phag mo/_rgyal ba rgya mtsho/_phur pa dkyil 'khor yongs rdzogs can/_'od zer can ma/_ku ru kul+le/_mgon mchog sbyin rdo rje rnams dang*/_ban chen dgon du bzhugs skabs rgyal dbang chos dbyings rdo rje'i phyag bris ston pa nye sras dang bcas pa'i zhal thang shin tu khyad mtshar la shan bzang gser ma spus legs zhal khebs bcas gsar du phul ba dang*/_spros bcas tshes bcu'i dus mchod chen po'i zhal 'bag yongs rdzogs dang*/_'cham gos mchod rdzas yongs rdzogs gsar bzhengs 'ba' zhig dang*/_gsung rten rgyal ba'i bka' 'gyur rin po che sde dge'i mtshal par rgya shog tho lon Ta 'ba' zhig la glegs zhing brkos ma/_stong skud kyi glegs thag_/gdong ras bzang gos can bcas yab kyis bzhengs nas phul ba dang*/_yum gyi dge rtsar bstan 'gyur spus dag_/sde dge'i gan shog steng mdzod chen rnam lnga/_'jam mgon rin po che'i gsan yig glegs bam/_mkhyen brtse rin po che'i bka' 'bum pod bcu drug_/sgrub thabs kun btus glegs bam bcu gsum/_mi pham rin po che'i bka' 'bum khams su par gang bzhugs/_rgyal dbang mi bskyod rdo rje'i dbu ma/_mdzod 'dul/_khrid thung*/_rlung sems gnyis med/_chos grags rgya mtsho'i tshad ma sogs dpal spungs su bka' brgyud gong ma'i gsung par gsar bzhengs thams cad dang*/_si tu pad+ma nyin byed kyi bka' 'bum/_rgyal tshab rin po che'i bka' 'bum phal cher/_zhe chen rin po che'i bka' 'bum/_bka' gdams pha chos sogs grub mtha' ris med kyi skyes chen rnams kyi gsung gzhung dang sgrub thabs man ngag gi skor gang yod rnams par btab/_yon tan rin po che sdud pa dang*/_sman mdo rgyas bsdus gser bris/_dpe rgyun dkon rigs bris ma gsar bzhengs pusti brgya phrag dang*/_dri med rnam gnyis kyi mchod rten sgrub chog_/sku rnams kyi gzungs/_rata gling tshe sgrub mi pham rin po ches ljags bsgrigs tshang ma/_lha btsun rat+na thod phreng gi tshe dbang cho ga bcas spar gsar bzhengs dang*/_rngog zhe sdang rdo rje'i brtag gnyis 'grel pa dang*/_sangs rgyas mnyan pa bkra shis dpal 'byor gsung mgur bcas par bzhengs kyis dpal spungs gdan sar phul ba dang sku gdung cha brgyad blugs ma thog tshad sogs te de thams cad kyang spus nom khyad du gang thon rgya gar li ma khyad 'phags bzo dbyibs dang*/_sprul pa bzo rig rdzu 'phrul gyis phyag bskrun rgyal mchog chos dbyings rdo rje dang*/_'jam mgon bstan pa'i nyin byed kyi phyag bzo rnams la ma phyi byas pa lta bu sha stag dang*/_rgyu dngos gang smar ched du btang zhing las byed rnams kyi yon dang dngos pos yid tshims pa kho na dang*/_dpal 'byor sgang du mkhan chen bkra shis 'od zer gyi 'das mchod phag mo'i sgrub mchod/_ban chen dgon dpal ldan phun tshogs dar rgyas gling du smon lam chen po dang*/_mchod me 'bum phrag gis mtshon pa'i mchod pa shin tu rgyas pa dang*/_gzhan yang rje btsun mar pa yab sras kyi sku mchod ras 'bud/_mgo zla'i dmar phyogs ma mgon gyi bskang mdos shin tu rgyas pa/_gtsug lag khang par dge 'dun 'dus tshogs dang po'i skabs grwa grangs nyer lnga las mi nyung bas gzhi gsum gyi cho ga gsar tshugs/_jo lugs dus 'khor lha