JKW-KABUM-01-KA-004-009

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 4, sde tshan 9, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

བླ་མ་ཀུན་འདུས་རྗེ་བཙུན་ཞེས་པ། བླ་མ་ཀུན་འདུས་རྗེ་བཙུན་ཐོད་ཕྲེང་རྩལ། །ཡི་དམ་ཞི་ཁྲོ་སྐུ་གསུང་ཐུགས་སུ་རྫོགས། །མཁའ་འགྲོ་ཆོས་སྐྱོང་ཡོངས་ཀྱི་ཚོགས་རྗེ་མཆོག །སྙིང་ནས་གསོལ་བ་འདེབས་སོ་བྱིན་གྱིས་རློབས། །གང་དང་དབྱེར་མེད་ཨོ༷་རྒྱན༷་ཆེན་པོ་ཡིས། །བྱིན་རླབས་ར༷ང་བྱུང༷་སྤྲུལ་པའི་རྡོ༷་རྗེ༷་འཛིན། །སྐྱབས་གནས་ཁྱོད་ལས་གཞན་དུ་མ་མཆིས་བདག །ཉམ་ཐག་གདུང་བས་འབོད་དོ་བརྩེ་བས་དགོངས། །མགོན་ཁྱོད་དོན་དམ་སྐྱེ་འགགས་ལས་འདས་ཀྱང་། །ཀུན་རྫོབ་སྤྲུལ་པའི་སྣང་བརྙན་བསྡུས་པ་ཡིས། །ཐུབ་བསྟན་སྤྱི་དང་ཁྱད་པར་སྔ་འགྱུར་གྱི། །བཤད་སྒྲུབ་བསྟན་པ་ཉམས་པ་འདི་གཟིགས་སམ། །དེ་ཕྱིར་ཚད་མེད་ཐུགས་རྗེའི་རྩལ་སྤྲུགས་ལ། །སྤྲུལ་པའི་རྣམ་རོལ་མྱུར་དུ་འཆར་བ་དང་། །གསན་བསམ་སྒོམ་དང་འཆད་རྩོད་རྩོམ་པ་ཡིས། །བསྟན་དང་འགྲོ་བའི་ཕན་བདེ་རྒྱས་མཛད་གསོལ། །བདག་ཀྱང་འདི་ནས་བྱང་ཆུབ་སྙིང་པོའི་བར། །དཔལ་ལྡན་བླ་མས་འབྲལ་མེད་རྗེས་བཟུང་ཞིང་། །འགལ་རྐྱེན་ཀུན་ཞི་བསམ་དོན་ཆོས་བཞིན་འགྲུབ། །རྣམ་གྲོལ་གོ་འཕང་ཐོབ་པར་བྱིན་གྱིས་རློབས། །ཞེས་པའང་དད་དམ་རྨད་བྱུང་ལུགས་གཉིས་ཀྱི་མཁྱེན་སྤྱན་ཡངས་པ་ཕྱག་མཛོད་འགྱུར་མེད་དམ་ཆོས་ཀྱིས་ཆེད་དུ་བསྐུལ་བའི་ངོར། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གསོལ་བ་བཏབ་པ་དོན་དང་ལྡན་པར་གྱུར་ཅིག ། ༈

[edit]

bla ma kun 'dus rje btsun zhes pa/__ bla ma kun 'dus rje btsun thod phreng rtsal/__/yi dam zhi khro sku gsung thugs su rdzogs/__/mkha' 'gro chos skyong yongs kyi tshogs rje mchog__/snying nas gsol ba 'debs so byin gyis rlobs/__/gang dang dbyer med oX rgyanaX chen po yis/__/byin rlabs raXng byungaX sprul pa'i rdoX rjeX 'dzin/__/skyabs gnas khyod las gzhan du ma mchis bdag__/nyam thag gdung bas 'bod do brtse bas dgongs/__/mgon khyod don dam skye 'gags las 'das kyang /__/kun rdzob sprul pa'i snang brnyan bsdus pa yis/__/thub bstan spyi dang khyad par snga 'gyur gyi/__/bshad sgrub bstan pa nyams pa 'di gzigs sam/__/de phyir tshad med thugs rje'i rtsal sprugs la/__/sprul pa'i rnam rol myur du 'char ba dang /__/gsan bsam sgom dang 'chad rtsod rtsom pa yis/__/bstan dang 'gro ba'i phan bde rgyas mdzad gsol/__/bdag kyang 'di nas byang chub snying po'i bar/__/dpal ldan bla mas 'bral med rjes bzung zhing /__/'gal rkyen kun zhi bsam don chos bzhin 'grub/__/rnam grol go 'phang thob par byin gyis rlobs/__/zhes pa'ang dad dam rmad byung lugs gnyis kyi mkhyen spyan yangs pa phyag mdzod 'gyur med dam chos kyis ched du bskul ba'i ngor/__bya bral ba 'jam dbyangs mkhyen brtse'i dbang pos gsol ba btab pa don dang ldan par gyur cig__/_!