JKW-KABUM-19-DZA-001-028

Previous Text Back to Volume PageNext Text

གྲུབ་ཆེན་ཐང་སྟོང་རྒྱལ་པོའི་རྣམ་ཐར་ལས།

Wylie title	grub chen thang stong rgyal po'i rnam thar las
Location	mkhyen brtse'i bka' 'bum Volume 19, sde tshan 1, Text 28, Pages 234-243 (Folios 117b5 to 122a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. grub chen thang stong rgyal po'i rnam thar las. In 'jam dbyangs mkhyen brtse'i dbang po'i bka' 'bum, Vol. 19: 234-243. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

Tibetan Text

Wylie

[edit]

༄༅། །གྲུབ་ཆེན་ཐང་སྟོང་རྒྱལ་པོའི་རྣམ་ཐར་ལས། ཨོ་རྒྱན་དུས་གསུམ་མཁྱེན་པས་ཙཱ་རི་གསང་སྔགས་ཕོ་བྲང་དུ་ཟབ་ཆོས་མང་པོ་གཏེར་དུ་སྦས་པས། མངའ་བདག་གིས་ཟབ་མོའི་ཆོས་འདི་སྐྱེས་བུ་སུ་ཞིག་གིས་བཏོན་ནས་འགྲོ་དོན་བྱེད་ལགས། དེས་འགྲོ་ཕན་ཇི་ལྟར་ཐོགས། དེ་འཚང་རྒྱ་བའི་དུས་ནམ་ཞིག་ལགས་ཞུས་པས། ཨོ་རྒྱན་ཆེན་པོ་ཞལ་འཛུམ་མཛད་ནས་ལྔ་བརྒྱ་དུས་ཀྱི་ཐ་མ་ལ༔ འདི་ཉིད་འདོན་ཅིང་སྤྱོད་པ་ཡི༔ སྐྱེས་བུ་ལས་ཅན་སྤྲུལ་སྐུ་དེ༔ འགྲོ་བའི་དོན་བྱེད་སྤྲུལ་ཨོ་རྒྱན་རང་གི་ཐུགས་ཀྱི་པ་ཡིན༔ ༈ ཞི་བ་ཐུགས་རྗེ་ཆེན་པོ་དང་༔ དྲག་པོ་ཁྲོ་བོ་དབང་ཆེན་གཉིས༔ དབྱེར་མེད་གཅིག་ཏུ་སྤྲུལ་པ་ལས༔ སྐུ་ཡི་ཆ་ལུགས་ཞི་མ་ཁྲོ༔ ༈ མདོག་སྨུག་དྲི་ཞིམ་སྨེ་བས་བརྒྱན༔ ངང་རྒྱུད་དལ་ཞིང་རིག་རྩལ་ཆེ༔ མ་ངེས་སྤྱོད་པ་སྣ་ཚོགས་སྐྱོང་༔ ༈ ཤཱཀྱའི་བཀའ་ལྔ་པ་ལས་བསྙེན་པར་རྫོགས། མཚན་བརྩོན་འགྲུས་བཟང་པོར་བཏགས། ཚུལ་འཛིན་གསང་སྔགས་སྤྱོད༔ ཌཱ་ཀི་མ་ལུས་དབང་དུ་སྡུད༔ རྒྱལ་བས་དབྱིངས་ནས་དབང་བསྐུར་ཞིང་༔ སྦས་པའི་ངང་ནས་འགྲོ་དོན་མཛད༔ ཟབ་དང་རྒྱ་ཆེའི་ཆོས་རྣམས་སྤྱོད༔ ༈ ནང་རྟགས་འཁྲུངས་དུས་ཡུམ་ལ་ངོ་མཚར་བའི། རྨི་ལམ་མཚན་ལྟས་འབྱུང་༔ ༈ བརྒྱ་ཕྲག་བཅུ་གཅིག་ཚེ་ཡི་ཚད༔ ཚེ་འཛིན་ལྷ་མོའི་བཅུད་བསྒྲུབ་ན༔ དེ་བས་རིང་བ་ཐུབ་པར་འགྱུར༔ ༈ ནམ་ཞིག་འདའ་ཚུལ་སྟོན་པའི་ཚེ༔ སྒྲ་དང་འོད་དུ་བཅས་ནས་སུ༔ དཔའ་བོ་ཌཱ་ཀིའི་ཚོགས་དང་བཅས༔ བདེ་བ་ཅན་དུ་བྱང་ཆུབ་ཐོབ༔ ཅེས་གསུངས་ཤིང་། རིག་འཛིན་རྒོད་ལྡེམ་སློབ་མ་ཀུན་སྤངས་དོན་ཡོད་རྒྱལ་མཚན་ལ་ཡུམ་གྱིས་སྐུ་ལུས་ཡོད་པའི་ཚེ་རྣལ་ལམ་ངོ་མཚར་བ་བྱུང་ཚུལ་རྣམས་ཞུས་པས། ངོ་མཚར་ཆེ། ཨོ་རྒྱན་ཆེན་པོས་ལུང་བསྟན་ནའང་། །འོ་བ་ཞེས་བྱའི་ཤར་མདུན་དུ༔ བརྩོན་འགྲུས་ཞེས་བྱའི་མིང་ཅན་འབྱུང་༔ དེ་ནི་ང་ཡི་ཐུགས་སྤྲུལ་ཡིན༔ ཞེས་བྱ་བའང་ཡོད་པས་ཁྱེད་ཀྱི་ལུས་འདི་ལ་གཅེས་སྤྲས་གལ་ཆེའོ་གསུངས། བཀའ་ལྔ་པ་དཔལ་འབྱོར་ཤེས་རབ་ལས་བསྙེན་པར་རྫོགས། ཕྱག་ཆེན་ཆོས་དྲུག་སོགས་གསན། ཀུན་སྤང་དོན་ཡོད་རྒྱལ་མཚན་དང་། ལྷ་གདོང་པ་བསོད་ནམས་མཆོག་པ་ལས་རྒོད་ལྡེམ་པའི་གཏེར་ཆོས་སྐོར་དང་། ཁྱད་པར་ལྷ་གདོང་པ་ལས་ཕྱག་རྡོར་གོས་སྔོན་ཅན་དང་། རྣམ་སྲས་ཀྱི་སྐོར་གསན་པས་རྣམ་སྲས་རྟ་བདག་བརྒྱད་འཁོར་དང་བཅས་པས་མཐུན་རྐྱེན་ཐམས་ཅད་བསྒྲུབ་པར་ཞལ་གྱིས་བཞེས། རྒྱ་གར་རྡོ་རྗེ་གདན་དུ་བླ་མ་རཏྣ་སིདྡྷི་ལས་སྔགས་ཀྱི་ཟབ་གནད་དང་། དེའི་ཕྱག་རྒྱ་བྲམ་ཟེ་མོ་ཞིག་ལས་ཐབས་ལམ་ཁྱད་པར་ཅན། ནཱ་ལེནྡྲར་གྲུབ་ཐོབ་ཨ་དྷི་ཀ་ར་ཞེས་དགུང་ལོ་ཉིས་བརྒྱ་སུམ་བཅུ་བཞེས་པ་ལས་ཚེ་དཔག་མེད་ཀྱི་དབང་གསན་པའི་ཚེ་བླ་མའི་ཐུགས་ཀར་ཚེ་དཔག་མེད་རིགས་ལྔ། ཞབས་ཀྱི་མདོ་བཞི་ལ་ཕྲིན་ལས་ཀྱི་ལྷ་མོ་བཞི། གསང་བར་རྟ་མགྲིན་དཔའ་གཅིག་རྣམས་གཟིགས། རྒྱ་གར་ཟངས་གླིང་དུ་རྫུ་འཕྲུལ་གྱིས་ཕེབས། སྤྲུལ་པའི་མཆོད་རྟེན་བཀྲ་ཤིས་སྒོ་མང་གི་དྲུང་དུ་ཞག་ཉེར་གཅིག་བཞུགས་པས་དཔལ་ཤ་བ་རི་ལང་ཚོ་དར་ལ་བབས་པ། དབུ་སྐྲ་སིལ་བུ་མེ་ཏོག་གི་ཐོད་བཅིངས་པ། རྨ་བྱའི་སྒྲོས་སྨད་གཡོགས་པ། རྨ་བྱའི་གདུགས་རང་འཁོར་བ། ཕྱག་གཉིས་ན་མདའ་གཞུ་ཐོགས་པའི་ནམ་མཁར་བདུད་རྩིའི་བུམ་པ་རྟེན་མེད་དུ་གནས་པ། གཡས་ན་རྣལ་འབྱོར་མ་གླིང་བུ་འབུད་པ། གཡོན་ན་རྣལ་འབྱོར་མ་ཤ་བའི་རོ་ཁུར་བ་བཅས་གཟིགས། གུས་པས་ཕྱག་འཚལ་ཞིང་ཡིད་ཀྱི་མཆོད་པ་ཕུལ་བས་སྐུའི་རྣམ་འགྱུར་དང་བརྡ་ཐབས་སྣ་ཚོགས་པས་ཟབ་རྒྱས་ཀྱི་གདམས་པ་མཐའ་ཡས་པ་བསྟན་ཅིང་བུམ་པས་དབང་བསྐུར་བས་ཡེ་ཤེས་མངོན་དུ་གྱུར། རྡོ་རྗེ་གདན་དང་ཉེ་བའི་གསང་བ་རྡོ་རྗེ་ཕུག་ཞེས་པར། སྔགས་རྙིང་མའི་གྲུབ་ཐོབ་སྐལ་ལྡན་རྡོ་རྗེ་གྲགས་པ་དང་དགུང་ལོ་སུམ་བརྒྱ་ཉི་ཤུ་བཞེས་པ་མཇལ། རྒྱལ་ཐབས་སྤྱི་བླུགས་ཀྱི་དབང་བསྐུར་ཞིང་ལུང་བསྟན་མངའ་གསོལ་མཛད། བྱང་སེམས་སྦྱིན་པ་བཟང་པོ་ལས་ནི་གུ་ཆོས་དྲུག་ཤངས་ཆོས་ཡོངས་རྫོགས་གསན། རི་ཁྲོད་དུ་མར་ཉམས་སུ་བཞེས། ཏིང་ངེ་འཛིན་རྣམ་པ་དུ་མ་ཐུགས་ལ་འཁྲུངས། སྙན་བརྒྱུད་ཟབ་མོ་འདི་གངས་རིའི་ཁྲོད་དུ་དར་བ་ཞིག་བྱུང་ན་དགོངས་པའི་སྐད་ཅིག་དེ་ལ་མདུན་གྱི་ནམ་མཁའ་ནས། བུ་རྣལ་འབྱོར་པ་ཞེས་འབོད་པའི་སྒྲ་ལྷང་གིས་བྱུང་། །སྤྱན་བར་སྣང་ལ་གཟིགས་པས་སྤྲིན་ཕུང་གི་དབུས་ན་ཡེ་ཤེས་ཀྱི་མཁའ་འགྲོ་ནི་གུ་མ་དངོས་སུ་བཞུགས་པ་ལ་ཞུ་བ་ཞུ་ལན་དང་། བརྡའ་དང་བརྡ་ལན་དང་། ཚོགས་ཀྱི་འཁོར་ལོ་འདོད་པའི་ཡོན་ཏན་རྨད་དུ་བྱུང་བ་རྣམས་ལ་ལོངས་སྤྱད། རྡོ་རྗེའི་ཚིག་རྐང་སོ་སོ་དང་། དེ་དག་ལ་དངོས་ཤུགས་སྦས་གསུམ་གྱི་མན་ངག་གི་འཕྲུལ་ཕྱེ་སྟེ་ཡོངས་སུ་རྫོགས་པ་དང་། ཁྱད་པར་དཔེ་གཉིས་ཀྱི་སྒོ་ནས་སྟོན་པའི་འཕྱུགས་མེད་མཁའ་སྤྱོད་དཀར་དམར་གྱི་འཕོ་བ་སོགས་གནང་། གྲུབ་ཐོབ་ཆེན་པོ་རི་འོ་བ་ལྷ་ཙེའི་ནུབ་མགུལ་གྱི་རྫ་ཁྲོད་དུ་སྒྲུབ་པ་རྩེ་གཅིག་མཛད་སྐབས། འཕགས་བལ་བོད་ཀྱི་མཁས་གྲུབ་རྣམས་ལས་གདམས་པ་རྒྱ་མཚོ་ལྟ་བུ་གསན་ནའང་། སྐུ་དངོས་ལས་དོན་དུ་གཉེར་བའི་གདུལ་བྱ་དུས་དེར་མ་བྱུང་། མ་འོངས་པ་ན་གང་ཟག་ལས་ཅན་ལ་ཕན་པའི་ཆེད། གཡམ་པ་མང་པོ་ལ་ལྕགས་ཀྱི་ཁབ་སྦོམ་གཉིས་མ་ཟད་བར་དུ་བྲིས་ཏེ་གཏེར་དུ་སྦས། དགེ་བསྙེན་ཆེན་པོ་འོ་བ་ལྷ་རྩེ་གཏེར་བདག་ཏུ་བསྐོས་སོ། །གཙང་རྒྱས་སྡེ་ཁར་གསང་སྤྱོད་ལ་བཞུགས་པས་ཡེ་ཤེས་ཀྱི་མཁའ་འགྲོ་སྡེ་ལྔས་མཚན་རེ་རེ་ཕུལ། དབེན་གནས་ཐར་པ་གླིང་དུ་བཞུགས་པའི་ཚེ་རྡོ་རྗེ་འཆང་ཆེན་པོ་འཁོར་དང་བཅས་པ་ལས་བླ་མའི་རྣལ་འབྱོར་སོགས་སྙིགས་མའི་སེམས་ཅན་འདུལ་བའི་ཆོས་ཚུལ་སྣ་ཚོགས་པ་གསན། རྫུ་འཕྲུལ་གྱིས་ཨོ་རྒྱན་མཁའ་འགྲོའི་གླིང་དུ་ཕེབས། མཁའ་འགྲོ་མ་མང་པོས་བསུས་ནས་ཟངས་མདོག་དཔལ་གྱི་རི་བོའི་ཕོ་བྲང་ཆེན་པོར་ཨོ་རྒྱན་རིན་པོ་ཆེ་རྒྱལ་པོའི་ཆ་ལུགས་སུ་མཇལ། ཕྱག་འཚལ་ཞིང་ཡིད་སྤྲུལ་གྱི་མཆོད་པ་བསམ་གྱིས་མི་ཁྱབ་པ་ཕུལ་ནས་གསོལ་བ་བཏབ་པས། སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་དུ་སློབ་དཔོན་ཆེན་པོ་ཧེ་རུ་ཀའི་རྣམ་པར་བཞུགས་ནས་སྐུ་གསུང་ཐུགས་ཡེ་ཤེས་རྡོ་རྗེས་བྱིན་གྱིས་བརླབས་ནས་སོ་སོའི་ཞལ་གཟིགས། ཟངས་མདོག་དཔལ་གྱི་རི་བོའི་མཐའ་བསྐོར་མཚོ་ཆེན་པོའི་དབུས་ན་མེ་ཏོག་པདྨ་དམར་པོ་འདབ་མ་བརྒྱད་པའི་སྟེང་ན་ཨོ་རྒྱན་རབ་བྱུང་གི་ཆ་ལུགས་སུ་བཞུགས་པ་མཇའ་ཚོན་སྣ་ལྔས་བསྐོར་བ། གཡོན་ཕྱོགས་ན་པདྨ་དམར་པོ་འདབ་མ་སྟོང་དང་ལྡན་པའི་དབུས་ན་བསྐལ་བཟང་གི་སངས་རྒྱས་སྟོང་བཞུགས་པའི་ཡལ་ག་ལ་ཉེ་བའི་སྲས་བརྒྱད་བཞུགས་པ། གཡས་སུ་སྣ་ཚོགས་པདྨ་ཡལ་ག་ལྔ་པའི་དབུས་ན་རྡོ་རྗེ་ཕག་མོ། །གཞན་བཞི་ལ་རིགས་བཞིའི་མཁའ་འགྲོ་བཞུགས་པའི་མདུན་གྱི་ནམ་མཁར་སྟོན་པ་རྡོ་རྗེ་སེམས་དཔའ་བཞུགས་པ་ལ། ཨོ་རྒྱན་ཆེན་པོས་ཞུ་བ་པོ་མཛད་ནས་བླ་ན་མེད་པའི་ཡང་སྙིང་རྫོགས་པ་ཆེན་པོའི་ཆོས་ཚུལ་མ་ཚང་བ་མེད་པ་གསན་ནོ། །དེ་ནས་ཨོ་རྒྱན་རིན་པོ་ཆེས་བོད་ཡུལ་དུ་འགྲོ་དོན་ལ་བཀས་བསྐུལ་བ་ནི། མཁའ་འགྲོས་མཚན་གསོལ་རིག་འཛིན་ཐང་སྟོང་པ། །གཟུགས་སྐུ་མཁའ་ལྟར་དག་པ་ཆོས་ཀྱི་སྐུ། །གྲགས་སྟོང་གཞོམ་དུ་མེད་པ་རྡོ་རྗེའི་གསུང། །གཟུང་འཛིན་རྟོག་བྲལ་གདོད་ནས་འདུས་མ་བྱས། །དེ་དོན་མ་ལུས་ཁྱོད་ཀྱིས་ཁོང་དུ་ཆུད། །སྙིགས་མ་ལྔ་བདོའི་སེམས་ཅན་དོན་ཕྱིར་དུ། །ཧོར་དང་ཁ་བ་ཅན་གྱི་ས་མཚམས་སུ། །ང་ཡིས་བཞེངས་པའི་མེ་བཙའ་ཞིག་གསོས་གྱིས། །བོད་འབངས་ཕན་བདེ་ཡུན་དུ་གནས་པར་འགྱུར། །ས་འབྲུག་དབྱར་ཟླ་དང་པོའི་ཚེས་བཅུ་ལ། །ས་ཡི་མེ་བཙའ་བརྟན་བཞུགས་གྲུབ་དགོས་སོ། །འགྱངས་ན་ཆུ་ཤོར་ཟིན་པའི་རགས་དང་འདྲ། །སྔས་ན་རི་དྭགས་མི་འགྲོ་རྒྱ་དང་འདྲ། །རིག་པ་འཛིན་པའི་སྐྱེས་བུ་ཕན་སེམས་ཅན། །སླར་ཡང་བོད་ཡུལ་ཁ་བ་ཅན་དུ་སོང་། །སྙིགས་མ་ལྔ་བདོ་བོད་ཀྱི་སེམས་ཅན་ལ། །གང་ལ་གང་འདུལ་སྤྲུལ་པས་འགྲོ་དོན་མཛོད། ཅེས་དང་། རིག་འཛིན་བོད་ཀྱི་སྐྱེས་བུ་ཁྱོད། །རྫུ་འཕྲུལ་སྟོབས་ཀྱིས་འདིར་འོངས་ཀྱང་། །ཆོས་སྐལ་གཏེར་ལྔ་བོད་ན་ཡོད། །ལུང་བསྟན་རྣམ་ཐར་བོད་དུ་བཞག །དུས་གསུམ་མཁྱེན་པ་པད་འབྱུང་ངའི། །ཐུགས་སྤྲུལ་ང་ནི་ལྕགས་ཟམ་ཚུགས། །རྟེན་འབྲེལ་འགྲོ་བ་འདུལ་བའི་ཕྱིར། །མྱུར་དུ་ཁ་བ་ཅན་དུ་བཞུད། ཅེས་གསུངས་པ་ལྟར་བོད་དུ་བྱོན་ནས་འགྲོ་དོན་བསམ་གྱིས་མི་ཁྱབ་པ་མཛད་དོ། ། ༈ གྲུབ་ཆེན་རིན་པོ་ཆེའི་རྡོ་རྗེའི་སྐུའི་རྣམ་འགྱུར་དྲུག་ནི། རྣམ་སྣང་གྲུབ་པའི་དབང་ཕྱུག་ཞལ་དཀར་མདངས་ཆེ་ཞིང་སྣུམ་པ། དབུ་སྐྲ་སིལ་བུར་ཡོད་པ། སྤྱན་དཀྱུས་རིང་ལ་ཞི་བ་སྙིང་རྗེའི་ཚུལ་གྱིས་གཟིགས་པ། ཕྱག་མཉམ་བཞག་སྐྱབས་སྦྱིན་མཛད་པ། ༡ རིན་འབྱུང་གྲུབ་པའི་དབང་ཕྱུག་སྐུ་མདོག་གསེར་ལྟ་བུ། །དབུ་སྐྲ་སེར་ལ་འཇམ་པ། སྤྱན་གཉིས་ཐད་ཀར་གཟིགས་པ་ཤིན་ཏུ་དགེས་པའི་ཚུལ་ཅན། ཕྱག་གཡས་མཆོག་སྦྱིན་དང་གཡོན་ནོར་བུ་དགའ་འཁྱིལ་བསྣམས་པ། ༢ སྣང་མཐའ་གྲུབ་པའི་དབང་ཕྱུག་སྐུ་མདོག་དམར་པོ། དབུ་སྐྲ་དམར་ནག་ལི་བ། སྤྱན་རྩ་དམར་ཟླུམ་ཟུར་གཟིགས། ཕྱག་གཉིས་མཉམ་བཞག་གི་སྟེང་ན་བུམ་པ་འཛིན་པ། ༣ དོན་གྲུབ་འདི་ཀུན་འདུས་གྲུབ་པའི་དབང་ཕྱུག་ཏུ་བཤད་པའང་སྣང་གྲུབ་པའི་དབང་ཕྱུག་སྐུ་མདོག་སྨུག་ནག་ཁྲོ་བོའི་གཟུགས་ཅན་རལ་པ་དམར་ནག་ཐོར་ཅོག་བཅིང་བ། སྤྱན་གསུམ་གྲུ་གསུམ་གློག་ལྟར་འཁྱུགས་པ། ཕྱག་གཡས་རྡོ་རྗེ་གསོར་ཞིང་། གཡོན་སྡིག་འཛུབ་བསྒྲེང་བ། ༤ མི་བསྐྱོད་གྲུབ་པའི་དབང་ཕྱུག་ཨིནྡྲ་ནཱི་ལའི་མདོག་ཅན་དབུ་སྐྲ་དམར་ལྗང་སྤྱི་བོར་འཁྱིལ་བ། སྤྱན་རྡོ་རྗེའི་ལྟ་ལྟངས་ནམ་མཁར་གཟིགས་པ། ཕྱག་གཉིས་ནམ་མཁའ་མཛོད་ཀྱི་ཕྱག་རྒྱ་མཛད་པ། ༥ རྡོ་རྗེ་སེམས་དཔའ་གྲུབ་པའི་དབང་འདི་སྐུ་མདོག་དཀར་ལྗང་ཅན་དོན་གྲུབ་གྲུབ་པའི་དབང་ཕྱུག་ཏུ་བཤད་པའང་སྣང་ཕྱུག་སྐུ་མདོག་དཀར་ཞིང་གཞོན་ཤ་རྒྱས་པ། དབུ་སྐྲ་ཁམ་སྔོན་ཐུར་དུ་འཕྱང་བ། ཕྱག་གཉིས་ཞི་དྲག་ཕྱེད་མའི་ཚུལ་ཅན་ཅུང་ཟད་ཁྲོ་བ། བཞད་ཞལ་ཤིན་ཏུ་མཛེས་པ་ཕྱག་གཉིས་རྡོ་རྗེ་དང་དྲིལ་བུ་འཛིན་པའོ། ༦ །སརྦ་མངྒ་ལཾ། གཞན་ཡང་གྲུབ་ཆེན་བིཪྺ་པ་ལས་གསུང་ངག་རིན་པོ་ཆེ་གསན་པ་དང་། བལ་པོ་མ་ཧཱ་བོ་དྷི་ལས་བདེ་མཆོག་གི་སྐོར་གསན། དེས་ལུང་བསྟན་ནས་རྒྱ་བལ་གྱི་མཚམས་ཀྱི་མཚམས་གཡའ་རི་སྒོ་ལྔར་མི་ཏྲའི་སློབ་མ་ཚེའི་རིག་འཛིན་བརྙེས་པ་དྷརྨ་རཏྣ་ལས་ཆོས་ཚུལ་མཐའ་ཡས་པ་གསན། དེར་ལོ་ལྔ་བཞུགས་ཞེས་འབྱུང་། ༈ ལུང་བསྟན་ལས། ལས་ཅན་ལྔ་བཅུ་རྩ་བརྒྱད་དེ༔ སྐྱེས་བུ་དེ་རྣམས་གང་འཕྲད་དང་༔ ཟབ་ཆོས་འདི་ཉིད་སུས་སྤྱོད་པ། བདེ་བ་ཅན་དུ་དངོས་སུ་འགྲོ༔ ལྔ་བརྒྱ་ཕྲག་གཅིག་ཕྱིར་མི་ལྡོག༔ ཆོས་ཀྱི་འབྲེལ་པ་ཁྲི་ཕྲག་བརྒྱ༔ འབུམ་ཕྲག་གཅིག་ལ་འབྲེལ་ཐོགས་ནས༔ བདེ་བ་ཅན་དུ་ངེས་པར་འགྲོ༔ ༈ སྤྲུལ་པའི་འཁོར་དང་སློབ་མའི་ཚོགས༔ འཇིག་རྟེན་སྤྱོད་པ་སྐྱོང་བ་ཡི༔ དོན་རྒྱུད་ཉམས་སུ་ལེན་པའི་བུ༔ མི་དཔོན་ཧོར་གྱི་ཆས་འཛིན་དགུ༔ ལས་ཅན་ལྔ་བཅུ་རྩ་བརྒྱད་དང་༔ སྦས་པའི་ཌཱ་ཀི་བཅུ་དྲུག་བཅས༔ དངོས་དང་དངོས་མེད་འགྲོ་དོན་འགྲུབ༔ གཞན་ཡང་ལས་དང་སྐལ་བར་ལྡན༔ དཔའ་བོ་ཌཱ་ཀིའི་སྤྲུལ་པ་རྣམས༔ རྒྱུན་མི་འཆད་པར་འཁོར་དུ་འདུ༔ ༈ སྒྲུབ་པའི་གནས་ནི་པོ་ཏཱ་ལ༔ བྱིན་རླབས་གནས་ནི་མཁར་ཆུའི་བྲག༔ ལུང་བསྟན་གནས་ནི་སྟག་སྒྲོའི་རོང་༔ འགྲོ་དོན་གནས་ནི་ཙ་རི་ཏྲ༔ གདུལ་བྱའི་གནས་ནི་མདོ་ཁམས་གླིང་༔ དངོས་གྲུབ་གནས་ནི་སུ་ཛ་ཏི༔ བདེ་བ་ཅན། དོན་གྱི་གནས་ནི་ཆོས་ཀྱི་དབྱིངས༔ རིག་པ་གཡོ་འགུལ་མེད་པར་བཞུགས༔ ཞེས་སོ། །གྲུབ་ཆེན་ཐང་སྟོང་རྒྱལ་པོ་དང་དུས་མཉམ་ཞིང་ཐུགས་བརྒྱུད་གཅིག་པ། ཐུགས་རྗེ་ཆེན་པོས་དངོས་སུ་བྱིན་གྱིས་བརླབས་པའི་རྟོགས་ལྡན་གྱི་རྒྱལ་པོ་བཞི་ཞེས་གྲགས་པ་ནི། མངའ་རིས་སྟོད་ཀྱི་རྟོགས་ལྡན་བེམ་ཐུལ་ཅན་ཚུལ་ཁྲིམས་བཟང་པོ། དབུས་གཙང་གི་རྟོགས་ལྡན་སླེ་ཐུལ་ཅན་ཐང་སྟོང་བརྩོན་འགྲུས་བསོད། མདོ་ཁམས་སྒང་གི་རྟོགས་ལྡན་ཕྱར་ཐུལ་ཅན། མདོ་ཁམས་སྨད་ཀྱི་རྟོགས་ལྡན་ཁྱི་ཐུལ་ཅན་རྡོ་རྗེ་བཟང་པོ་གསེར་རོང་དུ་བྱུང་བ་སྟེ། འདི་བཞི་ཀ་ལ་ཐུགས་རྗེ་ཆེན་པོའི་གདམས་ངག །ཉེ་བརྒྱུད་བཀའ་བབས་པའི་ནང་སྔ་མ་གཉིས་ཀྱི་རྒྱུན་ཡོད་པ་དང་། ཕྱི་མ་གཉིས་ཀྱི་གདམས་ངག་གཏན་ལ་ཕབས་རྒྱུ་བཅས་དགེ། ༈

[edit]

grub chen thang stong rgyal po'i rnam thar las/ @#/_/grub chen thang stong rgyal po'i rnam thar las/__o rgyan dus gsum mkhyen pas tsA ri gsang sngags pho brang du zab chos mang po gter du sbas pas/__mnga' bdag gis zab mo'i chos 'di skyes bu su zhig gis bton nas 'gro don byed lags/__des 'gro phan ji ltar thogs/__de 'tshang rgya ba'i dus nam zhig lags zhus pas/__o rgyan chen po zhal 'dzum mdzad nas lnga brgya dus kyi tha ma la:__'di nyid 'don cing spyod pa yi:__skyes bu las can sprul sku de:__'gro ba'i don byed sprul o rgyan rang gi thugs kyi pa yin:__!__zhi ba thugs rje chen po dang :__drag po khro bo dbang chen gnyis:__dbyer med gcig tu sprul pa las:__sku yi cha lugs zhi ma khro:__!