dgu_/'jam mgon mi pham rin po che sku mchod smin gling rdor sems sgrub chen dang*/_kun rig_/bka' brgyud sngags mdzod/_rgyal ba rgya mtsho/_shangs chos bcas kyi sgrub khang khag bzhir grwa dpon g.yog bdun re can gtsor 'brong pa bla ma bstan 'dzin chos rgyal gyis rgyun btsugs pa'i 'phro rje nyid nas bskyangs ba dang*/_thugs sgrub bar chad kun sel/_bla ma nor lha/_bdud kyi gshed chen rnams dang*/_zab bdun phur pa'i sgrub chen lan kha shas/_tshe sgrub gsang 'dus stong mchod lan grangs sogs kyi mtshon sgrub mchod skor dang*/_bla brang gi sgo bshas gtan spangs/_ris med bla sprul dge 'dun 'dus par dus dang rgyun gyi mchod sbyin rgya gang che bcas mdzad pas don gnyis lhun grub kyi phrin las rmad du byung pa'o/_/gsum pa mtha' ma'i mdzad pa ji ltar bstan pa ni/_de ltar don gnyis lhun grub kyi mdzad pa mthar phyin nas dus kyi 'gyur ba'i dbang gis dgung grangs don gnyis steng bod dbus gtsang dang*/_rgyal dbang yid bzhin nor bu'i bka' drin gyis rgya gar du phebs/_ston pa thub pa'i dbang po'i mdzad pa bcu'i ston pa'i gnas chen thams cad la phebs/_bal yul mchod rten rnam gsum/_yang le shod kyi sgrub phug sogs mjal/_gnas de rnams su phyag skor mchod 'bul thugs tshims par mdzad nas sbas yul 'bras mo ljongs bkra shis lding du'ang phebs/_mthar 'bras ljongs rum btegs karma'i chos sgar du phebs pa nas bzung*/_rgyal ba'i dbang po mchog dang thugs snang gcig 'dres yab sras lta bur gyur/_dgong re bzhin la mkhyen brtse rin po che'i ltung bshags cho ga dang 'brel ba'i sku phyag 'tshal zhing nam gung ma yol bar gcig pur sbas pa'i tshul gyis sgrib sbyong kho na mdzad/_zhal nas phran na tshod ni rgas/_shi gson gyi dkor ni mang*/_ming ni che/_yon tan ni med/_da 'chi ba 'di mgyogs po yong na snyam da lta nas dkor gyi sgrib sbyong yin/_rten 'di ma bor tshe gnyen po stobs bzhi'i sgo nas bshags sbyang la 'bad na sdig ltung ri bo tsam yod kyang dag pa sdig pa'i yon tan yin sogs rtag par gsungs/_chu stag zla ba dang po'i nang sku khams cung mi bde ba dang*/_mgul glo cung zad bzhes pa lta bu'i bsnyun tshul bstan/_spyir rgya gar du phebs nas sngar dus yin na bstan dgra la dmigs pa'i chos skyong gi drag bskul sogs byed kyi yod kyang*/_phran ni nus pa med cing lta dgongs dman pa de rigs bsam ngan du 'dug_/da ni byams dang snying rje la blo sbyong gi yod/_pha yul/_dgon sde/_bla brang sogs dang rgya mis kha 'phral ba la sems pham ci yang mi 'dug_/de rigs med pa kho rang gi bka' drin red pas mi tshe dkor nag la mi skyel ba dben khrod zhig tu chos gos rnam gsum las gsog 'jog med pa'i bya btang bka' brgyud gong ma bzhin byung na snyam pa'i re ba mi tshe gcig la yod pa de 'grub 'dug snyam ste dga' spro dang blo bde'i ngang yod sogs gsung pas mtshon/_rgyal dbang yid nor mdun dgongs zhu phebs khar rum btegs kyi gtsug lag khang du rten mjal gnang skabs da ni ston pa'i sku brnyan 'di yang i 'jal mi shes gsungs te bsang du phebs/_de nas bzung sngar dang mi 'dra bar zhal rtsed dang bzhad mo kho na mdzad pa zhig byung*/_de skabs rgyal dbang yid bzhin nor bus rum btegs chos sgar du dbyar gnas thog mar 'dzugs bzhed kyis/_gaN+Di gsar bzo'i dbyibs sogs gzhung mthun dgos tshul phebs 'phral thugs mnyes pa'i rnam 'gyur dpag med dang 'brel zhabs brtan bsngags brjod kyi tshigs su bcad pa zhig 'bul bar mdzad/_de nas khong gi bsnyun khams phyir 'khrugs par brten rgyal dbang mchog gi bka' bstun sgang tog sman khang du phebs/_sman sbyor 'phrod rten sogs gang zab gnang*/_byams mgon si tu rin po ches grub rgyal tshe dbang zhig gnang*/_rgyal ston sprul sku/_si tu'i mdzod bla co ga sogs nas lo shas bzhugs dgos kyi brtan bzhugs phul yang zhal gyis ma bzhes shing*/_byams mgon si tu pad+ma don yod khyed d+harmA ka ra'i mdzad spyod lhur bzhes thog_/rgyal dbang yid bzhin nor bu rig pa'i rdo rje dang dgongs bstun gyis/_gdams zab kun bum pa gang byo'i tshul gyis gsan la/_sngar bzhin don brgyud yid bzhin nor bu'i phreng ba bar ma chad par mdzod dang de las lhag pa gang yang med/_dad slob kun nas kyang de bzhin zhabs zhus mdzad dgos tshul gyi bslab bya rgya cher gnang*/_de skabs shig tu rgyal dbang mchog gi chos kyi seng khri gsar par zhabs sor 'khod pa'i rten 'byung gi mdun mjal dar dkar gtsang dang*/_gangs can ljongs su lung rtogs kyi bstan pa nyams dma' bar gyur pa'i skabs 'dir/_deng gi rten 'brel las che ba yong ma myong*/_de bzhin yid bzhin nor bu sku tshe zhabs pad brtan cing mdzad phrin rgyas pa'i thugs bskyed gnang grub zhu dang*/_rgan pos kyang de bzhin smon lam zhu yong zhes zhu 'phrin phul/_skabs 'gar bsnyun khams shin du dwangs te dgyes bzhin bzhugs/_nyin gcig sman khang 'dir nyin mtshan med par sgo phye zhing 'gro mkhan zhig 'dug pas/_kun rig gi sgo nas khrus dang sbyang ba zhig dgos/_de nub dmar gsur zhig gtong dgos gsungs pa bzhin mdzad/_mi ring bar rgan po na tshod smin stabs za ma gtan nas mi zhu ba'i nyen 'dug gsungs te nyin mor 'o ma dkar yol gsum re las gzhan gang yang ma bzhes nas nyin mtshan drug la bzhugs/_chu stag zla ba dgu pa'i tshes bcu bzhi nyin thugs nyams 'ur te/_da ni rgan po 'chi grabs bya ran/_mdang rmi lam du rgyal dbang mkha' khyab rdo rje dang*/_byams mgon pad+ma dbang chen zung mjal te da ni khyod 'di ru ma 'dug par nga yi gan du yong ran pa yin pas shog cig gsungs shing*/_spyan nam mkhar gzigs nas brda chos mang du gsungs/_rang gis kyang thugs yid bsres te rang gi rnam par shes pa ni bla ma'i thugs kar 'pho tshar/_da ni sman khang du mi sdod/_gzhan du 'gro dgos zhes gsungs/_de 'phral sgar mdzod dam yongs kyang phebs/_des gtsos ban chen bstan sprul rin po che sogs nas rum btegs su phebs bskul dang 'brel/_phebs bsu sogs go sgrig zhus/_sgar mdzod nas mjal dar phul ba phyir bstsal zhing*/_khyed rgyal dbang mkha' khyab rdo rje'i dus nas zhabs tog zhus pa'i mi yin/_bla ma dang so skye mi 'dra bas/_dgongs tshod dang bstun pa'i zhabs tog sgrub par mdzod ces zhal ta gnang*/_phebs lam nas/_sangs rgyas bcom ldan 'das rdo rje gdan nas byams pa chen po'i ting 'dzin gyis bdud sde thams cad btul te mngon par rdzogs par sangs rgyas pa bzhin bdag gis byams pa'i ting nge 'dzin gyi nus pas nad mug mtshon bskal zhi ba'i bden smon bgyid pa yin zhes dang*/_sku ngal gso'i skabs shig 'dir tsan+dan gyi sdong po chen po zhig gi rtser sangs rgyas stong bzhugs pa zhig mjal gsungs/_yang ngan song gi gnas ris rnams su sems can rnams skyes pa mthong zhing bdag gis de dag la phan thog pa 'dug kyang gsungs/_rgyal dbang rin po che'i gser zhal thog mar mjal skabs phyag mdzub shar gyi nam mkha'i sprin dkar la gtad de brda chos shig phul/_de nas rum btegs su yod pa'i mchog dman kun gyis mjal kha zhus te skyabs smon thugs gtad gnang*/_rje brgyad pa'i phyag bzo rdo sku chen mo/_rje nyid la mkhan chen bkra shis 'od zer gyi bstsal ba'i ston pa'i sku brnyan/_rje brgyad pa'i phyag blugs dus gsum mkhyen pa'i 'dra sku sogs snod gcig tu bkod pa'i mdun rje nyid gcig pur tshu tshod gnyis tsam du bzhugs/_tshes bco lnga'i tho rengs sku lus de drang por zhog dang gsungs pa bzhin byas pa'i mod gso sbyong gi gaN+Di'i sgra bskul ba gsan pas thugs shin tu dgyes pa'i sgo nas/_kho bo rgan po da ni 'chi ran pa yin/_de yang ji skad du/_chos sems a ma'i mngal nas skyes/_/skyes ma thag tu 'chi chos dran/_/zhes gsungs pa bzhin/_chos sems ni byis pa chung ngu'i dus nas yod/_mkhan chen thams cad mkhyen pa karma bkra shis 'od zer dang*/_byams mgon rdo rje 'chang pad+ma dbang chen zung gi bka' drin gyis dge tshul slong gi sdom pa ni thob/_thob bzhin 'chi ba 'di kho na bsams nas pham pa bzhi dang*/_lhag ma bcu gsum gyis dran pas zin ngang du ma gos/_nyes ltung gi tshogs la bshags pa nyin re phul bas da ni mthar phyin song*/_sgrub pa dang nyams len gyi lag rjes kyang 'di kho na yin/_khyed rnams kyis kyang 'di bzhin byas na 'chi ba 'di slebs tshe sems skyid po zhig 'byung rgyu yod ces gsungs/_rgyal dbang mchog gis grub rgyal tshe dbang zhig bstsal te lo shas bzhugs dgos pa'i bskul ma gnang skabs/_sangs rgyas karma pa chen po zhes mtshan dang don mthun pa'i nges shes khyad par can ban rgan 'chi khar rnyed pas bod yul bstan 'gro'i rgud pa myur du sel ba dang*/_bstan pa rgyas la bstan 'dzin rnams zhabs pad brtan pa gal che/_7gong sa lha mi'i rnam 'dren dbus rgyal dbang mchog sogs bka' brgyud/_rgyal ba yab sras/_sa skya bdag chen/_snying ma'i rig 'dzin khyad 'phags rnams zhabs pad brtan pa'i thugs smon zhus dang*/_ban rgan bsdad ma bsdad ci yang mi 'dug gsungs/_rgyal dbang rin po ches khyed rang la gzigs snang gang byung gsungs pas/_khar sang lam nas tshur 'ong dus nam mkha'i khams gang bar rang gi rtsa ba'i bla ma bzhugs te rang la thim pas rang nyid rtsa ba'i yi dam rdo rje phag mo'i skur gyur pa'i snang ba shar gsungs/_spyir bka' brgyud kyi bstan pa rje btsun mi las mi dbus pa ston pa dang*/_mi ma yin tshe ring mas 'dzin par 'dug gsungs pa ltar/_mnyam med dwags po'i thugs sras rje dus gsum mkhyen pa'i mchog sprul