__mdog smug dri zhim sme bas brgyan:__ngang rgyud dal zhing rig rtsal che:___ma nges spyod pa sna tshogs skyong :__!__shAkya'i bka' lnga pa las bsnyen par rdzogs/__mtshan brtson 'grus bzang por btags/__tshul 'dzin gsang sngags spyod:__DA ki ma lus dbang du sdud:__rgyal bas dbyings nas dbang bskur zhing :__sbas pa'i ngang nas 'gro don mdzad:__zab dang rgya che'i chos rnams spyod:__!__nang rtags 'khrungs dus yum la ngo mtshar ba'i/__rmi lam mtshan ltas 'byung :__!__brgya phrag bcu gcig tshe yi tshad:__tshe 'dzin lha mo'i bcud bsgrub na:__de bas ring ba thub par 'gyur:__!__nam zhig 'da' tshul ston pa'i tshe:__sgra dang 'od du bcas nas su:__dpa' bo DA ki'i tshogs dang bcas:__bde ba can du byang chub thob:__ces gsungs shing /__rig 'dzin rgod ldem slob ma kun spangs don yod rgyal mtshan la yum gyis sku lus yod pa'i tshe rnal lam ngo mtshar ba byung tshul rnams zhus pas/__ngo mtshar che/__o rgyan chen pos lung bstan na'ang /__/'o ba zhes bya'i shar mdun du:__brtson 'grus zhes bya'i ming can 'byung :__de ni nga yi thugs sprul yin:__zhes bya ba'ang yod pas khyed kyi lus 'di la gces spras gal che'o gsungs/__bka' lnga pa dpal 'byor shes rab las bsnyen par rdzogs/__phyag chen chos drug sogs gsan/__kun spang don yod rgyal mtshan dang /__lha gdong pa bsod nams mchog pa las rgod ldem pa'i gter chos skor dang /__khyad par lha gdong pa las phyag rdor gos sngon can dang /__rnam sras kyi skor gsan pas rnam sras rta bdag brgyad 'khor dang bcas pas mthun rkyen thams cad bsgrub par zhal gyis bzhes/__rgya gar rdo rje gdan du bla ma rat+na sid+d+hi las sngags kyi zab gnad dang /__de'i phyag rgya bram ze mo zhig las thabs lam khyad par can/__nA len+d+rar grub thob a d+hi ka ra zhes dgung lo nyis brgya sum bcu bzhes pa las tshe dpag med kyi dbang gsan pa'i tshe bla ma'i thugs kar tshe dpag med rigs lnga/__zhabs kyi mdo bzhi la phrin las kyi lha mo bzhi/__gsang bar rta mgrin dpa' gcig rnams gzigs/__rgya gar zangs gling du rdzu 'phrul gyis phebs/__sprul pa'i mchod rten bkra shis sgo mang gi drung du zhag nyer gcig bzhugs pas dpal sha ba ri lang tsho dar la babs pa/__dbu skra sil bu me tog gi thod bcings pa/__rma bya'i sgros smad g.yogs pa/__rma bya'i gdugs rang 'khor ba/__phyag gnyis na mda' gzhu thogs pa'i nam mkhar bdud rtsi'i bum pa rten med du gnas pa/__g.yas na rnal 'byor ma gling bu 'bud pa/__g.yon na rnal 'byor ma sha ba'i ro khur ba bcas gzigs/__gus pas phyag 'tshal zhing yid kyi mchod pa phul bas sku'i rnam 'gyur dang brda thabs sna tshogs pas zab rgyas kyi gdams pa mtha' yas pa bstan cing bum pas dbang