nyid bzhugs pas/_mi ma yin tshe ring ma la phran nas kyang yang yang bcol bzhin la yid bzhin nor bus kyang de ltar gnang bar zhu sogs/_ma 'ongs bstan don skor sogs thun min gyi zhu ba yang yang phul/_nyin gcig gzim khang gi phyogs bzhir zhal gyu nas/_phyogs bzhi kar ltad mo chen po 'dug pas de lta ba yin gsungs/_skabs shig kho bo lo 'dir mi 'chi ba 'dug_/dus chen zhig la 'chi ba'i smon lam yod pas sang zla ba drug pa'i nang dwogs pa cung yod/_de la ci 'gyur ma nges/_'on kyang*/_nam zhig 'chi nges yin pas rgan por 'brel thog gi 'gro ba kun la cung zad re phan pa'i re ba yod pas phran shi nas zhe dgu ma rdzogs par bstan dga' khyod kyis rtsa ba'i bla ma 'di rnams kyi mtshan lan gsum re ma brjed par bos shog de las gal che ba med ces/_rgyal dbang bco lnga pa dang*/_byams mgon pad+ma dbang chen sogs rje nyid kyi rtsa ba'i bla ma rnams kyi mtshan tho bkod pa zhig gnang*/_bkra shis sdings/_rdor gling sogs gnas chen zhig la shes rab kyi ral gris bdag 'dzin gyi phung po 'di stong rogs gyis/_gnas lnga'i rus pa zhig longs la ban chen 'dra slebs na der khyer/_ma slebs na mtshur phur mnyan pa gong ma'i dngul gdung zhig yod pas de'i nang du zhog_/gzhan yang khyed rnams tshul khrims kyi bslab pa mthar phyin pa dang*/_phyag rdzogs kyi nyams len snying po chos thams cad mnyam nyid du shes dgos sogs zhal gdams shig gnang*/_ban chen bstan sprul nas rje nyid zhing khams gzhan du phebs na/_yang srid bstan 'gror phan nges shig myur du phebs pa'i zhu ba phul ba bzhin bstan 'gro'i don chen 'grub pa'i smon lam dang 'brel yang srid phebs yong ba'i zhal bzhes gnang*/_tshes nyi shu nyin/_sang nyin gza' skar gang 'dug gsungs skabs/_gza' pa sangs skar ma 'phrod sbyor sogs legs po 'dug zhus 'brel/_nyer gnyis nyin gza' spen pa red 'dug_/'di g.yang gza' yin gsungs/_tshes nyer gcig nyin phyed yol mtshams da gsol ka 'don dgos gsungs nas rgyun ltar gsungs/_bsnyen pa'i nang ma ning gi phrin bcol lan gsum mdzad de phyag shar phyogs kyi nam mkhar sdigs mdzub kyis lan gsum bskor/_bstan sprul la/_sam Ta khyer shog gsungs te phul ba'i ngos su 'di ltar/_!_na mo gu ru mang+ga la rasmi ye/_/da ni/_sman pa'i rgyal po dngos su byon gyur kyang*/_/tshe yi 'phen zad srog la mthud du med/_/ces gsungs pa ltar dang*/_ma zad srog gcod las khur smin pas khyod la mya ngan gang yang med/_rang gi gwa'u nang bla ma rdo rje 'chang rnams kyi gdung rus dbu skra sogs gser srang 'bum ri ba yod/_de rjes ma ban chen dgon lha chen 'dra yod na nang rten zhog_/med na ston pa'i sku brnyan khru gang tsam la sgros gtsang ma can zhig bzhengs pa'i nang bzhugs na byin rlabs mi chung bas de ltar yid 'jog gyis zhes phyag bris gnang ste bstan sprul la bstsal/_de nas mi pham rin po che'i rdzogs chen gyi man ngag de zhib par gzigs/_de nas rgyal dbang rin po che der phebs phan tshun thugs snang gcig pa'i gsol smon mdzad cing yun ring bar bzhugs/_nyi nub phyi cha tsam la bde bar dgongs pa chos dbyings su thim pa'i tshul bstan to/__!