bskur bas ye shes mngon du gyur/__rdo rje gdan dang nye ba'i gsang ba rdo rje phug zhes par/__sngags rnying ma'i grub thob skal ldan rdo rje grags pa dang dgung lo sum brgya nyi shu bzhes pa mjal/__rgyal thabs spyi blugs kyi dbang bskur zhing lung bstan mnga' gsol mdzad/__byang sems sbyin pa bzang po las ni gu chos drug shangs chos yongs rdzogs gsan/__ri khrod du mar nyams su bzhes/__ting nge 'dzin rnam pa du ma thugs la 'khrungs/__snyan brgyud zab mo 'di gangs ri'i khrod du dar ba zhig byung na dgongs pa'i skad cig de la mdun gyi nam mkha' nas/__bu rnal 'byor pa zhes 'bod pa'i sgra lhang gis byung /__/spyan bar snang la gzigs pas sprin phung gi dbus na ye shes kyi mkha' 'gro ni gu ma dngos su bzhugs pa la zhu ba zhu lan dang /__brda' dang brda lan dang /__tshogs kyi 'khor lo 'dod pa'i yon tan rmad du byung ba rnams la longs spyad/__rdo rje'i tshig rkang so so dang /__de dag la dngos shugs sbas gsum gyi man ngag gi 'phrul phye ste yongs su rdzogs pa dang /__khyad par dpe gnyis kyi sgo nas ston pa'i 'phyugs med mkha' spyod dkar dmar gyi 'pho ba sogs gnang /__grub thob chen po ri 'o ba lha tse'i nub mgul gyi rdza khrod du sgrub pa rtse gcig mdzad skabs/__'phags bal bod kyi mkhas grub rnams las gdams pa rgya mtsho lta bu gsan na'ang /__sku dngos las don du gnyer ba'i gdul bya dus der ma byung /__ma 'ongs pa na gang zag las can la phan pa'i ched/__g.yam pa mang po la lcags kyi khab sbom gnyis ma zad bar du bris te gter du sbas/__dge bsnyen chen po 'o ba lha rtse gter bdag tu bskos so/__/gtsang rgyas sde khar gsang spyod la bzhugs pas ye shes kyi mkha' 'gro sde lngas mtshan re re phul/__dben gnas thar pa gling du bzhugs pa'i tshe rdo rje 'chang chen po 'khor dang bcas pa las bla ma'i rnal 'byor sogs snyigs ma'i sems can 'dul ba'i chos tshul sna tshogs pa gsan/__rdzu 'phrul gyis o rgyan mkha' 'gro'i gling du phebs/__mkha' 'gro ma mang pos bsus nas zangs mdog dpal gyi ri bo'i pho brang chen por o rgyan rin po che rgyal po'i cha lugs su mjal/__phyag 'tshal zhing yid sprul gyi mchod pa bsam gyis mi khyab pa phul nas gsol ba btab pas/__sgrub chen bka' brgyad kyi dkyil 'khor du slob dpon chen po he ru ka'i rnam par bzhugs nas sku gsung thugs ye shes rdo rjes byin gyis brlabs nas so so'i zhal gzigs/__zangs mdog dpal gyi ri bo'i mtha' bskor mtsho chen po'i dbus na me tog pad+ma dmar po 'dab ma brgyad pa'i steng na o rgyan rab byung gi cha lugs su bzhugs pa mja' tshon sna lngas bskor ba/__g.yon phyogs na pad+ma dmar po 'dab ma stong dang ldan pa'i dbus na bskal bzang gi sangs rgyas stong bzhugs pa'i yal ga la nye ba'i sras brgyad bzhugs pa/__g.yas su sna tshogs pad+ma yal ga lnga pa'i dbus na rdo rje phag mo/__/gzhan bzhi la rigs bzhi'i mkha' 'gro bzhugs pa'i mdun gyi nam mkhar ston pa rdo rje sems dpa' bzhugs pa la/__o rgyan chen pos zhu ba po mdzad nas bla na med pa'i yang snying rdzogs pa chen po'i chos tshul ma tshang ba med pa gsan no/__/de nas o rgyan rin po ches bod yul du 'gro don la bkas bskul ba ni/__mkha' 'gros mtshan gsol rig 'dzin thang stong pa/___/gzugs sku mkha' ltar dag pa chos kyi sku/__/grags stong gzhom du med pa rdo rje'i gsung/__/gzung 'dzin rtog bral gdod nas 'dus ma byas/__/de don ma lus khyod kyis khong du chud/__/snyigs ma lnga bdo'i sems can don phyir du/__/hor dang kha ba can gyi sa mtshams su/__/nga yis bzhengs pa'i me btsa' zhig gsos gyis/__/bod 'bangs phan bde yun du gnas par 'gyur/__/sa 'brug dbyar zla dang po'i tshes bcu la/__/sa yi me btsa' brtan bzhugs grub dgos so/__/'gyangs na chu shor zin pa'i rags dang 'dra/__/sngas na ri dwags mi 'gro rgya dang 'dra/__/rig pa 'dzin pa'i skyes bu phan sems can/__/slar yang bod yul kha ba can du song /__/snyigs ma lnga bdo bod kyi sems can la/__/gang la gang 'dul sprul pas 'gro don mdzod/__ces dang /__rig 'dzin bod kyi skyes bu khyod/__/rdzu 'phrul stobs kyis 'dir 'ongs kyang /__/chos skal gter lnga bod na yod/__/lung bstan rnam thar bod du bzhag__/dus gsum mkhyen pa pad 'byung nga'i/__/thugs sprul nga ni lcags zam tshugs/__/rten 'brel 'gro ba 'dul ba'i phyir/__/myur du kha ba can du bzhud/__ces gsungs pa ltar bod du byon nas 'gro don bsam gyis mi khyab pa mdzad do/_/_!__grub chen rin po che'i rdo rje'i sku'i rnam 'gyur drug ni/__rnam snang grub pa'i dbang phyug zhal dkar mdangs che zhing snum pa/__dbu skra sil bur yod pa/__spyan dkyus ring la zhi ba snying rje'i tshul gyis gzigs pa/__phyag mnyam bzhag skyabs sbyin mdzad pa/__1__rin 'byung grub pa'i dbang phyug sku mdog gser lta bu/__/dbu skra ser la 'jam pa/__spyan gnyis thad kar gzigs pa shin tu dges pa'i tshul can/__phyag g.yas mchog sbyin dang g.yon nor bu dga' 'khyil bsnams pa/__2__snang mtha' grub pa'i dbang phyug sku mdog dmar po/__dbu skra dmar nag li ba/__spyan rtsa dmar zlum zur gzigs/__phyag gnyis mnyam bzhag gi steng na bum pa 'dzin pa/__3__don grub 'di kun 'dus grub pa'i dbang phyug tu bshad pa'ang snang grub pa'i dbang phyug sku mdog smug nag khro bo'i gzugs can ral pa dmar nag thor cog bcing ba/__spyan gsum gru gsum glog ltar 'khyugs pa/__phyag g.yas rdo rje gsor zhing /__g.yon