__'das rjes kyi bya ba yang ban chen bstan sprul rin po che dang*/_zhabs 'bring ba bkra shis rnam rgyal zung nas bsam sbyor rnam dag gi sgo nas dgongs zhag so sor bla sprul khag gdan zhus dang 'brel/_rgyud sde rgya mtsho'i mchod chog gis mtshon tshogs gsog rgya gang cher bsgrubs/_sku gdung zhugs 'bul nyin phyogs bzhir rgyud sde bzhi'i dkyil 'khor zhal phye zhing bla grwa sum cu skor nas bsreg sbyong gi cho ga tshad ldan gyis mtha' rgyas su grub par mdzad pa'i nyin gcig gi bsnyen bkur mchod rdzas sogs rgyal dbang don gyi bdag po mchog nas bdag rkyen mdzad/_'di skabs 'ja' sprin gyis nam mkha' khengs/_lhag par spur khang thad nas rgyal dbang mchog bzhugs pa'i gzim chung gi thad bar 'ja' sprin dkar po l+wa ba brkyang pa lta bus sbrel ba sogs ngo mtshar ba'i ltas ci rigs pa byung ba bcas legs par grub/_de mtshungs sku rus rnams kyang 'thor zag med par bsdus nas dngul kyi byang chub mchod rten thig tshad gzhung mthun la rje nyid kyi gdus rus gtsos ring bsrel rnam bzhi gtso bor gyur pa'i nang rten khyad par can du ma dang srog shing 'dzugs chog_/gzungs zhugs sgrub 'bul bcas rje dbon rin po che karma grags pa yongs 'du nas phyag bstar gnang*/_ye shes sems dpa' lha gnas kyi cho ga rdo rje phag mo'i sgrub dkyil la brten nas rgyal dbang yid bzhin nor bu/_zhwa dmar mchog sprul rin po che sogs mkhan sprul rig pa 'dzin pa'i dge 'dun gyi sdes rgyas par mdzad pa'i gdung rten gyi phra tshom sogs rgyal dbang mchog nas phyag bstsal gyis spus nom ldan par gyur cing dkar chag zhib pa zur gsal ltar srid zhi'i mchod sdong du bzhugs su gsol ba'o/__/smras pa/_mngon sum tshad mas mthong dang thos pa yi/_/dam pa'i mdzad spyod sgro dang skur ba'i mthar/_/ma lhung drang por brjod pa'i ngag 'di ko_/snyigs dus bstan 'gro'i rgyan du mdzes par sems/_/bdag kyang deng nas tshe rabs thams cad du/_/mtshungs med dge ba'i bshes de'i mched gyur nas/_/byang chub spyod pa rgya mtsho lhan cig tu/_/spyad nas tshom bu gcig tu grol bar shog_/thugs rje'i gter gcig rgyal mchog bcu drug pa/_/yab sras gsang gsum rin chen lhun po brtan/_/sgrub brgyud bstan pa'i chu gter rab 'phel bas/_/dge legs dpal gyi 'byor ba rgyas gyur cig_/ces sgrub brgyud grub brnyes yongs kyi gtso bo sangs rgyas mnyan pa sku phreng dgu pa nyid rab rgyal dge byed chu stag tha skar zla ba'i dmar phyogs kyi dga' ba gnyis pa'i nyin dgongs pa rdzogs khar phyi yi rnam thar rags rim 'di nyid zhal chems kyi tshul du phyag bris su mdzad nas bzhag pa la zhu bcos dang*/_zhal bkod dgos pa rnams khyed nas 'bri bar 'os zhes rgyal dbang yid bzhin nor bu mchog gis bka' bstsal ba dang*/_ban chen 'brong pa sprul sku rin po che dang*/_bla ma blo gros rab gsal/_nye gnas bkra shis rnam rgyal bcas nas kyang bskul ba ltar rje de nyid kyi gcung du skyes pa bkra shis dpal 'byor du 'bod pa'i 'khos chung gyi na pas bris pa 'dis kyang mnyam med dwags po bka' brgyud kyi bstan dang bstan 'dzin 'phel zhing rgyas pa'i rgyur gyur cig_/