sdig 'dzub bsgreng ba/__4__mi bskyod grub pa'i dbang phyug in+d+ra nI la'i mdog can dbu skra dmar ljang spyi bor 'khyil ba/__spyan rdo rje'i lta ltangs nam mkhar gzigs pa/__phyag gnyis nam mkha' mdzod kyi phyag rgya mdzad pa/__5__rdo rje sems dpa' grub pa'i dbang 'di sku mdog dkar ljang can don grub grub pa'i dbang phyug tu bshad pa'ang snang phyug sku mdog dkar zhing gzhon sha rgyas pa/__dbu skra kham sngon thur du 'phyang ba/__phyag gnyis zhi drag phyed ma'i tshul can cung zad khro ba/__bzhad zhal shin tu mdzes pa phyag gnyis rdo rje dang dril bu 'dzin pa'o/__6__/sarba mang+ga laM/__gzhan yang grub chen biR+Wa pa las gsung ngag rin po che gsan pa dang /__bal po ma hA bo d+hi las bde mchog gi skor gsan/__des lung bstan nas rgya bal gyi mtshams kyi mtshams g.ya' ri sgo lngar mi tra'i slob ma tshe'i rig 'dzin brnyes pa d+harma rat+na las chos tshul mtha' yas pa gsan/__der lo lnga bzhugs zhes 'byung /__!__lung bstan las/__las can lnga bcu rtsa brgyad de:__skyes bu de rnams gang 'phrad dang :__zab chos 'di nyid sus spyod pa/__bde ba can du dngos su 'gro:__lnga brgya phrag gcig phyir mi ldog:__chos kyi 'brel pa khri phrag brgya:__'bum phrag gcig la 'brel thogs nas:__bde ba can du nges par 'gro:__!__sprul pa'i 'khor dang slob ma'i tshogs:__'jig rten spyod pa skyong ba yi:__don rgyud nyams su len pa'i bu:__mi dpon hor gyi chas 'dzin dgu:__las can lnga bcu rtsa brgyad dang :__sbas pa'i DA ki bcu drug bcas:__dngos dang dngos med 'gro don 'grub:__gzhan yang las dang skal bar ldan:__dpa' bo DA ki'i sprul pa rnams:__rgyun mi 'chad par 'khor du 'du:__!__sgrub pa'i gnas ni po tA la:__byin rlabs gnas ni mkhar chu'i brag:__lung bstan gnas ni stag sgro'i rong :__'gro don gnas ni tsa ri tra:__gdul bya'i gnas ni mdo khams gling :__dngos grub gnas ni su dza ti:__bde ba can/__don gyi gnas ni chos kyi dbyings:__rig pa g.yo 'gul med par bzhugs:__zhes so/__/grub chen thang stong rgyal po dang dus mnyam zhing thugs brgyud gcig pa/__thugs rje chen pos dngos su byin gyis brlabs pa'i rtogs ldan gyi rgyal po bzhi zhes grags pa ni/__mnga' ris stod kyi rtogs ldan bem thul can tshul khrims bzang po/__dbus gtsang gi rtogs ldan sle thul can thang stong brtson 'grus bsod/__mdo khams sgang gi rtogs ldan phyar thul can/__mdo khams smad kyi rtogs ldan khyi thul can rdo rje bzang po gser rong du byung ba ste/__'di bzhi ka la thugs rje chen po'i gdams ngag__/nye brgyud bka' babs pa'i nang snga ma gnyis kyi rgyun yod pa dang /_phyi ma gnyis kyi gdams ngag gtan la phabs rgyu bcas dge/__!_